হর হর মহাদেব!
খুরুমজরি,
থৌরম অসিদা শরুক য়াবীরিবা উত্তর প্রদেশকী মুখ্য মন্ত্রী, মীয়ামগী সেবা তৌবীরিবা য়োগী অদিত্যনাথজী, ঐহাক্কী কেবিনেৎকী মরুপ, শ্রী হর্দীপ সিংহ পুরীজী, য়ু.পি. সরকারগী মন্ত্রী, শ্রী অশুতোশ তান্দনজী, নীলকন্থ তিৱারীজী, ওল ইন্দিয়া মেয়র কাউন্সিলগী চেয়রমেন, শ্রী নবিন জৈনজী, কাশিদা লৈবীরিবা অমসুং লৈবাক্কী মফম খুদিংদগী শরুক য়ারিবা ঐহাক্কী মেয়র মরুপশিং, অতোপ্পা মীথুংলেন অমসুং ইচিল ইনাওশিং!
কাশীগী এম.পি. অমা ওইনা, ঐহাক্না অদোম খুদিংবু কাশিগী মাইকৈদগী তরাম্না ওকচরি। ঐহাক ইশামক্না কাশিদা লৈরমদুনা অদোম খুদিংবু থৌরম অসিগীদমক্তা তরাম্না ওকপা ফংজবা ওইরম্লবদি, ঐহাক্না য়াম্না হেন্না নুংঙাইবা ফাওরমগদবনি। অদুবু, মতমগী অকক্নবা খরা লৈবনা ঐহাক্না মফমসিদা লৈরগা অদোম্বু তরাম্না ওকপদি ফংজদ্রে। অদুবু কাশিগী মীওইশিংনা অদোমগী থৌগল তৌবদা অৱাৎপা অমত্তা লৈহল্লম্লোই হায়না ঐহাক্না থাজবা থম্মি। অদোমগীদমক্তা ঐহাক্না য়াম্না খঞ্জৈ। অদুগা করিগুম্বা, অৱাৎপা লৈরগসু কাশিগী মীয়াম্না শোইবা ওইরোই, মদু ঐহাক্কী অশোইবা ওইগনি। মরম অদুনা অদোম্না ঐহাকপু ঙাকপীগনি। অদোম্না কাশিগী অসিগুম্বা ৱাফম্বু তসেংনা নুংঙাইগনি, ঐখোয় পুন্না ভারতকী তুংগী মতাংদা খন্ন-নৈনমিন্নগনি, ভারতকী শহরশিংগী য়াইফরবা তুংগী মতমগীদমক্তা ঐখোয়গী লৌশিং লান্নগনি। ঐখোয় মশেলনা অমা-অমদগী য়াম্না তমজগনি। অদোম্না ইশাগী শহরশিংবু ইশা-ইশাগী ওইবা মওংদা মাং থাহন্নবগীদমক্তা, খ্বাইদগী ফজবা শহর ওইহন্নবগীদমক্তা, মতিক মগুন লৈবা শহর ওইহন্নবগীদমক্তা, মতমগা চুনবা শহর ওইহন্নবগীদমক্তা পাংথোকপা য়াবা থবক অমত্তা থাদোক্লোই হায়বগী ঐহাক্না থাজবা থম্মি। অদোম মেয়রশিংনা তুংগী মতমদা ইশাগী শহরশিংদা করিগুম্বা খরা পীবদি শোইদনা পাম্লমগনি। লাক্কদৌরিবা চহি ৫, ২০, ৫০গী মতুংদা শহর অসিদা লাকপা মীওই অমা হেক্তনা নহাক্কী মিং পন্দুনা নহাক্না পাংথোক্লম্বা থবক নীংশিংবা, অদোম্না পাংথোক্লম্বা থবকশিং নীংশিংদুনা অদোম্বু ইকায় খুম্ননবগীদমক্তা ইশাগী শহর অসিগীদমক্তা মশক থোকপা করিগুম্বা খরদি শোইদনা তৌনীংলমগনি। নীংশিংনীংঙাই ওইবা অমা শেম্লমগদবনি, মাইকৈ অমা তাক্লমগদবনি অমসুং মীওই খুদিংগী ৱাখলদা মঙলান অমা শেম্লমগদবনি, অসিগুম্বা থবকশিং পাংথোক্লম্নবগীদমক্তা থৱাই-হকচাং য়াওনা হোৎনরমগদবনি। মীয়াম্না ঐখোয়দা থাজবা থমদুনা, শহর অসিবু ঐখোয়দা শিন্নরবদি, মখোয়গী অপাম্ববু মনিং থুংহন্নবা ঐখোয়না মপুং ফানা হোৎনগদবনি। হীরম অসিগী মতাংদা অদোম্না করিগুম্বা খরদি শোইদনা পাংথোক্লমগনি হায়বগী ঐহাক্না থাজৈ। অফবা মহৈ ফংনবগীদমক্তা অদোমসু শোইদনা হোৎনরমগনি। শহর চাউখৎপগী মন্ত্রালয়, য়ু.