ফম্বাকথক্তা লেংশিনবীরিবা রাজ্যপাল দ্রোপদী জী, মুখ্য মন্ত্রী জী, কেন্দ্র সরকার অমসুং রাজ্য সরকারগী মন্ত্রীশিং অমসুং ঝারখন্দগী ঐহাক্কী নুংশিজরবা ইচিল-ইনাও অমসুং ইচল-ইচেশিং।
তিনবীরিবা ময়াম পুম্নমকপু, লৈবাক পুম্ববু অমদি মালেম অসিবু মালেমগী য়োগ নুমিৎকী থৌরম অসিদা হন্না-হন্না নুংঙাইবা ফোংদোকচরি। ঙসি প্রভাত তারা মৈদান অসিদগী লৈবাক মীয়াম পুম্নমক্তা য়াইফরবা অয়ুক্কী পাওজেল পীজরি। ঙসিদি প্রভাত তারা মৈদান অসি মালেমগী মেপতা মশেক মঙাল থোক্না ঙাল্লরে। অসিগুম্বা ইকাই খুম্নবা অসি ঙসি ঝারখন্দনা ফংলি।
ঙসি লৈবাক অসিগী অমদি মালেম অসিগী মফম কয়াদা মীওই লাখ কয়ানা য়োগ নুমিৎ পালন তৌনবা তোঙান তোঙানবা মফমশিংদা পুল্লরি। ঐহাক্না ময়াম পুম্নমক্কী মফমদা থমোই শেংনা থাগৎপা ফোংদোকচরি।
য়োগবু মালেমগী মফম পুম্বদা য়ৌহনবদা মীদিয়াগী মরূপশিং, সোসিয়েল মীদিয়াগা মরী লৈনরিবা মীয়াম্না মরুওইবা থৌদাং লৌরি, মদুসু য়াম্না মরু ওই, ঐহাক্না মখোয়বুসু তৌবীমল খঙবা উৎচরি।
মরূপশিং, ঝারখন্দা য়োগ নুমিৎ পাংথোক্নবা লাক্লিবা অসি থোইদোক হেন্দোকপা এক্সপরিয়েন্স অমনি। ময়াম পুম্নমক অয়ুক অঙনবদগী য়ুম য়ুমদগী থোরক্তুনা লাপ্ল-লাপ্লবা মফমশিংদগী লাকপীরি, ময়াম পুম্নমকপু ঐহাক্না তৌবীমল খঙবা উৎচরি। মীওই কয়া অমগী থমোইদা ঙসি ৱাহং অমা হংলি মদুদি মঙারকশুবা য়োগ নুমিৎ থৌরম অসি পাংথোক্নবগীদমক ঐহাক্না করিগীদমক রাঞ্চীদা লাক্লিবনো।
ইচিল-ইনাও অমসুং ইচল-ইচেশিং, রাঞ্চীগা ঐহাক্কা নক্নবা মরী লৈরি, অদুবু ঙসি ঐহাক্না রাঞ্চীদা লাক্লিবা অসিগী চাউরবা মরম অহুম লৈরি। অহানবদা – ঝারখন্দগী মমিং মক্তদা মসি উমংগী লমদমনি, মহৌশাগা য়াম্না নক্নবা অমদি য়োগ অমসুং মহৌশাগী মরী অসিনা মীওইবা জাতিদা তোঙানবা ইনোৎ অমা পীরি। মফম অসিদা লাকপগী অনিশুবা অচৌবা মরম অমনা রাঞ্চী অমসুং হেল্থকেয়রগী মরক্তা লৈরিবা মরী অসি পুৱারীদা য়াওদুনা লৈরে। মমাং চহীগী সেপ্তেম্বর ২৩দা পন্দিৎ দীনদয়াল উপধ্যায়গী মপোক থৌরমদা ঐখোয়না রাঞ্চীদগী আয়ুশ্মান ভারত য়োজনা হৌদোকখি। ঙসি মালেম অসিগী খ্বাইদগী চাউবা হেল্থ কেয়র স্কিম ওইরিবা প্রধান মন্ত্রী জন অরোগ্য য়োজনা অসি অতেনবা মতমগী মনুংদা লায়রবশিংগীদমক য়াম্না কান্নবা ওইরি। ভারত মচাশিংবু মশা মউ ফহনবদা য়োগগী মরুওইবা থৌদাং লৈরি, মদুসু ঐখোয়না নীংথিজনা খঙলবনি, মরম অদুনা ঙসি রাঞ্চীদা লাক্লিবা অসি ঐহাক্কীদমক মরুওইবা অমনি।
