“জল জীবন মিসন অসি দিসেন্ত্রেলাইজেসনগী চাওরবা খোঙজং অমনি। মসি খুঙ্গং-হৌদোকপা-নুপীশিং হৌদোকপা খোঙজং অমনি। মসিগী মরুওইবা য়ুম্ফমদি মীয়াম হৌদুনা খোঙজং চংবা অমসুং মীয়াম্না শরুক য়াবা অসিনি”
“হৌখিবা দিকেদ তরেৎতা তৌখিবদগী হেন্না চহি অনি অসিদা মীয়ামগীদমক্তা তোতিগী ঈশিং ফংনবা থবকশিং হেন্না তৌরি”“গুজরাত কুম্বা রাজ্যদগী লাকপা ওইবনা, ঐহাক্না ঈকং থোকপগী মওংশিং উরে অমসুং ঈশিং মরিক অমগী মরুওইবা খঙই। মরম অদুনা, গুজরাতকী মুখ্য মন্ত্রী ওইনা ঈশিং ফংহনবা অমসুং ঈশিং য়োকপা অসি ঐহাক্কী খ্বায়দগী লুবা হান্না পায়খৎকদবা থবকশিংগী মনুংদা অমনি”“ঙসিদি, লৈবাক অসিগী চাওরাক্না দিস্ত্রীক্ত ৮০গী খুঙ্গংশিং চাওরাক্না লাখ ১.২৫গী ইমুং খুদিংমক ঈশিং ফংলে”“এস্পিরেসনেল দিস্ত্রীক্তশিংদা তোতি শম্বগী মশিং অসি লাখ ৩১দগী কোতি ১.১৬তা হেনগৎখি”“য়ুম্থোং খুদিং অমসুং স্কুলদা তোইলেত, অহোংবা সেনিতরী পেদ, মীরোলঙৈদা চিঞ্জাক্কী মতেং অমসুং ইম্ম্যুনাইজেসনগী খোঙথাংনা মাত্রাশক্তিবু মপাঙ্গল কনখৎহল্লি”খুরুমজরি,
কেন্দ্র মন্ত্রী মন্দলগী ঐগী খোঙবু ওইরিবা শ্রীমান গজেন্দ্র সিংহ সেখাৱত জী, শ্রী প্রহলাদ সিংহ পতেল জী, শ্রী বিস্বেস্বর তুদু জী, রাজ্যগী মুখ্য মন্ত্রী, রাজ্যশিংগী মন্ত্রীশিং, লৈবাক পুম্বগী পঞ্চায়তকা মরী লৈনবা মেম্বরশিং, পানি সমিতিগী মেম্বরশিং, অমদি লৈবাক্কী কাচিন-কোয়া শিনবা থুংবদগী ভর্চুএল ওইনা থৌরমসিদা শরুক য়ারিবা য়াম্লবা ঐগী ইচিল ইনাউশিং।
ঙসিগী নুমিৎ অসি ওক্তোবর ২নি, লৈবাকসিগী অথোইবা মপারী অনিবু ঐখোয়না চাউথোকচবগা লোয়ননা নীংশিংলি। ইকায়খুম্নরবা বাপু অমসুং লাল বহাদুর সাস্ত্রী জী হায়রিবা অথোইবা মীওই অনিসিগী পুক্নিংদা ভারতকী খুঙ্গংশিং লোয়নদুনা লৈখি। ঙসিগী নুমিৎসিদা লৈবাক পুম্বদা খুঙ্গঙগী মীওই লাখ কয়ানা গ্রাম সভাগী মওংদা জল জীবনগী ৱাফম শন্দোকপসিদা ঐঙোন্দা হরাওবা ফাওই। অসিগুম্বা তুংগী মীৎয়েঙদা লৈবাক শিনবা থুংনা চঙশিল্লিবা মিসন অসি অসিগুম্বা থৌনা অমসুং পাঙ্গলনা মায় পাকহনবা ঙমগনি। জল জীবন মিসনগী মঙলানদি মীয়ামদা ঈশিং ফংহনবখক্তা নত্তে। মসি দিসেন্ত্রেলাইজেসনগী য়াম্না চাউবা ইহৌ অমসুনি। মসি খুঙ্গংশিংনা থৌবা – নুপীশিংনা থৌবা ইহৌ অমনি। মসিগী মরুওইবা য়ুম্ফমদি মীয়ামগী ইহৌ, মীয়াম্না শরুক য়াবদুনি। অদুগা হায়রিবা অসি ঐখোয়গী ঙসিগী থৌরমসিদা উবা ফংলি।
ইচিল ইনাউশিং,