পি. সরকার অমসুং অদোম খুদিংবু অসিগুম্বা থৌরম অসিগীদমক্তা কাশিবু, ঐহাক্কী কাশিবু পাংথোকফম ওইনা খনবগীদমক্তা ঐহাক্না থাগৎচরি। লৈবাক চাউখৎপগী অদোমগী মঙলানশিংগা বাবা বিশ্বনাথকী থৌজালগা পুল্লবদি, অদোম্না করিগুম্বা খরদি শোইদনা ফংদুনা, অনৌবা ইথিল ফংদুনা, অনৌবা থাজবা ফংদুনা শোইদনা হনগনি। কাশিদা পাংথোক্লিবা থৌরম অসিবু ঐহাক্না ওইথোকপা য়াবা ৱাফম কয়াগা লোয়ননা ঐহাক্না উরি। অমদনা বনারসকুম্বা মালেমগী খ্বাইদগী লিবা শহরশিংগী মনুংদগী মফম অমা, অতোপ্পা নাকলদনা, মতমগা চুনবা ভারতকী মতমগা চুনবা শহরগী শক্তম! ঐহাক্না কাশিদা হন্দক্তা লাক্লম্বা মতমদা কাশিনা চাউখৎপসি লৈবাক পুম্বা চাউখৎপগী লম্বী য়াৎপা ওইবা য়াই হায়খিবদুনি। ঐখোয়গী লৈবাক্কী শহর অয়াম্বসি চৎনবী মখা পোন্না শেমগৎখিবা নাৎকী ওইবা শহরনি। হৌজিক্কী মতমগা চুনহন্নবা য়ুগ অসিদা, ঐখোয়গী শহরশিংগী হান্নগী নীংথিবা মগুনশিং ঙাক-শেন্দুনা থম্বসু চপ মান্ননা মরু ওই। ঐখোয়গী অরিবা শহরশিংগী লৈরক খুদিংগী চেক খুদিং, পুংফম খুদিং, পুৱারীগী কাচিন খুদিংদগী তম্বা য়াবা য়াম্না লৈ। মখোয়গী পুৱারী ওইরবা লৌশিংনা ঐখোয়গী পুন্সিগী ইথিল ওইহনবসু য়াই। ঐখোয়গী চৎনবীগী লৈতেংগী মওং-মতৌ কয়া অমসু ঐখোয়না তমজবা য়াই। অসিগুম্বা থৌওং কয়া অসিদগী, ঐখোয়না লোকেলগী স্কিলবু করম্না চাউখৎহনবা য়াগনি অমসুং লোকেলগী স্কিল অমসুং পোত্থোকশিংবু চাউখৎহন্দুনা মফম অসিগী শক্তানীংঙাই ওইবা মওং অমা ওইহনবসু য়াগনি।
মরুপশিং,
অদোম্না বনারসতা কোয়বা মতমদা, মফমসিদা হান্ননা লাক্লম্লবা মীওইশিংনা নোংমা নত্ত্রগদি নোংমদি শোইদনা কোয়রম্লগনি। অরিবা মতৌশিংগা হৌজিক ওরিবা অনৌবা মতৌশিংগা চাংদম্নবদা অশোইবা খরদি শোইদনা উরমগনি। ইশাগী ৱাখলদা ইশাগী শহর শোইদনা নীংশিংলক্কনি। অদুগা, ঐহাক ইশাগী শহরগী লৈরক, তুরেল অমসুং অতোপ্পা মওং-মতৌ খুদিংমক্কা মফমসিগা শোইদনা চাংদম্নবগী ৱাখল্লোন লাক্কনি। অদুগা অদোমগা লোয়নরিবা মেয়র অদুনসু মসিগী মতান্দা শোইদনা ৱারী শাগনি। মখোয়না করি তৌখ্রে অমসুং মতৌ করম্না তৌখিবনো হায়বা শোইদনা খন্নগনি। অসিগুম্না খন্নবা মতমদা অনৌবা ৱাখল্লোন শোইদনা লাকনি। অনৌবা ৱাখল্লোন লাক্কনি, অনৌবা থবক-থৌরম পাংথোকপগী মতাংদা খন্থগনি। অদুগা, মহাক্না মশাগী শহরদা হন্দুনা অহোংবশিংগা মান্ননা শোইদনা থবক্তা পাংথোক্কনি। মতমদুদা অদোমগী শহরগী মীয়াম, রাজ্যগী মীয়াম্না অনৌবা হরাওবা অমা ফংগনি, অনৌবা থাজবা অমা ফংগনি। ঐখোয়না ইভোল্যুসন্দা থাজবা থম্নবা হোৎনগদবনি, রিভোল্যুসনগী ওইনদি ঐখোয়না থোইদোক্না মথৌ তাদ্রে। ঐখোয়না অনৌবা ইনোৎ হাপ্পগী মথৌ তারে, হান্নগী মওং-মতৌশিং থুগাইবসি তৌগদবা নত্তে, মসিগী