ইচিল-ইনাও অমসুং ইচল-ইচেশিং, হৌজিক্তি য়োগগী কেম্পেন অসি ঐখোয় পুম্নমক্না তোঙানবা থাক অমদা পুখৎকদবনি মদুমক ঐহাক্না রাঞ্চীদা লাকপগী অহুমশুবা অমসুং খ্বাইদগী চাউবা মরম্নি।
মরূপশিং, য়োগ ঐখোয়গী লৈবাক্তা মতম কয়াদগী লৈরক্লি, ঐখোয়গী সংস্কৃতিগী তৎন-থানবা য়াদ্রবা শরুক অমা ওইদুনা লাক্লি। ঝারখন্দগী ছাউ দান্সতসু তোঙান তোঙানবা আশনশিং অমসুং পোসচরশিং উবা ফংলি। অদুবু মসি চুম্লবা ৱাফম্নি মদুদি মোদর্ন য়োগগী খোংচৎ অসি লৈবাক অসিগী খুঙ্গংগী লমদমশিং অমসুং ত্রাইবেল লমদমশিংদা য়ৌফম থোকপা অদুমক য়ৌদ্রি। হৌজিক ঐখোয় অমত্তা ওইনা পুন্দুনা মোদর্ন য়োগগী খোংচৎ অসি শহরশিংদগী খুঙ্গংশিংগী মাইকৈদা, উমংশিংগী মাইকৈদা অমসুং চাউখৎপা ৱাৎলিবা মফমশিংদা পুদুনা চৎকদবনি। লায়রবা অমসুং ত্রাইবেলগী য়ুম ফাওবা য়োগ য়ৌহনবা তাই। য়োগ অসি লায়রবা অমসুং ত্রাইবেলগী পুন্সিগী শরুক অমা ওইহনগদবনি মরমদি মখোয় অসি অনা অয়েক্না মরম ওইদুনা খ্বাইদগী য়াম্না ফিভম শোকহল্লি। মখোয়গী পুন্সিবু য়োগনা কোন্সিনবা তারগদি অনা-অয়েক অমসুং লায়রবদগী ঙাকথোকপা ঙমহল্লগনি।
মরূপশিং, খুদোংচাবশিংগী থোংদা পুন্সি মহিং লাইথোকহনবা খক্তনা মতিকচাবা নত্তে। মেদিসিন অমসুং সর্জরীগী সোলুসন খক্তনা মপুং ফাবা নত্তে। ঙসিগী হোংলক্লিবা মতম অসিদা অনা-অয়েক্তগী নান্থোকপগা লোয়ননা নুংঙাই য়াইফবদসু ঐখোয়না মিৎয়েং থম্বা দরকার ওই। শক্তি অসিমক ঐখোয়না য়োগদগী ফংলি। য়োগ অসি লৈবাক মথক্তা নত্ত্রগা ফিদা মথক্তা মতম খরগী ওইনা পাংথোক্লিবা থৌওংশিং অদুনা মপুং ফাবা নত্তে। য়োগগী ৱাহন্থোক্তি লমচৎ শাজৎ ফজবা অমসুং কত্থোকপনি অমদি মসি ঐখোয়না পুন্সি চুপ্পা পাংথোক্কদবনি। য়োগনা চহী, কুচু, জাতি, কাংলুপ, ৱাখল্লোন, লায়রবা নত্ত্রগা ইনাক খুনবা, রাজ্য অমদি ঙমখৈগী অপনবশিং অদু লৌথোক্লি। য়োগ অসি মীপুম খুদিংমক্কিনি অমদি পুম্নমক য়োগনি।
মরূপশিং, হৌখিবা চহী মঙাদা ঐখোয়গী সরকারনা য়োগবু হেল্থ অমসুং ৱেলনেসকা শম্নহন্দুনা প্রিভেন্তিব হেল্থ কেয়রগী অচেৎপা য়ুম্বী অমা ওইহন্নবা হোৎনরি। ঙসিদি দ্রোইং কাদগী হৌরগা বোর্দ কা ফাওবা, পার্কশিংদগী হৌরগা স্পোর্তকী কমপ্লেক্সশিং ফাওবা অমদি লৈরক খুল্লক্তগী ৱেলনেস সেন্তরশিং ফাওবা য়োগনা মীয়ামগী মংলান অদন ফাজিন্দুনা থম্লি।
ইচিল-ইনাও অমসুং ইচল-ইচেশিং, হৌরক্লিবা নহাশিংনা ঐখোয়গী অসিগুম্লবা ত্রেদিসনগী ওইবা মওং মতৌবু অনৌবা থাক্কা শম্নহল্লিবা, মসিবু মীয়ামদা খঙহল্লিবা অসিদা ঐহাক অপেনবা ফাওই। নহারোলশিংগী ইনোবেতিব অমসুং ক্রিয়েতিব আইদিয়াশিংগী মতেংনা য়োগ অসি হান্নদগী মীয়াম্না পাম্নবা হেঙ্গৎলে।
