উত্তরাখন্দগী রাজ্যপাল শ্রীমতি বেবী রানি মোর্য়া জি, মুখ্য মন্ত্রী শ্রী ত্রিবেন্দ্র সিংহ রাৱৎ জি, কেন্দ্রগী কেবিনেত্তা লৈরিবা ঐহাক্কী মরুক শ্রী গজেন্দ্র সিংহ সেখাৱৎ জি, দাঃ রমেশ পোখ্রিয়াল নিশাঙ্ক জি, শ্রী রতন লাল খুরানা জি, অতোপ্পা ওফিসারশিং অমসুং ঐহাক্কী উত্তরাখন্দগী ইচিল-ইনাওশিং অমসুং শেংলবা লাইফম মরি লৈরিবা উত্তরাখন্দগী দেবভুমিগী মফমদা ঐহাক্না অহানবদা কোক নোঞ্জরি।
ঙসি ইমা গঙ্গাবু হেন্না লু-নান্না লৈহন্নবা হায়দুনা অচৌবা প্রোজেক্ত ৬ শঙ্গাখ্রে। মসিগী মনুংদা রিশিকেশ, বদ্রিনাথ অমসুং মুনি কি রেতীগী ফত্তবা ঈশিং শেংদোকহন্নবা প্লান্ত অমসুং হরিদ্বারগী ম্যুজিয়ম য়াওরি। ঐহাক্না প্রোজেক্তশিং অসিগীদমক্তা উত্তরাখন্দগী মীয়ামবু থাগৎপা ফোঙদোক্লি।
মরুপশিং, মতম খরগী মমাংদা জল জীবন মিসনগী ফজরবা লোগো অমসুং মিসন অসিগী কাঙলোনশিংসু ফোঙখ্রে। জল জীবন মিসন – ভারতকী খুঙ্গং খুদিংদা থক্নবা অশেংবা ঈশিং য়ৌহনবগী অচৌবা খোঙথাং অমনি। মিসন অসিগী লোগো অসিনা ঈশিংগী মরিক অমা ফাওবা তুংশিনবগী তঙাই ফদবগী ইথিল পীগনি। মসিদা নত্তনা মসিগী কাঙলোনশিং অসিনা সরকারগী খুৎলাইশিংদা মরু ওইরিবা অসিগা চপ মান্ননা খুঙ্গংগী মীওইশিং, গ্রাম পঞ্চায়ত্তসু মরু ওইরি। হায়রিবশিং অসিনা প্রোজেক্ত অসিবু মাই-পাকহনবগী মরু ওইবা পাম্বৈ অমনি।
মরুপশিং, ঐখোয়না ঙসি ফোঙখিবা লাইরিক অসিদা গঙ্গানা ঐখোয়গী নাৎ, থাজবা অমসুং চৎনবীগী খুদম অমা ওইবগে হায়বগী মতাংদা পল্লি। গঙ্গানা উত্তরাখন্দদা লৈরিবা মসিগী হৌরকফম অসিদগী হৌদুনা নোংচুপ বেঙ্গোলগী গেঞ্জেস সাগরগী মফমশিং ফাওবগী লৈবাক অসিগী মীশিং তঙ্খায়দগী হেন্না কান্নবা পীরি। মরম অদুনা গঙ্গাবু লু-নান্না থম্বা অমসুং হীরম অসিদা থৱাই য়াওবা অসি য়াম্না তঙাই ফদবনি। হৌখিবা দিকেদ খরদগী হৌনা গঙ্গা তুরেলবু লু-নান্না থম্নবা অচৌবা খোঙথাং কয়া অমসু পায়খৎপা হৌখ্রে। অদুবু খোঙথাংশিং অসিদা মীয়াম্না শরুকসু য়াদে অমসুং মসিগী মরমদসু খঙনবা হোৎনদে। মসিনা মরম ওইদুনা গঙ্গা তুরেলগী ঈশিং অসি শেংদোকপা ঙমদনা লাক্লি।
