লৌউ-শিংউগী লমদা রিছর্স অমসুং দিবলপমেন্তদা প্রাইভেদ সেক্তরগী থৌদাং হেন্না দরকার ওইরে হায়না ফোঙদোক্লি
লায়রবা লৌমীশিংগী ফিবম ফগৎহনবা অসি সরকারগী পান্দমগী মরুওইবনি: প্রধান মন্ত্রীশেম-শারবা চীঞ্জাক্কীদমক ঐখোয়গী লৈবাক্কী লৌউ-শিংউগী থবকশিং ঐখোয়না মালেমগী কৈথেল য়ৌহনগদবনি: প্রধান মন্ত্রীখুরুমজরি!
হন্দক্কী চহিগী বজেৎ অসিদা নখোয়না পীরকপা পাউতাকশিংবু ঐখোয়না নীংথিনা খন্নখি। অদুগা অদোম্না বজেৎ উবা মতমদসু নখোয়গী পাউতাকশিং, ৱাখল্লোনশিংবু ঐখোয়না বজেৎকী মনুং চলহন্নবা হোৎনবগী থৌওং উবা ফংলমগনি। মদুগী থবক অদুদি পাংথোকখ্রে, অদুগা ঙসিগী ৱা খন্নরিবা অসিদি লৌউ-শিংউববু হেন্না ফগৎহনবা অমসুং বজেৎ অসিদা য়াওরিবা খুদোংচাবশিংবু মাংদা খোঙজেল য়াঙনা পুদুনা, মীওই খুদিংমক ফংহন্দুনা অকক্নবা মতমগী মনুংদা পাংথোক্নবা হোৎনবগী মতাংদনি। থৌওংশিং অসিবু মমুৎ তানা অমসুং মীয়াম পুন্না তেংবাংমিন্নদুনা পাংথোক্কদবনি। পব্লিক অমসুং পারিভেৎকী খুৎশম্ননা থবক তৌমিন্নবগী নীংথিরবা খুদম অমা, কেন্দ্র অমসুং রাজ্যগা খুৎশম্ননা চৎমিন্নবগী নীংথিরবা খুদম, হায়রিবশিং অসি ঐখোয়না ঙসিগী খন্ন-নৈনবা অসিদা পুখৎনীংই।
ঙসিগী ৱেবিনার অসিদা লৌউ-শিংউ, দাইরী, ঙা-য়োকপনচিংবা তোঙান-তোঙানবা অখঙ-অহৈশিংসু য়াওরি, পব্লিক, প্রাইভেৎ অমসুং কো-ওপরেতিব সেক্তরগী মরূপশিংসু য়াওরি, ঙসিদি ঐখোয়না মখোয়গী ৱাখল্লোনশিংদগীসু কান্নবা কয়া অমা ফংগনি। অদুগা লৈবাক অলসিগী খুঙ্গংগী শেন্মিৎলোন্দা শেল থাদগদবা বেঙ্ক কয়াগী মীহুৎশিংসু য়াওরি।
নখোয় খুদিংমক অসি মরোমদোম লেপচবা ঙম্বা ভারত অমা ওইহন্নবা মরোমদোম লেপচবা ঙম্বা খুঙ্গংগী শেন্মিৎলোনগী মরু ওইবা স্তেকহোলদরশিংনি। ঐহাক্না মতম খরগী মমাংদা পার্লিয়ামেন্ততা লৈবাক্কী অপিকপা লৌমীশিংবু ৱাখল্লোন্দা থমদুনা সরকারনা হৌখিবা চহিশিংদা মশক থোকপা ৱারেপ কয়া লৌখি হায়না ফোংদোকখি। মসিগী অপিকপা লৌমীশিং অসিগী মশিং অসি চাউরাক্না করোর ১২নি অমসুং মখোয়বু মপাঙ্গল হাপ্পা অমসুং মখোয়বু খুমাং চাউশিলহনবা অসিনা লৈবাক অসিগী লৌউ-শিংউগী শিংনবা কয়া অমা কোকহনবদা য়াম্না তেংবাংগনি। মসিদা নত্তনা, খুঙ্গংগী শেন্মিৎলোনগী শাফুসু মখোয়না ওইগনি।