মহুত্তা মখোয়শিংবু নৌহৌননা শেমগত্তুনা ঙাক শেনবদা অহেনবা মিৎয়েং চঙগদবনি। থৌওংশিং অসি হৌজিক্কী মতমগী তঙাই ফদবশিংগী মতুং ইন্না পাংথোক্কদবনি। লু-নানবগী খোঙথাং পায়খৎপা মতমদা, লৈবাক খুদিংগী ওইনা চহি খুদিংগী ওইনা শহরগী মমিং লাউথোকই। শহর খরনা মসিগী মতাংদা মখোয়গী মফম তপা তপ্না কনশিল্লকপগী মতৌ ঐহাক্না উবা ফংই। মসি য়াম্না ফবা ৱাফম্নি। অদুগা অতোপ্পা শহরশিংনা হায়রিবা শহরশিংনা মনা লৌখ্রগনি হায়দুনা নুংঙাইতনা লৈথোক্কদবা নত্তে, মখোয়সু হোৎনদুনা ঐখোয়সু মখোয়গুম্না পাংথোকপা ঙমগনি হায়বা থাজবগা লোয়ননা লৈগদবনি। অদোম মেয়রশিংনসু, লু-নানবগী মথংগী মনা অসি তান্নবদা ঐখোয়না তুং হন্থদুনা লৈরৈ, লৈবা য়াদে হায়বা ৱারেপ লৌগদবনি। ঐহাক্না হর্দীপ সিংহ পুরীজীদা হায়জনীংবদি, খ্বাইদগী ফবা অমসুং লু-নানবা শহরদা মনাদি শোইদনা পীরগনি, মখোয়বু শকখঙদুনা ইকায় খুম্নবা উৎকনি, অদুবু অফবা তৌনবগীদমক্তা খ্বাইদগী হেন্না হোৎনবা শহরশিংদসু শকখঙবীবা অমসুং ঐখোয়দি করিমত্তা তৌররোই হায়দুনা মমিৎ উইশিল্লগা ফম্মগা লৈখ্রবশিংবু করম্না ইথিল পীগনি, মথৌ তৌহনগনি হায়বগী পাম্বৈ পুথোকপা তাবনি অমসুং মখোয়গী রাজ্যশিংগী পাউ-চেদা এদভর্তিসজমেন্ত পীদুনা অতোপ্পা শহরশিংনা পাংথোকপগুম্না মখোয়দি করিমত্তা তৌদ্রে হায়বা খঙহনবগী মথৌ তাই হায়না হায়জনীংই। মদুদগী, মীয়াম্না তকশিন্নরক্লনি অমসুং থবক তৌনীংবগী ৱাখল্লোন লাক্লগনি। অদুগা, লু-নানবগী থৌওংশিং অসিবু চহি চুপ্পা পাংথোকপা থৌরম অমখক ওইনা য়েংদনবসু খঙহন্নীংই। অদোম্না থা খুদিংগী ফম্বা বোর্দকী মরক খুদিংদা লু-নানবগী খোঙথাং কয়া শিন-লাঙবা য়াদবরা? থা অসিগী ওইনা পুংবা শেমদুনা করম্বা বোর্দনা লু-নানবগী খ্বাইদগী নীংথিবা থবক কনানা পাংথোক্তুনা মনা লৌরি হায়না য়েংবা য়াগনি। করিগুম্বা শহরগী বোর্দকী মরক্তা চাংয়েংনবগী থৌওং লৈরবদি, কাউন্সিল্লরগী মরক্তসু লৈরক্কনি। মসিগী অপুনবা কান্নবা মহৈদি শহরবু ওন্থোকপদা য়াম্না মতেং ওইগনি। অদুনা ঐহাক্না লু-নানবদা মত্তনা শহর ফজহনবগী থৌওংদু মিৎয়েং চঙহন্নীংই। মালেমদা ফজবা তান্নবগী থৌরম কয়া পাংথোকই, ঐহাক্না মসিগী মতাংদা করিমত্তা হায়নীংদে। অদুবু, ঐখোয়গী শহরগী ফজবা তান্নবগী থৌরম পাংথোকপদি য়াদবরা? করম্বা বোর্দনা খ্বাইদগী ফজনা পাংথোকই য়েংবা য়াদবরা? লু-নানবগী পেরিমীতর লৈবা য়াই, ফজবা পুরক্নবা খোঙথাংগীসু পেরিমীতর অমা লৈবা য়াইনা। শহর খুদিংনা হোৎনদুনা পুংবা শেমসি। ফক্লাংশিংবু করম্বা মচু শঙই, দুকান্দা বোর্দ করম্না য়াল্লি, লৈরক্কী সাইন বোর্দ লৈরবদি করম্না ইবগে, লৈফম করম্না ইবগে। অসিগুম্বা থৌওং কয়া অমসি অদোম্না চাংদম্নবা অমা লৈ খন্দুনা পাংথোকপা