India has a long tradition of handicrafts and Varanasi has played a key role in this regard: PM Modi
We want our weavers and artisans belonging to the carpet industry to prosper and get global recognition: PM ModiFor the carpet sector, our mantra is Farm to Fibre, Fibre to Fabric, Fabric to Fashion and Fashion to Foreign: PM Modiখুরুমজরি।
বরানসীদা লেংশিনবীরিবা মন্ত্রীপরিশদকী ঐগী খোংলোই স্মৃতি ইরানীজী, কার্পেৎ সেক্তরগা মরি লৈনবা ইন্ত্রপ্রিনর পুম্নমক, ঐগী ফি শাবা ইচিন-ইনাও, ইচে-ইচল পুম্নমক, অমসুং মফম অসিদা লেংশিনবীরিবা অখঙ অহৈ পুম্নমক। কাশীগী শেংলবা লৈমাই অসিদা লৈবাক অপুনবদগী লাকপীরিবা, মীরমদগী লাকপীরিবা, অদোম পুম্নমকপু থমোই শেংনা নোল্লুকপা ফোংদোকচরি। ঐঙোন্দা হায়খি মদুদি মালেমগী চাউরাক্না লৈবাক ৩৮দগী মীথুংলেন চনি য়াঙ্খৈরোম্না এক্সপো অসিদা শরুক য়ারি। মসিদা নত্তনা জম্মু-কশ্মীর, নোংচুপ বেঙ্গল অমসুং লৈবাক অসিগী অতৈ রাজ্যশিংদগীসু কার্পেৎ সেক্তরগা মরি লৈনবা মীয়াম্না শরুক য়াররি। অদোম পুম্নমকপু বনারসকী এম.পি. অমা ওইনসু হন্না হন্না তরাম্না ওকচরি।
মরূপশা, হৌজিক লৈবাক অসিদা কুম্মৈগী মতম ওইরি। দশেরা, দুর্গাপুজাগী মতুংদা ঐনা অহানবা ওইনা তেক্নোলোজীগী থোংদা বনারসকা লোইনজবগী খুদোংচাবা ফংজরে। হৌজিক অদোম ধন্তেরস অমসুং দীপাবলীগীদক শেম শাবা হৌবীরম্লগনি। মতম অসি চহি অমগী খ্বাইদগী চিনবা মতমনি। মসিদা অতৈ মতমদগী থবক খরা হেন্না শুনৈ, মরমদি চংবা হেল্লি। অদোমগী হোৎনজমনগী, কলাগী মনা অদোম্না ফংনবগীদমক খ্বাইদগী ফবা মতমনি।
মরূপশা, বরানসী অমসুং য়ু.পী.গী ফি শাবা অমসুং ললোনবা ইচিল-ইনাওশিংগীদমক্তা হন্দক্তি কুম্মৈশিং অসিনা হরাও-নুংঙাইবা শরুক অনি পুদুনা লাক্লি। দীনদয়াল হেন্দিক্রাফত পেকেজদা অহানবা ওইনা ইন্দিয়া কার্পেৎ এক্সপো পাংথোক্লি। মসিগীদমক্তা অদোম পুম্নমকপু হন্না হন্না নুংঙাইবা ফোংদোকরি। হৌজিক দিল্লীগা লোইননা বরানসীদা ভারতকী কার্পেৎ ইন্দস্ত্রীবু, ঐখোয়গী ফি শাবশিংবু, দিজাইনরশিংবু, ললোন-ইতিক তৌবশিংবু, মখোয়গী হৈ-শিংবা, মখোয়গী পোৎথোক মালেমগী মাংদা উৎননবগী তাঞ্জা ফংলরি।
মরূপশা, ঐনা নুংঙাইবা ফাওজৈ মদুদি পান্দম অদুবু পুদুনা লিংখৎখিবা দীনদয়াল হেন্দিক্রাফ পেকেজ অসিনা পান্দম অদুগী মাইকৈদা খোংজেল য়াংনা চংশিল্লি। মসি লম লমগী ফি শাবা, কার্পেৎ ইন্দস্ত্রীগী হব অমা ওইবগীদমক্তসু মরু ওইরি। মফম অসিদা লৈবাক্কী হেন্দিক্রাফকা মরি লৈনবা চাউরাক্না ফি শাবা শরুক মরি থোকপগী অমা, শিন্মী অমসুং ললোন-ইতিক তৌরিবা ইচিল-ইনাওশিং য়াওরি। বরানসীবু ওইরো, ভদোইবু ওইরো, মসি কার্পেৎ ইন্দস্ত্রীগী ময়োন ওইদুনা লাক্লি, অমসুং হৌজিক অৱাং ভারত, লমদম অপুনবা অসি লৈবাক অসিগী তেক্সতাইল এক্সপোগীসু গ্লোবেল হব ওইরক্লি। মসিদসু নত্তনা, দীনদয়াল হেন্দিক্রাফ পেকেজসু হেন্দিক্রাফকী মতাংদা অসিগুম্বা মালেমগী ওইবা শক্তাক অসি চেৎশিনহনবদা মরু ওইবা থৌদাং লৌরি।