ঐহাক্না ঐহাক্কী ৱারোল অসি মখা তাদ্রিঙৈগী মমাংদা, লৌউ-শিংউগীদমক্তা বজেত্তা য়াওরিবশিং অসিবু মীয়াম মাংদা অমুক্কা হন্না তমজনীংই। নখোয়না ৱাফমশিং অসিগী মতাংদা খঙলে হায়বা ঐহাক্না খঙজৈ। হন্দক্কী মতাং অসিদা সরকারনা লৌউ-শিংউগী ক্রেদিৎকী পান্দম্বু হেনগৎহন্দুনা লুপা করোর লাখ ১৬কা লিশিং ৫০ ওইহনখ্রবনি। ঐখোয়না শা-য়েন লোইবা, দাইরী অমসুং ঙা-য়োকপদসু মিৎয়েং চঙলে। খুঙ্গংগী ইনফ্রসাস্ত্রকচরগী ফন্দবুসু হেনগৎহন্দুনা করোর ৪০,০০০ ওইহনখ্রবনি। মাইক্রো ইরিগেসনগী ওইনসু ফন্দগী শরুক অসি হান্নদগী ২ থোক্না হেনগৎহনখ্রবনি। ওপরেসন গ্রীন স্কিমগী পাক-চাউবসু হেনগৎহন্দুনা মসিগী মনুং চনবা অমাঙ-অতা থোকপা য়াবা পোত্থোক্কী মশিং অসি ২২ ওইহনখ্রবনি। লৈবাক অসিগী মন্দী ১০০০ অমবুসু ই.-নামগী মনুং চলহন্নবা ৱারেপ লৌখ্রে। মসিগী ৱারেপশিং অসিদা সরকারগী করি ৱাখল্লোন লৈবগে হায়বা নীংথিনা তাক্লি। সরকারগী অপাম্বা খঙবা ঙম্লে অমসুং লোয়না-লোয়ননা, সরকারগী মঙলানবুসু মীয়াম্না খঙনরে। মসিগী ৱাফমশিং অসি নখোয়গা খন্নরবা তুংদা ওইরকখিবনি। অমসুং ঐখোয়না মসিবু হেন্না মাই-পাকহনবনি। লৌউ-শিংউগী পোত্থোকশিং নোংম-নোংমগী হেনগৎলক্লিবা অসিগা লোয়ননা ২১শুবা চহি-চাগী ভারতনা পোস্ত হার্ভেস্ত রিভোল্যুসন নত্ত্রগা ফুদ প্রোসেসিং রিভোল্যুসন অমসুং ভেল্যু এদিসনগী মথৌ তারক্লি। মসিগী থবক অসি চহি ১০ খুজিং অনি-অহুমগী মমাংদগী পায়খৎপা হৌরম্লবদি লৈবাক অসিগী ওইনা য়াম্না কান্নবা অমা ওইরমগদবনি। অদুবু হৌখ্রবা মতম অসিগীদমক্তা ঐখোয়না মেনখৎপা হায়বসিদি শোইদনমক্কী তৌগদবনি অমসুং লাক্কদৌরিবা মতমশিং অসিদা নখোয়নসু খোঙজেল য়াঙনা তানখৎপা ঙম্নবা শেম-শাদুনা লৈগদবনি।
মরূপশিং,
ঐখোয়না ঙসি ঐখোয়গী দাইরী সেক্তরদা য়েংবদা, মসিনা মপাঙ্গল য়াম্না কন্না লৈবা ওইনা উরিবা অসি চহি ১০গী খুজিংশিং অসিদা প্রোসেসিংগী থৌওং কয়া অমা হৌদোকখিবননি। ঙসিদি, ঐখোয়না লৌউ-শিংউবগী সেক্তর খুদিংদা, মসিগী উহৈ, মনা-মশিং, ফিশরীনচিংবা হীরম খুদিংদা প্রোসেসিংগী থৌওং অসিদা অহেনবা মিৎয়েং চঙগদবনি অমসুং মসিবু হেন্না শেমদোকপদা থবক তৌবগী মথৌ তারবনি। লৌমীশিংনা মখোয়গী খুঙ্গংগী মনাকমক্তদা পোত্থোক থম্নবা খুদোংচাবা লৈবা, লবুক্তগী প্রোসেসিং য়ুনিৎ ফাওবা য়ৌহনবগী পাম্বৈশিংদা ফগৎহনবা, প্রোসেসিং য়ুনিৎশিংবু মখুৎ শম্বীদুনা লমজিং-লমতাকপীবা অসিসু ফার্মর প্রদ্যুসর ওর্গনাইজেসনশিংনা পুন্দুনা পাংথোক্মিন্নগদবনি। অদুগা ফুদ প্রোসেসিংগী ইহৌ অমা পুরক্নবগীদমক্তা লৈবাক অসিগী লৌমীশিংগা লোয়ননা পব্লিক-প্রাইভেৎ কোর্পোরেৎ সেক্তরসু মশাগী অপুনবা মপাঙ্গলগা লোয়ননা মাং থানা থোক্লকপগী মথৌ তাই।