য়াই। নিংতম্বগী অমৃত মহোৎসবকী মতমসিদা অদোমগী মীচম মীয়াম্না পাংথোকপা য়াবা থবক অহুম লৈ। অহানবা, নিংতম্বগা মরী লৈনবা হীরমগী “রঙ্গোলি” য়েকপগী চাংয়েংনবা পাংথোকপা। মসিদা নিংতম্বগী ইহৌগা মরী লৈননা পাংথোকখিবা আন্দোলনগা মরী লৈনবা থৌদোক্কী মতাংদা পাংথোকপা য়াই। লাক্কদৌরিবা জনুৱারী ২৬ ফাওবা পাংথোক্তুনা মসিগী ফিভম অমা শাগত্তুনা করিগুম্বা অহোংবা খরা লাকই নত্ত্রগা লাক্তে য়েংবা য়াইদনা। মতৌ অসুম্না, অদোমগী শহরদা নিংতম্বগী ইহৌগী মনুংদা থোকখিবা থৌদোক্কী মতাংদা ঈশৈ ইদুনা মদুদা চাংয়েংনবা য়াই। অদোমগী রাজ্যদা থোকখিবা থৌদোক্কী মতাংদা ইবা ঈশৈগী চাংয়েংনবা য়াই। অহোংবা অমা লাকই নত্ত্রগা লাক্তে হায়বা অমুক্তা য়েংবীয়ুনে। মসিগী মান্ননা, ঐখোয়গী ইমা অমদি ইচে-ইচলশিংবুসু মনুং চলহনবা য়াবা অচৌবা থৌরম অমসু ওইবা য়াই। অঙাংনা তুম্নিংলকপা মতমদা, মমানা নাউশুম ঈশৈ শক্তুনা থেম্বগী ঐখোয়গী চৎনবী অমা লৈ। ঐখোয়না হৌজিক্কী মতমগা চান্নবা নাউশুম ঈশৈ শেম্বা য়াইকো। ইং ২০৪৭দা ভারতনা নিংতমবগী চহি ১০০ শুরকপা মতমদা ভারতকী করি ফিভম ওইগনি? হৌজিক পক্লিবা অঙাংশিংগী মঙলানশিংনা করি ওইগনি? অফবা তুংগী ভারত অমা ওইহন্নবগীদমক্তা, মমাশিংনা হৌজিক্কী অঙাংশিংদা তুংগী অফবা মতমগী মতাংদা অমসুং থকসি খাসি ফবগী নাউশুম ঈশৈ শকপীবা য়াই। মখোয়দা হৌজিক্তগী হৌনা থকসি খাসি অমসুং লৈবাক নীংবা তম্বীবা য়ারে। ঐখোয়না ২০৪৭দা নিংতম্বগী চহি ১০০ শুবা মতমদা ঐখোয়না অসি তৌগনি হায়না হৌজিক্তগী তম্বীবা য়াই। অদোম্না মফমসিদা লৈরবনিনা, গঙ্গা তোর্বান য়েংলম্বা য়ারে নত্ত্রগা ঙসি চৎকে খল্লম্বসু য়াই। মালেম পুম্বগী লমকোয়বা লাকই। কাশিগী শেন্মিৎলোন চলায়বদা মসিগী অচৌবা থৌদাং য়াওরি। কাশিগী শেন্মিৎলোনগী মপাঙ্গল কনখৎহনবা থবক অমা ইমা গঙ্গা তুরেল তোর্বান্দা শোইদনা থোক্লে। ঐখোয়গী লৈবাকসিদা তুরেল তোর্বান মনাক্তা লৈবা নত্ত্রগা মসিগী অনকপদা লৈবা শহর য়াম্না লৈ। তুরেলনা শহর ফাওদুনা চেল্লম্বা য়াই, অদুবু হৌজিক্কী মতমসিদদি অসিগুম্বা তুরেলশিং অসি মাঙখিবগী মওংগুম তৌনরে। করিগুম্বা মতমদনা তুরেলশিং য়াম্না মোৎশিনখিবা নত্ত্রগা নোং তাবা খক্তদা তুরেলগী ইচেল উদুন্না তুরেল লৈ খঙবা য়াওনরে। ঐখোয়না অসিগুম্বা তুরেলশিংগীদমক্তা মিৎয়েং শানবা থৌওং অমা পায়খৎফম থোকই। ঙসিদি, মালেম শিনবা থুংবনা ঈশিং ৱাবগী মতাংদা ৱারী শানরি। ঙসিদি মালেম শিনবা থুংবনা গ্লোবেল ৱার্মিং, ক্লাইমেত চেঞ্জকী মতাংদা ৱারী শনরিবা অসিদা ঐখোয়না ইশাগী শহরগী তুরেলগীদমক্তা খন্দ্রবদি, মদুবু করম্না ঙাক-শেনগনি, করম্না ফজহনগনি, মদুগী কান্নবশিং খঙদ্রবদি, ঐখোয়না করম্বা ৱাফমদা চাউথোকচগদৌরিবনো?