মরূপশা, হেন্দিক্রাফনা অপীকপা অমসুং ময়াই ওইবা ইন্দস্ত্রীশিংবু পুক্নীং থৌগৎনবগীদমক্তা তেক্নোলোজী শিজিন্নদুনা শন্দোক্নবা হোৎনবদা শাফু পীবা, কান্নবশিং অদু পোৎথোক শেম্লিবা মফম অদুদা য়ৌহনবা অসি সরকারনা লেপ্তনা হোৎনদুনা লাক্লি। হন্দক বারানসীদা পাংথোক্লিবা ইন্দিয়া কার্পেৎ এক্সপো অসি মসিগী পরিং অসিদা অচৌবা খোংথাং অমা ওইবগা লোইননা তেক্সতাইল সেক্তরগীদমক্তা ঐখোয়গী ফাইব এপকী ভিজনগীসু মরু ওইবা শরুক অমনি। অমসুং ঐনা ফাইব এপ হায়রিবা অসিদা ফাইব এপকী ৱাহন্থোক অসি ফার্ম তু ফাইবর, ফাইবর তু ফেক্তরী, ফেক্তরী তু ফেশন, ফেশন তু ফোরেন্নি মসি ফি শাবশিংবু হকথেংননা মালেম অপুনবগী কৈথেলগা শম্নহন্নবগী মাইকৈদা য়াম্না চাউবা থৌরাং অমনি।
লাক্কদৌরিবা নুমিৎ মরিনি অসিদা এক্সপো অসিদা খ্বাইদগী মকোক থোংবা দিজাইনশিং উৎকনি, লুপা ক্রোর ক্রোরগী ব্যুজিনেস তৌনগনি, য়ান-ৱারোল শেমগনি, ব্যুজিনেসকী অনৌবা তাঞ্জা হাংদোক্কনি, ফি শাবশিংনা অনৌবা ওর্দর ফংগনি। ঐনা থাজৈ মদুদি মীরমদগী লাক্লিবা মরূপশিং অসি, মখোয়সু ঐখোয়গী সংস্কৃতি, কাশী অমসুং ভারতকী হোংলক্লিবা ব্যুজিনেসকী ফিভম অসি খঙবা ঙমগনি।
মরূপশা, হেন্দিক্রাফ অসিগা লোইননা ভারত্তা য়াম্না কুইরবা চৎনবী অমা লৈরক্লি। ভারতকী খু্ঙ্গংগী লমদমদা ঙসিসু লংচাক চাক্ননবগীদমক্তা তরেং নীংথিজনা শিজিন্নরি। মসিদা বনারসকী লমদম অসিনা অচৌবা থৌদাং য়ারি। সন্ত কবীরগা মরি লৈনবা বনারসকী শক্তাক পুম্নমক অদুগুম্না হেন্দিক্রাফকসু মরি লৈনৈ। সন্ত কবীর অসি লংচাকসু চাকখি অমসুং মদুগী থোংদা পুন্সিগী পাউজেলসু পীখি। কবীরদাসজীনা হায়বীরম্মি –
কহি কবীর সুনো হো সন্তো, চরখা লখো জো কোয়।
জো য়হ চরখা লখি ভয়, তাকো অৱাগমন নহোয়॥
হায়বদি তরেং অসিমক পুন্সিগী তঙাইফদবা অদুনি অমসুং মসিবু খঙলবদি মীশক অদুনা পুন্সিগী মশক খঙলবনি। হেন্দিক্রাফপু পুন্সিগী অসুক চাউখ্রবা ৱাঙুলোনগা পুন্সিল্লিবা মফম অসিদা ফি শাবশিংগী পুন্সিবু লাইথোকহন্নবগীদমক অসিগুম্বা মখলগী থৌরাং শেম্লকপদা অপেনবা ফাওজৈ।
মরূপশা, ঐখোয়গী লৈবাক্তা হেন্দিক্রাফ-ব্যুজিনেস অসি ললোন ইতিক তৌবগী মথক্কী ৱাখল্লোনগী, নীং খা তম্বগী লাঞ্জংগী, ইশানা ইশাবু শেম শাজনবগী পাম্বৈ অমা ওইদুনা লাক্লি। গান্ধীজী, সত্যগ্রহ অমসুং তরেং অসি ঐখোয়গী নীং খা তম্বগী খোংজংদা কয়াদা মরু ওইখিবগে হায়বদু ঐখোয়না ময়েক শেংনা খঙই।