মরূপশিং,
লৈবাক অসিগী লৌমীশিংনা কৈথেলশিংদা মখোয়গী পোত্থোকশিংগী মতাংদা য়ারিবমখৈ অপাম্বা খনবগী খুদোংচাবা ফংহনবা অসি হৌজিক্কী মতমগী খ্বাইদগী তঙাই ফদবা হীরম্নি। অহিংবা পোত্থোক নত্ত্রগা মখোয়গী পোত্থোক খক্তদা অকক্নবা লৈবদগী ওইরকখিবা মাঙজবা কয়া অমা ঐখোয়না উবা ফংখ্রে। ঐখোয়না লৈবাক্কী লৌউ-শিংউগী সেক্তরবু প্রোসেস তৌরবা চিঞ্জাক্কী মালেমগী কৈথেল ফাওবা চাউথোকহনবগী তঙাই ফদবা লৈরে। ঐখোয়না খুঙ্গংশিংগী মনাকমক্তদা এগ্রো-ইন্দস্ত্রীগী ক্লস্তরশিংগী মশিং হেনগৎহন্দুনা খুঙ্গংগী মীওইশিংদা লৌউ-শিংউগা মরী লৈনবা থবক ফংহনবগী মথৌ য়াম্না তারে। ওর্গানিক ক্লস্তর, এক্সপোর্ত ক্লস্তরশিংগীসু হীরম অসিদা অচৌবা থৌদাং লৈগনি। লৌউ-শিংউগী খ্বাইদগী ফরবা পোত্থোকশিং অসি খুঙ্গংশিংদগী শহর ফাওবা য়ৌহনবা অমসুং ইন্দস্ত্রীগী অতোপ্পা পোত্থোকশিং অসিনা শহরদগী অমুক খুঙ্গংশিংদা য়ৌহনবা অসিগুম্বা ফিভম অমা পুরক্নবা ঐখোয়না হোৎনগদবনি। হৌজিকসু লৈবাক অসিদা মাইক্রো ফুদ প্রোসেসিং য়ুনিৎ লাখ কয়া অমা লৈরি। অদুবু মখোয়শিং অসিবু পাকথোক চাউথোকহন্দুনা, মখোয়গী মতিক হেনগৎহনবা অসি য়াম্না মরু ওইবা অমসুং হৌজিক্কী মতমগী খ্বাইদগী তঙাই ফদবা থবকশিংগী মনুংদা অমনি। জিলা অমা, পোত্থোক অমা হায়রিবা স্কিম অসিবু মালেমগী কৈথেলদা মতৌ করম্না য়ৌহনবা হায়বা হীরম অসিদা ঐখোয় পুম্নমক্না ৱাখল খনগদবনি।
মরূপশিং,
লৌউবা খক্তা নত্তনা, ফিশরীগী সেক্তরদা ফাওবা প্রোসেসিং তৌবগী অচৌবা মতিক অমা ঐখোয়গী লৈবাক অসিদা লৈরি। ঐখোয় অসি মালেমগী ঙা পুথোকপা অমসুং মীরমদা থাদোকপা লৈবাকশিংগী মনুং চঞ্জরবসু, প্রোসেস তৌরবা ঙাবু মালেমগী কৈথেলদা য়ৌহনবগী মতাংদদি য়াম্না মনিঙদা লৈরি। ভারতকী ঙা, নোংপোক এসিয়া ফাওদুনা প্রোসেস ওইরবা মওংদা ওন্থোক্তুনা মালেমগী কৈথেলশিংদা য়ৌই। মসিগী ফিভম অসিদা অহোংবা পুরকপা তাবনি।মরূপশিং, মসিগীদমক্তা থবক থৌরমশিংদা শেমদোকপদগী হেন্দোক্তুনা চাউরাকপা লুপা করোর লিশিং ১১গী প্রদক্সন লিঙ্ক ইন্সেন্তিব স্কিম অমসু ভারত সরকারনা শেমখ্রবনি অমসুং ইন্দস্ত্রীশিংনা মসিগী খুদোংচাবা লৌবা য়াগনি। চাবা য়ারবা, থোংবা য়ারবা উহৈ অমসুং মনা-মশিং ওইরো, সী ফুদ ওইরো, মোজারেলা চীজ ওইরো, অসিগুম্বা তোঙানবা পোত্থোক কয়া অমগী পুক্নিং থৌগৎলি। কোবিদকী মতুংদা অসিগুম্বা অফবা পোত্থোক কয়াগী অপাম্বা কয়া য়াম্না হেনগৎলক্লে হায়বসি নখোয়না ঐঙোন্দগী হেন্না খঙলবনি।
মরূপশিং,
ওপরেসন গ্রীন স্কিমগী মখাদা উহৈ অমসুং মনা-মশিংবু কিসান রেলদা পুথোক-পুশিন তৌবদা ৫০%গী সবসিদী ফাওবা পীরবনি। কিসান রেল অসি লৈবাক অসি কোল্দ স্তোরেজ নেৎৱর্ক্কী মশক থোকপা পাম্বৈ অমনি। মসিগী কিসান রেল অসিনা অপিকপা লৌমীশিং, ঙা-ফাবশিংবু অপাম্বা য়াম্না লৈবা কৈথেলশিংগা নক্নহনবদা মাই পাক্লি। হৌখিবা থা তরুক অসিদা চাউরাক্না কিসান রেল ৩৫০ মুক চেনখ্রে অমসুং মসিগী খুত্থাংদা উহৈ অমসুং মনা-মশিং চাউরাক্না মেত্রিক তোন লাখ ১ হেন্না পুথোক-পুশিন তৌখ্রে। ত্রেন অসি অপিকপা লৌমীশিংগী অচৌবা তেংবাং অমা ওইবতা নত্তনা কঞ্জ্যুমর অমসুং ইন্দস্ত্রীশিংনসু মসিগী কান্নবা কয়া অমা লৌরি। মরূপশিং, লৈবাক অসিগী জিলা খুদিংদগী পুরকপা উহৈ, মনা-মশিংগী প্রোসেসিং তৌনবা ক্লস্তর শানবা মিৎয়েং চঙদুনা কন্না হোৎনরি। মতৌ অসিগুম্না, আত্মানির্ভর ভারত অভিয়ানগী শরুক অমা ওইনা মখাদা প্রধান মন্ত্রী মাইক্রো ফুদ প্রোসেসিং ইন্তর্প্রাইস অপগ্রেদেসন স্কিমগী মখাদা অপিকপা ফুদ অমসুং প্রোসেসিং য়ুনিৎ লাখ কয়া অমদা তেংবাংলি। মসিগীদমক্তা মথৌ তাবা ইনফ্রাস্ত্রকচরদগী হৌদুনা য়ুনিৎশিং শেম্বদা নখোয়না শৌগৎপা অসি য়াম্না মরু ওইরি।
মরূপশিং,
ফুদ-প্রোসেসিংগা লোয়ননা ঐখোয়না ঐখোয়গী অপিকপা লৌমীশিংনা মতমগা চান্নবা তেক্নোলোজী ফংহনবা অসিদসু ঐখোয়না মিৎয়েং চঙফম থোকই। লৈবাক অসিগী অপিকপা লৌমীশিংনা ত্রেক্তর অমদি অতোপ্পা মেছিনশিং লৈবা ঙম্নদে। ত্রেক্তর অমসুং অতোপ্পা খুৎলায়শিংবু ৱাইনদুনা শিজিন্নবা য়াবগী খুদোংচাবা কয়া ঐখোয়না লৌমীশিংদা ফংহনবা য়াগদরা? হৌজিক্কানগী মতমসিদা, এরোপ্লেন ফাওবদা পুঙদা য়ুম্ফম ওইদুনা ৱাইনবা য়ারবা মতম অসিদা, লৌমীশিংগীদমক্তা অসিগুম্বা খুদোংচাবশিং অসি লৈবাক অসিদা লৈহনবা য়ারবনি। লৌমীশিংগী