Development while protecting the environment is visible in Gujarat: PM Modi
Micro-irrigation has helped in conserving water in Gujarat: PM ModiSardar Patel’s visionary leadership helped to unite India: PM Modiখুৎ অনিমক থাংগৎতুনা ঐহাক্কা লোয়ননা হায়মিন্নরসি…নর্মদে…নর্মদে…নর্মদে…নর্মদে…নর্মদে…নর্মদে…নর্মদে।
গুজরাতকী রাজ্যপাল আচার্য দেবব্রতজী, মফম অসি মুখ্য মন্ত্রী শ্রীমান বিজয়ভাই রুপানি, উপ-মুখ্যমন্ত্রী নিতিন ভাই… ফম্বাকথক্তা লেংশিনবিরিবা শক্নাইরবশিং অমসুং মশিং য়াম্না লেংবিরক্লিবা ঐহাক্কী নুংশিজরবা ইচিল-ইনাও অমসুং ইচল-ইচেশিং।
মতম অমদা ঐহাক ফোতোগ্রাফীদা ঙাওজরম্মি। ফোতো নমনিংবগী অপাম্বা ফাওরম্মি… তুংদদি পুম্নমক থাদোকখি অদুবু ঙসি মফম অসিদা ফম্বা মতম অসিদদি খুৎতা কেমেরা পায়রম্লবদি হায়না খল্লকই। মথক্তগী ঐহাক্না উরিবা শক্তম অসি, মখাদা মীয়ামগী সমুদ্র তুংদা ঈশিংগী সমুদ্র লৈরি। ফোতো নম্লিবশিংগীদমক অসিগুম্লবা শক্তম অসি তাংনা ফংবা তঞ্জানি। ঐহাক্না মফম অসিগী এদমিনিস্ত্রেতরশিংবুসু লোকেসন অসিগীদমক, মসিগী ফজরবা শক্তম অসিগীদমক অখন্ননা নুঙাইবা ফোংদোকচরি।
ঙসিগী নুমীৎ অসিদা ইমা নর্মদাবু খুরুমজবগী তাঞ্জা ফংজবা অসিদগী হেন্না লাইবক ফবা করি লৈরুগনি। অদোম্না ঐহাকপু নর্মদা ইমাগী নর্মদা থৌরমদা শরুক য়ানবা বার্তন তৌবিরকপগীদমক ঐহাক গুজরাত সরকার অমসুং ময়াম পুম্নমক্কী লমন তোন্সিনজরে। থৌরম অসিগীদম ঐহাক্না গুজরাত মীয়াম পুম্নমকপুসু হন্না-হন্না নুঙাইবা ফোংদোকচরি অমদি ঙসি পাংথোক্লিবা থৌরম অসিগী কান্নবা অদু মধ্য প্রদেশ, মহারাস্ত্র, রাজস্থান অমসুং গুজরাত… রাজ্য মরি অসিগী মীয়াম্না, লৌমীশিংনা ফংলি।
মরূপশিং, মহৌশাগী ফিভম ঙাক্তুনা থম্লবসু চাউখৎপা পুরকপা য়াই হায়বা ঐখোয়গী সংস্কৃতিদা মতম পুম্নমক্তা লৌনদুনা লাক্লি। প্রকৃতি অসি ঐখোয়গীদমক খুরুমজনিঙাইনি, প্রকৃতি অসি ঐখোয়গীদমক লৈতেংনি। মহৌশাগী ফিভম্বু ঙাক্তুনা থম্লগা করম্না চাউখৎপা পুরকপা য়াবগে হায়বদুগী অহিংবা খুদম অদু হৌজিক কেবরিয়াদা উবা ফংলি।
