জয় হিন্দ!
জয় হিন্দ!
জয় হিন্দ!
নোংচুপ বেঙ্গোলগী রাজ্যপাল, শ্রী জগদীপ ধনখরজী, মুখ্য মন্ত্রী, ইচল মমতা বেনর্জী, কেবিনেত্তা লৈরিবা ঐহাক্কী মরুপশিং, শ্রী প্রহলাদ পতেলজী অমসুং শ্রী বাবুল সুপ্রিয়োজী, নেতাজী সুভাস চন্দ্র বোসকী নক্নবা মরী-মতাশিং, ভারতকী মিংচৎপু হেন্না ফজহনখিবা অজাদ হিন্দ ফাউজকী থৌনা ফরবা মীওইশিং অমসুং মখোয়গী মরী-মতাশিং, মফম অসিদা লৈরিবা মালেমগী আর্ত অমসুং লিতরেচরগী লময়ানবশিং অমসুং শক্নাইরবা বেঙ্গোলগী ইচিল ইনাওশিং।
ঐহাক্না ঙসি কোলকতাদা লাকপা অসি ঐহাক্কী ওইনা য়াম্না পুক্নিং নুংশিজবা ওই। ঐহাক্না অঙাং ওইরিঙৈদগী হৌনা নেতাজী সুভাস চন্দ্র বোসকী মিং তাবা মতমদা ফিভম অমা হেক্তদা লৈরবসু, ঐঙোন্দা অনৌবা শক্তি অমা হাপ্পগুম্না ফাওই। মহাক্কী মতিক মগুন অসিদি ৱাহৈনা ফোংদোকপদা য়ৌবা ঙম্লোই। মীওই কয়ানা মপোক কয়া পোক্লবসু খঙবা ঙম্লরোইদবা কয়া অমনা মহাক্না খঙই। তান চাদ্রবা মতমদসু, মহাক্না মালেমগী শিংনবা অমত্তনা অকায়বা পীবা ঙম্লরোইদবা থৌনা অমসুং লিচৎ লৈরম্মমি। ঐহাক্না নেতাজী সুভাস চন্দ্রগী মফমদা কোক নোন্দুনা খুরিমজরি। অমসুং মহাকপু পোকপীখিবা, ইমা প্রভাদেবীজীগী মফমদসু নোল্লুক্না ইকায় খুম্নবা উৎচরি। ঙসিগী নুমিৎ অসিদা মহাক্কী পোকপগী চহি ১২৫ মপুং ফারক্লে। ঙসিগী নুমিৎ অসিদা, চহি ১২৫গী মমাংদা, নিং তম্বা ভারত অমগী মঙলানগী অনৌবা মাইকৈ অমা পীবিখিবা থৌনা ফরবা মচা অসি ইমা ভারতকী তম্বাক্তা পোকখি। ঙসিগী নুমিৎ অসিদা, মীনায় চৎনবীগী মম্লবা মতম অমদা, ৱাখল্লোন অমা থোক্লক্তুনা মালেমগী খ্বাইদগী কন-থৌরবা শক্তিগী মমাংদা লেপ্লদুনা “ঐহাক্না নখোয়দা নিং-তম্বা পীবিয়ু হায়জরোই, ঐখোয়না নখোয়দগী নিং-তম্বা মুনগনি” হায়খিবনি। ঙসিগী নুমিৎ অসিদা, নেতাজী সুভাস চন্দ্র মথন্তা পোকখিবা নত্তে, ভারতকী মশাদা থাজবা অনৌবা অমসু পোকখি; ভারতকী অনৌবা মিলিতরীগী শক্তি অমা পোকখি। ঙসি, নেতাজীগী চহি ১২৫ শুবা মপোক-কুমওন অসিদা ঐহাক্না লৈবাক্কী মহুৎ শিন্দুনা মহাক্কী মফমদা ইকায় খুম্না উৎচরি।
