গুজরাতকী গান্ধীনগরদা পাংথোকপা গুজরাত ফোরেন্সিক সাইন্স য়ুনিভর্সিতীগী কনভোকেসন্দা পীখিবা প্রধান মন্ত্রীগী ৱারোল

Police, forensic science and judiciary are integral parts of criminal justice delivery system: Prime Minister

Greater technological intervention in forensic science can help tackle challenges of cyber security: PM Modi

In order to deal with rapidly changing crime scenario we have to develop newer techniques to make it clear that criminals will not be spared: PM

গুজরাতকী গবর্নর শ্রীমান ও.পি. কোহলীজী, মুখ্য মন্ত্রী শ্রী রুপানীজী, উপ মুখ্য মন্ত্রী শ্রী নিতিন ভাই, মন্ত্রী পরিশদকী মহাক্কী খোংলোই শ্রীমান ভুপেনেদ্রজী চুরাসমা, শ্রী প্রদীপ সিংহ জাদেজা, গুজরাত ফোরেন্সিক সাইন্স য়ুনিভর্সিতীগী দাইরেক্তর জেনরেল দা. জে. এম. ব্যাস কনভোকেসন অসিদা শরুক য়াবীরিবা খঙ–হৈরবশিং, মেদল ফংলবা স্কোলরশিং, মখোয়গী ইমুং–মনুং অমসুং ঙসি প্রধান মন্ত্রীগী স্পিসিএল গেস্ত, স্কুলদগী লাক্লিবা অঙাংশিং অসি ঐগী অখন্নবা মীথুংলেনশিংনি। ইচিল–ইনাওশা অদোম পুম্নমকপু গুজরাতকী ফোরেন্সিক সাইন্স য়ুনিভর্সিতীগী মরিরক শুবা কনভোকেসন্দা ঐনসু থমোই শেংনা হন্না হন্না তরাম্না ওকচরি। অমসুং ঐহাক মফম অসিদী মীথুংলেন ওইনা লাক্লিবনি হায়না কনানা লান্না লৌখিদনবগীদমক তরাম্না ওকচরিবনি। ইহান হানবদা ঐনা, ঙসি দিগ্রী ফংলিবা অমসুং তুংগী পুন্সিগীদমক য়াম্না মরু ওইবা খোংচৎ অমা চৎপা হৌরিবা মখোয়গীদমক থমোই শেংনা নুংঙাইবা ফোংদোকচরি। ঐনা মহৈরোই পুম্নমক্কী মমা–মপা অমসুং মরি–মতা পুম্নমকপুসু থমোই শেংনা নোল্লুকপা ফোংদোকচরি। মখোয়গী নাউয়োক–নাউকোন, মখোয়না হোৎনখিবা অমসুং হোৎনজমন অদুননি ঙসি মখোয়গী নুংশিজরবী মচা নুপী অমসুং নুংশিজরবা মচা নুপাশিংনা মাই পাকপগী থাক অসিদা য়ৌবা ঙম্লিবা।

|

মরূপশা, পুলিস, ফোরেন্সিক সাইন্স অমসুং জ্যুদিসিয়রী অহুম অসি ক্রিমিনেল জস্তিস দিলিবরী সিস্তেমগী থানবা য়াদ্রবা শরুক অমনি। লৈবাক অমদা শরুক অহুম অসিনা অদুক্কী মতিক কল্লিবা মখৈ মফম অদুগী মীয়াম তেক্তা কাইদবা ওইগনি অমসুং অরান–অহুইশিং লাকশিনবা ঙমগনি। ৱাখল্লোন অসিগা লোইননা হৌখিবা চহিশিংদা গুজরাত্তা হোলিস্তিক এপ্রোচ অমগা লোইননা য়ুম্বী অহুম অসি পাকথোক–চাউথোকহন্নবগী থবক পাইখৎপা হৌখি। ঙাকশেলগী পাঙ্গল ওইবা য়ুনিভর্সিতী, নেস্নেল লো য়ুনিভর্সিতী অমসুং ফোরেন্সিক সাইন্স য়ুনিভর্সিতী হায়বদি অমরোমদা আইনগী কাংলোনগা মরি লৈনরিবা মপুং ফারবা হোলিস্তিক পেকেজ অসি মসিগী মহয়নি মদুদি ঙসি ঙাকশেলগী পাঙ্গল ওইবা য়ুনিভর্সিতীদগী ক্বালিফাইদ, ত্রেন তৌরবা মহৈরোইশিং থোরক্তুনা তোঙান তোঙানবা সেক্যুরিতী ফোর্সশিংদা চংদুনা ইন্তর্নেল সেক্যুরিতীবু চেৎশিহন্নবগী থবক পাইখৎলি। নেস্নেল লো য়ুনিভর্সিতী অমসুং ফোরেন্সিক সাইন্স য়ুনিভর্সিতীদগী থোরকপা নহারোলশিংনা, মখোয়গী হৈ–শিংবনা, থিজিন হুমজিনবা অমসুং জ্যুদিসিএলগী থৌরাংদা মপাঙ্গল কলহল্লি।