ঙসি অয়ুক্তগী তোঙান তোঙানবা মফমশিংদা চৎচবগী তঞ্জা অদু ঐহাক্না ফংজরে। চৎচরুবা মফম খুদিংদা ঐহাক্না মহৌশাগী ফিভম অমসুং চাউখৎপগী অঙকপা অপুনবা অমা উবা ফংই। নাকল অমরোমদা মৈ পুথোক্লিবা সরদার সরোবর দাম লৈরি, অতোপ্পা নাকল অমদা এক্তা নর্সরি, বতরফ্লাই গার্দেন, কেক্তস গার্দেন অসিনচিংবা ইকো-তুরিজমগা মরী লৈনবা য়াম্না ফজরবা সিস্তেমশিং লৈরি। ময়াম পুম্নমক অসিগী মরক্তা সরদার বল্লভ ভাই পতেলজীগী চাউখ্রবা মীতম্না ঐখোয়বু থৌজাল পীনবিরি।
মরূপশিং, ঙসি অসি বিশ্বকর্ম খুরুম্বগী থৌরমসু পাংথোক্লি। অনৌবা ভারত শেমগৎনবা মাংলোমদা চংশিল্লিবা অসিদা ভগবান বিশ্বকর্মগী থৌজাল অদু ভারত্তা লেংদনা লৈবা ওইরসনু হায়না ঐখোয় পুম্নমক্না খুরুমজরি।
মরূপশিং, ঙসিগী তঞ্জা অসি পুক্নিং য়াম্না নুংশিনিঙাই অমসুনি। সরদার পতেলনা মংজরম্বা মংলান অদু চহী তরাগী খুজিং কয়াগী মতুংদা মপুং ফারে, মদুসু সরদার সাহেবকী চাউরবা মীতমগী মীৎমাং মক্তদা মপুং ফারে।
ঐখোয়না অহানবা ওইনা সরদার সরোবর দাম্বু নিক নিক লাওনা থনবা উরে। মতম অমদদি মীতর ১২২গী পান্দম অদু ফংবদা য়াম্না চাউনা লৌনরম্মি। অদুবু ঙসি চহী ৫গী মনুংদা সরদার সরোবরনা মীতর ১৩৮ ফাওবা য়ৌনা থল্লিবা অসি অঙকপনি, কাওঙম্লরোইদবা অমনি।
মরূপশিং, ঙসিগী ফিভম অসি য়ৌনা য়ৌহনখিবদা মীওই লায় কয়াগী থৌদাং লৈরি। ইচম চম্বা মীওইগী থৌদাং য়াওরি। লাইনিংবশিংগী থৌদাং য়াওরি। সোসিয়েল ওর্গনাইজেসন কয়াগী থৌদাং য়াওরি। ঙসিগী নুমীৎ অসি সরদার সরোবর প্রোজেক্তকীদমক মশাগী থৌদাং লৌখিবা অদুগুম্লবা মরূপ লাখ কয়া অদুগী মফমদা তৌবিমল খংবা উৎপা নুমীৎনি। অদুগুম্লবা মরূপ পুম্নমকপু ঐহাক্না খুরুমজরি।
মরূপশিং, ঙসি কেবরিয়াদা থৱায় য়াওরিবা অদুমক গুজরাত পুম্বদা উবা ফংলি। ঙসিদি খোংশিং, পুখ্রিশিং, পাৎশিং, তুরেলশিং শেংদোকপগী থবক চত্থরি। লাক্কদৌরিবা নুমীৎ খরা অসিদা পাক চাউনা উ থাবগী থৌরমসু পাংথোক্কনি।
মরূপশিং, ঙসিদি হাপতা কয়া-কয়া ফাওবা ঈশিং য়ৌবা ঙমলমদবা কচ্ছ অমসুং সৌরাস্ত্রগী লমদমশিংদসু ইমা নর্মদাগী থৌজাং ফংজরে। গুজরাত্তা চহী তরাগী খুজিং কয়াগী মমাংদা ঈশিংগী খৎন-চৈনবদা নোংমৈ ফাওবা কাপখি। ইচল-ইচে অমসুং ইচানুপীশিংনা থক্নবা ঈশিং শোক্নবগীদমক কিলোমীতর ৫-৫, ১০-১০ খোংনা চৎপা তারম্মি।