জল জীবন মিসনগী হেন্না মপাঙ্গল কলহন্নবা, তরু তরুবা ওইহন্নবা ঙসি খোঙথাং কয়াসু লৌখৎলি। জল জীবন মিসন এপ্তা থৌরাং অসিগা মরী লৈনবা ঈ-পাউ খুদিংমক মফম অমত্তদা ফংগনি। য়ুমথোঙ কয়াদা ঈশিং ফংহনখ্রে, ঈশিংগী ফীভম কমদৌই, ৱাতর সপ্লাই স্কিমগী ফীভম, পুম্নমক হায়রিবা এপ অসিদা ফংগনি। অদোমগী খুঙ্গংগী ঈ-পাউসু মসিদা ফংগনি। ৱাতর ক্বালিতী মোনিতরিং অমসুং সর্ভিলেন্স ফ্রেমৱর্ক্কী মতেঙনা ঈশিংগী ফীভম ফনা থমবদা মতেঙ ওইগনি। খুঙ্গংগী মীয়ামসু মসিগী মতেঙনা মখোয়গী মফমদুগী ঈশিংগী ফীভম শেংবরা শেংদবরা হায়বা য়েংশিনবা ঙম্লগনি।
মরূপশিং,
চহি অসিদা ইকায়খুম্নবদা মতিক চারবা বাপুগী মপোক কুমওন থৌরম নীংতমবগী অমৃত মহোতসবকী থৌরমগা লোয়ননা পাঙথোক্লি। বাপুগী মঙলান মঙফাওনহন্নবগীদমক লৈবাক মীয়াম পুম্বনা লেপ্পা লৈতনা হোৎনরিব অমদি মতেঙ পাংনরিবসিদা নুংঙাইবগী ইথিল অমা ঐখোয় পুম্নমক্কী ইফমদা ফাওরি। ঙসি লৈবাকসিগী ময়োল্লম অমসুং খুঙ্গংশিং মশা মশানা লমহাংদা খোঙহাম খুৎহামবগী ফীভম লৈত্রে হায়না লাউথোকচখ্রে। চাউরাক্না খুঙ্গং লাখ ২রোম্না মখোয়গী মফমদুদা অমোৎ অকায় মফম চানা লোইশিন্নবা থবক হৌখ্রে। খুঙ্গং লিশিং ৪০ হেনবনা মখোয়গী মফমশিংদা সিঙ্গল য়ুজ প্লাস্তিক থিংননবা ফিরেপ লৌখ্রে। মতম শাংনা নাথৈবিদুনা লাক্লবা খাদি, হেন্দিক্রাফ্ত য়োনবগী চাং শরুক কয়া হেনগৎলে। হায়রিবা থৌরাংশিং অসিগা লোয়ননা ঙসি লৈবাকসিনা আত্মনিরভর ভারত অভিয়ানগী ফিরেপকা লোয়ননা মাঙদা চঙশিল্লি।
মরূপশিং,
গান্ধী জীনা হায়বিরম্মি খুঙ্গং মনীং তমহনবগী নুংগী ৱাহন্থোক্তি মখোয়দা মপাঙ্গল মপুং ফানা হাপ্পিবনি। মরম অসিনা খুঙ্গং মনীং তমহনবগী ৱাখল্লোন অসিগী, পান্দম অসিগী মায়কৈদা খোঙ থাঙজিন্নবা ঐনা লেপ্পা লৈতনা হোৎনরি। গুজরাত্তা মতম শাংনা থৌগল তৌদুনা লাকপদা খুঙ্গং মনীং তমহনবগী মঙলানবু ঐনা থবক ওইনা পাঙথোক্নবগী তাঞ্জা ফংখি। তরু তনানবা খুঙ্গংগী পান্দমগা লোয়ননা লমহাংদা খোঙহাম খুৎহামবা তোকপা, জল মন্দির অভিয়ানগী খুত্থাঙদা খুঙ্গংগী হান্নগী স্তেপৱেলশিংবু অমুক হিংগৎহনবা, জ্যোতিগ্রাম য়োজনাগী মখাদা খুঙ্গংদা পুং ২৪ মৈ ফংহনবা, তীর্থগ্রাম য়োজনাগী খুত্থাঙদা খুঙ্গংশিংদা হাৎন-শুনবগী মহুৎ নুংশি-চান্নবা পুরকপা, ই-গ্রাম অমসুং ব্রোদবেন্দনা গ্রাম পঞ্চায়ত পুম্নমক্তা কন্নেক্তিভিতী পীবা, অসিগুম্বা থৌরাং কয়াগা লোয়ননা খুঙ্গং অমসুং খুঙ্গংদা ফংলিবা খুদোংচাবশিংবু স্তেত অদুগী চাউখৎপগী মরুওইবা য়ুম্ফম ওইনা শেমগৎখি। হৌখিবা চহি ২০লোমসিদা গুজরাতপু অসিগুম্বা থৌরাংশিংগীদমক মরুওইনা ঈশিংগী লমদা মাঙজিল থানা থবক তৌবগীদমক লৈবাক্কী অমদি মালেমগী থাক্তা মনা কয়া ফংখি।