ঐখোয়না থবক অমা পাংথোকপা য়াবরা? চহি খুদিংগী ওইনা, ঐখোয়গী খুদোংচাগদবা নুমিৎ ৭নি কাইথোক্লগা তুরেলগী থৌরম অমা পাংথোকপা য়াবরা? তুরেলগী থৌরম পাংথোক্তুনা, শহর পুম্বগা লোয়ননা মদুদা তুরেল শেংবগী থবক পায়খৎপা য়াবরা? তুরেল অসিগা পুৱারী অমগা করিগুম্বা মরী অমা লৈনরম্বা ইয়াই, তুরেল তোর্বান অসিদা থোকখিবা থৌদোক্কী ৱারী ৱাতাই শাবা য়াই। তুরেল অসিগী মতাংদা ৱারী শাবগা থবক পাংথোকপা য়াই। তুরেল মপান্দা চত্তুনা থবক থৌরম পাংথোকপা য়াই, কবি সম্মেলন পাংথোকপা য়াই। হায়বদি, তুরেলগা মরী লৈননা, শহরগী চাউখৎ থোরাংগী খোঙচত্তা তুরেল অসিবু মনুং চলহন্দুনা অমুক্কা হন্না হিংগৎহনবা য়াই। তুরেলশিং অসিবু ইরায় লায়না থাদোকফমদি থোক্তে। থৌওং অসিগী খুত্থাংদা অদোমগী শহরদা অনৌবা পুন্সি ময়োল চোংলক্কনি। তুরেলগী মরু ওইববু করম্না হেনগৎহনগদগে হায়বগী মতাংদা ঐখোয়না করিগুম্বা খরা তৌফম থোকই।
সিঙ্গল য়ুজ প্লাস্তিক শিজিন্নবগী মতাংদা ঐখোয়গী শহরশিংদা করি হায়নরি হায়বা অদোম খুদিংনা থেংনরমগনি। ঐখোয়গী শহরগী দুকান ফম্বশিং, কারবার তৌবশিংদা অসিগুম্বা প্লাস্তিক শিজিন্নবা লেপ্না ঐখোয়না পাউতাক পীবা য়াই। মসিগী মহুত্তা, লাইরবনা শাবা চেখাও মচা মচা লৈরিবশিং শিজিন্নবগী হৈনবী লৈহন্নবা ঐখোয়না হায়বা য়াই। অদুগা হৌজিক্তি, সর্ক্যুলর ইকোনোমীগী মতাংদা মালেম শিনবা থুংবদা মিৎয়েং চঙবা হেনগৎলক্লি, ফত্ত-হৌদীদগী লন-থুমদা ওন্থোকপগী থৌওং পাংথোক্নরি। শহরশিংদা ফত্ত-হৌদীদগী লন-থুমদা ওন্থোকপগী চাংয়েংনবগী থৌওং শিন্দুনা হীরম অসিগী মতাংদা উৎপা অমসুং মার্কেতিং তৌনবা মেলা শিনবা য়াই। তেলেন্ত লৈবশিংনা অরিবা পোত্থোক কয়াবু শেমদোক-শাদোক্তুনা অনৌবা অমসুং ফজরবা পোত্থোক কয়া শাবা ঐখোয়না থেংনরে। মসিবু মফম চাবা মফমদা থম্লবদি, নীংথিরবা লৈতেংগী পোত্থোক ওইবসু য়াই। ঐখোয়না খ্বাইদগী ফবা মেনেজমেন্ত অমা লৌদুনা মসিদগী শেল তান্নবা মোদেল অমা শেম্বা ইয়াই। মোদেল অসি করম্না শেমগৎকনি হায়বগী মতাংদা ঐখোয়না হোৎনবা য়াই। অদুগা সিৱেজকী ঈশিং অসিসু ঐখোয়না অমুক্কা হন্না শিজিন্নবা য়াই। ঐখোয়না গার্দেন্দা ঈশিং শিজিন্নরি। খুঙ্গংগী ঈশিং লোইখ্রবা অমদুগা ঐখোয়না শহরগী ঈশিং পীয়ু হায়না তানবা মতমদা করি ফিভম ওইরক্কনি হায়বা অদোমসু অমুক্তা খন্থদুনা য়েংবীয়ু।
ঐখোয়না ঈশিং চুমথবগী থবক পাংথোক্লিবশিং অসিদা, সিৱেজকী ঈশিংবু ত্রিতমেন্ত তৌদুনা মদুদগী লাকপা ঈশিং অসিনা ঐখোয়গী গার্দেন অমসুং অতোপ্পা থবক্কী ওইনদি ঈশিং য়াম্না শিজিন্নবা ফংগনি। অদুনা, ফত্ত-হৌদীদদগী লন-থুমদা ওন্থোক্লে অমসুং ঈশিং মোৎপগী শিংনবসু লৈররোই। অদুগা শহরগী হকশেলদসু অহোংবা য়াম্না লাক্কনি। ঐখোয়না শহরগী হকশেলদা চেকশিন্নবা থবক পাংথোক্ত্রবদি, হোস্পিতাল কয়া অমা শারবসু অদুমক ৱাৎকনি। মসিদি মহৌশানা তাবনি, মরম অদুনা, ঐখোয়না ইশাগী শহরবু লু-নান্না অমসুং হকশেল ফনা থম্বা অসি ঐখোয় খুদিংগী থৌদাং ওইফম থোক্লবনি। ঐখোয়না ইমুংদ, লৈরক-খুল্লক, চাকখুমদগী থোক্লপা ফত্ত-হৌদি অমসুং য়ুম থুগাইবগী অকায়-অতোয়শিংবু মফম চানা