মরুপশিং, করিগুম্বা গঙ্গা তুরেল শিংদোকপগী থৌওং অসিদা হান্নদগী শিজিন্নবা অরিবা থৌওংশিং অসি শিজিন্নরবদি ঙসিসু ফিভম অসি ফত্তনা অদুমক লৈগনি। অদুবু ঐখোয়না অনৌবা ৱাখল্লোন অমসুং অনৌবা থৌওংগা লোয়ননা মাং থাদুনা লাক্লি। ঐখোয়না নমামি গঙ্গে মিসন অসিবু গঙ্গা তুরেল লু-নান্না থম্বা খক্তগীসু নত্তনা লৈবাক অসিগী ওইবা তুরেল শেংদোকপগী খ্বাইদগী চাউবা অমসুং পাক-শনবা প্রোগ্রাম অমা ওইনা চত্থরি। সরকারনা থৌওং অসিগা মরী লৈননা মাইকৈ মরিদা থবক তৌরি। অহানবা- গঙ্গা তুরেলদা অমোৎপা ঈশিং তাশিন্দনবা ঐখোয়না সীৱেজ প্লান্ত কয়া অমা শেম্লি। অনিশুবা- মথংগী চহি ১০-১৫গী তঙাই ফদবশিংবু থেংনবা ঙম্বা সীৱেজ ত্রীৎমেন্ত প্লান্ত শেম্লি। অহুমশুবা- গঙ্গা তুরেলগী তোর্বান্দা লৈরিবা অচৌবা শহর ১০০ অমসুং খুঙ্গং ৫০০০গী মীওইশিং অসিবু অহাঙবদা অমাংবা তৌশিনবা থিংবা অমসুং মরিশুবা- গঙ্গা তুরেলগী মরিলশিং অসিদা ফত্ত-হাউদি থাদদুনা মোৎশিলহনবা থিংবা।
মরুপশিং, ঙসিদি হীরম শিনবা থুংনা পাঙথোক্লিবা থবকশিং অসিগী মহৈ ঐখোয়না উবা ফংলে। ঙসিদি নমামি গঙ্গে প্রোগ্রামগী মখাদা লুপা করোর ৩০,০০০গী শেনফমগী প্রোজেক্ত কয়া অমা থবক পায়খৎপদা নত্তনা লোইশিনবসু য়াওরে। ঙসিদি লাউথোকখিবা প্রোজেক্তশিং অসিগা লোয়ননা কেম্পেন অসিগী মখাদা উত্তরাখন্দদা লৈবা অচৌবা প্রোজেক্তশিং লোইশিনখ্রে। মসিগী করোর লিশিং কয়াগী প্রোজেক্তশিং অসিনা শুপ্নগী চহি ৬কী মনুংদা উত্তরাখন্দদা লৈবা সীৱেজ ত্রীৎমেন্ত তৌফমশিংগী মতিক অসি শরুক ৪গী চাংদা হেনগৎহনবা ঙম্লে।
মরুপশিং, গঙ্গোত্রি, বদ্রিনাথ, কেদারনাথতগী হরিদ্বার ফাওবগী মনুংদা ঈশিংগী ইচেল ১৩০না গঙ্গাদা তিল্লম্বা অসি মতম অমদা উত্তরাখন্দদা ওইরম্বা ফিভম অমনি। ঙসিদি মসিগী ইচেলশিং অসি অয়াম্বনা থিংজিল্লে। মসিগী মনুংদা য়াওবশিংদি রিশিকেশকা থংননা লৈবা ‘মুন্নি কি রেতি’গী চন্দ্রেশ্বর নগরগী নালা য়াওরি। মসিনা মরম ওইদুনা গঙ্গা য়েংবা লাকপা মীওইশিং, রাফতিং তৌবা লাকপা মীওইশিংনা খুদোংচাদবা কয়া থেংনরি। লৈবাক অসিগী মথোল মরিগী সী ৱেজ ত্রীৎমেন্ত প্লান্ত অসি