খুরুমজরি,
রাজস্থানগী রাজ্যপাল, শ্রী কলরাজ মিশ্রাজী; হরিয়ানাগী রাজ্যপাল, শ্রী সত্যদেব নরায়ন আর্য়াজী; রাজস্থানগী মুখ্য মন্ত্রী, শ্রী অশোক গেহলোৎজী; হরিয়ানাগী মুখ্য মন্ত্রী, শ্রী মনোহর লালজী; দেপ্যুতী চীফ মিনিস্তর, দুশ্যন্ত চাউতালাজী, ঐহাক্কী মন্ত্রী-মন্দোলগী মরুপ-মপাঙ, শ্রী পিয়ুশ গোয়লজী, শ্রী গজেন্দ্র সিংহ শেখাৱৎজী, শ্রী অর্জুন রাম মেঘ্বালজী, রাজস্থান্দগী শ্রী কাইলাশ চৌধরীজী, শ্রী রাও ইন্দর্জিৎ সিংহজী, শ্রী রত্তন লাল কতারিয়াজী, হরিয়ানাদগী শ্রী কৃষন পালজী অমসুং পার্লিয়ামেন্ত, লেজিস্লেচরগী ঐহাক্কী অতোপ্পা মরুপশিং, ভারত্তা লৈবা জাপানগী এম্বেসেদর, হিস এক্সেলেন্সী শ্রী সাতোশি সুজুকিজী অমসুং থৌরম অসিদা শরুক য়ারিবা অতোপ্পা মীথুংলেনশিং।
ইচিল ইনাওশিং,
ঐহাক্না মীয়াম পুম্ববু অনৌবা চহি ২০২১ লাকপদা য়াইফ-পাউজেল পীজরি। ঙসিদি, লৈবাক অসিগী ইনফ্রাস্ত্রকচরবু মতমগা চান্নবা ওইহন্নবগীদমক্তা হৌজিক হৌজিক চত্থরিবা মাহা য়াগ্না অসিনা অনৌবা শাফু অমা ফংলে। ঐখোয়না করিগুম্বা হৌখিবা নুমিৎ ১০-১২ খক্কী ৱারী শারবদি, মতমগা চান্নবা ইনফ্রাস্ত্রকচরগী মতেংদগী লৌউবশিংগী একাউন্ততা লুপা করোর ১৮,০০০ হেনবগী শেনফম অসি হকথেংননা হাপখ্রবনি, নেস্নেল কম্মন মোবিলিতী কার্দ অসি দিল্লী মেত্রোগী এয়র্পোর্ত এক্সপ্রেস লাইন্দা হৌদোকখ্রে; অমসুং মসিগা মান্নবা ওইনা দ্রাইভর য়াওদবা মেত্রোসু হৌদোকখ্রে। গুজরাৎকী রাজকোত্তা এমস শাবগী থবক হৌখ্রে অমসুং ওরিশাগী সম্বলপুরদা আই.আই.এম.গী মতম চুপ্পগী ওইগদবা কেম্পসকী থবকসু হৌখ্রে; মালেমগী খ্বাইদগী ফবা তেক্নোলোজী শিজিন্নদুনা লৈবাক অসিগী শহর ৬তা য়ুম ৬০০০ শাবগী থবক হৌখ্রে; নেস্নেল এতোমিক তাইমস্কেল অমসুং ভারতিয় নির্দেশক দ্রভ্যা সীস্তেমসু লৈবাক মীয়ামদা শিন্নখ্রে; লৈবাক অসিগী খ্বাইদগী ইহান হানবা ওইগদৌরিবা নেস্নেল ইনভাইরনমেন্তেল স্তেন্দর্দ লেবোরেতরীগী উরেপ-উয়ুংসু য়ুংখ্রে; কিলোমীতর ৪৫০ শাংবা কোচি-মেঙ্গালুরু গ্যাস পাইপলাইনসু শঙ্গাখ্রে; ১০০শুবা কিসান