মরূপশিং,
২০১৪দা লৈবাকসিনা ইফমদা অনৌবা থৌদাং শিন্নবিরকপা মতমদা ঐনা গুজরাতকী গ্রাম স্বরাজপু লৈবাক্কী থাক্তা পুখৎলক্নবগী তাঞ্জা ফংখি। গ্রাম স্বরাজ হায়বগী ৱাহন্থোক্তি পঞ্চায়তকী মীখল পাঙথোকপা, পঞ্চ-সর্পঞ্চ খনবা অসিখক্তা নত্তে। গ্রাম স্বরাজকী তশেং তশেংবা কান্নবদি খুঙ্গংদা লৈরিবশিংনা খুঙ্গংগী চাউখৎ থৌরাংগা মরী লৈনবা প্লানিংগী অমদি মেনেজমেন্ততা মপুং ফানা শরুক য়ারবা মতমদতা ফংগদৌরিবনি। হায়রিবা পান্দমসিগা লোয়ননা লৈঙাক্কী খুত্থাঙদা মরুওইনা ঈশিং অমসুং লু-নানবগীদমক লুপা করোর লাখ ২.২৫ হেনবা শেনফম গ্রাম পঞ্চায়তশিংদা হকথেংননা থাদখ্রে। ঙসি মায়কৈ অমদা গ্রাম পঞ্চায়তশিংদা মখোয়গী মঙম হেন্না পীরি, অদুগা নাকল অমরোমদনা থবক থৌরমদা অরোন অথুপ লৈতবা ফীভম পুরক্নবা ৱাফমদসু পুক্নিং চঙলি। গ্রাম স্বরাজকীদমক কেন্দ্র লৈঙাক্না পায়খৎলিবা থৌরাংশিংগী অচৌবা খুদম অমা হায়রগদি জল জীবন মিসন অমসুং পানি সমিতিশিং অসিসু অমনি।
মরূপশিং,
ঐখোয়না খুঙ্গংগী নুপী অমসুং অঙাংশিংনা ঈশিং শোক্নবগীদমক মাইল কয়া লাপ্না চৎনৈ হায়বা শুগায়না তাকপা ফিল্ম কয়া য়েংখ্রে, ৱারী কয়া পাখ্রে। কনাগুম্বা খরগী পুক্নিংদদি খুঙ্গং হায়বা মমিংসি তাবদা হায়রিবা খুদোংচাদবা ফীভমসি মীৎমাঙদা উরকপা য়াওই। অদুবু মীওই খরখক্কী পুক্নিংদা করিগীদমক্তা হায়রিবা মীওইশিং অসিনা নুমিৎ খুদিংগী তুরেলদা নৎত্রগা ইকোনদা চৎপা তারিবনো, করিগীদমক্তা মখোয়গী মনাক্তা ঈশিংদু য়ৌহল্লোইদৌরিবনো হায়বা ৱাহং থোরকই। ঐ খঙই, মতম শাংনা চৎন-পথাপ ঙাকপগী থৌদাং পুদুনা লাক্লবা মীওইশিংদুনা মখোয় মশা মথন্তা শোয়দনা ৱাহং অসি হংজফম থোকই। অদুবু ৱাহংশিং অসি হংখিদে। মরমদি হায়রিবা মীওইশিং অসিনা লৈরিবা মফমশিং অদুদা ঈশিংগীদমক অসুক য়াম্না ৱাবা মখোয়না থেংনদে। ঈশিং য়াওদনা হিংবদা কয়াম ৱাবগে হায়বা মখোয় খঙদে। য়ুমদা ঈশিং, স্বিমিং পুলদা ঈশিং, মফম খুদিংদা ঈশিংগী ঈশিং ঙাক্তা লৈরবা অদুগুম্বা মীওইশিং অদুনা লায়রবা করিনো হায়বা খঙদে, মরম অসিনা লায়রবা হায়বসি মখোয়গীদমক্তদি পুক্নিং চিংশিনফম্নি, লিতরেচর নৎত্রগা হৈশিংবগী লৌশিং উৎননবা পাম্বৈ অমা ওইনা উই। মখোয়দা তমজনিংঙাই ওইবা খুঙ্গং শেমগৎনিংবগী ইহুল লৈফম থোকপনি অদুবু মখোয়দি খুঙ্গংদা অৱাৎ অপা লৈবদু পামদুনা লৈ।