লৌরোকশিংবু মন্দি ফাওবা য়ৌহন্নবগীদমক্তা কোরোনাগী মতমদা ত্রক এগ্রিগেতরশিং অসি থাক থেংখাং অমা ফাওবা শিজিন্নখি। অদুগা মসিবু মীওইশিংনসু পাম্নখি। মসিগী থৌওং অসি লবুক্তগী মন্দি ফাওবা নত্ত্রগা ফেক্তরী ফাওবা, লবুক্তগী কিসান রেল ফাওবা মতৌ করম্না য়ৌহনগনি হায়বদিদা ঐখোয়না হোৎনফম থোক্লি। লৌউবগা মরী লৈনবা য়াম্না মরু ওইবা হীরম অমদি লৈবাক লৈহাওগী চাংয়েং তৌবনি। হৌখিবা চহিশিংদা, কেন্দ্র সরকারগী মাইকৈদগী লৌমী করোর কয়াগী লৈবাক-লৈহাওগী হেল্থ কার্দ পীখি। হৌজিক্তি, ঐখোয়না লৈবাক-লৈহাওগী হেল্থ কার্দকী চাংয়েং তৌবগী খুদোংচাবা অসি খূঙ্গং খুদিংদা য়ৌহনগদবনি। ঈ-গী চাংয়েং তৌনবা লেব লৈবগুম্না, মসিগী নেৎৱর্ক অমা লৈবগুম্না, ঐখোয়না লৈবাক-লৈহাওগী চাংয়েংগীসু অসিগুম্বা থৌওং অসি লৈহনগদবনি। অমসুং মসিদা প্রাইভেৎ পার্তী কয়াবু মশিং য়াম্না য়াওহনবা য়াগনি। অদুগা করিগুম্বা লৈবাক-লৈহাও চাংয়েং তৌবগী নেৎৱর্ক অমা হেক শেম্লবদি, লৌমীশিংনা মখোয়গী লৈবাক-লৈহাওগী চাংয়েং তৌবা অসি হৈনবী অমা ওইরক্কনি। মখোয়গী লমগী ফিভম করম্না লৈরিবগে, মসিগী মতাংদা মখোয়না নীংথিনা খঙ-হৈরবদি, মখোয়না ৱারেপ লৌবগী থৌওংশিংদা অহোংবা কয়া অমা লাক্কনি। লৈবাক্কী লৌমীশিংনা মখোয়গী লবুক্কী লৈবাক-লৈহাওগী মরমদা খঙবা হেল্লিবা মখৈ, অফ-অফবা পোত্থোক কয়া থাদুনা কান্নবা লৌরোক কয়া অমা লোকপা ঙম্লগনি।
মরূপশিং,
লৌউ-শিংউগী সেক্তরদা আর. অমসুং দি.গী থৌদাং কয়া পাংথোক্লিবা অসি পব্লিক সেক্তরনা অয়াম্বননি। মসিদা প্রাইভেৎ সেক্তরনসু শরুক য়াবগী মতম অদু হৌজিক্তি লাক্লবনি। আর. অমসুং দি.গী মতাংদা ৱাফম পল্লকপা মতমদা মরুদা খক্তা অকক্নবা লৈতে, মহৈ-মরোংগা মরী লৈনবা সাইন্তিফিক ইকোসীস্তেমগী মতাংদসু শরুক য়াওরি। অপুনবা থৌওং অমা পাম্মি, অপুনবা খোঙজেল অমা লৈবা পাম্মি। হৌজিক্তি ঐখোয়না লৌমীশিংবু গেহু নত্ত্রগা ফৌ খক্তমক থাবদগী হেন্দোকপা ঙম্নবা খুদোংচাবা পীগদবনি। ওর্গানিক চিঞ্জাক্তগী হৌদুনা সলাদকা মরী লৈনবা মনা-মশিংশিংগুম্বা লৌরোক কয়া অমা লৈ অমসুং ঐখোয়না মখোয়শিং অসিসু থাবা য়ারবনি। মতৌ অসিগুম্না, নখোয়না মিল্লেৎকী অনৌবা কৈথেল অমগী খুদোংচাবা লৌনবা পাউতাক অমা পীগে। ভারতকী মফম অয়াম্বা অমদি অপৌবা গ্রেন