ঙসিদগী থবক তৌবা হৌখ্রে। হরিদ্বারদসু অসিগুম্বা নালা ২০ থিংজিনখ্রবনি। মরুপশিং, গঙ্গা তুরেলগী লু-নানবা অসি প্রয়াগরাজ কুম্ভদা মালেম শিনবা থুংবদগী লাকপা মীওইশিংনা থেংনরম্মি। হৌজিক্তি হরিদ্বার কুম্ভগী মনুংদা মালেম শিনবা থুংবনা অশেংবা গঙ্গাদা ইরু-লুবগী নুংঙাইবা লৌবা য়ারগনি। মসিগী মতাংদা থবক কয়া অমা লেপ্তনা চত্থরি।
মরুপশিং, নমামি গঙ্গে মিসনগী মখাদা গঙ্গাজিগী তোর্বান্দা লৈবা ঘাৎ ১০০/১০০ মশক ফজহল্লে অমসুং গঙ্গা ভিহারগী তোর্বান্দা হৌজিক্কী মতমগা চান্নবা মওং কয়া অমসু শাগৎলে। হরিদ্বারগী তোর্বানশিংগী ওইনদি হায়রিবা থবকশিং অসি লোইরে। হৌজিক্তি গঙ্গা ম্যুজিয়ম শেম-শাবা লোইবগা লোয়ননা মফম অসিদা মী লাকপা য়াম্না হেনগৎলগনি। মসিগী ম্যুজিয়ম অসিনা হরিদ্বারদা লাকপা লম-কোয়বশিং হেনগৎহন্নবা পাম্বৈ অমা ওইরগনি অমসুং মসিনা গঙ্গা তুরেলগা মরী লৈনবা চৎনবী কয়া অমসু মীয়ামদা খঙহনবগী পাম্বৈ অমসু ওইরগনি।
মরুপশিং, হৌজিক্তি নমামি গঙ্গে মিসন অসি অনৌবা থাক অমদা পুখৎলে। গঙ্গা তুরেল লু-নালহনবতা নত্তনা মসিনা গঙ্গাগা থংননা লৈবা মফম খুদিংগী শেন্মিৎলোন অমসুং অকোয়বা চাউখৎহন্নবা মিৎয়েংসু চঙবা হৌরে। উত্তরাখন্দ য়াওনা রাজ্য খুদিংদা লৌউবশিংদা ওর্গানিক ওইবা পোত্থোক থাবা, অয়ুর্বেদগী হিদাক্কী পাম্বীশিং থাবগী কান্নবশিং ফংহন্নবা সরকারনা পাক-চাউবা থৌরাং অমা য়াৎলি। গঙ্গাজিগী তোর্বানগী নাকল অনিমক্তা উ থাবতা নত্তনা ওর্গানিক ফার্মিংগা শম্নহনবা থোঙ অমসু শারি। মসিগী গঙ্গাগী ঈশিং ফগৎহনবগী থবকশিং অসিদা তমগী মিসন দোলফিন্দগীসু তেংবাং কয়া অমা ফংলগনি। মিসন দোলফিন অসি ওগস্ত ১৫দা লাউথোকখিবনি। মসিগী মিসন অসিনা গঙ্গাজিদা লৈরিবা দোলফিন কলচর অসিবু হেন্না মপাঙ্গল লৈহল্লগনি।
মরুপশিং, ঙসিদি লৈবাক অসিনা শেলবু ঈশিংদৌনা চেনবা অদুবু মহৈদি উবা ফংদবা মতম অদুদগী থোক্লক্লে। ঙসিদি শেলনা ঈশিংদৌনদি চেন্দ্রে অদুবু শেল অসি ঈশিংগী হীরমদা ওইনা থাদরে। ঐখোয়গী শিংনবা অসিদি ঈশিংগী হীরমগুম্বা য়াম্না মরু ওইবা হীরম কয়া অসি মন্ত্রালয় অমসুং বিভাগ কয়াদা চায়থোক্তুনা লৈরম্মি। মসিগী মন্ত্রালয়শিং অসিগী বিভাগশিংগী মরক্তা পাউ-ফাওনদুনা থবক শুমিন্নবা অমসুং মান্নবা পান্দম অমা ফংনবা ময়েক শেংবা কাঙলোনসু অমত্তা লৈরমদে। মসিনা মরম ওইদুনা থক্নবা ঈশিংগী মতাংদা থেংনরিবা খুদোংচাদবশিং অসি মখা তাদুনা অদুমক লাক্লিবনি। নিং-খা তম্বা ফংলবা মতুংগী চহি কয়া কয়া অসিদা য়ুম্থোং করোর ১৫ হেনবদা তোতি ঈশিং ফংদনা লাক্লিবা অসিগী মতাংদা অমুক্তা খন্থবীয়ু। মসিগী ফিভম অসিমক উত্তরাখন্দগী ইমুং লিশিং কয়াদসু থোক্লিবনি।
চত্থোক চৎশিন তৌবদা য়াম্না নুংঙাইতবা খুঙ্গংশিং অমসুং চিংনুং-মান্নুংদা ঐখোয়গী ইমা-ইচলশিংনা থক্নবা ঈশিং ফংনবা য়াম্না ৱানা হোৎনবা তাই। মসিগী খুদোংচাদবশিং অসিবু মাইথিবা পীনবা হায়দুনা লৈবাক অসিগী ঈশিংগা মরী লৈনবা শিংনবা খুদিংমক থেংননবা হাইদ্রোপাৱর মন্ত্রালয় অসি শেমখিবনি।
অতেনবা মতমগী মনুংদা হাইদ্রোপাৱর মন্ত্রালয়না খোঙজেল য়াঙনা থবক তৌবা হৌরকপা অসিদা ঐহাক্না য়াম্না নুংঙাইবা ফাওই। মসিগী ঈশিংগী মতাংদা থেংনবা শিংনবা অসিগা লোয়ননা মন্ত্রালয় অসিনা লৈবাক অসিগী খুঙ্গংগী ইমুং খুদিংদা থক্নবা ঈশিং য়ৌহন্নবা থবকসু পায়খৎলি। ঙসিদি জল জীবন মিসনগী মখাদা চাউরাক্না ইমুং লাখ ১দি নুংতিগী ওইনা অশেংবা থক্নবা ঈশিং ফংহনবগী থৌওং চত্থরি। চহি ১ খক্তদা লৈবাক অসিগী ইমুং করোর ২ হেনবদা থক্না ঈশিং অসি য়ুম্থোং খুদিংগী ফংহনখ্রে। উত্তরাখন্দগী মফম অসিদসু ত্রিবেন্দ্র জি অমসুং মহাক্কী কাঙবুশিংনা লুপা ১ খক্তদা ইমুং অমদা থক্নবা ঈশিং ফংহনবগী থবক পায়খৎলি। উত্তরাখন্দ সরকারনা ইং ২০২২ ফাওবগী মনুংদা ইমুং খুদিংদা থক্নবা ঈশিং ফংহনবগী পান্দম থম্বা অসিদা ঐহাক্না য়াম্না নুংঙাইবা ফাওই। হৌজিক চৎলিবা কোরোনাগী মতম অসিদসু হৌখিবা থা ৪-৫ অসিদা ইমুং ৫০,০০০ হেন্না থক্নবা ঈশিং ফংহনখ্রে। মসিনা উত্তরাখন্দ সরকারগী থবক্তা মাই-ওনশিনবগী মতৌ উৎলি।