মরুপশিং,
ঙসি, শীংথনিংঙাই ওইরবা বেঙ্গোলগী লমদম অসিবু মহাক্কী মচা সুভাসপু নেতাজী ওইহনবগী অমসুং মহাক্কী পুন্সিদা মীনা হেঞ্জিনবা য়াদবা, কত্থোকপা অমসুং অখাঙ-কনবগী মগুন কয়া হাপ্তুনা মহাক্কী পুন্সিবু শেম্বীখিবগীদমক্তা ঐহাক্না ইকায় খুম্না উৎচরি। গুরুদেব শ্রী রবিন্দ্রনাথ তেগোর, বঙ্কিম চন্দ্র চত্তোপাধ্যায়, শরদ চন্দ্রগুম্বা শক্নাইরবা মীওইশিং অসিনা শীংথানীংঙাই ওইরবা লমদম অসিদা লৈবাক নীংবগী ৱাখল্লোন পীবিখি। স্বামী রামাকৃষ্ণ পরমহন্সা, চৈতন্যা মহাপ্রভু, শ্রী ঔরোবিন্দো, ইমা শর্দা, ইমা অনন্দমায়ী, স্বামী বিবেকানন্দ, শ্রী শ্রী থাকুর অনুকুচন্দ্রগুম্বা লাইনীংবশিংনা নীংথিরনা লমদম অসিবু লাই-তিনগী নীংথিরবা থকসি-খাসি, সেবা অমসুং লাই-তিনগী ওইবা মহৌশাগা মান্নদবা তোঙানবা লমদম অমা ওইহনখি। ইশ্বর চন্দ্র বিদ্যাসাগর, রাজা রাম মোহন রোই, গুরুচান্দ থাকুর, হরিচান্দ থাকুরনচিংবা খুন্নাই শেমদোকপগী লময়ানবশিং অসিনা শেংলবা লমদম অসিদগী লৈবাক অসিগী ওইবা অনৌবা শেমদোকপা কয়াগী য়ুম্ফম থোনবীখি। জগদিশ চন্দ্র বোস, পি.সি.রায়, এস.এন. বোস অমসুং মেঘ্নাদ সাহাগুম্বা মশিং থীঙমদ্রবা সাইন্তিস্ত কয়া অমনসু লমদম অসিবু লৌশিং অমসুং সাইন্সনা থলহনখি। ঐখোয়গী লৈবাক্কী এন্থেম অমসুং ঈশৈ পীবিরিবা অসিসু লমদম অসিননি। মসিগী লমদম অসিনা দেশবন্ধু চিত্তরঞ্জন দাস, স্যামা প্রসাদ মুকর্জী অমসুং ঐখোয়গী নুংশীরবা ভারত রত্না প্রনব মুখর্জীসু ঐখোয়দা শক্তাপীবনি। ঙসিগী শেংল্বা নুমিৎ অসিদা অসিগুম্লবা শক্নাইরবা মীওই মিলিয়ন কয়াগী মফমদা কোক নোঞ্জরি।
মরুপশিং,