থাবগী ইয়াম্না চানৈ। মসিগীশিং অসি ঈশিং য়াম্না লৈত্রবসু লোকপা য়াবনি। মিল্লেৎকী অপাম্বা অসি হান্নদগী মালেম অসিদা লৈরবনি, হৌজিক্তি মসিনা কোরোনাগী মতুংসিদা ইম্ম্যুন হেনগৎহনবা অমা ওইনা মীয়াম্না হেন্না পাম্নবসু হৌরবনি। মসিগী মাইকৈ অসিদা লৌমীশিংবু পুক্নিং থৌগৎপদা ফুদ ইন্দস্ত্রীগী মরুপশিংগীসু অচৌবা থৌদাং লৈ।
মরূপশিং,
সী ৱীদ অমসুং বী ৱেক্স, খোইহী অসি ঐখোয়গী মফম অসিদা তপ্না-তপ্না শন্দোকপা হৌরক্লি। অদুগা লৌমীশিংনসু খোইহীগী মতাংদা থবক তৌনরি। অসিগুম্বা মতম অসিদা ঐখোয়না সমুদ্র তোর্বানশিংদগী সী ৱীদ অমসুং অতোপ্পা মফমশিংদগী খোইহী লোক্তুনা মসিগী কৈথেল অসিগী কান্নবা লৌবগী মতম ওইরবনি। ঐখোয়গী অশাংবা সমুদ্র মপান লৈবনা মরম ওইদুনা, লৈবাক অসিদা সী ৱীদ লোকপগী ওইথোকপা য়াবা য়াম্না চাউনা লৈ। মসিদগী ঐখোয়গী ঙামীশিংগী শেন্থোক্কী পাম্বৈ অমসু ফংগনি। মতৌ অসিগুম্না, ঐখোয়না খোইহীগী কার্বার য়াম্না নীংথিজনা তৌরি অমসুং বী ৱেক্সতসু, ঐখোয়গী শরুক অসি য়াম্না হেনগৎহনবগী মথৌ তাই। মসিগী হীরম অসিদা, নখোয়না মতৌ করম্না নীংথিজনা অমসুং মশক-থোক্না তেংবাংবা অমসুং শৌগৎপা য়াগনি হায়বগী মতাংদা ঙসি ঐখোয়না নুমিৎ চুপ্পা খন্নগনি, ৱাখল-লৌশিং লান্নরবদি অফবা ৱাফম কয়া অমদি থোক্লক্কনি। করিগুম্বা, প্রাইভেৎ সেক্তরনা হীরম অসিদা শরুক য়াবা হেনগৎলক্লবদি, লৌমীশিংগী মশাদা থাজবগী চাংসু য়াম্না হেনগৎলক্কনি। ঐখোয়গী মফম অসিদা কন্ত্রেক্ত ফার্মিং অসি মওং অমদা নত্ত্রগা অমদা মতম কুইনদগী পাংথোক্তুনা লাক্লি। মসিগী থৌওং অসি কারবার অমা ওইনা লৈদুনা লৈবতা নত্তনা, মসিগী লমশিং অসিদা ঐখোয়না ঐখোয়গী থৌদাংশিংসু নীংথিনা পাংথোক্নবা ঐখোয়না হোৎনগদবনি। ঐখোয়না লৈবাক-লৈহাওগী ওইনসু অফবা ওইহনবা অমসুং মচি ওইবা মনা-মশিংসু পুথকপা ঙমগদবা তেক্নোলোজীশিং কয়া অমা ঐখোয়গী লৌমীশিংদা ফংহনবগী মথৌ য়াম্না তারবনি।
মরূপশিং,
লৈবাক অসিগী লৌউ-শিংউগী থৌওংদা ঈশিং ফংহনবগী পথাপ, পাম্বী থাবা, লোকপা অমসুং শেল তানবগী থৌওং ফাওবদা তেক্নোলোজী শিজিন্নদুনা ৱারোইশিন কয়া পুরক্নবা পুন্না হোৎনবগী মথৌ তাই। ঐখোয়না লৌউ-শিংউগী সেক্তরগা মরী লৈনবা স্তার্ত-অপশিংবু পুক্নিং থৌগৎকদবনি, নহাশিংবু হীরম অসিগী মনুং চলহনগদবনি। কোরোনাগী