রেলসু মহারাস্ত্রাগী সঙ্গোলাদগী নোংচুপ বেঙ্গোলগী শালিমার ফাওবা চেনবা হৌখ্রে; অমসুং চপ মান্নবা মতম অসিদা ৱেস্তর্ন দেদিকেতেদ কোরিদোরগী ফ্রৈৎ কোরিদোরগী লম্বীদা ন্যু ভাউপুরদগী ন্যু খুর্জা ফাওবা চেনবা অহানবা ফ্রৈৎ ত্রেন্সু হৌদোকখ্রে অমসুং হৌজিক্না, ঙসি অসিদা ৱেস্তর্ন দেদিকেতেদ ফ্রৈৎ কোরিদোরগী কিলোমীতর ৩০৬ শাংবা কোরিদোর অমসু লৈবাক মীয়ামদা শিন্নরি। অমুক্তা খন্থবীয়ু, হায়রিবশিং অসি শুপ্নগী নুমিৎ ১০-১২নিদা তৌরিবনি। লৈবাক অসিনা অনৌবা চহি অসিবু য়াম্না ফজবা মওংদা হৌরবা অসিনদি, তুংদা লাক্কদৌরিবা নুমিৎশিংদি মসিদগী হেন্নবা ফবা ওইরগনি। শঙ্গাবা কয়া অমসুং উরেপ-উয়ুং তম্বা কয়া অসি য়াম্না মরু ওই মরমদি হায়রিবশিং অসি কোরোনাগী য়াম্না ৱাবা মতমগী মনুংদা পাংথোকখিবা ঙক্তনি। নুমিৎ খরনিগী মমাংদসু, ভারতনা ‘ভারত্তা শাবা’ কোরোনাগী ভেক্সিন অনিগী অয়াবসু পীখ্রবনি। ভারতনা মশানা শাজবা ভেক্সিন অসিনা লৈবাক মীয়ামদা থাজবগী ৱাখল্লোন অমা চেলহনখ্রে। ইং ২০২১গী অহৌবা অসিদা ভারতনা মরোমদোম লেপচবা ঙম্নবগী লম্বীদা খোঙজেল য়াঙনা চৎলিবা অসিগী মতাংদা তারবা অমসুং উরুবা মতমদা করম্বা ভারত মচানা চাউথোকচরোইদোইনো। ঙসিদি, ভারত মচা খুদিংগী খোল্লাও অসিদি, ঐখোয়না লেপ্পা নাইরোই, ৱাবা ফাওরোই, ঐখোয় ভারত মচা খুদিংগী অমত্তা ওইনা পুন্দুনা তুং লমচৎকীদমক্তা মাং থানা চৎকনি হায়বা অসিনি।
মরুপশিং,
মসিগী দেদিকেতেদ ফ্রৈৎ কোরিদোরগী প্রোজেক্ত অসি ২১শুবা চহি-চাগী ভারতকী অনৌবা থৌওং পুরক্কদবা অমনি হায়না মীয়াম্না য়েংনরি। হৌখিবা চহি ৫-৬তা ৱানা হোৎনখিবদগী, ঙসিদি মসিগী অয়াম্বা শরুক অমদি ওইথোক্লে। ফ্রৈৎ ত্রেনশিংগী খোঙজেল অসি নুমিৎ খরনিগী মমাংদা হৌখিবা ন্যু ভাউপুর-ন্যু খুর্জা সেক্সন্দা পুং অমদা কিলোমীতর ৯০গী মথক্তা চেল্লে হায়বা খঙলে। ফ্রৈৎ ত্রেন অমগী পুং অমদা চাংচৎকী খোঙজেল অসি কিলোমীতর ২৫ চৎলম্বা লম্বী অদুদা ঙসিদি খোঙজেল অসি হান্নদগী শরুক অহুম হেন্দুনা চেল্লে। ভারতনা চাউখৎপা পুরক্নবগীদমক্তা মসিগা মান্নবা খোঙজেলদা চৎপা অসি তঙাই ফদে অমসুং লৈবাক অসিনা মসিগা মান্ননা চাউখৎপা অদুগী য়াম্না তঙাই ফদবসু লৈ।
