Several projects in Delhi which were incomplete for many years were taken up by our government and finished before the scheduled time: PM
All MPs have taken care of both the products and the process in the productivity of Parliament and have attained a new height in this direction: PMParliament proceedings continued even during the pandemic: PM Modiখুরুমজরি,
লোকসভাগী স্পীকর শ্রীমান ওম বিরলাজী, মন্ত্রিমন্দলগী ঐগী খোংলোই শ্রীমান প্রহলাদ জোশীজী, শ্রী হরদীপ পুরীজী, সমিতী অসিগী চিয়রমেন শ্রীমান সি.আর. পাতিলজী, এম.পি.শিং, ইবুংঙো অমদি ইবেম্মশিং!! দিল্লীদা মীয়ামগী মীহুৎশিংগীদমক্তা লৈননবা য়ুমগী অনৌবা খুদোংচাবা অসিগীদমক্তা অদোম পুম্নমক্তা হন্না হন্না নুংঙাইবা ফোংদোকচরি! ঙসি অসি অতোপ্পা নুংঙাইরবা নুমিৎ অমসুনি। ঙসি ঐখোয়গী মথৌ খঙবা, ৱাহৈ-ৱাতা হৈবা, ঐখোয়গী স্পীকর শ্রীমান ওম বিরলাজীগী মপোক নুমিৎসুনি। ওমজীদা হন্না হন্না নুংঙাইবা ফোংদোকচরি। অদোম হকচাং ফবা, পুন্সি নুংশাংবা ওইরসনু, অমসুং লৈবাক্কী সেবা অসুম্না তৌবীবা ওইরসনু, ইশ্বরদা ঐনা থৌনীজরি।
মরূপশা,
এম.পি.শিংগীদমক্তা হৌখিবা চহিদা নোর্থ এভেন্যুগী য়ুম শাবা লোইখ্রে। অমসুং ঙসি বি.দি. রোদতসু মথোল অহুম অসি লৈননবা শেম শারে। ঐনা নীংজরি মদুদি গঙ্গা, য়মুনা অমসুং সরস্বতী, হায়রিবা তাৱর অহুম অসিগী ইতিনফম অসিনা, মসিদা লৈগদৌরিবা মীয়ামগী মীহুৎশিংবু মতম পুম্নমক্তা মশা-মউ ফনা, মথৌ পাংথোকহন্দুনা নুংঙাইনা থম্বীবা ওইরসনু। ফ্লেৎশিং অসিদা এম.পি.শিংনা মখোয়গী মথৌ তৌরকপদা মতেং ওইগদবা খুদোংচাবা পুম্নমক ফংহল্লি। পার্লিয়ামেন্ত হাউসকী মনাক্তা লৈবা মরমনসু মসিদা লৈগদৌরিবা এম.পি.শিংদা য়াম্না অরাইবা ওইহল্লগনি।
মরূপশা,
দিল্লীদা এম.পি.শিংগী লৈননবগী অৱাবা অসি কুইনদগী লৈরক্লবনি। অমসুং হৌজিক বিরলাজীনা হায়বীখিবা অদুগুম্না মতম কুইনদগী এম.পি.শিংনা হোতেলদা লৈবা তারক্লি। মসিনা মরম ওইদুনা শেন-থুমগী অৱাবসু ওইরি, মখোয়সু মসি নুংঙাইবা ওইদে অদুবু তঙাফদনা তৌবা তাখি। অদুবু সমস্যা অসি কোকহন্নবা লুম্না লৌদুনা ২০১৪গী মতুংদা অখন্নবা মওংদা চৎথবা হৌখি। চহি কয়াদগী লৈরক্লবা সমস্যাশিংবু য়ৈথোক্তুনা থম্বগী মহুত্তা মদুগী পাম্বৈ পুথোক্লবতদা লোইশিনবা ঙম্মি। শুপ্নগী এম.পি.