ঐহাক্না ঙসি অঙনবদা নেতাজীগী পুন্সিগী মতাংদা মালেমগী কনফরেন্স অমসুং আর্তিস্ত কেম্প পাংথোক্লিবা নেস্নেল লাইব্রেরীদা চৎলুরে। নেতাজী পুন্সিনা মীওই খুদিংগী নুংগী ৱাখল্লোনগা শম্নবগী মওংদা মীওই খুদিংনা মহাক্কী মমিং তাবদা শক্তি কয়া অমা ফাওবগী মওং উরকখি। মহাক্কী শক্তি, ৱাখল্লোন, অতোপ্পনা হেঞ্জিনবা য়াদবা, কত্থোকপগী থৌওং অসিনা লৈবাক অসিগী নহাশিংদা ইথিল পীরি। ঙসি ভারতনা নেতাজীনা পীরম্বা ইথিলগা লোয়ননা মাং থানা চৎলিবা অসিদা ঐখোয়না মহাক্কী মতমদা মহাক্না তেংবাংলম্বশিংবু নীংশিংবা অসি ঐখোয়গী ইথৌনি। মসিদি চারোন শুরোন খুদিংগী ওইনা নীংশিংগদবনি। মরম অদুনা, লৈবাক অসিনা মহাক্কী ১২৫শুবা মপোক কুমওন অসি পুৱারী ওইগদবা অমসুং চাউরবা মওংদা পাংথোক্নবা ৱারেপ লৌখ্রবনি। ঙসিগী অয়ুক্তগী হৌদুনা, লৈবাক্কী মফম খুদিংদা তোঙান-তোঙানবা থৌরম কয়া পাংথোক্লি। মসিগী শরুক অমা ওইনা, নেতাজীবু নীংশিংবা অমসুং ইকায় খুম্নবা ওইনা মহাক্কী শেনয়েক অমসুং পোস্তেজ স্তাম্প অমসু ঙসি ফোঙখি। মহাক্কী মতাংদা ইবা লাইরিক অমসু ঙসি ফোঙখি। নেতাজী ‘করমভুমি’ ওইরিবা বেঙ্গোলগী কোলকতাদসু মহাক্কী পুন্সিগা মরী লৈনবা একজিবিসন অমসুং প্রোজেক্ত মেপিংগী শো অমসু হৌরগনি। হৌরাহদগী চেনবা ‘হৌরাহ-কলকা মেল’ অসিসু নেতাজী এক্সপ্রেস হায়না মিংথোনখ্রে। লৈবাক অসিনা মহাক্কী মপোক কুমওন, জনুৱারি ২৩বুসু চহি খুদিংগী ‘পরাক্রম দিবস’ (থৌনা ফবা নুমিৎ) হায়না পাংথোকপগী ৱারেপসু লৌখ্রবনি। ঐখোয়গী নেতাজী অসি ভারতকী মথৌনা অমসুং ইথিলগী মোদেল অমসু ওইরিবনি। ঙসি, ঐখোয়গী লৈবাক অসিনা নিং-তম্বগী ৭৫শুবা চহিদা চঙশিল্লকপা, লৈবাক অসিনা আত্মানির্ভর ভারতকী ফীদমগা লোয়ননা তুং লমচৎকীদমক্তা চৎলকপা অসিদা নেতাজীগী পুন্সি, মহাক্কী থবক খুদিংনা ঐখোয় পুম্নমক্তা ইথিল পীবীরি। মহাক্কুম্বা শক্নাইরবা স্তীলগুম্না কনবা মগুন চেনবা মীওই অসিগীদমক্তা ওইথোক্তবা হায়বসি করিমত্তা লৈরমদে। মহাক্না মীরমদা চত্তুনা মফমদুদা লৈরিবা ভারত মচাশিংগী ৱাখল্লোনবু মীকপ থোকহনখি অমসুং নিং-তম্বগীদমক্তা অজাদ হিন্দ ফাউজকী মপাঙ্গল কনখৎহনখি। মহাক্না লৈবাক অসিগী কাস্ত, ধর্মা অমসুং মফম খুদিংগী মীওইবু মহাক্কী লান্মী ওইহনখি। মালেম অসিনা নুপীগী ফংফম থোকপা হক্কী