মরুপশিং,
ঙসিদি, খ্বাইদগী অহানবা দবল স্তেক কন্তেনর গুদ ত্রেন অসি হরিয়ানাগী ন্যু অতেলিদগী রাজস্থানগী ন্যু কিশানগর্হ ফাওবগী মনুংদা লম্থাখ্রে। মসিনা হায়বদি কন্তেনর অমগী মথক্তা কন্তেনর অমা হাপ্পা হায়বনি অমসুং মসিসে কিলোমীতর অমগা মখায় শাংবা গুদ ত্রেন্নি; মসি তসেংনা য়াম্না চাউবা মাই পাকপা অমনি। মসিগী মতিক লৈবা খনগৎলবা লৈবাকশিংগী মনুংদা ভারতসু চল্লবনি। মসিবু ওইথোকহনবদা ঐখোয়গী ইঞ্জিন্যার, তেক্নিসিয়ন অমসুং শিন্মী কয়াগী হোৎনজমন কয়া য়াওরি। ঐহাক্না অসিগুম্লবা চাউথোকচনিংঙাই ওইরবা মাই-পাকপা অসিগীদমক্তা মখোয়বু থাগৎলি।
মরুপশিং,
ঙসিগী নুমিৎ অসিনা ঐখোয়গী লৌউবা, ওন্তোপ্রিনর, কারবার তৌবা মীওই অমসুং হরিয়ানা অমসুং রাজস্থানগী এন.সি.আর.গী মীওই খুদিংদা অনৌবা আশা, খুদোংচাবা কয়া পীরবনি। দেদিকেতেদ ফ্রৈৎ কোরিদোর, ইস্তর্ন ওইগেরা ৱেস্তর্ন ওইগেরা, অসি মতমগা চান্নবা ফ্রৈৎ ত্রেনশিংগী মতমগা চান্নবা লম্বী ওইবতা নত্তনা মসিনা লৈবাক অসিবু খোঙজেল য়াঙনা চাউখৎহন্নবা কোরিদোর অমসু ওইরিবনি। মসিগী কোরিদোরশিং অসিনা অনৌবা শাহৌ লৌনবা মফমশিং অমসুং লৈবাক অসিগী তোঙান-তোঙানবা মফমশিংগী চাউখৎপগী য়ুম্ফম ওইরগনি।
ইচিল ইনাওশিং,
ইস্তর্ন ফ্রৈৎ কোরিদোর অসিনা মখোয়না মতৌ করম্না লৈবাক অসিগী মফম কয়া অমগী মপাঙ্গল হেনগৎহনবগে হায়বসু উৎপা হৌরে। নাকল অমদা, হৱাই- চেংৱাই তোন লিশিং কয়া পুবা ত্রেন অমা পঞ্জাবতগী ন্যু ভাউপুর-ন্যু খুর্জা সেক্সন অসিদা থৌবা হৌরক্লে অমসুং নাকল অমদনা, ঝারখন্দ অমসুং মধ্য প্রদেশকী সিংগ্রাউলীদগী কোয়লাগী তোন লিশিং কয়া অমা পুরকপা ফ্রৈৎ ত্রেন অমনা এন.সি.আর., পঞ্জাব অমসুং হরিয়ানাদা থুংলে। ৱেস্তর্ন ফ্রৈৎ কোরিদোর অসিনা য়ু.