মরূপশিং, ঙসিগী থৌরম অসিদা ঐখোয়গী মন্ত্রীনা প্রাইম মিনিস্তর্স এৱার্দ ফোর প্রমোসন & দিবেলপমেন্ত ওফ য়োগ লাওথোকখ্রে। জুরী অমনা মসিগী ৱারেপ অসি লৌখি অমদি মালেম পুম্বদগী কন্না হোৎনদুনা মীওইশিং অসি থিদুনা পুথোরক্লিবনি।
মনা ফংলবা মরূপশিংনা য়োগগীদমক কত্থোক্লিবা অদুগীদমক ঐহাক্না থাগৎচরি।
মরূপশিং, চহী অসিগী মালেমগী য়োগ নুমিৎকী থিমদি ‘য়োগ ফোর হার্ত কেয়র’নি। হার্ত কেয়র অসি ঙসি মালেম পুম্বগী ওইনা মায়োক্নরিবা অমনি। ভারত্তদি হৌখিবা চহী কুন কুনমঙা অসিদা থম্মোইগা মরী লৈনবা লৈনাশিং মশিং য়াম্না হেঙ্গৎলক্লি। নুংঙাইতবা ৱাফম অমনা হৌজিক্তি চহী য়ামদ্রিবা নহাশিংদসু থম্মোইগী সমস্যা অসি হেঙ্গৎলক্লি। অসিগুম্বা মতম অসিদা হার্ত কেয়র এৱ্যারনেসকা লোয়ননা য়োগবুসু প্রিভেন্সন নত্ত্রগা ত্রিৎমেন্তকী শরুক অমা ওইহনবা মরু ওই।
ঐহাক্না মফম অসিগী লোকেল য়োগ অশ্রমশিংবু য়োগগী পাওজেল শন্দোক্নবা মখা তাবা খোংথাং লৌখৎনবা হায়জরি। দেবঘরগী রিখ্যাপীথয়োগ অশ্রম ওইগেরা, রাঞ্চীগী য়োগদা সৎসঙ্গ সাখা অশ্রম ওইগেরা নত্ত্রগা অতোপ্পা সংস্থানশিং ওইগেরা, মখোয়সু চহী অসি হার্ত কেয়র এৱ্যারনেসকী থিম শেম্দুনা পাংথোক্নবা হায়জরি।
মরূপশিং, হকচাং ফনা লৈরগদি পুন্সিগী অনৌবা অৱাংবশিং ফংনীংবগী অপাম্বসু ফাওরকই। চোকথরবা হকচাংদগী, কাইরবা থম্মোইদগী, মাংলান শাগৎপা ঙমদে, অনীংবা অপাম্বা থুংহনবা ঙমদে। ঐখোয়না খ্বাইদগী ফবা হকশেলগী মতাংদা হায়বা মতমদা, ঐখোয়না ঈশিং, ন্যুত্রিসন, এনভাইরনমেন্ত অমসুং শুবা নোম্বা কনবা মরি অসি নীংশিংগদবনি। থক্নবা অফবা অরুবা ঈশিং ফংবা, মথৌ তাবা মতুং ইন্না ন্যুত্রিসন ফংবা, অশেংবা নুংশিৎকুম্না অশেংবা এনভাইরনমেন্ত অমসুং শুবা নোম্বা কনবা অসি পুন্সিগী শরুক অমা ওইগদবনি।
মরূপশিং, য়োগ নুমিৎ পালন অসিদা শরুক য়াবগীদমক ঐহাক্না মালেমগী মীয়াম্বু থাগৎচরি। কত্থোক্লবা য়োগগী প্রেক্তিস্নরশিংনা মালেমদা অহানবা খোংদাংরিবা নুমিৎকী মঙালবু তরাম্না ওকপা অসি ফজখ্রবা শক্তম অমনি। য়োগ অসি অরীবা অমসুং অনৌবা অনিমক লৈ। মসি হোংবা নাইদে অমসুং শাফোংলক্লি। চহী চা কয়াদগী য়োগগী কান্নবা অসি হান্নগুম হোংবা নাইদ্রি, মশা মউ ফবা হকচাং, চরাংনবা লৈতবা ৱাখল, অমত্তা ওইবা অপুনবগী ৱাখল্লোন। য়োগনা পুক্নিং লৌশিং, থবক অমসুং ভক্তিগী মতিকচাবা মচল অমা পীরি।
মরূপশিং, শান্তি, অপুনবগী শক্তম অসিসু য়োগগা মরী লৈনরি। ৫শুবা মালেমগী য়োগ নুমিৎকী থৌরম অসিদা ঐখোয়গী মোতো অসি য়োগ ফোর পিচ্ছ, হার্মোনী এন্দ প্রোগ্রেস ওইহল্লসি।