মরূপশা ঙসি হোংলক্লিবা মতম অসিদা মরাল লৈরবশিংনা মখোয়গী মরাল অদু লোৎশিন্নবা, নান্থোক্নবগীদমক শিজিন্নরিবা থৌওং কয়া অসিদা, কনাগুম্বনা অরানবা তৌরবদি নোংমদি শোইদনা ফাগনি হায়বসি মীপুম খুদিংমক্কী পুক্নীংবা ফাওহনবা মথৌ তাই। ফাগনি হায়বগী অকিবা অমসুং চৈরাপ্তা মখোয়বু মরাল পীদুনা চৈরাক ফংগনি হায়বগী অকিবা অসিনা মরাল অদু লাকশিনবদা মতেং য়াম্না পী অমসুং মতাং অসিদা ফোরেন্সিক সাইন্সকী থৌদাং খ্বাইদগী মরু ওইরকই। স্যুরতী ওফ পনিশমেন্ত অসিনা ঐখোয়গী জ্যুদিসিএল সিস্তেমগী ক্রেদিবিলিতীবুসু অনৌবা থৌনা হাপ্পি। ঐনা জি.এফ.এস.য়ু.গী ৱাফম অসিগীদমক থোইদোক্না থাগৎপা ফোংদোকচরি মদুদি মখোয় সাইন্তিফিক ওইবা মওংদা ক্রিমিনেল ইনভেস্তিগেসন অমসুং জস্তিস দিলিবরী সিস্তেমবু মপাঙ্গল কলহন্নবগীদমক মালেমগী থাক্তা হ্যুমেন রিসোর্সকী অচৌবা থোং অমা শেম শারি। শুপ্নগী ভারত খক্তা নত্তনা মালেম অকোইবদা লো ইনফোর্সমেন্তকী এজেন্সীশিংনা অদোমগী য়ুনিভর্সিতীদগী মতেং লৌনবগীদমক লাক্নরি। লৈবাক কয়ামরুম্বু মতেং পীদুনা মখোয়গী মীওইশিংবু ত্রেনিং অমসুং কন্সল্তেন্সী পীদুনা অদোমগী য়ুনিবর্সিতী অসি মালেমগী থাক্তা মিংচৎ পুরক্লি।

ঐঙোন্দা তমখি মদুদি হৌখিবা চহি মঙাদা গুজরাত ফোরেন্সিক সাইন্সনা ওফিসর লিশিং তরুক্তগী হেন্না ত্রেনিং পীখ্রে। মদুগী মনুংদা লৈবাক ২০ হেনবদগী পুলিস ওফিসর ৭০০ হেনবসু ত্রেনিং অসি ফংখ্রে। লোইননা মখোয়গী লৈবাক্তা হনখিদুনা ওফিসরশিং অদুনা মখোয়গী নোলেজ অমসুং স্কিল অদু মখোয়গী লৈবাক্কী অমসুং খুন্নাইবু তেক্তা কাইদনা থম্বদা ঙসি শিজিন্নরি। অদোম পুম্নমক্কীদমক্তা গুজরাত মচা পুম্নমক্কীদমক্তা মসি য়াম্না চাউথোকচনীংঙাইগী ৱাফম্নি মদুদি মখোয়গী লমদমদা চৎনরিবা য়ুনিভর্সিতী অমনা মসিগী ত্রেনিং অমসুং এজুকেসনগী পাঙ্গলদা গ্লোবেল সেক্যুরিতীদা অদুক্কী মতিক ৱারেপ লৌনীংঙাই ওইবা থৌদাং য়ারি।