পৈশিন্দুনা থমগদবনি, পংলঙদা লঙথোক্তুনা থম্লোইদবনি। হীরম অসিদা ঐখোয়না করম্না মখা চত্থগদগে হায়বা ঐখোয়না হোৎনগদবনি। অদুগা, মতমগা চানবা সিৱেজ ৱাতর ত্রিতমেন্ত প্লান্তকী মতমগা চুনবা মোদেল অমা সুরত্তা শেমখ্রিবা অসিনি। মসিদা সিৱেজ ৱাতরবু ত্রিতমেন্ত তৌরবা তুংদা ইন্দস্ত্রীশিংদা থারি অমসুং লোকর বোদীনা মসিদগী শেল তাল্লি, অসিগুম্বা থৌওং অসি শহর কয়া অমদসু পাংথোক্লম্বা য়াই। ঐহাক্না মসিগী মতাংদা খঙবদগী, ঐহাক্না কুপা তাক্লিবনি। অসিগুম্বা থৌওং অসিনা শহরগী শেন্দান্দসু কান্নহল্লি অমসুং শহর খুদিংনা অসিগুম্বা থৌওং পাংথোক্নবা হোৎনফম থোকই হায়না ঐহাক্না খল্লি। ঐখোয়গী শহরগী শেমখিবা নুমিৎ অসি ঐখোয়না খঙদোকফম থোকই হায়না ঐহাক্না খল্লি, অরিবা রেকোর্দ ফাক্তুনা থিদোকফম থোকই। অসিগুম্বা নুমিৎ অসি য়াম্না চাউনা পাংথোক্কদবনি। শহরগীদমক্তা ইশাদা চাউথোকচবা ফাওনবগীদমক্তা মখল খুদিংগী চাংয়েংনবা পাংথোকপা অমসুং শহরগী নাগ্রিক খুদিংগী পুকচেলদা মশাগী শহরগী অসিদি অসিগুম্বনি, ঐহাক্না অসিগুম্বা থৌওং কয়া পাংথোকফম থোকই হায়বা ৱাখল পোকহনবগী তঙাই ফদবা লৈ। ঐখোয়না অসিগুম্বা থবক পাংথোক্ত্রিবা মখৈ করি থোক্কনি, তেক্স হেনগৎলক্কদরা নত্ত্রগা হন্থরক্কদরা, অমুক্তা খনবীয়ু। ঐখোয়সু মসিগী মতাংদা কন্না খন্নরিবনি।
য়োগীজীনা মহাক্কী ৱারোলদা হৌজিক্তসু এল.ই.দি. বল্বকী মতাংদা ঙাংবীখ্রে। ঐখোয়গী শহরগী লৈরক অমত্তগী পোস্ততা এল.ই.দি. বল্ব খক্তমক থানগদবনি হায়না ঐখোয়না লেপ্পা য়াদবরা? শহরগী মৈগী বিল অসি ফজনা হন্থরক্কনি অদুগা ঙানবসু হেনগৎলক্কনি। ঐখোয়না মসিগী থবক অসিবু থা অমা নত্ত্রগা অনিগী মনুংদা লোইশিনগদবনি খন্দুনা অচৌবা খোঙথাং অমা ওইনা পায়খৎকদবনি। এল.ই.দি. নত্তবা বল্ব অমত্তা থানবা য়ারোই হায়বা ৱাফম থমদুনা অদোম্না ইশাগী শহরগী ভোতরশিংবু হরাওহন্নবা অসিগুম্বা থৌওং পাংথোকপা য়াই। য়ুম্থোং খুদিংদা এল.ই.দি. বল্ব থানবা মতম, মিদ্দল ক্লাসকী য়ুম্থোং খুদিংদা এল.ই.দি. বল্ব থানবা মতমদা মৈগী বিল য়াম্না হন্থগনি, লুপা ১০০, ৫০০, ১০০০গী চাংদা হনথরক্কনি। মিদ্দল ক্লাস ইমুংশিংগী ওইনদি শেল য়াম্না কল্লগনি, হেন্না তুংশিনবা ঙম্লগনি। অসিগুম্বা কান্নবা স্কিম শিজিন্নদনা ঐখোয়না মাং থানা মখা করম্না চত্থবা ঙমগনি।
হৌজিক নিংতম্বগী অমৃত মহোৎসব চত্থরি। শহরগী চাউখৎ-থৌরাংসু মীয়াম পুন্না শরুক য়াদুনা পাংথোক্কদবনি, অপুনবা অসিদা অহেনবা মিৎয়েং চঙগদবনি, মী য়াম্না পুল্লিবা মখৈ হেন্না খঙবা হেনগনি। অদোমগী শহরগী স্কুলশিংদা এন.সি.সি. য়ুনিৎ লৈরবদি, মখোয়গা ৱারী শাবীয়ু। অদোমগী শহরদা মীতম কইয়া, বাবা অম্বেদকর, মহাত্মা গান্ধী, স্বামী বিবেকানন্দা, অথৌবা ভগৎ সিংহ, মহারানা প্রতাপ, ছত্রপতি সিবাজী নত্ত্রগা অতোপ্পা তোঙান-তোঙানবা মীতম ওইবা য়াই, লৈরম্বা য়াই অমসুং মতম কাইথোক্লবদি, মখোয়গী মরমদা মীয়ামদা খঙহনবা য়াই। মখোয়বু শেম-শাবা মতমদা মতম অমদি শেল য়াম্না চঙখিবনি, অদুবু শাবা লোইরবা মতুংদদি, কনা অমত্তনা নীংশিংদে। চহি অমদা মখোয়গী মপোক নুমিৎ তাবা মতমদা, ঐখোয়না এন.সি.সি. কেদেতশিংদা কাঙবু শেমহন্দুনা মীতমশিংবু শেংদোকহনগনি। মখোয়না শেংলিবা মীতমগী মতাংদা মিনিত মঙা তরা কাইথোক্লগা মরী লৈনবা ৱাফম তাক্কনি, অনৌবা অঙাংশিংদা মখোয়গী মরমদা খঙহনগনি। শক্নাইরবা মীওই অসিনা অসিগুম্বা থবক তৌরমখি, ঙসি ঐখোয়গী পালিনি মীতম অসিবু শেংবগী। অসিগুম্না মখোয়দা ৱাফম কইয়া খঙহনবা য়াগনি। মসি য়াম্না পীকপা থবক্নি, অদুবু মপাঙ্গলদি য়াম্না লৈবনি।