পি., হরিয়ানাদগী রাজস্থান, গুজরাৎ অমসুং মহারাস্ত্রাদা য়ৌহন্দুনা চপ মান্নবা থবক অসি তৌগনি। মসিনা হরিয়ানা অমসুং রাজস্থানগী লৌউ-শিংউবা অমসুং মসিগা মরী লৈনবা কারবারশিংদা লাইহনবতা নত্তনা মসিনা মহেন্দ্রগর্হ, জয়পুর, অজমের অমসুং সিকারনচিংবা শহরশিংদসু অনৌবা পাঙ্গল হাপ্লগনি। মসিগী রাজ্যশিং অসিগী মেন্যুফেকচরিং য়ুনিৎ অমসুং ওন্তোপ্রিনর্শিংদা অহোঙবা মমলদা লৈবাক্কী অমসুং মালেমগী কৈথেলশিংদা থুনা য়ৌবা ঙম্বগী খুদোংচাবা হাংদোক্লে। গুজরাত অমসুং মহারাস্ত্রাগী হিথাংফমশিংদা থুনা য়ৌহনবা ঙমহনবা অসিনা মফম অসিদা শেল থাদবগী অনৌবা খুদোংচাবা কয়া অমসু খুমাং চাউশিনহল্লগনি।
মরুপশিং,
মতমগা চান্নবা ইনফ্রাস্ত্রকচর শেম-শাবা অসি কারবারগী ওইনদি মসিবু পুন্সিনা তঙাই ফদবা ওইরিবা অসিগা চপ মান্ননা তঙাই ফদে অমসুং অনৌবা পথাপ খুদিংমক্না মখোয়গী চাউখৎনবা শাফু ফংজৈ। মসিগী মরী লৈনবা থবক কয়ানা শেন্মিৎলোনগী ইঞ্জিন কয়া অমগী খোঙজেল য়াঙহল্লি। মসিনা মফমশিং অদুদা থবক লৈহনবতা নত্তনা সীমেন্ত, স্তীল, ত্রান্সপোর্ত অমসুং অসিগুম্বা সেক্তর কয়া অমগী ইন্দস্ত্রীশিংদসু অনৌবা থবক লৈহল্লি। মসিগী দেদিকেতেদ ফ্রৈৎ কোরিদোর অসিনা রাজ্য ৯গী রেলৱে স্তেসন ১৩৩ কোনগনি। মসিগী স্তেসনশিং অসিদা মলতি মোদেল লোজিস্তিক পার্ক, ফ্রৈৎ তর্মিনেল, কন্তেনর দীপো, কন্তেনর তর্মিনেল, পার্সেল হবশিংসু শেমগৎলগনি। মসিগী খুদোংচাবা কয়া অসিনা লৌউবশিং, অপিকপা ইন্দস্ত্রী, কোত্তেজ ইন্দস্ত্রী অমসুং পোত্থোক পুথোকপা অচৌবা কাংবুশিংদসু কান্নবা ফংহনগনি।
মরুপশিং,
ঙসিগী থৌরম অসি রেলৱেগী থৌরম ওইবনিনা, ত্রেক্কী মতাংদা ৱা ঙাংবা অসি মহৌশানা তাবনি। মরম অদুনা ঐহাক্না ত্রেক্কী মতাংদা ঙাংগে। ঐহাক্না ত্রেক্তা নমা পান্দুনা খুদম অমা পীগে। ত্রেক অমনা মীওই অমগী চাউখৎনবা থবক তৌরি অমসুং অতোপ্পা ত্রেক অমনা লৈবাক অসিগী শাহৌ লৌবগী ইঞ্জিনশিংদা অনৌবা ইনোৎ হাপ্লি। মীওই অমগী চাউখৎপগী মতাংদা হায়রবদি, ঙসি মখোয় খুদিংদা য়ুম, অমাংশঙ, ঈশিং, মৈ, গ্যাস, লম্বী-শোরোক অমসুং ইন্তর্নেৎ ফংহন্নবা কেম্পেন কয়া অমা লৈবাক অসিদা লৈরি। য়াইফ-য়ুম্বালগী তোঙান-তোঙানবা প্রোগ্রাম কয়া অমসু খোঙজেল য়াঙনা পায়খৎলি। পি.