মতমদা, স্তার্ত-অপ কয়া অমনা উহৈ অমসুং মনা-মশিংবু য়ুম্থোং খুদিংদা মতৌ করম্না য়ৌহনখিবগে হায়বা ঐখোয়না খুদিংনা উবা ফংখি। অদুগা মসিগী স্তার্ত-অপ অয়াম্বশিং অসি লৈবাক অসিগী নহাশিংনা হৌদোকপনি হায়বসিদা য়াম্না নুংঙাইবসু ফাওই। ঐখোয়না মসিবু লেপ্তনা পুক্নিং থৌগৎকদবনি। মসিগী থৌওং অসিনা নখোয়না তেংবাংদ্রবদি ওইথোকপা ঙম্লোই। লৌমীশিংগী মরু ওইনা তঙাই ফদবা লোন, মরু, হারনচিংবা অসি মখোয়গী ওইনদি খ্বাইদগী তঙাই ফদবা পোৎলমশিংনি অমসুং মসিবু মখোয়না মতম চানা পাম্নৈ।
মরূপশিং,
অসিগুম্বা থৌওংশিং অসিবু ঐখোয় মতৌ করম্না মাং থানা পুখৎকদগে হায়বগা মরী লৈনবা নখোয়গী পাউতাকশিং অসি য়াম্না মরু ওইবনি। মসিগী লম অসিদা নখোয়না খঙই, নখোয়গী মঙলান লৈ। সরকারগী ৱাখল্লোন, মঙলান, সরকারনা শিন-লাঙলিবা খুদোংচাবশিং, নখোয়গী পাঙ্গল...মসিবু পুন্সিন্দুনা ঐখোয়না লৈবাক অসিগী লৌউ-শিংউগী সেক্তরদা অহোংবা পুরক্কদবনি। মসিগী খন্ন-নৈনবা অসিগী মনুংদা, নখোয়না ভারতকী লৌউ-শিংউগীদমক্তা, খুঙ্গংগী শেন্মিৎলোনগীদমক্তা পীরকপা পাউতাক অমসুং ৱাখল্লোন কয়া অসিনা সরকারদা য়াম্না তেংবাংগনি।
নখোয়গী করি থৌরাং লৈ, সরকার অমসুং নখোয়গা মতৌ করম্না পুন্না চৎমিন্নগনি, মসিদা নখোয়না ৱাখল চাউথোক্না খন্নবীয়ু, নখোয়না খনবশিংদু ঐখোয়দা শোইদনা তম্বীয়ু। বজেৎ অসিদা অসিগুম্না তৌরমদ্রবদি, য়াম্না হেন্না ফরমগদবনি, মসি ওইরম্লবদি হেন্না ফরমগদবনি হায়না খল্লমগনি। মসিনা অরোইবা ভজেৎ নত্তে, তুংদসু ঐখোয়না বজেৎ কয়া অমা পুদুনা লাকখিগনি, নখোয় খুদিংনা ঐখোয়দা নখোয়গী তেংবাংনবা খুদোংচাবা পীবিরিবনিনা, ঐখোয়না নখোয়গী সেবা তৌজগনি। হন্দক্কী চহিগী বজেৎ অসিদা ঐখোয়না পুথোক্লিবশিং অসিবু চহি অমগী মনুংদা মতৌ করম্না থবক্তা ওন্থোক্কনি, য়াম্না থুনা পাংথোকপা, য়ারিবমখৈ মীওই খুদিংদা য়ৌহনবা...মসিগী হীরমশিং অসি ঙসিগী খন্ন-নৈনবা অসিনা মিৎয়েং চঙগনি, কান্নবসু য়াম্না ফংগনি। ঐহাক্না পমাজবদি, নখোয়না ঐখোয়গী লবুকশিংবু, লৌমীশিংবু, ঐখোয়গী এগ্রিকলচর সেক্তরবু, ঐখোয়গী ব্লু ইকোনোমীগী মফমশিংবু, ঐখোয়গী অঙৌবা ইহৌগী লমশিংবু নখোয়না ৱাখল চাউনা খন্নবা অসিনা মপাঙ্গল য়াম্না হাপকনি। ঐহাক্না নখোয় খুদিংবু হন্না হন্না থাগৎচরি।
থাগৎচরি।