মরুপশিং, জল জীবন মিসন অসি খুঙ্গং অমসুং লায়রবগী ইমুংশিংদা ঈশিং য়ৌহনবা, স্বরাজ পীনবা, খুঙ্গংবু খুমাং চাউশিলহন্নবা, অনৌবা ইনর্জী ফংহন্নবা, অনৌবা পাঙ্গল হাপ্নবা অমসুং অনৌবা ইথিল পীনবা খোঙথাং অমনি। মসিনা সরকারগী মনুংদা অচৌবা অহোংবা লাক্লিবা অসিগী খুদম অমসু ওইরি। মমাংদদি সরকারগী স্কিমশিং অসি দিল্লীদা ফমদুনা শেম্বগী মওং লৈরম্মি। করম্বা খুঙ্গং, কদায়দা ঈশিংগী তেঙ্কী খিনগনি, কদায়দা পাইপ ফুমগনি হায়বনা চিংবা ৱারেপশিং অসি অয়াম্বনা দিল্লীদগী লৌরম্মি। অদুবু জল জীবন মিসন্না মসিগী থবক তৌবগী চৎনবী অসি হোংদোকহল্লে। হৌজিক্তি খুঙ্গংশিংদা ঈশিংগা মরী লৈনবা করম্বা থবকশিং পায়খৎকনি, কদাইদা পায়খৎকনি অমসুং খুঙ্গংশিংনা করম্না শেম-শাদুনা লৈগনি হায়বনচিংবা হীরম কয়াগী ৱারেপ লৌবদসু শরুক য়াহল্লে। ঈশিংগী থবকশিং অসি শেন্নবা অমসুং থবক ওইনা পাঙথোকপগী থৌদাংশিং অসি গ্রাম পঞ্চায়ৎ অমসুং ঈশিংগী কম্মিত্তীনা পাঙথোক্লে। ঈশিংগী কম্মিত্তী অসিগী মনুংদা ৫০%দি খুঙ্গংগী নুপীশিং ওইগদবনি হায়বসু লৈরে।
মরুপশিং, ঙসি ফোঙখিবা কাঙলোন অসিনা মমাংদা পনখ্রিবা ইচে-ইচলশিং, ঈশিংগী কম্মিত্তীগী মেম্বরশিং অমসুং পঞ্চায়ৎকী মেম্বরশিংদা য়াম্না কান্নবা পীগনি। মসি য়াম্না মশক থোকপা চেফোঙ অমনি অমসুং মসিনা ঈশিংগী ফংনবা হোৎনবদা থেংনবা খুদোংচাদবশিং, ঈশিংগী মগুন, ঈশিংগী তঙাই ফদবা লৈবা অসিনা কান্নবা অমসুং খুদোংচাদবা কয়া য়াম্না লৈহনবগে হায়বগী হীরমশিংগী মতাংদা মীয়াম্বু নীংথিনা খঙহল্লগনি হায়না ঐহাক্না থাজবা থম্মি। মসিগী খুদোংচাদবশিং অসি ঐখোয়দগীদি ঐখোয়গী ইমা, ইচে-ইচলশিংনা হেন্না নীংথিনা খঙই। অমসুং মসিগী অপুনবা থৌওং অসি ঐখোয়গী ইমা, ইচে-ইচলশিংদা শিন্নরবনিনা মখোয়না থৌদাং খঙনা থবক কয়া পাঙথোরক্তুনা অফবা মহৈ উবা ফংলগনি।
মসিনা খুঙ্গংগী মীওইশিংগী অনৌবা লম্বী অমা য়াৎলগনি অমসুং মতুং ইনবা ৱারেপ লৌহনবসু ঙম্লগনি। জল জীবন মিসন্না খুঙ্গংগী মীওইশিংদা কান্নবা কয়া অমা পীরি হায়বসি ঐহাক্না খঙই। ঈশিংগী খুদোংচাদবশিংদগী নিং-তমহনবা, নখোয়গী খুঙ্গংশিংদা ঈশিংনা থলহনবগী কান্নবা কয়া অমা মসিনা পীরি। ঐঙোন্দা পাউদম্লকপগী মতুং ইন্না গান্ধী জয়ন্তি, ওক্তোবর ২দগী জল জীবন মিসন্না অনৌবা খোঙথাং অমসু হৌদোক্লগনি হায়রি। মসিগী মতুং ইন্না লৈবাক অসিগী মহৈ-লোইশঙ অমসুং অঙ্গনৱাদি খুদিংদা থক্নবা তোতি ঈশিং য়ৌহন্নবা নুমিৎ ১০০গী অখন্নবা খোঙথাং অমা পায়খৎকদৌরি। মসিগী খোঙথাং অসি মাই পাকপা ওইসনু হায়না ঐহাক্না য়াইফ-মঙ্গোল পীরি।