মতাংদা খন্নরিবা য়ুগ অদুদা নেতাজীনা নুপীশিংবু মহাক্কী লান্মীদা শরুক য়াহন্দুনা ‘ঝান্সি রানী রেজিমেন্ত” শেমখি। মহাক্না লান্মীশিংবু মতমগা চান্নবা লাল্লোংদা ত্রেনিং পীখি, লৈবাক্কীদমক্তা হিংবগী ইথিল পীখি অমসুং লৈবাক্কীদমক্তা থৱাই থাবগী মরমসু পীখি। নেতাজীনা হায়রম্মি, “ভারোত দাকছে। রোক্তো দাক দিএ ছে রোক্তো কো। ঔথো, দরাও আমাদের নোস্থো করার মতো সোমোয় নোয়”। মসিনা হায়বদি, ভারতনা কৌরি। ঈনা ঈগীদমক্তা কৌরি। মীকপ থোক্লো, হৌগৎলো। ঐখোয়না মতম মাঙহনবা য়াদ্রে হায়বনি।
মরুপশিং,
নেতাজী খক্তনা অসিগুম্লবা লানগী থাজবা খোল্লাও পীবা ঙম্বনি। অদুগা, নুমিৎ শুক্তা তাদবা চাউরবা ইম্পায়র অসিবু ভারতকী লান্মীশিংনা লানফমদা মাইথীবা পীবা ঙমগনি হায়বসি মহাক্না থবক্না উৎলমখি। মহাক্না নিং-তম্বা ভারত অমদা ভারতকী মনিং তম্বা সরকার অমগী য়ুম্ফম হুল্লমগনি হায়না ৱাশকখি। নেতাজীনা মহাক্কী ৱাশকপুসু ঙাকখি। মহাক্না অন্দমান্দা মহাক্কী লান্মীশিংগা লোয়ননা লাক্তুনা মচু অহুমগী ফীরাল পায়হনখি। মহাক্না মফম অসুদা চত্তুনা ব্রিতিশশিংনা ওৎপী-নৈবীরবা অমসুং খ্বাইদগী অহকপা চৈরাক পীরিবা ভারতকী নিং-তম লান্মীশিংগী মফমদা ইকায় খুম্নবা উৎখি। মদুগী সরকার অদুনা অপুনবা ভারতকী অহানবা নিং-তম্বা সরকারনি। নেতাজীনা অপুনবা ভারতকী অজাদ হিন্দ সরকারগী অহানবা মকোক্নি। ঐখোয়না নিং-তম্বগী খ্বাইদগী অহানবা মিৎকুপ অদুবু ঙাক্তুনা থমদুনা অন্দমান ইথৎ অসিবু ইং ২০১৮দা নেতাজী সুভাস চন্দ্র ইথৎ হায়না থোনখিবা অদুদা ঐহাক্না য়াম্না চাউথোকচবা ফাওই। লৈবাক্কী ৱাখল্লোনশিংবু মিৎয়েং থম্লদুনা, নেতাজী মতাংদা লৈরম্বা ফাইল খুদিংমকসু ভারত সরকারনা মীয়ামদা ফংহনখি। আই.এন.এ.গী অহল ওইরবা লান্মীশিংনা জনুৱারি ২৬কী পেরেদতা শরুক য়াবা অসিদা ঐখোয়গী সরকারনা চাউথোকচবা ফাওই। ঙসিগী থৌরম অসিসু অজাদ হিন্দ ফাউজতা য়াওরম্বা লৈবাক্কী থৌনা ফরবা মচানুপা অমসুং মচানুপীশিংসু শরুক য়ারি। ঐহাক্না নখোয়গী নফমদা অমুক্কা হন্না কোক নোন্দুনা লৈবাক অসিনা নখোয়গী নফমদা লমন তোনশিঞ্জরে হায়না হায়জরি।