শিংগী লৈফম খক্তা নত্তনা দিল্লীদা অসিগুম্বা চহি কয়া কয়াদগী পন্দুনা প্রোজেক্ত কয়া লৈরমখি। বিল্দিং কয়া সরকার অসিগী মতমদা শাবা হৌখি অমসুং লেপখিবা মতমগী মনুংদা, লেপখিবা মতমগী মাংওইননা লোইশু লোইশিনখি। অতল বিহারী ভাজপেয়ীজীগী সরকার লৈরিঙৈদা অতলজীগী মতমদা ঙাংনখিবা অম্বেদকর নেস্নেল মেমোরিয়েল অদু শাবদা চহি কয়া চংখি, সরকার অসি শেম্লবা মতুংদা মদুগী থবক হৌখি। চহি ২৩ শাংনা ঙাইরক্লবা মতুংদা দাক্তর অম্বেদকর ইন্তর্নেস্নেল সেন্তর শাবগী থবক সরকার অসিনা হৌখি। সেন্ত্রেল ইনফোর্মেসন কমিশনগী অনৌবা বিল্দিং শাবগী থবকসু সরকার অসিনা তৌখি। লৈবাক অসিদা চহি তরাগী খুজিং কয়াদগী ৱার মেমোরিয়েলগী মতাংদা ঙাংনদুনা লাকখি। ঐখোয়গী লৈবাক্কী থৌনা ফরবা জৱানশিংনা মতম কুইনদগী মসিবু ঙাইজরকখি, মসিবু তান্নজরকখি। লৈবাক অসিগী মথৌনা ফবা অথৌবশিংগী স্মৃতিদা ইন্দিয়া গেৎকী মনাক্তা ৱার মেমোরিয়েল শারিবা অসিসু, মসি পাংথোক্নবগী লাইবক ফবা তাঞ্জা অদুসু ঐখোয়গী সরকারনা ফংজখি।
মরূপশা,
ঐনা লোকসভাগী স্পীকর, লোকসভা সেক্রেতরিয়েৎ অমসুং মসি শাবগা মরী লৈনবা অর্বান দিবেলপমেন্ত মন্ত্রালয়বু ওইরো, অতৈ দিপার্তমেন্তশিংবু ওইরো, পুম্নমক্তা নুংঙাইবা ফোংদোকচরি মদুদি মখোয়না অসুক তেনখ্রবা মতমগী মনুংদা চাউখ্রবা খুদোংচাবা অসিবু শাবীখি। অমসুং ঐখোয় পুম্নমক্না মসি নীংথিজনা খঙই। ঐখোয়গী লোকসভাগী স্পীকরজীদি ক্বালিতী অমদি সেবিংদসু থাজবা থম্বী। অমসুং মসি শাবা মতমদসু হায়রিবশিং অসি নীংথিজনা ফংখি। ঐখোয় পুম্নমক্না নীংশিংলি মদুদি হৌজিক ঐখোয়না নোংজু মীফমদসু স্পীকরজীগী অসিগুম্বা থৌওং অসিগী মমি উবা ফংখি। কোরোনাগী মতমদা মখল কয়াগী চেকশিন-থৌরাং মরক্তা, অনৌবা থৌরাংশিংগা লোইননা পার্লিয়ামেন্তকী মীফম পাংথোকখি। রুলিং অমসুং ওপিজিসনগী মরূপ পুম্নমক্না মিৎকুপ অমমম্বু নীংথিজনা শিজিন্নখি। হাউস অনিমক্না মথং মথং ওইনা থবক তৌববু ওইরো নত্ত্রগা থাংজা অমসুং নোংমাইজিংদসু থবক তৌবদা, পুম্নমক্না তেংবাং পীখি। দল পুম্নমক্না মতেং পাংখি।
মরূপশা,
ঐখোয়গী পর্লিয়ামেন্তকী ইনর্জী হেনগৎলক্লিবা অসিগী মরুমদা য়াম্না চাউবা মরম অমসু লৈরি। মসিসু অমরোমদা ২০১৪দগী হৌখ্রে। মতমদুদা লৈবাক অসি অনৌবা মায়কৈ অমদা চখৎপা পামখি, অহোংবা পামখি অমসুং মরম অসিনা মতম অদুদা লৈবাক অসিগী পার্লিয়ামেন্ততা এম.পি. ৩০০দগী হেন্না, অহানবা ওইনা খন্দুনা লাকখি অমসুং ঐসু অহানবা ওইনা লাকখিবশিংগী মনুংদা য়াওখি। ১৭শুবা লোকসভাদসু অহানবা ওইনা এম.পি. ২৬০ খন্দুনা য়ৌরকখি। হায়বদি, হন্দক্কী ৪০০দগী হেনবা এম.পি.শিং অসি অহানবা ওইনা খন্দুনা লাকখিবা নত্ত্রগা অনিরকশুবা ওইনা পর্লিয়ামেন্ততা লাকখিবা ঙাক্তনি। মসিদসু নত্তনা, ১৭শুবা লোকসভাগী মিং অসি নুপী এম.