|

মরূপশা, ঙসিগী মতম অসিদা মসিসু য়াম্না মথৌ তাই মদুদি অনৌবা থৌরাং পুম্নমক ইশানা অনৌবা তেক্নোলোজীগী মতুং ইন্না হাপচিঞ্জগদবনি। তশেংনমক মসিদা দিজিতেল তেক্নোলোজীগী চাউরবা থৌদাং য়াওরি। দিজিতেল তেক্নোলোজীনা ফোরেন্সিক সাইন্সতা অনৌবা থৌনা হাপ্লিবনি। অহানবদদি তেস্তিং, ইনভেস্তিগেসন পুম্নমক ফিজিকেল্লী ওইনা তৌরম্মি। ঙসি দিজিতেল তেক্নোলোজীনা থবকশিং অদুবু হেন্না লাইথোকহল্লে অমসুং মপুংসু ফাহল্লে। অমসুং ঐনা লৌই মদুদি লম অসিদা অনৌ অনৌবা শোফৱেয়র দিবেলপ তৌবা দিজিতেল তুলশিং শিজিন্নবা হেনগৎহন্ননবা স্কোপ য়াম্না হৌজিকসু মাইকৈ অসোমদা খরা পাক–চাউনা খনবা মথৌ তাই। মরূপশা মাইকৈ অমরোমদা ইন্তর্নেতনা ঐখোয় পুম্নমক্কী পুন্সিবু লাইথোকহনবগী থবক তৌরি অদুগা অমরোমদনা অনৌবা মখলগী মরাল সাইবর ক্রাইমসু পোকহল্লি। সাইবর ক্রাইম অসি লৈবাক অসিগী মীয়ামগী প্রাইভেসীদা শিংনবা অমা ওইরি। ঐখোয়গী ফাইনান্সিয়েল ইন্সতিত্যুসনবু ওইরো, পাৱর স্তেসনশিংবু ওইরো, হোস্পিতালশিংবু ওইরো অসিগুম্বা মরু ওইখ্রবা শরুকশিংবুসু শোকহল্লি। মসি নেস্নেল সেক্যুরিতীগীসু, শুপ্নগী হিন্দুস্তান খক্তা নত্তনা মালেমগী লৈবাক পুম্নমক্কীদমক্তা য়াম্না চাউবা শিংনবা অমনি। ঙসি থৌরম অসিদা ঐনা সাইবর অমসুং দিজিতেল এক্সপর্ত পুম্নমক্তা হায়জরি মদুদি মখোয়না দিজিতেল ইন্দিয়া মিশনগী খোংলোই ওইবীদুনা লৈবাক অমসুং খুন্নাইবু ঙাক শেন্নবা, মসিবু মপাঙ্গল কলহনবদা মতেং পাংবীয়ু। সরকারনা সাইবর ক্রাইম থিংননবা অসিগুম্বা মরাল তৌবশিংদা অকিবা পোকহন্নবা মরু ওইবা খোংথাং লৌখৎলে। সাইবর ফোরেন্সিক লেবশিংসু মপাঙ্গল কলহল্লে, অদুবু মসিগা লোইননা অদোমগুম্বা মতম খজিক্তংগী মনুংদা অদুগুম্বা মরাল লৈরবশিং অদুদা য়ৌশিনবা ঙম্ননবা হোৎনবদা থিজিল্লিবা এজেন্সীশিংগী মতেং পাংবা ঙম্বা খঙ হৈরবশিংগীসু লৈবাক অসিনা অদুক্কী মতিক মথৌ তারি। মরূপশা, হোংলক্লিবা মতমগা লোইননা শুপ্নগী ক্রাইম খক্তা নত্তনা তোঙান তোঙানবা লমশিংদসু ফোরেন্সিক সাইন্সকী মগুন অসি হেনগৎলক্লি। ইন্সুরেন্স সেক্তরবু ওইরো, ইন্সুরেন্স কম্পেনীশিংগী ক্লেম সেতলমেন্তগীদমক্তা তোঙান তোঙানবা মীওইশিং লাকই। ক্লেম তৌরক্লিবশিং অদু অশেংবরা হায়বদু খঙদোকপদা মখোয়দা য়াম্না চাউবা শিংনবা অমা ওই। ফোরেন্সিক সাইন্সকী ই–পাউনা মদুদা মতেং পাংবা য়াই। মতৌ অসুম্না করিগুম্বা হেল্থ সেক্তরদা থবক তৌরিবশিংনা ফোরেন্সিক সাইন্সকী নোলেজ লৈরগদি মখোয়সু ফোরেন্সিক্কী তঙাইফদবশিং অদুদা মিৎয়েং থম্লদুনা থবক পাইখৎকনি। করিগুম্বা থৌদোক অমগী মতুংদা নত্রগা মরাল অমগী মতুংদা শোক্লবা মীওই অদু হোস্পিতালদা পুরকপদা মঙোন্দা ফোরেন্সিক ইবিদেন্স ময়াম অমা লোইনরকই। হেল্থ সেক্তরদা থবক তৌরিবশিংনা, নর্সশিংনা, ফোরেন্সিক সাইন্সকী মরমদা করিগুম্বা নীংথিজনা খঙবা তারবদি শাখি/খুদম কনবদা য়াম্না মতেং ওইনবা য়াই। ফোরেন্সিক সাইন্সকী মহৈরোই পুম্নমক্তা হ্যুমেন ইন্তিলিজেন্সকী অকুপ্পশিং অদু নীংথিজনা খঙহনবা য়াম্না মরু ওই।