ঐদি অয়ামবা মতমদা ঈশিং কংদুনা লৈবা ফীভম উদুনা লাক্লবা গুজরাত্তগীনি। ঈশিংগী ঈরিক খুদিংমক্কী মমল কয়াম য়ামবগে হায়বসি ঐদি মীৎসিনা উরক্লবনি। মরম অসিনা গুজরাতকী মুখ্য মন্ত্রী ওইরিঙৈদা মীয়ামদা ঈশিং ফংহন্নবা অমদি ঈশিংগী ফীভম ফগৎহন্নবা ঐনা মীৎয়েং চঙদুনা লাকখি। ঐখোয়না মীয়ামদা, লৌমীশিংদা ঈশিং ফংহনবতা নত্তনা লৈনুংগী ঈশিংগী থাক ৱাংখৎহন্নবা থবকসু পায়খৎখি। মসিমক ঐনা প্রধান মন্ত্রী ওইরক্লবা মতুংদা ঈশিংগা মরী লৈনবা শিংনবশিংদা লেপ্পা লৈতনা থবক পায়খৎপগী অচৌবা মরম অমনি। ঙসি ঐখোয়না ফংলিবা মহৈ অসি ভারত মচা পুম্নমকপু চাউথোকচবা পোকহনগদবা ফীভমদুনি।
নীংতমবদগী হৌরা ২০১৯ ফাওবদা ঐখোয়গী লৈবাকসিদা শুপ্নতগী য়ুমথোঙ করোর ৩দা তোতিগী ঈশিং ফংলম্মি। ২০১৯দা জল জীবন মিসন হৌরবা মতুংদা য়ুমথোঙ করোর ৫দা ঈশিংগী কনেক্সন পীখি। ঙসি লৈবাকসিগী চাউরাক্না দিস্ত্রিক্ত ৮০গী ময়াদা লৈবা খুঙ্গং লাখ অমা হেনবগী য়ুমথোং খুদিংদা ঈশিং য়ৌরে। হায়বদি হৌখিবা চহি ৭০সিদা তৌরকখিবা থবকশিং অদুদগী হেন্না ঙসি ভারতনা শুপ্নতগী চহি ২দা তৌদুনা উৎলে। লৈবাকসিগী ইচল ইচানুপী অমত্তনা ঈশিং শোক্নবগীদমক নুমিৎ খুদিং লাপ্না লাপ্না খোঙনা চৎনবগী মথৌ তাররোইদবা নুমিৎ অদু লাপত্রে। মখোয়না মখোয়গী অহাংবা মতমশিং লাইরিক ঔরাইবদা নৎত্রগা থবক ইনখাঙদা মায় ওনশিনবা ঙম্লগনি।
ইচিল ইনাওশৎং,
ভারতকী চাউখৎ লমজেলদা ঈশিং ৱাৎপনা খুরৌ থাংদনবা থবক লেপ্তনা পায়খৎপনা ঐখোয় পুম্নমক্কী থৌদাংনি, পুম্নমক্না হোৎনমিন্নবা য়াম্না মরুওই। ঐখোয় ঐখোয়গী তুংগী মীরোলদা পাউখুম পীবা মথৌ তাই। ঈশিং ৱাৎপনা মরম ওইরগা ঐখোয়গী অঙাংশিংনা মখোয়গী মপাঙ্গল মথৌনা লৈবাক শেমগৎপদা ওনশিনবা ঙমদ্রগদি, মখোয়গী মপুন্সি ঈশিংগী অৱাবা কোহন্নবা মায়কৈরোমদা মায় ওনশিন্দুনা লৈখিগনি, ফীভমসি ঐখোয়না তানবা শীল্লোইদবনি। মসিগীদমক ঐখোয়গী লানগী খোঙজেলদা ঐখোয়গী থবকশিং মখা চত্থবা তাই। নীং তম্বগী চহি ৭৫ মতম য়াম্না হৌখ্রে, হৌজিক ঐখোয় খোঙজেল য়াঙ্খৎহনবা তাই। লৈবাক্কী মফম অমা হেক্তদা তেঙ্কর নৎত্রগা ত্রেন্না ঈশিং হোনবা মথৌ তাদনবা ঐখোয়না অচেৎপা খোঙফম অমা লৌবা মথৌ তাই।
মরূপশিং,
ঐনা মমাঙদসু হায়খ্রে মদুদি ঐখোয়না ঈশিং শীজিন্নবা মতমদা প্রসাদকুম্না খনগদবনি হায়না। অদুবু মীওই খরদি ঈশিংবু প্রসাদকী মহুত্তা লেম্না ফংলবনি খন্না মাঙহল্লি। মখোয় ঈশিংগী মমল খঙদবনি। ঈশিংগী মমলদি ঈশিংগী অৱাবা মায়োক্নদুনা হিংলিবা মীওইদুনা খঙই। ঈশিং ঈরিক অমমম খোমজিনবদা কয়া য়াম্না ৱাবগে হায়বা মখোয়তনা খঙই। ঈশিংগী অৱাবা খঙদনা লৈরিবা