এম. অৱস য়োজনা, স্বচ্ছ ভারত অভিয়ান, সৌভাগ্য, উজ্বালা, প্রধান মন্ত্রী গ্রাম সরক য়োজনা ওইরো, মখোয়শিং অসিনা ভারত মচা করোর লিশিং কয়া অমগী পুন্সিবু লাইহল্লি, নুংঙাইহল্লি, মশাদা থাজবা লৈহল্লি অমসুং মখোয়দা মকোক ৱাংনা থাংগত্তুনা লৈবা ঙমহল্লি। নাকল অমদনা, ইনফ্রাস্ত্রকচরগী অনিশুবা ত্রেক অসিনা লৈবাক শাহৌ লৌবগী ইঞ্জিনশিং, ঐখোয়গী অন্তোপ্রিনরশিং অমসুং ইন্দস্ত্রীশিংদা কান্নবা কয়া পীরি। ঙসিদি, হাইৱে, রেলৱে, এয়রৱে, ঈশিংগী লম্বীশিং অসি লৈবাক্কী মফম খুদিংদা খোঙজেল য়াঙনা শন্দোক্লি। হিথাংফমশিং অসি তোঙানবা ত্রান্সপোর্তকী পাম্বৈশিংদা শম্নহল্লে অমসুং মলতিমোদেল কন্নেক্তিবিতীদসু মিৎয়েং চঙবা হৌরে।
ফ্রৈৎ কোরিদোরগুম্না শেন্মিৎলোনগী কোরিদোর, দিফেন্স কোরিদোর, তেক ক্লস্তর কয়া অমসু ঙসিদি ইন্দস্ত্রীশিংগী ওইনা শেমগত-শাগৎলি। মসিগী মীওই অমগী অমসুং ইন্দস্ত্রীগী খ্বাইদগী ফরবা ইনফ্রাস্ত্রকচরশিং অসি ভারত্তা শেমগৎলি হায়না মালেম্না খঙবা মতমদসু, মসিনা কান্নবা চৈথেং অমা অমুক পীগনি। মসিনা মরম ওইদুনা ভারতনা হান্নগুম ওইখিদ্রিবা এফ.দি.আই. লাকপা, ভারতকী ফোরেন এক্সচেঞ্জকী রিজর্ব হেনগৎলক্লিবা অমসুং মালেম ভারত্তা থাজবা হেনগৎলকপগী ফিভমশিং উবা ফংলিবনি। জাপানগী এম্বেসেদর, শ্রী সুজিকিসু থৌরম অসিদা শরুক য়াবীরি। জাপান অমসুং মখোয়গী মীয়াম্না মতম পুম্বদা ভারতকী চাউখৎপগী লম্বীদা থাজরবা মরুপ অমাগুম্না খোঙলোই ওইদুনা লাক্লি। ৱেস্তর্ন দেদিকেতেদ ফ্রৈৎ কোরিদোর শাবদসু জাপানগী মীয়াম্না তেক্নিকেল অমসুং শেল-থুমগী হীরমদা মপুং ফানা শৌগৎলকখি। ঐহাক্না মসি খঙই অমসুং মসিগীদমক্তা জাপান অমসুং মখোয়গী মীয়াম্বু থাগৎচরি।
মরুপশিং,
মীওই অমা, ইন্দস্ত্রী অমসুং শেল-থাদবগী থৌওংশিংদা নীংথিনা মরী লৈনবা অসিনা ইন্দিয়ন রেলৱেজপু চাং নাইনা মতমগা চান্নহল্লি। রেলৱেগী পেসেঞ্জরশিংনা থেংনরম্বা খুদোংচাদবা কয়া অদুবু কনানা কাওবা ঙমগদগে? ঐখোয়সু মদুগী অৱাবশিং অসু লোইনা থেংনরকই। বুকিংদগী হৌদুনা ঐখোয়গী পন্থুংফম য়ৌবা ফাওবদা ৱাকৎপগী ৱাকৎপা ঙাক্তনি। মতম অদুদা লু-নানবা, ত্রেন মতম চানা চেনবা, সর্ভিস, ফেসিলিতী নত্ত্রগা ই.