পি. খ্বাইদগী য়াম্না খন্দুনা থারকখিবগী রিকোর্দসু থমখি। লৈবাক্কী নহা ওইবা ৱাখল, অসিগুম্বা অনৌবা মচৎ অসি পর্লিয়ামেন্তকী শক্তমদসু উবা ফংই। মরম অসিননি ঙসি লৈবাক অসিগী থবক্কী পরিংদা, গভর্নেন্সতা অনৌবা ৱাখল্লোন অমা অমসুং অনৌবা লোনচৎ অমা উবা ফংলিবসি। মমাংগী ১৬শুবা সোকসভানা অহানবগা চাংদম্নবদা চাদা ১৫ বিল পাস তৌখি। ১৭শুবা লোকসভাগী অহানবা মীফমদা অপীবা মতমদগী চাদা ১৩৫ থবক পাংথোকখি। রাজ্যসভানসু চাম্মদা চাম্মা থবক পাংথোকখি। পর্ফোর্মেন্স অসি হৌখিবা চহি তরাগী খুজিং অনিদা খ্বাইদগী হেল্লবনি। হৌখিবা চহি চাদসু লোকসভাগী প্রদক্তিবিতী চাদা ১১০দগী হেল্লি।
মরূপশা,
পার্লিয়ামেন্তকী প্রদক্তিবিতী অসিদা অদোম এম.পি. পুম্নমক্না প্রদক্ত অমসুং প্রোসেস অনিমক্তা পুক্নীং চংখি। ঐখোয়গী লোকসভা অমসুং রাজ্যসভা অনিমক্কী এম.পি.শিংনা মায়কৈ অসোমদা অনৌবা মতোল অমা লোম্বা ঙমখ্রে। অমসুং তশেংবা মওংদা মসিদা হৌজিক এম.পি. ওইদ্রবা অদুগুম্বা এম.পি.শিং অদুগী শরুকসু য়াওরিবনি। অদোম য়েংবীয়ু, ঐখোয়না কয়াদা মায় পাকপা ফংলিবনো? পুন্না অমত্তা ওইনা অনৌবা কয়া তৌরে। শুপ্নগী হৌখিবা চহি অমা মখাই রোমতগী মতাংদা পল্লবদা, লৈবাক অসিনা লৌমীশিংবু ময়াই চাবশিংগী খুবাম নুংদগী মনীং তমহনবগী থবক তৌখ্রে। লৈবাক অসিগী পুৱারী ওইবা মওংদা লেবর রিফোর্ম তৌখ্রে, শিন্মীশিংগী য়াইফনবা তৌখ্রে। লৈবাক অসিনা জম্মু-কশ্মীরগী মীয়াম্বুসু চাউখৎপগী মরুওইবা ইচেলদা অমসুং অতৈ কাংলোন কয়াগা লোইনহন্নবা থবক পায়খৎলে। অহানবা ওইনা হৌজিক জম্মু কশ্মীরদা করপ্সনগী মায়োক্তা থবক পাইখৎপা ঙম্নবা অসিগুম্বা কাংলোন শেম্বা ঙম্লে।
লৈবাক অসিনা নুপীশিংবু তিন তলাক্কুম্বা খুন্নাইগী ফত্তবা চৎনবীশিংদগীসু নীং খা তম্বা ফংহল্লে।
মসিগী মমাংগী ৱারী পল্লবদি, নৌজরিবা অঙাংশিংদা নমজা-নমথেক্নবশিংবু শিবগী চৈরাক পীবগী থৌরাংসু মতম অসিদা তৌখিবনি। অনৌবা শেন্মিৎলোনগীদমক্তা জি.এস.তি., ইন্সোলভেন্সী অমসুং বেংক্রপ্সী কোদকুম্বা অচৌবা অচৌবা ৱারেপ কয়া লৌখ্রে। মতৌ অসুম্না, ভারতকী অসিগুম্বা কমিৎমেন্তশিং অসিবু মপুং ফাহল্লদুনা ঐখোয় পুম্নমক্না অমত্তা ওইনা সিতিজেন এমেন্দমেন্ত বিলসু পাস তৌখ্রে। ঐখোয়গী থবক অসি, মায় পাকপশিং অসি করিগুম্বা ঐখোয়গী প্রদক্ত ওইরবদি মখোয়শিং অসিগী প্রোসেসসু অদুক্কী মতিক অঙকপনি। মীওই কয়ানা মসিদা পুক্নীং চংলমদবা য়াই, অদুবু ১৬শুবা লোকসভাদা বিল চাদা ৬০দি পাস তৌনবগীদমক্তা অমমমদা পুং ২দগী অহুম ফাওবা মরৈ য়েৎনখি। ঐখোয়না হৌখিবা লোকসভাদগী বিল হেন্না পাস তৌখি, অদুবু অদুমওইনমক ঐখোয়না হান্নদগী হেন্না মরৈ য়েৎনখি।