লৈবাকসিগী মীপুম খুদিংমক্তা ঐনা হায়জনিংবদি অদোমসু ঈশিং মাঙহন্দনবা হোৎনবা য়াবা হোৎনবিয়ু। অদুগা ফীভমসি পুরক্নবগীদমক মীয়াম্নসু মখোয়গী হৈনবী শেমদোকপা মথৌ তাই। মফম কয়াদা তোতিগী ঈশিং লেম্না তাদুনা লৈবা, মীয়াম্না থৌশানদবা ঐখোয়না উই। কনাগুম্বা মীওই কয়া অমদি নুমিদাংদা কোঞ্জিন মখাদা বালতিন উপ্লগা থম্লম্লগা অয়ুক্তা ঈশিং তারকপগী খোঞ্জেলদুনা মখোয়গী অয়ুক্কী এলার্ম ওইনবা য়াওরি। মালেম পুমবদা ঈশিংগী ফীভম য়াম্না নাতৈ চাদ্রে হায়বা মখোয় খঙদবগুম তৌরি।
ঐনা মন কি বাত্তা ঈশিং মাঙহন্দনবা, ঈশিং য়োকশিন্নবা থবক থৌরমশিংবু মখোয়গী পুন্সিগী খ্বাইদগী মরুওইবা মিসন ওইনা লৌবা অথোইবা মীওইশিংগী মরমদা হেক হেক পল্লি। অসিগুম্বা মীওইশিংগী মতৌ তম্ফম থোকই, মখোয়দগী ইথিল লৌফম থোকই। লৈবাক্কী তোঙান তোঙানবা মফমশিংদা তোঙান তোঙানবা থৌরমশিং পাঙথোকই, অদুগুম্বশিংদুগী ঈ-পাউনা ঐখোয়গী খুঙ্গংশিংদা কান্নরকপা য়াই। ঙসিগী থৌরমসিদা শরুক য়ারিবা লৈবাক পুম্বগী গ্রাম পঞ্চায়তশিংগী মফমদা ঐনা হায়জনিংবদি খুঙ্গংশিংদা ঈশিংগী হৌরকফমশিং ঙাক শেন্দুনা থম্নবা অমদি লু-নান্না লৈনবগীদমক পুক্নিং লুপ্না থবক তৌবিয়ু। নোংগী ঈশিং য়োকশিন্দুনা, য়ুমদা শীজিন্নবা ঈশিং তারক্লিবদু লৌবুক্তা শীজিন্নদুনা, ঈশিং য়াম্না চঙদবা মহৈ মরোংশিং থাবদা পুক্নিং থৌগত্তুনা ঐখোয়গী পান্দম ফংবা ঙমগনি।
মরূপশিং,
ঈশিং মোৎপগী খুদোংচাদবা ফীভম থেংনরিবা মফম কয়া লৈবাকসিদা লৈ, মফম খরদদি ঈশিংদা য়াওবা অর্সেনিক্কী চাং য়াম্না ৱাংলি। অসিগুম্বা মফমশিংদা য়ুমথোঙ খুদিংবা পাইপ তিংদুনা অফবা অরুবা ঈশিং ফংহনবনা মফমদুদা লৈরিবা মীওইশিংগী পুন্সিদা ফংবা য়াবা খ্বাইদগী চাউবা থৌজাল ওইগদৌরিবনি। মতম অমদা এন্সেফলাইতিস-মেনিংজাইতিসনা শোকহনবা লৈবাক্কী দিস্ত্রিক্ত ৬১দা তোতি ঈশিং কন্নেক্সন মশিং শুপ্নতগী লাখ ৪ খক্তা ওইরম্মি। ঙসিদি মশিং হেনগৎলক্তুনা করোর ১ লাখ ১১গী মথক্তা ওইরে। চাউখৎ লমজেলদা খ্বাইদগী শোত্থনা লৈহৌরবা লৈবাকসিগী দিস্ত্রিক্তশিং, চাউখৎপগী লমদা নাথৈবিরবা দিস্ত্রিক্তশিংদা অহেনবা মীৎয়েঙ চঙদুনা য়ুমথোঙ খুদিংদা ঈশিং ফংহন্নবা থবক পায়খৎলি। অসিগুম্বা শোত্থহৌরবা দিস্ত্রিক্তশিংদা তোতি কন্নেক্সন মশিং লাখ ৩১দগী হেনগৎলক্তুনা করোর ম লাখ ১৬ হেন্না লৈরে।
মরূপশিং,