কালেন হৌরকপগা সৌরাস্ত্র অমসুং অৱাং গুজরাতকী মীয়াম্না মশা মশাগী শা-শনশিং পুরদুনা কিলোমীতর কয়া লাপ্না ঈশিং ফংগদবা মফমশিংদা মশাগী য়ুম, খুঙ্গং, লৌ-ইঙ্খোল থাদোক্তুনা চৎপা তারম্মি। ইং শোক ২০০০দা কা হেন্না শাবনা মরম ওইদুনা রাজকোত, সুর্য় নগর, জাম নগরদা ঈশিং য়ৌহন্নবগীদমক হিন্দুস্তানদা অহানবা ওইনা ঈশিংগীদমক অখন্নবা ৱাতর ত্রেন চেলহন্নবা তঞ্জা লাকখিবা অদু ঐহাক্না নিংশিংলি।
মরূপশিং, ঙসি অদুগুম্লবা হৌখ্রবা নুমীৎশিং অদু নিংশিংলুবা মতমদা ঙসিদি গুজাত খুমাং য়াম্না চাউশিল্লে হায়না লৌজৈ। অদোম চাউথোকপা ফাওবিব্রা নত্রগা ফাওবিদব্রা, অদোম নুঙাইবা ফাওবিরি। অদোম্না ঐহাকপু মফম অসিগী থৌদাং শিন্নবিবা মতমদুদা ঐখোয়গী নাক্তা ইথৈ-লৌখোংগীদমক, থক্নবা ঈশিংগীদমক, মৈগীদমক দামগী থবক থুজিলহন্নবগীদমক চাউনা মায়োক্নবা কয়া অমা লৈরম্মি।
নাকল অমরোমদা নর্মদা কেনেলগী নেৎৱার্ক অমসুং অতোপ্পা ইরিগেসন সিস্তেমশিংবুসু শেমগৎপা তারম্মি। অদোম্না খন্দুনা য়েংবিয়ু, ২০০১ ফাওবদা মরুওইবা কেনেলগী থবক শুপ্নতগী কিলোমীতর ১৫০ খক্তমক লোইশিনবা ঙমলমখি। ইরিগেসন সিস্তেম অমসুং কেনেলশিংগী থবক তঙখাই হেন্না কাং খোং চাইদুনা পন্দুনা লৈরমখি। অদুবু ময়াম পুম্নমক্না, গুজরাত মীয়াম্না কৈদৌনুংদা নিংহন্নখিদে।
ঙসিদি ইরিগেসন প্রোজেক্তশিংগী চাউরবা নেৎৱার্ক অমা গুজরাত্তা লৈরে। হৌখিবা চহী ১৭-১৮ অসিদা লৌফম শরুক অনি হেন্না ইথৈ-লৌখোং ফংহল্লে।
ইচিল-ইনাও অমসুং ইচল-ইচেশিং, ২০০১দা দ্রিপ ইরিগেসন, মাইক্রো ইরিগেসন্না হেক্তর লিশিং ১৪ খক্তমক কোন্সিন্দুনা চাউরাক্না লৌমী ইমুং লিশিং ৮না মসিগী কান্নবা ফংবা ঙম্লম্মি। পর দ্রোপ মোর ক্রোপগী খোংজং হৌদোক্লে, ঈশিং মাংহন্দনবা খোংজং হৌদোক্লে, মাইক্রো ইরিগেসন্দা পুক্নিং থৌগৎলে, দ্রিপ ইরিগেসন্দা পুক্নিং থৌগৎলে। মতম অমদা শুপ্নতগী হেক্তর লিশিং ১২-১৪ খক্তমক ওইরম্বা অদু গুজরাত্তা ঙসিদি লৌবুক হেক্তর লাখ ১৯বু মাইক্রো ইরিগেসনগী মনুংদা পুরকপা ঙমদুনা লৌমী ইমুং লাখ ১২দা কান্নবা ফংহল্লে। মসি অদোমগী মতেং য়াওদনা ওইথোকপা ঙম্লমলোয়। পর দ্রোপ মোর ক্রোপ ৱাফম অসি গুজরাতকী লৌবুক খুদিংমক্তা য়ৌরে। ঙাইহাক্কী মমাংদা আই.আই.এম. অহমেদবাদনা হিরম অসিদা স্তদী তৌখি। মসিগী মতাংদসু ঐহাক লৈবাক মীয়ামদা হায়জগে।