মসি উৎলে মদুদি ঐখোয়না প্রদক্ততসু ফোকস তৌই অমসুং অমসুং প্রোসেসতসু নীংথিজহল্লি। অমসুং পুম্নমক অসি ইকাই খুম্নজরবা অদোম এম.পি. ময়াম্না তৌবীখিবনি। অদোমগী মরমদগী ওইথোক্লিবনি। ঐনা মসিগীদমক অদোম এম.পি. পুম্নমক্কী মফমদা থাগৎপা ফোংদোকচরি, নুংঙাইবা ফোংদোকচরি।
মরূপশা,
মহৌশানা মসি হায়নৈ মদুদি নহাশিংগীদমক্তা চহি ১৬-১৭-১৮ অসি, ১০-১২শুবা তম্লিঙৈ মতম অসি য়াম্না মরুওইবা মতম্নি। হৌজিক ২০১৯গী মীখলগা লোইননা ১৬শুবা লোকসভাগী মতমসু মপুং ফারে। মতম অসি লৈবাক অসিগী খোংজেলগী, লৈবাক্কী চাউখৎপগীদমক্তা য়াম্নমক পুৱারী ওইরি। ২০১৯গী মতুংদগী ১৭শুবা লোকসভাগী মতম হৌরে। মতম অসিদসু লৈবাক অসিনা লৌখিবা ৱারেপশিং অদুনা, থাংখিবা খোংথাংশিং অদুনা, হৌজিক লোকসভা অসি পুৱারীদা য়াওখ্রে। মসিগী মতুংদা ১৮শুবা লোকসভা লৈরগনি। ঐনা থাজৈ, মথংগী লোকসভাসু লৈবাক অসিবু অনৌবা চহি তরাগী খুজিংদা মাংদা পুখৎনবা য়াম্না মরুওইবা থৌদাং লৌগনি।
মরম অসিনা ঐনা ১৬-১৭-১৮গী মগুন অদোমগী মাংদা অখন্নবা মওংদা থম্লিবনি। লৈবাক্কী মাংদা তাদুনা লৈরিবা ময়াম অসি, ঐখোয়না মতম অসিদা ফংহৌগদৌরিবনি। আত্মনির্ভর ভারত অভিয়ানবু ওইরো, শেন্মিৎলোনগী মরী লৈনবা পান্দমশিংবু ওইরো, নত্ত্রগা অসিগুম্বা ৱাশক কয়ামরুম, পুম্নমকশিং অসি ঐখোয়না মতম অসিগী মনুংদা পাংথোক্কদৌরিবনি অমসুং মরম অসিনা ১৬শুবা, ১৭শুবা, ১৮শুবা লোকসভাগী মতম অসি ঐখোয়গী নহা ওইরিবা লৈবাক অসিগী য়াম্না মরুওই। লৈবাক্কীদমক্তা মরুওইবা মতম অসিগী শরুক অমা ওইজবগী লাইবক ফবা তাঞ্জা ঐখোয়না ফংজরি। অমসুং মরম অসিনা, পুৱারীদা লোকসভাগী তোঙান তোঙানবা মতম নৈনরকপদা হায়রিবা মতম অসি লৈবাক্কী খোংজেলদা সনাগী ময়েক্না ইরবা তাঙ্ক ওইনা নীংশিংনহৌনবা হোৎনবা অসি ঐখোয় পুম্নমক্কী থৌদাংনি।
মরূপশা,
ঐখোয়গী অসিদা হায়নৈ – “ক্রিয়াসিদ্ধিঃ সত্বেফবতি মহতাম নোপকরনে”
হায়বদি, থবক্কী মহৈ অদু ঐখোয়গী অচুম্বা ফিরেপ, ঐখোয়গী অনীংবা অদুগী মখা পোল্লি।
ঙসি ঐখোয়গী পাম্বৈসু লৈরে, অমসুং অচেৎপা ফিরেপসু লৈরে। ঐখোয় ঐখোয়গী ফিরেপ অসিগীদমক হেন্না কন্না নোমলবদি, মহৈ অদু অদুক্কী মতিক থুনা অমদি চাউগনি। ঐনা থাজৈ মদুদি ঐখোয় পুম্নমক্না অমত্তা ওইনা পুনশিন্দুনা ইরৈবাকচা করোর ১৩০গী মঙলান অসি শোইদনা মপুং ফাহনগনি। আত্মনির্ভর ভারতগী পান্দম অসি মপুং ফাহনগনি। য়াইফ-পাউজেলশিং অসিগা লোইননা অমুক্কা হন্না অদোম ময়ামদা হন্না হন্না নুংঙাইবা ফোংদোকচরি।
হন্না হন্না থাগৎচরি!