ঙসি লৈবাকসিদা থক্নবা ঈশিং পীনবখক্কী নত্তনা ঈশিং য়োকশিন্নবা অমদি ঈথৈ-লৌখোঙগী মপুং ফাবা ইনফ্রাস্ত্রকচর শেমগৎনবগীদমক অৱাংবা থাক্তা থবক পায়খৎলি। ঈশিং মওং চুম্না শীন লাঙনবগীদমক অহানবা ওইনা জল সক্তি মন্ত্রালয়গী মখাদা ঈশিংগা মরী লৈনবা হীরম অয়ামবা থম্লে। ইমা গঙ্গা জীগা লোয়ননা অতৈ তুরেলশিংগী ঈশিং মোৎশিলহনবা লেপ্নবগীদমক অচেৎপা খুজিল থৌরাংগা লোয়ননা থবক চঙশিল্লি। অতল ভুজল য়োজনাগী মখাদা লৈবাকসিগী স্তেত ৭তা লৈনুংগী ঈশিংগী থাক ৱাংখৎহন্নবগী থবক পায়খৎলি। হৌখিবা চহি ৭সিনা প্রধান মন্ত্রী কৃসি সিঞ্চাই য়োজনাগী মখাদা পাইপ ইরিগেসন অমদি মাইক্রো ইরিগেসনগী লমদসু অহেনবা থবক পায়খৎলি। হৌজিক ফাওবদা লৌফম হেক্তর লাখ ১৩ হেনববু মাইক্রো ইরিগেসনগী মখাদা কোনশিনবা ঙম্লে। পর দ্রোপ মোর ক্রোপ হায়রিবা ফিরেপসিবু মপুং ফাহন্নবগীদমক অসিগুম্বা থৌরাং কয়া পায়খৎলি। মতম শাংনা পন্দুনা লৈরক্লবা ঈথৈ-লৌখোংগী অচৌবা প্রোজেক্ত ৯৯গী মনুংদা তঙ্খায়রোমদনি লোইশিল্লক্লে অমদি লেমহৌরিবশিংগীসু খোঙজেল য়াঙনা থবক চঙশিল্লি। লৈবাক পুমবদা দামশিং হেন্না মওং চুম্না শীন লাংনবগীদমক অমদি মখোয়বু নীংথিনা শেম শাদুনা থম্নবগীদমক লুপা করোর লিশিং কয়াগী মরুওইবা থৌরাং অমা পায়খৎলি। মসিগী মখাদা দাম ২০০ হেন্না শেমদোক শাদোকপগী থবক তৌখ্রে।
মরূপশিং,
মচি ওইবা চীঞ্জাক ফংদবগী ফীভম থেংনবদা ঈশিংগীসু অচৌবা থৌদাং লৈ। য়ুমথোঙ খুদিংদা ঈশিং ফংহল্লবদি অঙাংশিংগী হকচাঙসু ফগৎলক্কনি। হন্দক্তসু লৈঙাক্না পি.এম. পোসন সক্তি নির্মান স্কিমগী অয়াবা পীখ্রে। থৌরাং অসিগী মখাদা মহৈ তম্ফমশঙশিংদা, অঙাংগী মহৈ মশিং তমবদা নত্তনা মখোয়দা মচি ওইবা চীঞ্জাকসু ফংহল্লগনি। থৌরাং অসিদা কেন্দ্র লৈঙাক্না লুপা করোর লিশিং ৫৪ হেন্না চাদিং তৌগদৌরি। মসিগী কান্নবা লৈবাকসিগী অঙাং চাউরাক্না করোর ১২রোমদা ফংগদৌরিবনি।
মরূপশিং,
ঐখোয়গীদা হায়নবা অমা লৈ-
উপ-কর্তুম্ য়থা সু-অল্পম্, সমর্থো ন তথা মহানক।
প্রায়: কূপ: তৃসাম্ হন্তি, সততম্ ন তু ৱারিঘি:।।
হায়বদি, ঈশিংগী অপীকপা গুহা অমনা মীয়ামগী খৌরাংবা কোকহনবা ঙম্মি অদুগা চাউখ্রবা ঈপাক ঈরেলনদি অসুম্না তৌবা ঙমদে। ৱাফমসি কয়াদা চুমখ্রবনো! কনাগুম্বগী পীক্লবা থৌওংনা চাউরবা ফিরেপ কয়াদগীসু হেনবা ঐখোয়না কয়ারক হন্না উনরি। ঐখোয়গী সমিতি অসিদসু হায়রিবা ৱাফমসি চুশিন্নৈ। ঈশিংগী ফীভম য়েংশিনবা অমদি ঈশিং য়োকশিনবগী থবক পানি সমিতিশিংনা মখোয়গী খুঙ্গং মনুংদা তৌজরবসু মসিগী মহৈদি য়াম্না চাউই। হায়রিবা পানি সমিতিশিং অসিনা লায়রবা, দলিত, শোত্থহৌরবা, ত্রাইবেলশিংগী পুন্সিদা চাউনা অওনবা পুরক্লি।