মরূপশিং, স্তদি অসিদগী খংবা ঙম্লে মদুদি, মাইক্রো ইরিগেসন্না মরম ওইদুনা দ্রিপ ইরিগেসন অমসুং ত্বিংকলরনা মরম ওইদুনা গুজরাত্তা ঈশিং চাদা ৫০ ফাওবা কনবা ঙম্লে। ফর্তিলাইজর শিজিন্নবা চাদা ২৫ হন্থরে। খুৎশুমল চাদা ৪০ ফাওবা হন্থহল্লে অমদি মদুগী মথক্তা মৈ শিজিন্নবগী চাংসু হন্থরে। মসিদা নত্তনা নাকল অমদা সেভিং তৌবা মতমদা অতোপ্পা নাকল অমদা মহৈ মরোং পুথোকপগী চাং চাদা ৩০ ফাওবা হেঙ্গৎপা ঙম্লে। মসিগা লোয়ননা হেক্তর অমমমদা লৌমী ইমুং খুদিংগী শেন্থোক্তা চাউরাক্না লুপা লিশিং তরামঙা চামঙা ফাওবা হেঙ্গৎপসু ঙম্লে।
মরূপশিং, কচ্ছতা নর্মদাগী ঈশিং য়ৌরকখিবা অদু ঐহাক নিংশিংলি। ঈশিং অসি কচ্ছকীদমক পারস ওইগনি হায়না মতম অদুদা ঐহাক্না হায়খি। ঙসিদি ইমা নর্মদাগী ঈশিং অসি কচ্ছ খক্তা নত্তনা সৌরাস্ত্রা খক্তা নত্তনা গুজরাতকী পাক চাউরবা শরুক অমগী পরস ওইরকপা অসিদা ঐহাক নুঙাইবা ফাওই। নর্মদাগী ঈশিং অসি ইচম চম্বা ঈশিং নত্তে মসিদি পারসনি। ২০০১ চহীদা গুজরাতকী ইমুং শুপ্নতংগী চাদা ২৬তা তোতিগী ঈশিং ফংলম্মি। ঙসিদি অদোম ময়াম্না হোৎবিবা অদুগী মহৈ ওইনা রাজ্যগী ইমুং চাদা ৭৮দা তোতিগী ঈশিং য়ৌহল্লে।
ইচিল-ইনাও অমসুং ইচল-ইচেশিং, সোনি প্রোজেক্ত ওইগেরা, সুজলাম-সুভলাম প্রোজেক্ত ওইগেরা ঙসিদি গুজরাতকী খুঙ্গং অমসুং শহরশিং খোংজেল য়াংনা ঈশিংগী নেৎৱার্কনা শম্নহল্লি। ঐহাক্না গুজরাত করকারগী হান্নগী মুখ্য মন্ত্রী আনন্দিবেনগী লুচিং মখাদা অমদি হৌজিক্কি মুখ্য মন্ত্রী রুপানিজীগী লমজিং মখাদা য়ুমথোং খুদিংদা, লৌবুক খুদিংদা, ঈশিংগা শম্নহন্নবা মিশনবু মাংলোমদা পুখৎপগীদমক হন্না-হন্না নুঙাইবা ফোংদোকচরি।
ইচিল-ইনাও অমসুং ইচল-ইচেশিং, ২০২২ ফাওবদা গুজরাত য়াওনা লৈবাক অসিগী লৌমী ইমুং খুদিংমক্কী শেন্থোক শরুক অনি ওইহন্নবগীদমক থবক কয়া অমা পায়খৎলি। অনৌবা সরকার শেম্লবা মতুং হৌখিবা নুমীৎ ১০০দা মায়কৈ অসিদা খোংথাং কয়া অমা পায়খৎ্লে। প্রধান মন্ত্রী কিসান সম্মান নিধিগী কান্নবা অদু হৌজিক্তি গুজরাতকী লৌমী ইমুং খুদিংমক্না ফংলে।