মরুপশিং,
ইং ২০১৮দা, লৈবাক অসিনা চপ-মান্নবা হরাও-তয়াম্বগা লোয়ননা অজাদ হিন্দ সরকারগী ৭৫শুবা চহি পাংথোকখি। লৈবাক অসিনা মান্নবা চহি অসিদা সুভাস চন্দ্র বোস দিজাজতর মেনেজমেন্ত এৱার্দসু হৌদোকখি। “দিল্লী অসি য়াম্না লাপ্ত্রে” হায়বা খোল্লাওগা লোয়ননা লাল কিলাদা মচু অহুমগী ফীরাল পায়হনবগী মহাক্কী মঙলান অদুসু লৈবাক অসিনা লাল কিলাদা মচু অহুমগী ফীরাল পায়হন্দুনা মঙফাওননহনখি।
ইচিল ইনাওশিং,
ঐহাক্না লাল কিলাদা অজাদ হিন্দ ফাউজকী তুপী উপ্তুনা মচু অহুমগী ফীরাল পায়হনখিবা মতমদা, ঐহাক্না তুপী অসিবু ঐহাক্কী লাইবক্তা থমজখি। মতম অদুদা ঐহাক্না ৱাখল কয়া অমা খনখি। মতম অদুদা ৱাহং কয়া অমা, পোৎলম কয়া অমা অমসুং ৱাখল্লোন কয়া অমা ফাওখি। ঐহাক্না নেতাজী অমসুং লৈবাক মীয়ামগী মরমদা খনখি। মহাক্না কনাগীদমক্তা খুদোংথিবা কয়া অসিবু মপুন্সি চুপ্পগী ওইনা থেংনরম্মিবনো? মসিগী পাউখুমদি, নখোয় অমসুং নখোয় খক্তগীনি। মহাক্না কনাগীদমক্তা নুমিৎ কয়া অমা চরা হেনখ্রিবনো? নখোয়গী অমসুং ঐখোয়গী। মহাক্না থা কয়া কয়াগী কৈশুমশঙদা চঙখ্রিবনো? নখোয়গী অমসুং ঐখোয়গী। চাউরবা ব্রিতিশ নীংথৌরেলনা মহাক্কী মতুংদা ইন্নরবসু, মহাক্না থৌনা ফনা নান্থোক্তুনা চেনখিবা অসি মহাক্না করি ওইদুনা ঙমখ্রিবনো? মহাক্না মপুন্সিবু খুদোংথিবদা থম্লদুনা চয়োল কয়া চুপ্না কাবুলগী ইম্বেসীশিংদা কোয়চৎ চৎখ্রিবনো? নখোয়গী অমসুং ঐখোয়গী। লৈবাকশিংগী মরী অসি মতম অমদা হোংবা মালেমগী অনিশুবা লাঞ্জাওগী মনুংদা, মহাক্না করিগীদমক্তা লৈবাক খুদিংদা চত্তুনা ভারত্তা শৌগৎপীনবা হায়জখ্রিবনো? মদুদি ভারতপু নিং-তমহন্দুনা নখোয়না নিং তম্বা ভারত্তা লৈবা য়ানবগীদমক্তনি। ভারত মচা খুদিংনা মহাক্কী লমন তোল্লবনি। ঐখোয়না মসিবু মতৌ করম্না শিংবা ঙমগদোইনো? ঐখোয়না মসিবু তসেংনা শিংবা ঙমগদরা?