ঐখোয়গী মতমসিদা, নিংতম্বগী অমৃত মহোৎসবকী মতম লাক্লিবনি। অদোমগী শহরদা লম্লোং ম,রি ফাংবা মফম লৈরমগনি। মসিদা সরকারদগী, প্রাইভেত পব্লিক পার্তনরশিপ নত্ত্রগা ম্যুনিসিপালিতীগী মতেং লৌদনা, শহরগী মীয়াম্না পুন্দুনা করিগুম্বা নিংশিংনীংঙাই ওইবা ফুরা শাবা য়াদবরা? নিংতম্বগী মতৌ উৎপা নত্ত্রগা নিংতম্বগী ইহৌগা মরী লৈনবা নত্ত্রগা লৈবাক্কীদমক্তা অফবা তুংগী ফিভম তাকপা তোপ-তোপ্পা ফুরা অমা। মসিবু আর্তিস্তশিংগী ওইবা চাংয়েংনবগী খুত্থাংদা পাংথোকপা য়াই। খ্বাইদগী অথোইবদা মনা পীবসু য়াই। মসিদগী কনানা শাগনি হায়বা খনগনি। অদোমগী পুন্সিগী নীংশিংনীংঙাই ওইবা খুভম অমা থনম্লগনি। ঐখোয়না পুক্নিং থৌগৎফম থোকপা থৌওং কইয়া অমা লৈ হায়বা ঐহাক্না খঙই। মতৌ অসিগুম্না অদোমগী শহরগী অনৌবা শক্তাক অমা শেমগনি। অদোমগী শহরগী শক্তা অমা লৈবা অদোম্না পামদবরানে? অচা-অথক ওইরো নত্ত্রগা অতোপ্পা হীরম অমগীদমক্তা খঙনবা পামদবরনে? খুদম ওইনা হায়রবদা, বনারসকী ক্বা, মফম খুদিংদা চৎলবসু, মসিগী মমিং অদুম লৈবনি। কনাগুম্বা অমনা শোইদনা হোৎনরমগনি, অদুনবু শক্তাক ওইরিবনি। অদুগা মেয়র খুদিংনা বনারসকী ক্বা মহাও তংল্মবসু য়ারে। ঐহাক্না হায়জনীংবদি, অদোমগী শহরদসু অসিগুম্বা তোপ-তোপ্পা পোত্থোক অমা শোইদনা লৈরমগনি, নত্ত্রগা পুৱারীগা মরী লৈনবা মফম অমা, মখোয়শিং অসিদগী অদোমগী শহরগী মমিংগী ব্রান্দ শেম্বা য়াগনি।
ঐখোয়গী শহরশিং অসি ঐখোয়গী শেন্মিৎলোন চলায়বগী শাফুনি। ঐখোয়না শহরশিংবু মতিক লৈবা শেন্মিৎলোনগী হব অমা ওইহনগদবনি। শেন্মিৎলোনগী থবক থৌরমগী পুক্নিং চিংশিনবা অমসুং খুমাং চাউশিলহনবা ইকোসীস্তেম অমা শেম্নবগীদমক্তা খুদোংচাবা খুদিংমকপু মতম অমতদা শেমগৎপা অপুনবা পথাপ অমা শেমগৎকদবনি। ঐখোয়গী চাউখৎ-থৌরাংগী মোদেলদা এম.এস.এম.ই.বু মতৌ মপাঙ্গল হেনগৎহনবগী মথৌ তারিবা অসিদা মিৎয়েং চঙসি। লম্বীদা পোৎ য়োনবশিং অসি ঐখোয়গী খোঙচৎকী শরুক অমনি। ঐখোয়না মখোয়গী অৱাবশিং মতম খুদিংদা উগনি। মখোয়গীদমক্তা পি.এম. স্বনিধী য়োজনা পুরক্লি। মসিনা য়াম্না কান্নবা স্কিম্নি। অদোমগী মফমদা লৈবা মখোয় ময়ামগী পরিং শেমসি অমসুং মখোয়দা মোবাইল ফোন্দা ত্রাঞ্জেক্সন তৌবা তম্বীসি। মসিনা বেঙ্কশিংনা ফজবা তর্মশিংগী মখাদা শেল থাদবদা য়াম্না তেংবাংগনি। মখোয়গী মরু ওইবশিং অসি লাইচৎ মনুংদা য়াম্না ময়েক শেংনা উখ্রবনি। ঐখোয়গী লম্বীদা পোৎ য়োনবশিংনা অসুক য়াম্না চাউরবা কারবারগীদমক্তা শেন্দোই য়াওদনা শেল্লেপকী তেংবাং ফংবা মতমদা মখোয়না নীংথিনা মথৌ পাংথোক্কনি, মচা-মশুগী মহৈ-মশিংদা অহেনবা মিৎয়েং চঙবা ঙমদুনা মগুন লৈবা মহৈ তমহনবা ঙমগনি। মখোয়না