মরুপশিং, নমামি গঙ্গে কেম্পেন, জল জীবন মিসন, স্বচ্ছ ভারত অভিয়ানগুম্বা প্রোগ্রাম কয়া অসিনা হৌখিবা চহি ৬তগী হৌনা অচৌবা শেমদোকপগী শরুক অমা ওইদুনা লাক্লি। মসিগী শেমদোকপশিং অসিনা অচম্বা মীয়াম অমসুং খুন্নাইগী পথাপ্তা তুং কোইনা চৎলগদবা ফজরবা অহোংবা কয়া অমা লৈহল্লগনি। হৌখিবা চহি অমা তংখায়দা মসিগী অহোংবশিং অসি হেনগৎলক্লি। হন্দক্তা লোইখিবা পার্লিয়ামেন্তকী সেসন্দা লৈবাক অসিগী লৌউবশিং অমসুং শিন্মীশিংগী হকশেলদা কান্নগদবা শেমদোকপা কয়া পুথোকখি। মসিনা লৈবাক অসিগী শিন্মীশিং, নহাশিং, নুপেশিং অমসুং লৌউবশিংবু মপাঙ্গল হেন্না হাপ্লগনি। অদুবু ঙসিদি ঐখোয়না মীয়াম খরনা তৌদবা হায়বগী মতাগুম য়ানিংদবা ফোঙদোক্লি।
মরুপশিং, ঙসিদগী নুমিৎ খরনিগী মমাংদা লৈবাক অসিগী লৌউবশিংবু অফা-অপুন্দগী থাদোকপীখি। হৌজিক্তি মখোয়না মখোয়গী পোত্থোকশিং অসি মীওই অমা হেক্তদা অমসুং মফম অমা হেক্তদা য়োনবা য়ারগনি। অদুবু ঙসি কেন্দ্র সরকার অসিনা লৌউবশিংগী হক পীরিবা অসি ফাওবদা মীওই কয়া অমনা য়ানিংদবা ফোঙদোকপগী থৌওং পাঙথোক্লি। মসিগী মীওইশিং অসিনা লৌউবশিংনা মশাগী পোত্থোক অসি মীয়ামগী কৈথেলদা পোৎ য়োনবা অসি পামদে। মখোয়না লৌউবশিংগী পোত্থোক অসি ফাজিন্দুনা, নম্ফুদা লৌদুনা অমসুং অহোঙবা মমলদা লৈদুনা অদুমক লৈনিংই অমসুং মরক্তা লৈবা মীওইশিংনা শেন্দোন চাউনা ফংবা অদু পাম্লি। মখোয়না লৌউবশিংনা নিং-খা তম্বা অসি পামদে। মসিগী মীওইশিং অসিনা লৌউবশিংগী লাই ওইনা লাৎচরিবা পোত্থোক অমসুং খুৎশু খুৎলায়শিংবু মৈ থাদুনা লৌউবশিংবু থওই-উইশিত্তনা তৌরি।