মরুপশিং,
নেতাজীনা মহাক্কী, কোলকতাগী মফম অসিগী, ৩৮/২, ইলগিন রোদতা লৈবা ময়ুমদা ফাদুনা লৈরিঙৈদা, মহাক্না ভারত থাদোক্তুনা চেনবগী ৱারেপ লৌখি। মহাক্না মহাক্কী মচিন-মনাওশিংগী মচানুপা সিশির কৌদুনা অসুম্না হায়রমখি, “নহাক ঐহাক্কী থবক অমা তৌবা ঙমগদরা?”। মদুদগী সিশিরনা করিগুম্বা অমা তৌখি অমসুং মদুনা ভারতনা নিং-তম্বা ফংবগী য়াম্না মরু ওইবা মরম অমা ওইখি। ব্রিতিশকী নীংথৌরেল অসি মালেমগী লাঞ্জাওগী মনুংদা মপান্দগী য়ৈরবদি য়াম্না শোক্কনি হায়বা মহাক্না খঙলকখি। লাঞ্জাও অসিনা শাংথরবদি, ব্রিতিশকী মপাঙ্গল হন্থরক্কনি অমসুং মখোয়না ভারত্তা লৈরিবা চুক্লি অসি শোন্থরক্কনি হায়বা মাঙজৌননা উবা ঙমখি। মসি মহাক্না উখিবনি। ঐহাক্না মসিগী মতাংদা পাখ্রে অমসুং চপ মান্নবা মতম অদুদা, মহাক্না মহাক্কী মচিন মনাওগী মচানুপী, ইলাবু দখিনেশ্বর লাইশঙদা ইমাগী য়াইফ-থৌজাল নিজনবা থাখি। মহাক্না লৈবাক অসিদগী খুদক্তা থোকখিদুনা লৈবাক অসিগী মপান্দা লৈরিবা ভারতপু শৌগৎপা মীওইশিংবু পুন্সিন্নীংখি। মরম অদুনা মহাক্না নহা ওইরিবা সিশিরদা “ঐহাক্কীদমক্তা করিগুম্বা অমা তৌবা ঙমগদরা” হায়খিবনি।
মরুপশিং,
ঙসিদি, ভারত মচা খুদিংনা মশাগী থম্মোদা মখুৎ থমদুনা, নেতাজীবু ফাওজদুনা “ঐহাক্কীদমক্তা করিগুম্বা অমা তৌবা ঙমগদরা” হায়বা ৱাহং অদুবু অমুক্কা হন্না তাগদবনি। মসিগী থবক অসিদি, ঙসিগী মতমদা ভারতপু মরোমদোম লেপচবা ঙমহনবা অসিনি। লৈবাক অসিগী মীওই খুদিংমক অমসুং মফম খুদিংমক মসিগা মরী লৈনৈ। নেতাজীনা হায়রম্মি, “পুরুশ, ওরথো এৱম উপোকরন নিজেরাই বিজোয় বা সাধিন্তা আনতে পারে না, আমোদের অবোশোই সেই উদেশ্যো শক্তি থোক্তি থাক্তে হোবে জা আমোদের সাহোসিক কাজ এউম বিরতপুরনো শোস্নে উদবুধো কোরবে”। হায়বদি, ঐখোয়না থৌনা ফবা মওংদা লৈঙাকপা ঙম্নবা ইথিল পীনবগী শক্তি অমসুং মরম লৈগদবনি হায়বনি। ঙসিদি, ঐখোয়না পান্দমসু লৈরে, পাঙ্গলসু লৈরে। ঐখোয়গী মরোমদোম লেপচবা ঙম্বা হায়বা পান্দম অসিদি ঐখোয়গী ৱাখল চেৎপা অমসুং ইশাদা থাজবা অসিনা ফংহল্লগনি।
মরুপশিং,
