য়োর এক্সেলেন্সী
রাস্ত্রপতি ধনি,
অদোমগী মমল য়াম্লবা ৱাফমশিংগীদমক ঐনা থাগৎচরি। অদোমগা লোয়ননা শরুক য়াবিরিবা অফঘানিস্তানগী মকোক থোংবা ওফিসরশিং,
মরূপশিং,
খুরুমজরি!
অহানবমক্তদা ঐনা অদোমগী মফমদা ঙাকপীনবা হায়জরি, ঐ য়ৌরকপদা খরা থেঙখ্রে, ঐখোয়গী পার্লিয়ামেন্ত মীফম চত্থরি, পার্লিয়ামেন্তকী থবক খরনা মরম ওইরগা মফমদুদা ঐ পন্থদবা য়াদদনা পন্থরক্লে। ঙসি ঐখোয়না ভারত-অফঘানিস্তানগী মরূপ মপা ওইবগা শাংলবা লম্বীসিদা পন্দোল অমা অমুক হাপচিনগদৌরি। ভারত অমসুং অফঘানিস্তাম জিওগ্রাফীদা নত্তনা ঐখোয়গী পুৱারী অমসুং নাৎ-চৎনবীদসু তোৎন-তিন্নদুনা লাক্লি, অমনা অমবু তেংবাংনদুনা লাক্লি। চহী চা কয়া ঈ-পাউ ফাওনদুনা লাক্লিবা অসি ঐখোয়গী লোল, ঐখোয়গী চাকচা-য়ুথক, ঐখোয়গী ঈশৈ নোংমাই, ঐখোয়গী লোইনসিল্লোন্দা মমি তারি।
মরূপশিং,
পুম্নমক্না খঙই মদুদি তুরেল হায়বসি অচৌবা খুন্থোক্লোন কয়াগী হৌরকফম ওইদুনা লাক্লি। তুরেলশিংনা থৱায় হাপ্তুনা ঐখোয়গী লৈবাক, ঐকোয়গী খুন্নাইগী চৎনলোলবু থৌদুনা লাক্লি। ভারত্তা ঐখোয়না ঐখোয়গী গঙ্গা তুরেলবু ইমা অমা ওইবগী থৌগল উৎলি, মসিগী ফীভম শেংনা থম্নবগীদমক ঐখোয়না ‘নমামি গঙ্গে’ থৌরম হৌদোকখি। তুরেলশিংবু লুম্না লৌবগী চৎনবী অসি ভারত অমসুং অফঘানিস্তানগী তৎন-থানবা য়াদ্রবা অথোইবা লন্নি। লমদমসিগী রিগবেদদা ‘তুরেল শৈথারোল’না মফমসিদা চেল্লিবা তুরেলশিংবু শিংথারি। মৌলানা জলালুদ্দিন রুমীনা তুরেলশিংগা মপাঙ্গল কল্লবা খুন্থোক্লোনগা লৈনবা মরীগী মরমদা “নহাক্কী নফমদা চেল্লিবা তুরেলদু ঐগী ইফমদসু চেল্লি” হায়না হায়বিরম্মি।
মরূপশিং,
হৌখিবা চহী ২০লোমসিদা ভারত অমসুং অফঘানিস্তানগী লুচিংবশিং চাউখৎপগী খোঙবু ওইদুনা লাক্লি। অফগানিস্তান্তা ঐখোয়গী চাউখৎ থৌরাংগী প্রোজেক্তশিং ইনফ্রাস্ত্রকচর, কেপাসিতী বিল্দিং, লৌউ-শিংউ, মহৈ মশিং, হকশেলনচিংবা সেক্তর কয়ামরুমদা পায়খৎলি। চহী তরামুক্কী মমাঙদা পুল-এ-খুমরীদা ত্রান্সিসন লাইন হৌদোকপদগী কাবুল ময়োল্লমদা মৈগী ফীভম ফগৎলকখি। কিলোমিতর ২১৮ শাংবা দেলারম-জরঞ্জ রাজমার্গনা অফঘানিস্তানগী চাউখৎ লমজেলদা অনৌবা পন্দুপ অমা হাপখি। চহী খরগী মমাঙদা “মৈত্রী বাঙ্ঘ”না হেরাত্তা মৈ অমসুং ঈথৈ লৌখোঙগী সিস্তেম ফগৎলকখি। অফঘানিস্তানগী পার্লিয়ামেন্ত শেমগৎখিবা ভারত অমসুং অফঘানিস্তানগী মীয়ামগী দিমোক্রেসীগী মরুওইবা পন্দুপ অমা ওইরি। হায়রিবা প্রোজেক্ত পুম্নমকসিদা মকোক থোংবা ৱাফম অমদি মসিনা ভারত অমসুং অফঘানিস্তানগী মরূপ মপাং ওইবগী মরী, তেংবাংনবগী মরী হেন্না চেৎশিলহল্লি। মরূপ মপাং ওইবগী, নকশিন্নবগী মরী অসি কোবিদ লাইচৎ থেংনবদসু ঐখোয়গী মরক্তা লৈখি। হিদাক লাংথক ওইরবসু, পি.পি.