মরুপশিং, চহি কয়াদগী হৌনা মীওইশিং অসিনা এম.এস.পি. চৎনহনগনি, থবক ওইনা পাঙথোক্কনি হায়দুনা লাক্লি অদুবু করিমত্তদি তৌদ্রি। ঐখোয়গী সরকার অসিনা স্বামিনাথন কম্মিসন্না হায়বগী মতুং ইন্না এম.এস.পি. চৎনহল্লে। ঙসিদী হায়রিবা মীওইশিং অসিনা এম.এস.পি.গী মতাংদা অরানবা ৱাফম শন্দোক্তুনা লৌউবশিংবু চমম্নহল্লি। লৈবাক অসিদা এম.এস.পি. চৎনগনি অমসুং লৌউবশিংনা মখোয়গী পোত্থোকশিং অসি মফম অমা হেক্তদা য়োনবগী নিং-তম্বা লৈগনি। অদুবু মীওই খরনদি মসিগী নিং-তম্বা অসি পামদ্রি। ব্লেক মনী তানবগী পাম্বৈ অমা লোইশিল্লে, মরম অদুনা মখোয়দা শিংনবা কয়া অমা লৈরে।
মরুপশিং, হৌজিক্কী কোরোনাগী মতম অসিদা দিজিতেল ইন্দিয়া কেম্পেন, জন ধন বেঙ্ক একাউন্ত, রু-পে কার্দনা মীয়ামদা করম্না তেংবাংবগে হায়বসি লৈবাক অসিনা উরে। অদুবু ঐখোয়গী সরকারনা থবকশিং অসি হৌরকপা মতমদা মখোয়না মসিগী মায়োক্তা লৈখিবা অদু নখোয়না নীংশিংলমগনি। মখোয়গী মিৎয়েংদা লৈবাক অসিগী লায়রবশিং, খুঙ্গংগী মীওইশিং অসি লাইরিক হৈতে, করিসু খঙদে হায়না উরম্মি। মসিগী মীওইশিং অসিনা লৈবাক অসিগী লায়রবশিংনা বেঙ্ক একাউন্ত লৈবা অমসুং দিজিতেল ত্রাঞ্জেক্সন তৌবা অসি শুকপাম পামদে।
মরুপশিং, লৈবাক অমা-তেক্স অমা, জি.এস.তি.গী মতাংদসু মীওইশিং অসিনা য়েৎপা অসি লৈবাক অসিনা উখ্রবনি। জি.এস.তি. লাকপদগী লৈবাক অসিগী য়ুম্থোং খুদিংদা শিজিন্নবা পোত্থোক কয়াগী তেক্স অসি য়াম্না হন্থখি। ইমুং মনুংদা শিজিন্নবা পোত্থোকশিং, চাক-খুমগী পোত্থোকশিংদা তেক্স অয়াম্বনা লৈত্রে অমসুং লৈরবসু চাদা ৫গী চাংদগী তাবা ঙাক্তনি। মমাংদদি মীওইশিং অসিনা তেক্স য়াম্না থম্লম্মি অমসুং মীয়ামগী ফুরিৎখাওদগী শেল য়াম্না তিংহনলম্মি। অদুগা মসিগী মীওইশিং অসিনা জি.এস.তি.বু য়ানিংদে অমসুং করেম কথাইনৈ।
মরুপশিং, মসিগী মীওইশিং অসিনা লৌউবশিং, লায়রবশিং অমসুং নহাশিংগীদমক কৈদৌনুংদা লৈখিদে। ঐখোয়গী সরকারনা রেঙ্ক অমা- পেন্সন অমগী থৌওং পুথোক্লকপদা উত্তরাখন্দগী এক্স-সর্বিসমেন লিশিং কয়াদা মখোয়গী হক পীখি অমসুং মসিদা মীওইশিং অসিনা য়ানিংদবা ফোঙদোকখিবা অদু নখোয়না নীংশিংলমগনি। রেঙ্ক অমা- পেন্সন অমগী থৌওং অসি হেক চৎনবা হৌখিবদগী সরকারনা এক্স-সর্বিসমেনশিংদা লুপা করোর লিশিং ১১গী শেনফম অসি এরিয়ার ওইনা পীথোকখি। উত্তরাখন্দগী মফম অসিদসু এক্স-সর্বিসমেন লাখ ১ হেনবনা মসিগী কান্নবা ফংখি। অদুবু রেঙ্ক অমা-পেন্সন অমা অসিবু থবক ওইনা পাঙথোকপা অসিদা মীওইশিং অসিনা অদুমক য়ানিংদবগা লোয়ননা য়াম্না নুংঙাইখিদে।