নেতাজীনা লায়রবা, ইবা-পাবা থোক্তবা অমসুং লায়নাবু লৈবাক অসিগী খ্বাইদগী চাউবা শিংনবনি হায়না লৌখি। মহাক্না অসুম্না হায়রম্মি, “আমোদের সবছে বোরো জাতিয়ে সমস্য হোলি, দারিদ্রো, অখিক্সা, রোগ, বেগ্যানিক উতপাদোন। জে সমস্যার স্মাধান হোবে, কেবল মাত্রো সামাজিক ভাবনা-চিন্তা দ্বারা”। মসিনা হায়বদি, লায়রবা, ইবা-পাবা থোক্তবা, লায়না অমসুং সাইন্তিফিক ওইবা পোত্থোক পুথোকপা ৱাৎপা অসি লৈবাক অসিগী খ্বাইদগী চাউবা শিংনবনি। মসিগী ৱারোইশিন পুরক্নবগীদমক্তা খুন্নাই অসিনা অমত্তা ওইনা অপুনবা থবক পায়খৎমিন্নগদবনি”। লৈবাক অসিনা শোত্থরবা, অৱা-অনা তারবা, লৌমী অমসুং নুপীশিংবু মপাঙ্গল হাপ্নবা লেপ্পা লৈতনা হোৎনরিবা অসিদা নুংঙাইবা ফাওই। ঙসিদি, ঐখোয়গী লায়রবশিংনা লেম্না লায়েংবা অমসুং হকশেলগী ফেসিলিতীশিংগী খুদোংচাবা ফংলি; লৌউবশিংনা পোত্থোক্কী মরুদগী হৌদুনা কৈথেল ফাওবগী মতমগা চান্নবা খুদোংচাবা কয়া অমা ফংলি অমসুং মখোয়না লৌউবদা চঙবা চাদিংসু য়াম্না হন্থরে; এজুকেসনগী ইনফ্রাস্ত্রকচরশিংসু নহাশিংগীদমক্তা মতমগা চান্ননা মগুন লৈহল্লি; ২১শুবা চহি চাগা চুনহন্নবগীদমক্তা নেস্নেল এজুকেসন পোলিসীগা লোয়ননা অনৌবা আই.আই.তি., আই.আই.এম. অমসুং এমস কয়াসু লিংখৎলে।
মরুপশিং,
ঙসিগী ভারত অসিদা লৈরক্লিবা অফবা অহোংবশিং অসিনা নেতাজিবু য়াম্না হরাওহল্লমগনি। লৈবাক অসিনা খ্বাইদগী অনৌবা তেক্নোলোজীশিংগী হীরমদা মরোমদোম লেপচবা ঙম্লকপা; মালেমগী খ্বাইদগী চাউবা কম্পেনীশিং, এজুকেসন অমসুং মেদিকেল সেক্তরদা ভারত মচাশিংনা খুৎকন-পাঙ্গনবগী ফিভম লৈরক্লিবা অসি উবদা নেতাজিনা করম্না খল্লমগনি হায়বা খঙনিঙই। করিগুম্বা ভারতকী দিফেন্স ফোর্স অসিনা মতমগা চানবা রাফাএলগুম্বা এয়রক্রাফ লৈরক্লবনিনা, ভারতনা মতমগা চানবা ফাইতর প্লেন তেজাসকুম্বসু পুথোক্লি। লৈবাক্কী মপাঙ্গল অমসুং লৈবাক অসিনা লাইচৎ অসিবু থেংনবগী মওং অমসুং লমদম অসিদা ভেক্সিন শাজবগুম্বা মতমগা চানবা সাইন্তিফিক ওইবা ৱারোইশিন পুরকপা ঙম্লিবা অমসুং অতোপ্পা লৈবাকশিংবুসু তেংবাংবা ঙম্লিবা অসি উরবদি নেতাজিনা করি ফাওগনি? এল.এ.সি.দগী হৌদুনা এল.ও.সি. ফাওবা লৈরিবা মপাঙ্গল লৈবা ভারত অমগী মহাক্কী মঙলান অসি ঙসিদি মালেম্না উবা ফংলে। ভারতনা মসিগী অপুনবদা শিংনরকপশিংদসু মতিক চাবা পাউখুম পীরে।
মরুপশিং,