ফোরেন্সিক সাইন্স য়ুনিভর্সিতীনা হিরম কয়ামরুমদা থবক তৌরি। থাইনগী চৎনবীদা ঐখোয়গী লৈবাক্তা ফোরেন্সিক সাইন্স য়ুনিভর্সিতী অমসুং অরিবা মতমগী চৎনবী লৈরম্মি, দিজিতেল তেক্নোলোজী লৈত্রিঙৈগী মমাংদা ফিঙ্গর প্রিন্ত য়েংদুনা শাখি/খুদম খোমজিল্লগা মৎ পীনরম্মি। হেন্দ রাইতিং এক্সপর্ত লৈরম্মি মখোয়না মৎ ফোংদোক্লম্মি, সাইকোএনলিস্ত লৈরম্মি, মখোয়না সাইকো প্রোফাইল শেমদুনা পীরম্মি। থবকশিং অসি ত্রেদিস্নেল ওইবা মওংদা পাংথোক্লম্মি। হিন্দুস্তান্দা অমসুং রাজ্য খুদিংমক্তা চৎনরম্বা ত্রেদিস্নেলগী মচাকশিং অসি খোমজিল্লগা ত্রেদিস্নেল নোলেজ অসিবু অনৌবা তেক্নোলোজীগা লোইননা পুন্সিন্দুনা মসিবু অনৌবা মশক অমা করম্না শেম্বা য়াগদগে, ঐনা লৌই মদুদি হিন্দুস্তান খক্তা নত্তনা মালেম অসিদা লৈবাক খুদিংমক্কী অসিগুম্বা করিগুম্বা মহৈ অমদি সোইদনা লৈনরিবা ঙাক্তনি। মহৈ অদু ঐখোয়না শিজিন্নরগদি ঐখোয় পোৎশকশিং অসি মখা তানা পুশিনবা ঙমগনি। খুদম ওইনা সাইকো প্রোফাইল শেম্বশিং, সাইকোএনলাইসিস তৌরিবশিং। মতম অমদা মখোয়না পুন্না ৱারী শানদুনা মখোয়গী ইমুং–মনুংদা ৱাহং হংদুনা ৱারেপ লৌরম্মি। ঙসিনা তেক্নোলোজীগী থোংদা পাংথোক্লি। ত্রেদিস্নেল নোলেজনা, প্লস তেক্নোলোজীনা ইফিসিএন্সী পুরক্লিবা, পর্ফেক্সন পুরক্লিবা অসি ঐনা লৌই, ঐখোয়গী ফোরেন্সিক সাইন্স য়ুনিভর্সিতী রিসর্সকী লম অমসু ওইগদবনি মদুনা ত্রেদিস্নেল নোলেজ, হ্যুমেন ইন্তিলিজেন্স অমসুং মোদর্ন তেক্নোলোজী অনি অসিবু পুনশিন্দুনা ঐখোয়না লম অসোমদা মতৌ করম্না থবক তৌবা ঙমগনি, হায়বসিদসু ঐখোয়গী য়ুনিবর্সিতীনা থবক তৌগদবনি।

|