-সেক্যুরিতী, মী ঙাক্তবা থোঙ লৈহন্দবনচিংবা রেলৱেবু হেন্না ফগৎহন্নবা দীমান্দ কয়া অসি থাক খুদিংদা লৈরম্মি। হায়রিবশিং অসিবু হোংহনবগী মতাংদা চহি খরগী মনুংদা অনৌবা থৌওং কয়া লৈখ্রে। স্তেসন্দগী হৌদুনা কম্পার্তমেন্ত ফাওবগী লু-নানবা, বাইওদিগ্রেদেবল তোইলেৎ, কেতরিং, মতম চান্নবা তিকেৎ ককপগী পথাপ অমসুং তেজাস নত্ত্রগা ভন্দে ভারত এক্সপ্রেস, ভিস্তা-দোম কোচকুম্বা ওইরো, ইন্দিয়ন রেলৱেজ অসি য়াম্না য়াঙবা খোঙজেলদা মতমগা চান্নরক্লি অমসুং ভারতপু তুং লমচৎকীদমক্তা অয়াঙবা খোঙজেলদা পুদুনা চৎলি।
মরুপশিং,
হৌখিবা চহি ৬তা, অনৌবা রেল লাইন, ত্রেক পাকথোকপা, রেল লাইনশিংবু ইলেক্ত্রিক ওইহন্নবা শেম্নবা শেল থাদবগী থৌওংসিং অসি হান্না অমুক্তা তৌখিদ্রি। রেল নেৎৱর্ক্তা মিৎয়েং চঙবা হেনগৎলকপা অসিনা ইন্দিয়ন রেলৱেজকী খোঙজেল অমসুং পাকথোক চাউথোকপা হেনগৎহল্লক্লি। অৱাং-নোংপোক্কী রাজ্যশিংগী কোনুংশিংসু অথুবা মতমদা রেলৱেনা শম্নহনবগী মতম অদুসু কুইদ্রে। ঙসিদি ভারত্তা সেমি হাই স্পীদ ত্রেন্সু চেল্লে। ভারতনা ত্রেক শেম্বদগী হৌরগা খ্বাইদগী ফবা তেক্নোলোজী শিজিন্নদুনা হাই স্পীদ ত্রেনগী থবকশিং পাংথোকপগী থবকসু চত্থরিবনি। ইন্দিয়ন রেলৱেজনা ‘মেক ইন ইন্দিয়া’ অমসুং নীংথিজবা ইঞ্জিন্যারিংগী খুদম অমা ওইরি। মসিগী রেলৱেগী খোঙজেল অসিনা লৈবাক অসিবু চাউখৎপগী অনৌবা থাক্তা পুরগনি হায়বগী ঐহাক্না থাজবা থম্মি। ইন্দিয়ন রেলৱেজনা ভারতপু অসিগুম্বা মওংদা সেবা তৌবগীদমক্তা ঐহাক্না য়াইফ-পাউজেল পীরি। কোরোনাগী মতমদসু, মখোয়না থবক তৌখিবা মওং অমসুং শিন্মীশিংবু ময়ুমদা য়ৌহনখিবা অদুগীদমক্তা মখোয়দা মীয়াম্না থৌজানখিবনি। মীয়ামগী থৌজাল খুদিংমক অসি নখোয়গী থবক তৌরিবা মীওই খুদিংদা লৈবা ওইসনু হায়না ঐহাক্না থৌনিজরি।
ঐহাক্না মীয়াম্বু ৱেস্তর্ন দেদিকেতেদ ফ্রৈৎ কোরিদোরগীদমক্তা অমুক্কা হন্না থাগৎপা ফোংদোক্লি।
মীয়াম্বু য়াম্না থাগৎচরি।