নীং তম্লবা মতুংদা চহি ৭০ চুপ্না তোতিগী ঈশিং থকপা ফংদ্রবা মীওইশিংগী পুন্সিদা পীক্লবা কোঞ্জিন অমনা চাউনা অহোংবা পুরক্কদৌরিবনি। অদুগা জল জীবন মিসনগী মখাদা শেম্লিবা পানি সমিতিশিংগী মেম্বর চাদা ৫০দি নুপীশিংনা শোয়দনা ওইহল্লিবসিমকসু য়াম্না চাউথোকচনিংঙাইগী ৱাফম্নি। তেনখ্রবা মতমসিদা চাউরাক্না খুঙ্গং লাখ ৩ মখায়রোমদা পানি সমিতিশিং শেমখিবসি লৈবাক্কী চাউনা কান্নবনি। মতম খরগী মমাঙদা জল জীবনগী মতাঙদা খন্ন-নৈনবদা হায়রিবা পানি সমিতিশিংসিদা খুঙ্গংগী নুপীশিংনা কয়াম মথৌনা মরৌশিং লৈনা থবক তৌরি হায়বা উখ্রে। খুঙ্গংগী নুপীশিংনা মখোয়গীঈ খুঙ্গংগী ঈশিংগী মরমদা থিজিন্নবগীদমক অখন্নবা ত্রেনিংসু পীরিবসিদা ঐঙোন্দা নুংঙাইবা ফাওই।
মরূপশিং,
খুঙ্গংগী নুপীশিং মপাঙ্গল কলহনবা হায়বসি ঐখোয়গী লৈঙাক্কী মরুওইবা পান্দমশিংগী মনুংদা অমনি। হৌখিবা চহিশিংদা ইচানুপীশিংগী হকশেল অমসুং ঙাকশেলদা মরুওইবা মীৎয়েঙ থমখি। য়ুম অমসুং মহৈতম্ফমশঙশিংদা তোইলেত, অহোঙবা সেনিতরী পেদতগী হৌরগা মীরোল্লকপা মতমদা মচি ওইবা চীঞ্জাক পীননবা লুপা লিশিং কয়াগী তেংবাং অমসুং তিকা থাবগী থৌরাংশিংনা নুপীওইবীগী মপাঙ্গল হেন্না কনখৎহল্লি। প্রধানমন্ত্রী মাত্রুবন্দনাগী মখাদা মীরোনবী নুপী করোর ২গী মথক্তা লুপা করোর লিশিং ৪ মখায়গী তেংবাং হকথেংননা পীখ্রে। খুঙ্গংশিংদা পক্কাগী য়ুম করোর অনি মখায় হেন্না শাগৎলিবশিংগী মনুংদা অয়ামবনা নুপীশিংগী মমিংদা শারি। উজ্জ্বলা য়োজনানা খুঙ্গংগী নুপী করোর কয়াবু শীংগী মৈখুদগী মনীং তমহল্লি।
মুদ্রা য়োজনাগী মখাদসু চাদা ৭০গী মতেং নুপী ওন্ত্রপ্রিন্যুরশিংদা ফংহল্লি। সেল্ফ হেল্প গ্রুপশিংগী খুত্থাঙদা খুঙ্গংগী নুপীশিংবু আত্মনিরভরগী মিসনগা শমজিন্নরি। হৌখিবা চহি ৭সিদা মশাবু তেংবাংজবা লুপ মশিং শরুক ৩ হেন্না হেনগৎলক্লি, ইচল ইচে মশিং শরুক ৩ হেন্না শরুক য়ারক্লি। নেসনেল লাইবলিহুদ মিসনগী মখাদা ২০১৪গী মমাঙগী চহি ৫দা লৈঙাক্না ইচল ইচেশিংগীদমক পীখিবা মতেংদুগী চাউরাক্না শরুক ১৩ হেন্না হৌখৎবা চহি ৭সিদা পীখ্রে। মসিদসু নত্তনা চাউরাক্না লুকা করোর লাখ ৪গী ময়াগী মতেং সেল্ফ হেল্প গ্রুপ্সকী ইমা-ইচল ইচেশিংদা ফংহনখ্রে। লৈঙাক্না সেল্প হেল্প গ্রুপশিংদা গরেন্তী য়াওদনা শেন্থং পীনবগী থবক কয়াসু পায়খৎলি।
ইচিল ইনাউশিং,