মরূপশা, মগু হেনগৎহনবতা নত্তনা ফি শাবশিং অসিবু, ললোন-ইতিক মচা তৌবশিং অসিবু পৈশাগী অৱাবা লৈহন্দনবগীদমকসু হোৎনরি। মুদ্রা য়োজনাগী মখাদা লুপা লিশিং ৫০দগী হৌদুনা লুপা লাখ ১০ ফাওবগী গরেন্তী ফ্রী লোন্দগী য়াম্না চাউবা কান্নবা ফংলি। ফি শাবশিংগীদমক্তদি মুদ্রা য়োজনাদা লুপা লিশিং ১০গী মার্জিন মনীসু ফংহল্লি।
মসিদসু নত্তনা, হৌজিক মতং নত্ত্রগা লোন অমা হেক্তা ফি শাবশিংদা পীরিবা অসি অতেনবা মতমগী মনুংদা মখোয়গী একাউন্তা য়ৌরি। ‘পহেচান’গী মিংদা ফি শাবশিংদা পীরিবা শক্তাক চে অসিনা ময়াই চাবশিং লৌথোকপদা য়াম্না মতেং ফংলি।
মসিদসু নত্তনা ভদোই, মির্জাপু মেগা কার্পেৎ ক্লস্তর অমসুং ক্ষীনাগর কার্পেৎ ক্লস্তর ফি শাবশিংদা অনৌবা লোনসু পীরি। লোন হৈ শিংনা শিজিন্ননবগীদমক ত্রেনিংসু পীরি। ফি শাবশিংগী লৌশিং হেনগৎহন্নবা মখোয়গী স্কিল দিবেলপমেন্ত পাইখৎলি।
মরূপশা, অহানবদা ঐনা ফি শাবা ইচিল-ইনাওশিংগা ৱারী শানবা মতমদা ৱাফম অমা শোইদনা তাবা ফংলম্মি, মখোয়না হায় মদুদি ঐখোয়গী অঙাংশিংনা ঐখোয়গী থবক অসি তৌনিংদ্রে। মসিদগী হেন্না শাথিবা ফিভম করি ওইগনি? ঙসি ঐখোয় কার্পেৎকী মতাং মালেমগী মকোক থোংনা লৈরিবা অসিগুম্না লাক্কদৌরিবা মীরোল অসিদা পুক্নীং থৌগৎপগী মথৌসু তাই।
পান্দম অসিগী মখাদা আই.আই.সি.তি. ভদোইদা,
মসিগী মখাদা কার্পেত তেক্নোলোজীদা বি তেক (B.Tech) হাংদোক্লি। লৈবাক অসিগী অতোপ্পা মফমশিংদসু ত্রেনিং ইন্সতিত্যুৎশিংদা অসিগুম্বা মখলগী পাইখৎনবা থৌরাং লৈ। ফি শাবশিংগী হৈ-শিংবগা লোইননা মখোয়গী অমসুং মখোয়গী মচা-মশুশিংগী মহৈ-মশিং তম্বদসু মীৎয়েং থমলি। লাইরবা ফি শাবশিংগী অঙাংশিংগী ফীসকী চাদা ৭৫ সরকারনা পুথোক্লি।
মরূপশা, অদোমগী কলা অমসুং থৌদাং অদুবু লৈবাক অসিগী পাঙ্গল ওইহন্নবগীদমক্তসু সরকার অসিনা লেপ্লি। লাক্কদৌরিবা মতম অসিদা লৈবাক্কীদমক্তা, বনারসকীদমক্তা কলা অসি উৎথোক্নবগী য়াম্না চাউরবা তাঞ্জা লাক্কদৌরি।
মথং চহীগী জনুৱারীদা প্রভাসী ভারতীয় সম্মেলন কাশীদা পাংথোক্কদৌরি, মদুসু শন্দোক্নবগী য়াম্না চাউরবা পাম্বৈ অমা ওইগনি। ঐনা থাজৈ মদুদি মালেম পুম্নমক্তগী লাকপা ললোন-ইতিক তৌবা মরূপশিংনা ঐখোয়গী হেন্দিক্রাফকা লোইননা ঐখোয়গী নাৎকী শক্তম অমসুং হোংলক্লিবা কাশীগী নুংঙাইবসু লৌবা ঙমগনি।
অমুক্কা হন্না অদোম পুম্নমকপু ধনতেরস, দীপাবলী অমসুং ছথ পুজাগীদমর মাংজৌননা য়াইফ-পাউজেল পীজরি অমসুং মসিবু মাই পাক্না পাংথোকপগীদমক্তা, কাশীবু মালেমগী থাক ফংহন্নবগীদমক ঐনা মন্ত্রালয়দা, ঐগী ফি শাবা ইচিল-ইনাওশিংদা, এক্সপোর্ত-ইম্পোর্তকা মরি লৈনরিবা খঙ-হৈরবশিং পুম্নমকপু কাশীদা লাকপীবা, কাশীগী মিংচৎ অসিবু হেনগৎহনবীবগীদমক্তা হন্না হন্না নুংঙাইবা ফোদোকচরি।
হন্না হন্না থাগৎচরি।