নেতাজীগী মতাংদা হায়বা য়াবা কয়া অমা লৈ অমসুং মখোয়শিং অসিগী মতাংদা পাউদম্বদা অহিং কয়া অমদি শোইদনা হৌখিগনি। ঐখোয় খুদিংনা, মরু ওইনা নহাশিংনা, মহাক্কী পুন্সিদগী তমজনিংঙাই কয়া অমা লৈ। ঐহাক্না মহাক্কী মরমদা খ্বাইদগী পামজবা অসিদি মহাক্না পান্দম অমা ফংনবগীদমক্তা লেপ্পা লৈতনা হোৎনখিবা অদুনি। মালেমগী লাঞ্জাউদা য়ুম্থংনবা লৈবাকশিংনা মাইথিরকপা অমসুং সরেন্দর তৌনরকপা মতমদা, নেতাজীনা মহাক্কী খোঙলোয়শিংদা হায়খিবদি, মখোয়না চঙজখিবা য়াই অদুবু ঐখোয়দি মদু তৌরোই। মহাক্না মহাক্কী পান্দম্বু ফংবা ঙম্নবা হোৎনবা থৌওং অসিদি য়াম্না তোপ-তোপ্পী। মহাক্না মহাক্কী মফমদা মতম পুম্বদা ভগবদ গীতা থম্লম্মি অমসুং মদুনা মঙোন্দা ইথিল পীবীরম্মি। মহাক্না করিগুম্বা অমগী মতাংদা থাজবা লৈরবদি, মদু ফংনবা মহাক্না থেংখাং কয়া থেংনদুনা চৎকনি। মহাক্না হায়বীরম্বদা, করিগুম্বা ৱাখল্লোন অমসি য়াম্না চম্বা ওইদ্রবা, য়াম্না তোঙানবা ওইদ্রবা, নত্ত্রগা মদুগা মরী লৈনবা খুদোংচাদবা কয়া লৈরবসু, অনৌবা থৌওং পাংথোকপা ওইরগদি কৈদৌনুংদা কিরোইদবনি। করিগুম্বা নহাক্না করিগুম্বা অমদা থাজবা থম্লবদি, মদুগীদমক্তা থবক হৌবা ঙম্বগী থৌনা লৈগদবনি। নখোয়না ঈচেলগী মাইয়োক্তা চৎলে হায়না খনবসু য়াই, অদুবু নহাক্কী পান্দম অদুনা অফবা, অশেংবা ওইরবদি, নহাক্কী খোঙচৎ অদুদা চিংনবা ফাওরোইদবনি। করিগুম্বা নখোয়না নখোয়গী লাপ্না লৈবা পান্দম অদুগী মতাংদা খোঙফম চেৎলবদি, মদু শোইদনা ফংগনি হায়বসি মহাক্কী থবক্না ঐখোয়দা উৎপীরে।
মরুপশিং,
নেতাজী সুভাসনা সোনার বাঙ্গলাগা লোয়ননা আত্মানির্ভর ভারতকী মঙলানগী খ্বাইদগী চাউবা ইথিলনি। লৈবাক অসিগী নিং-তম লান্দা নেতাজি সুভাস চন্দ্র বোসনা লৌরম্বা থৌদাং অদুগা মান্ননা নোংচুপ বেঙ্গোলসু লৈবাক অসিগী আত্মানির্ভর ওইবগী খোঙজঙ অসিদা চপ মান্নবা থৌদাং লৌগদবনি। আত্মানির্ভর ভারত অসি আত্মানির্ভর বেঙ্গোল অমসুং সোনার বঙ্গলানসু লমজিংগদবনি। বেঙ্গোলনা মাং থানা চত্তুনা মশাগী অমসুং লৈবাক অসিগী নুংঙাই য়াইফবা পুরক্কদবনি। ঐখোয়সু, নেতাজীগুম্না, পান্দন ফংদ্রিবা ফাওবা লেপ্পোইদবনি। নখোয় খুদিংসু নখোয়গী ৱারেপ অমসুং থবকশিংদা মাই-পাকপা ওইয়ু। ঙসিগী শেংলবা নুমিৎ অসিদা মসিগী শেংলবা লমদম অসিগী য়াইফ-থৌজালগা লোয়ননা ঐখোয় খুদিংমক্না তুং লমচৎকীদমক্তা খোঙশান্দুনা নেতাজীগী মঙলান অসিবু মঙফাওনহল্লসি। মসিগী ইথিল অসিগা লোয়ননা, ঐহাক্না মীয়াম্বু থাগৎচরি। জয় হিন্দ, জয় হিন্দ, জয় হিন্দ।
মীয়াম্বু অমুক্কা হন্না, হন্না-হন্না থাগৎচরি।