ভারতকী চাউখৎপা খুঙ্গং চাউখৎপগী মখা পোল্লি। খুঙ্গংদা লৈবা মীওইশিং, নহাশিং- লৌমীশিংদা লৈঙাক্না অসিগুম্বা থৌরাংশিংগী মীৎয়েং থম্লি, ভারতকী খুঙ্গংশিংবু অমুক্কা হেন্না চাউখৎহন্নবগীদমক। খুঙ্গংদা শা-শনশিংদগী অমদি য়ুমদগী থোরক্লিবা বাইও ৱেস্তশিং শীজিন্ননবগীদমক গোবরধন য়োজনা চলাইরি। থৌরাং অসিগী খুত্থাঙদা লৈবাকসিগী দিস্ত্রিক্ত ১৫০ হেনবদা বাইও-গেস প্লান্ত ৩০০ হেন্না লোইশিল্লক্লে। খুঙ্গংগী মীওইশিং খুঙ্গংদুমক্তদা হেন্না ফবা খুদোংচাবশিং ফংহন্নবগীদমক, খুঙ্গংদা মরুওইবা তেস্তশিং তৌবা য়ানবগীদমক হেল্থ এন্দ ৱেলনেস সেন্তর লাখ ১ মখায় হেন্না লিংখৎখ্রে। মসিগী মনুংদা চাউরাক্না সেন্তর লিশিং ৮০ রোমগী থবক পুম্লোয় লোইরে। খুঙ্গংগী অঙ্গনৱাদি অমসুং অঙ্গনৱাদিদা থবক তৌরিবা ঐখোয়গী ইচল ইচেশিংগী মফমদসু শেন্মিৎলোনগী ওইবা তেংবাং ফংহল্লি। খুঙ্গংশিংদা খুদোংচাবশিংগা লোয়ননা লৈঙাক্কী থৌরাংশিংসু থুনা য়াঙনা য়ৌহন্নবগীদমক ঙসি তেক্নোলোজীবু খোঙজেল য়াঙনা শীজিন্নরি।
পি.এম. স্বাবিত্ব য়োজনাগী মখাদা দ্রোনগী মতেংনা মেপিং তৌরগা খুঙ্গংগী লম অমসুং য়ুমশিংগী দিজিতেল প্রোপর্তী কার্দশিং শেম্লি। স্বামিত্ব য়োজনাগী মখাদা চহি ৭গী মমাঙদা লৈবাকসিগী পঞ্চায়ত ১০০গী মখাদা ব্রোদবেন্দ কন্নেক্তিবিতী পীরমবদু ঙসিদি পঞ্চায়ত লাখ অমা মখায়দা ওপ্তিকেল ফাইবর য়ৌহল্লে। অহোঙবা মোবাইল ফোন অমসুং অহোঙবা ইন্তরনেতনা মরম ওইরগা ঙসিদি খুঙ্গংশিংদা ময়োল্লমদগী হেন্না মীয়াম্না ইন্তরনেত শীজিন্নরে। ঙসি কম্মন সর্ভিস সেন্তর লাখ ৩ হেনবনা লৈঙাক্কী থৌরাং কয়া খুঙ্গংশিংদা য়ৌহল্লি অমদি নহা লিশিং কয়াদা থবক পীরি।
ঙসি খুঙ্গঙদা মখল খুদিংগী ইনফ্রাস্ত্রকচরগীদমক রেকোর্দ ওইনা শেল থাদরি। প্রধানমন্ত্রী গ্রামিন সরক য়োজনা ওইরবসু, লুপা করোর লাখ অমগী এগ্রি ফন্দ ওইরবসু, খুঙ্গং নক্না কোল্দ স্তোরেজ প্লান্ত লিংখৎপা ওইরবসু, ইন্দস্ত্রিএল ক্লস্তর ওইরবসু নৎত্রগা কৃসি মন্দিশিং মতমগা চুননা শেমগৎপা ওইরবসু হীরম খুদিংদা খোঙজেল য়াঙনা থবক পায়খৎলি। জল জীবন মিসনগীদমকসু লুপা করোর লাখ ৩ লিশিং ৬০গী থৌরাং তৌরবসি খুঙ্গংশিংদা থাদগদৌরিবনি। হায়বদি মিসন অসিনা খুঙ্গংগী শেন্মিৎলোন্দা অনৌবা মপাঙ্গল হাপ্পদা নত্তনা খুঙ্গংশিংদা থবক পীনবগী অনৌবা খুদোং চাবা কয়াসু শেমগনি।
মরূপশিং,
ভারতকী মীয়াম্না অচেৎপা ফিরেপগা লোয়ননা পুন্না হোৎনমিন্নদুনা লুবদগী লুরবা পান্দমশিং ফংবা ঙমই হায়না ঐখোয়না মালেমসিদা উৎলি। ঐখোয় অমত্তা ওইনা পুনশিন্দুনা থৌসিল অসিবু মায় পাকহনগদবনি। জল জীবন মিসন থুনা মাগী পান্দম য়ৌহল্লসি হায়বা ৱাফমসিগা লোয়ননা ঐগী ৱারোল তেনশিঞ্জরি।
ময়াম পুম্নমক য়াইফবা ওইবিয়ু!
থাগৎচরি!