অফবা পোৎ য়োনবা হৌবসু ঙম্লগনি, কার্বার চাউনা তৌবসু ঙম্লগনি। মখোয়না অফবা পোৎ য়োল্লবদি, অদোমগী শহরগী মীয়ামদসু অফবা সেবা তৌবা ঙমগনি। অদোম্না প্রধান মন্ত্রী স্বনিধী য়োজনাদা অহেনবা মিৎয়েং চঙবা ঙমগদরা? কাশি লমদমগী ইমা গঙ্গাগী থৌজাল লৌদুনা হনবীখ্রো, অদুগা ইং ২০২২গী জনুৱারী ২৬কী মমাংদা, ঐখোয়না মসিগী থৌওং অসি হান্না পাংথোক্কনি খনবীরো। জনুৱারী ২৬কী মমাংদা অদোমগী শহরদা লৈরিবা লম্বীদা পোৎ য়োনবা মীওই ২২০, ৫০০, ১০০০, ২০০০গী বেঙ্ক একাউন্ত হাংলগনি, মখোয়দা দিজিতেল ত্রাঞ্জেক্সনগী ত্রেনিং পীরগনি। মখোয়না চৎলুবা মফম খুদিংদা মখোয়দা দিজিতেল ত্রেনিং পীরবদি, মখোয়গী কারবার অদু উনা-উনা দিজিতেল কারবার ওইরক্কনি, হেনগৎলক্কনি। অদুগা ঐহাক্কী অসিগুম্বা মরুপশিংনা খ্বাইদগী পীকপা শেন্দোইদা মশাগী কারবারদা থাদনবা শেল্লেপ ফংদুনা মশাগী কারবার চাউথোকপগী অচৌবা খুদোংচাবা অমা ফংলগনি।
ৱারী য়াম্না লৈখ্রে, মরুপশিংনা মফমসিদা লাকপীরে, কাশিবু য়াম্না নক্না য়েংলে অমসুং ইশাগী ৱাখল্লোন্দা হায়নীংবা অমসুং পাউতাক কইয়া লৈরমগনি। অদোম্না অদুগুম্বা ৱাফমশিংবু ঐহাক্কী ইফমদা থাবীরক্লবদি, ঐহাক্না কাশিদা মখা তাবা থবক চত্থবদা য়াম্না মতেং ওইগনি। অদোম্না মেয়র ওইনা পাংথোকখিবা অমসুং অসিগুম্বা থবকশিং অসি মোদীজীনসু পাংথোকফম থোকই হায়না খনবা লৈরমগনি। অদোম্না ঐহাক্কী ইফমদা হায়বীরক্লবদি ঐহাক্না মতম পুম্বদা তৌবীমল খঙজগনি। মসিগী মরমদি, ঐহাক্না অদোমদগী তম্বা পামজৈ। অদোম্বু মফমসিদা কৌরিবা অসি, অদোম্না ঐহাক্কী কাশিদা করিগুম্বা খরা তাকপী-তম্বীরম্নবগীদমক্তনি, অনৌবা থৌওংগী মতাগদা হায়বীরম্নবনি, ঐখোয়না অমসুং কাশিনা অদোমদগী শোইদনা তমজগনি। অদোম্না তাকপীরম্বা খুদিংমক ঐখোয়না কাশিদা শোইদনা পাংথোক্কনি অমসুং ঐহাক্না খ্বাইদগী অহানবা মহৈরোই ওইগনি। মেয়র হায়বসি মীয়ামগী সেবা পাক চাউনা তৌনবা রাজনিতীগী পুন্সিদা খোঙদাবগী খোঙথাং অমা ওইবা য়াই হায়বা অদোম্না খঙবীরম্লগনি। সরদার বল্লবভাই পতেলসু অহমেদবাদ শহরগী মেয়র ওইরম্মি হায়বা খঙবীরম্লগনি। মসি য়াম্না পীকপা শহর অমা ওইরম্মি। মহাক্না লোইলম লৈঙাক্কী মখাদা লৈরিঙৈদা মেয়র ওিরম্বনি, মসিদগী মহাক্কী পুন্সিগী খোঙচৎ হৌখিবনি। লৈবাক্না মহাকপু ঙসিসু নীংশিংলি। মশাগী পুন্সিগী খোঙচৎ অসি ম্যুনিসিপালিতী, মহানগরদগী হৌখিবা নেতা কইয়া অমা লৈ। অদোমগী পুন্সিসু অসিগুম্বা তাঙ্কক অমদা লৈরি, অদোমসু অদোমগী রাজনিতীগী তুংগী পুন্সিগীদমক্তা ইশাগী লমদমগী অফবা তৌদুনা, মতমগা চুনবা মওংদা শেমগৎ-শাগত্তুনা অফবা তুং অমা শেম্না হোৎনগদবনি। ইশাগী লম্বীসু শেমগদবনি, চাউখৎ থৌরাংসু পুরক্কদবনি, মঙালনা খুদিংমকপু পুন্না পুদুনা চৎকদবনি। ঐহাক্না ঐহাক্কী মাইকৈদগী অদোম খুদিংবু কাশিগী মাইকৈদগী ইমুক্কা হন্না তরাম্না ওকচরি, অমসুং কাশিনা অদোমবু নুংঙাইনা থম্বীরমগনি হায়না ঐহাক্না থাজবা থম্মি। কাশিদি মীয়াম্বু য়াম্না নুংশিবা লমনি, অদোম্না মসিগী মতৌ অসিবুসু থেংনরমগনি অমসুং মখোয়গী থৌজাল পুদুনা হনবীয়ু।
পুম্নমকপু হন্না হন্না থাগৎচরি।