নুমীৎ খরনিগী মমাংদা অপিকপা লৌমীশিং অমসুং করবার মচা মশু তৌবশিংগীদমক পেন্সন স্কিমসু হৌদোকখ্রে। মসিগী কান্নবা অদুসু গুজরাত অমসুং লৈবাক অসিগী লৌমী ইমুংশিংনা ফংলগনি।
মরূপশিং, গুজরাতকী লৌমীশিং, ললোন ইতিক তৌরিবশিং অমসুং অতোপ্পা মীওইশিংগীদমক্তা ঈশিংগী খুত্থাংদা ত্রান্সপোর্তকী অচৌবা সিস্তেম অমসু থৌরাং তৌরি। ঘোঘা-দহেজ রো-রো ফেরি সার্বিস হৌদোক্নবা খুদোংচাবা তঞ্জা অদুসু ঐহাক্না ফংজখি। হৌজিক ফাওবদা মীওই লাখ অহুম হেনবনা ফেরি সর্ভিস অসিগী খুদোংচাবা ফংখ্রে হায়না ইফমদা তাকপীররে। মসিদসু নত্তনা চাউরাক্না গারি লিশিং ৭০ মসিগী মতেংনা ত্রান্সপোর্ত তৌখ্রে। খন্দুনা য়েংবিয়ু, হান্নদি কিলোমীতর চাহুম য়াঙ্খৈ শাংনা কংফাল লম্বিদা চৎলম্বা অদু হৌজিক্তি সমুদ্রগী লম্বীদা শুপ্নতংগী কিলোমীতর ৩১ খক্তমক চৎলে। খুদোংচাবা অসিনা মীয়ামগী মতমসু কনবা ঙম্লে, অকোয়বগী ফিভমসু য়োকখৎলে।
মরূপশিং, অসিগুম্বা মখলগী সর্বিস মুম্বাইদগী হজিরাগী মরক্তা পায়খৎনবা খন্নরি। গজরাত সরকারনা মসিদা অয়াবা পীরে। অথুবা মতমদা মসিদা থবক হৌরগনি। রো-রো ফেরিগুম্বা প্রোজেক্তনা গুজরাতকী ৱাতর তুরিজমদসু ইনোৎ পীরি।
মরূপশিং, তুরিজমগী ৱাফম লাকপা মতমদা স্তেচু ওফ য়ুনিতীগী মতাংদা খন্ন-নৈনফম থোকই। মসিনা মরম ওইরগা কেবরিয়া অমদি গুজরাত অসি মালেম পুম্বগী তুরিজমগী মেপতা মরুওইবা ওইরে। হৌজিক মসি মায়খুম হাংদোকখিবা থা ১১ খক্তমক ঙায়রি, চহী অমা ফাওবা ফাদ্রি অদুবু থা ১১ অসিদা হৌজিক ফাওবদা লমকোয়বা লাখ ২৩ হেনবনা লৈবাক্কী মনুং মপান্দগী ঐখোয়গী সরদার পতেলগী স্তেচু ওফ য়ুনিতী অসি য়েংবা লাকখ্রে।
নুমীৎ খুদিংগী চাংচৎ অমদা লমকোয়বা লিশিং নিপাল চামঙানা মফম অসিদা লাক্লি। হৌখিবা থাদা পাংথোকখিবা জম্নাস্তমি নুমীৎতা লমকোয়বা লিশিং ৩৪ হেন্না লাক্তুনা রেকোর্দ থমখি হায়না ইফমদা খংহনবিরে। চহী ১৩৩ শুরবা অমেরিকাগী স্তেচু ওফ লিবর্তী য়েংনবগীদমক নুমীৎ খুদিংগী চাংচৎতা লমকোয়বা লিশিং ১০ লাক্লি অদুবু থা ১১ খক্তমক ঙাইরিবা স্তেচু ওফ য়ুনিতীবু য়েংনবগীদমক নুমীৎ খুদিংগী চাংচৎতা লমকোয়বা লিশিং নিপাল চামঙা লাক্লিবা অসি মশানা অঙকপা অমনি।