ইচিল-ইনাও অমসুং ইচল-ইচেশিং, মালেমগী য়োগ নুমিৎ হৌদোকখ্রবা মতুং ঐখোয়না খোংথাং কয়া অমা লৌখৎখ্রে, মদুগী কান্নবা অদুসু উবা ফংলে। তুংগী য়েংলগা ঐখোয়না য়োগবু মীপুম খুদিংগী পুন্সিগী শরুক অমা ওইহন্নবা লেপ্পা লৈতনা থবক তৌগদবনি। মদুগীদমক য়োগগা মরী লৈনবা প্রেক্তিস্নরশিং, ওজাশিং অমসুং ওর্গনাইজেসনশিংগী থৌদাং হেঙ্গৎহল্লগনি। য়োগবু মীওই কোতি কয়াগী পুন্সিগী শরুক অমা ওইহন্নবা মেনপাৱর থৌরাং তৌবা, হ্যুমেন রিসোর্স দিবেলপমেন্তসু য়াম্না মরু ওই। য়োগগা মরী লৈনবা স্তেন্দর্দশিং অমদি ইন্সতিত্যুৎশিং দিবেলপ তৌরবা মতমদা মসি ওইথোক্কনি। মরম অদুনা ঐখোয়গী সরকারনা ৱাখল্লোন অসিগা মাংলোমদা চংশিল্লি।
মরূপশিং, ঙসিদি ঐখোয়গী য়োগ অসি মালেম অসিনা য়োকখৎলক্লিবা মতম অসিদা ঐখোয়না য়োগগা মরী লৈনবা রিসর্সতসু পুক্নীং থৌগৎকদবনি। ঐখোয়না শিজিন্নরিবা ফোনগী সোফতৱেয়র লেপ্পা লৈতনা অপদেৎ তৌবগুমনা ঐখোয়না য়োগগী মতাংদা ইনফোর্মেশনশিং মালেম অসিদা পীদুনা লৈগদবনি। মরম অদুনা ঐখোয়না য়োগবু অকক্নবা থম্লোইদবনি। য়োগবু মেদিসিন, ফিজিওথেরাপী অমদি আর্তিফিসিয়েল ইন্তিলিজেন্সগুম্বা দিসিপ্লিনশিংগা শম্নহনগদবনি। মসিদসু নত্তনা ঐখোয়না য়োগগা মরী লৈনবা প্রাইভেৎ ইন্তর্প্রাইজ স্পিরিৎপুসু পুক্নীং থৌগৎকদবনি, মতম অদুদা ঐখোয়না য়োগবু শন্দোকহনবা ঙমগনি।
ঐখোয়গী সরকারনা দরকার ওইবশিং অসি খঙনা লম কয়াদা থবক তৌরি।
ঐহাক্না হকচাং ফনা লৈনবা থৌনীজবগা লোয়ননা ময়াম্বু অমুক হন্না মালেমগী য়োগ নুমিৎকী য়াইফ পাওজেল পীজরি। অমসুং ঐহাক্না আশা তৌরি মদুদি ঙসি ঐখোয়না মফম অসিদা তৌগদৌরিবা য়োগগী আশনশিং অসিদং তৌবীয়ু, অদুবু চাং নাইনা মসিগী মতম শাংদোকহনবীয়ু, অদোমগী পুন্সিদা অঙকপা ফংনা কান্নবা ফংগনি।
ঐহাক্না অমুক হন্না ময়াম্বু খ্বাইদগী ফবা হকশেল, শান্তি, হার্মোনী অমসুং য়াইফরবা পুন্সিগীদমক য়াইফ-পাওজেল পীজরি।
লাকপীরো, ঐখোয় হৌজিক য়োগ হৌরসি।
ঐহাক্না ঝারখন্দ সরকারবুসু নুংঙাইবা ফোংদোকচরি মদুদি মখোয়না তেনখ্রবা মতমগী মনুংদা অসুক য়াম্না চাউবা থৌরম অমা পাংথোক্লি। মখোয়দা মাংজৌননা খঙহনখিবা লৈখিদে, হপ্তা অনি খক্কী মমাংদা, অনৌবা সরকার শেম্লবা মতুং রাঞ্চীদা অসুক য়াম্না চাউবা থৌরম অসি পাংথোক্নবা ৱাখল লাকখি। অদুবু অসুক তেনখ্রবা মতমগী মনুংদা ঝারখন্দ মীয়াম্না উৎলিবা থোইদোক হেন্দোকপা অসিগীদমক ঐহাক্না ময়াম পুম্নমকপু, সরকারবুসু হন্না-হন্না থাগৎপা ফোংদোকচরি।
থাগৎচরি।