ই. ওইরবসু, নৎত্রগা ভারত্তা শাবা ভেক্সিন সপ্লাই তৌবদা ওইরবসু ঐখোয়গী ইফমদা অফঘানিস্তানগী মথৌ তাববু মতম পুম্নমক্তা মরু ওইনা লৌদুনা লাক্লি অমদি লৌখিগনি। মরম অসিনা ঙসি কাবুলদা সাহতুত দাম শেমগৎপগী মতাঙদা য়ানবা ৱাফম অমা পুরক্লিবসিগী য়ুম্ফম চেক অমসুং নুংখক্তা নত্তনা ভারত-অফঘানগী মরূপ মপাং ওইবগী থৌনানা থোনগনি হায়না ঐনা হায়বা ঙম্মি। কাবুল ময়োল্লম ভারতকী পুক্নিং-ৱাখলদা লৈরি। অদোম্না হায়খিবগুম মীরোল কয়ানা গুরু রবিন্দ্রনাথ তেগোরগী ‘কাবুলিৱালা’ ৱারী পাদুনা চাউরকখিবনি। মরম অসিনা সাহতুত দাম প্রোজেক্তনা কাবুল ময়োল্লমগী মীয়ামদা থক্নবা ঈশিংগী খুদোংচাবা পীগনি হায়বসিদা ঐঙোন্দা অখন্ননা নুংঙাইবা ফাওই। লোয়ন-লোয়ননা কাবুল তুরেল বেসিন্দা ঈথৈ লৌখোংগী নেতৱর্ক অমসু শেমগৎলগনি।
মরূপশিং,
ঐনা পার্লিয়ামেন্ত হাউস শঙ্গাবগীদমক দিসেম্বর ২০১৫দা মফমসিদা লাকপা মতমদা ঐনা অফঘান নুপা, নুপী অমসুং অঙাঙ খুদিংমক্কী মীত্তা ভারতপু নুংশিবগী মমি উখি। অফঘানিস্তান্দা চৎপা মতমদা মীতোপ অমগী য়ুমদা চৎপদৌনা ঐঙোন্দা ফাওখিদে ‘খানা-এ-খুদ-অস্ত’ মফমসিদা ঐগী ইয়ুমগুম্না ফাওখি! ঐনা বদখসানদগী নিমরোজ ফাওবা অমদি হেরাত্তগী কন্দাহার ফাওবদা লৈরিবা অফঘান ইচিন ইনাউ খুদিংদা ভারতনা অদোমগীদমক লেপকনি হায়না থাজবা থমজরি। অদোমগী খাঙবা কনবা, থৌনা অমসুং হোৎনবা কনবগী খোঙচৎকী খোঙথাঙ খুদিংদা ভারতনা অদোমগীদমক লেপকনি। মপানগী শাফু অমত্তনা অফঘানিস্তানগী চাউখৎপদা নৎত্রগা ভারত-অফঘানিস্তানগী মরূপ মপাং ওইবগী মরীদা অপনবা পীবা ঙম্লোই।
এক্সেলেন্সী,
অফঘানিস্তান্দা হেনগৎলক্লিবা হিংসাগী থৌদোকশিংগীদমক ঐখোয়না নুংনাংলি। মরাল লৈজদ্রবা মীয়াম, পাউমী অমসুং থৌমীশিংবু অয়ম্বা মওংদা ওৎপি নৈবিবা কয়া থোক্লি। ঐখোয়না হিংসাবু খুদক্তা লেপ্নবা ৱাফম থমজরি অমদি অথুবা মতমদা খুৎ থোক্নবা লেপ্নবা ৱাফমসু থমজরি। হিংসা হায়বসি ইং চিকপগী ওন্ন-তৈনবনি অমদি হায়রিবা অনি অসি পুন্না চৎমিন্নবা য়ারোই। নক্নবা য়ুম্লোন্নবা অমসুং মপাঙ্গল কল্লবা স্ত্রেতেজিক পার্ত্নর অমা ওইনা ভারত অমসুং অফঘানিস্তান অনিনা মখোয়-মখোয়গী লমদমবু তেরোরিজম অমসুং তেরোরিস্তকী তমথিরবা লাংফমদগী মনীং তমহনবা পাম্লি। অফঘানিস্তান্তা লুচিংবা, অফঘানিস্তান্না মপু ওইবা অমসুং অফঘানিস্তান্না খুৎলি পায়বা ইং চিকপগী থৌরাং ভারতনা শৌগৎকনি।
অফঘানিস্তানগী মীয়ামগী অমত্তা ওইবগী শক্তম হেন্না মপাঙ্গল কলহনবা মথৌ তাই। লিংজেল মান্নবা অফঘানিস্তান্দা শিংনবা খুদিংমক থেংনবা ঙম্বগী থৌনা লৈগনি হায়না ঐনা থাজৈ। অফঘানিস্তান্না মায় পাকপদা ঐখোয়না ভারতকী অমসুং অপুনবা লমদম অসিগী মায় পাকপা উই। ঐনা অমুক্কা হন্না অফঘান মরূপ পুম্নমক্কী মফমদা ভারতকী মরূপ মপাং ওইবগী থাজবা পীরি। অদোম্না ভারত্তা থম্লিবা থাজবগীদমক্তা ঐনা ঐগী নুংশিরবা অফগান ইচিল ইনাউশিংগী মফমদা তৌবিমল খঙবা উৎচরি।
তশক্কুর,
থাগৎচরি