ইচিল-ইনাও অমসুং ইচল-ইচেশিং, এক ভারত, শ্রেস্থ ভারতকী ওইবা সরদারগী মংলান অদু মংফাওনরকপা ঙসিদি লৈবাক অসিনা উবা ফংলে। নিংতম্বা ফংখিবা মনুং, নিংতম্লবা মতুংগী চহীশিংদা মপুংফানা পাংথোকখিদ্রবা থবকশিং অদু ঙসিদি মপুং ফাহন্নবা হিন্দুস্তান্না হোৎনরি।
জম্মু-কাশ্মির অমসুং লদাখকী মীয়াম্না চহী ৭০ অসি খেৎনবা কয়া মায়োক্নদুনা লাক্লি। মদুগী ফত্তবা মহৈ ওইনা হিংসা অমসুং তোখায় তানিংবগী মওংদা, মপুং ফাদ্রবা আশা অমসুং এস্পিরেসনগী মওংদা হিন্দুস্তান পুম্বনা চৈনা ফংলি।
সরদার সাহেবকী ইন্সপিরেসন্না মরুওইবা ৱারেপ অমা লৈবাক অসিনা লৌখি। চহী তরাগী খুজিং কয়া লীরবা সমস্যাগী ৱারোইশিন পুরক্নবগীদমক অনৌবা লম্বীদা চৎনবা ৱারেপ লৌখি।
জম্মু-কাশ্মিরগী লদাখ অমসুং কারগিলগী মরূপ লাখ কয়াগী ইচং থৌবা তেংবাংনা চাউখৎ থৌরাং অমসুং থাজবগী অনৌবা ইচেল অমা পুরকপদা ঐখোয় মায় পাকপা ঙমগনি হায়না ঐহাক্না মপুং ফানা থাজবা থম্লি।
মরূপশিং, ভারতকী য়ুনিতী অমসুং ভারতকী মকোক থোংনবগীদমক অদোমগী সেবক অসিনা মপুং ফানা হোৎনরি। হৌখিবা নুমীৎ চামনিগী মনুংদা অচৌবা ৱারেপ কয়া অমা অমগী মতুংদা অমা লৌখি। মসিদা লৌমীশিংগী য়াইফ থৌরাংদগী হৌরগা ইনফ্রাস্ত্রকচর অমসুং শেল-থুমগী ফিভম ফগৎহন্নবা উপায়শিংসু য়াওরি।
অমুক হন্না ঐহাক্না গুজরাত পুম্ববু সরদার সাহবনা নিংজরম্বা অদু মংফাওনরকপদা হন্না-হন্না নুঙাইবা ফোংদোকচরি। অদোম্না ঐহাকপু থৌরম অসিগী শরুক অমা ওইহনবিবগীদমক তৌবিমল খংবা উৎচরি। অদোম ময়াম্না ইফমদা থৌজাল কয়া পীনবিরে। গুজরাতকী মীয়াম্না, লৈবাক মীয়াম্না ঙসি মফম অসিদা ইমা নর্মদাবু ইকোক নোন্না খুরুমজরি, মখোয়বুসু থাগৎপা ফোংদোকচরি। অমুক হন্না খুৎ অনিমক থাংগৎতুনা ঐহাক্কা লোয়ননা হায়মিন্নরসি… নর্মদে… খোঞ্জেল অসি কচ্ছ ফাওবা য়ৌহল্লসি, নর্মদে… নর্মদে… নর্মদে…।
ভারত ইমানা য়াইফরে,
ভারত ইমানা য়াইফরে,
ময়াম পুম্নমকপু হন্না-হন্না থাগৎচরি।