মরুপশিং, চহি কয়াদগী হৌনা মসিগী মীওইশিং অসিনা লৈবাক্কী লান্মী, এয়র ফোর্সপু মপাঙ্গল হেনগৎহন্নবা থবক অমত্তা পাঙথোকখিদে। এয়রফোর্সনা মতমগা চান্নবা এয়রক্রাফৎ পাম্মি হায়দুনা লাকখি অদুবু মীওইশিং অসিনা ৱাফম অসিবু য়ৈথোক্তুনা অদুমক লাকখি।
ঐখোয়গী সরকারনা ফ্রেঞ্চ সরকারগা খুৎশম্নদুনা রফাএল ফাইতর এয়রক্রাফৎকী য়ানচে অমা হকথেংননা খুৎয়েক পীনবা মতমদা মসিগী মীওইশিংগী য়ানিংদবা অমুক হৌরকখি। ভারতকী এয়র ফোর্সতা রফাএল য়ৌরকখি অমসুং মসিনা এয়র ফোর্সকী মপাঙ্গল কনখৎহনখি। মসিদসু মীওইশিং অসিনা য়ানিংদবা উত্তুনা লাকখি। ঙসিদি রফাএল এয়রক্রাফৎনা ভারতকী এয়রফোর্সকী মপাঙ্গল হেনগৎহনবা অসিদা ঐহাক্না নুংঙাইবা ফাওই। মহাক্না অম্বালাদগী লেহ ফাওবদা ঙংদুনা পায়খিবা অসিনা ভারতকী থৌনা ফবশিংবু পুক্নিং থৌগৎখি।
মরুপশিং, ভারতকী তৌনা ফবশিংনা সর্জিকেল স্ত্রাইক পাঙথোক্তুনা লালহৌবশিংগী মফম থুগায়খিবগী মতম অমা চহি ৪গী মমাংদা থুগায়খি। মসিদা শরুক য়ারিবা থৌনা ফবা মীওইশিং অসিদা পুক্নিং থৌগৎপগী মহুত্তা সর্জিকেল স্ত্রাইক পাঙথোকখি হায়বগী খুদম পীয়ু হায়না হঙখি। থৌওঙ্গ অসিগী মায়োক্তা লৈখিবা অদুনা মীওইশিং অসিগী ৱাখল্লোনশিং অসি লৈবাক মীয়াম মমাংদা তাকখ্রবনি। লৈবাক্কী ওইনা করুগুম্বা অমা পাঙথোকপা হীরম খুদিংদা য়ানিংদবা ফোঙদোকপা অসি মীওইশিং অসিগী হৈনবী ওইরে। অসিগুম্বা য়ানিংদবা উৎপগী থৌওং অসিনা মখোয়গী রাজনিতী তৌবগী অমত্তা ঙাইরবা পাম্বৈ অমা ওইরি। ভারতনা হৌদোক্তুনা মালেম শিনবা থুংনা মালেমগী য়োগ নুমিৎ পাঙথোকখিবা অদুদসু মসিগী মীওইশিং অসিনা য়ানিংদবা উৎখিবা অদু নখোয়না নীংশিংবীয়ু। লৈবাক অসিগী নিংথৌ পানবা রাজ্য ১০০/১০০বু পুন্সিনবগী পুৱারী ওইরবা থৌওং পাঙথোকখিবা সরদার পতেলগী মালেমদা খ্বাইদগী ৱাংবা মীতম অমা হাংদোকপা মতমদা মীওইশিং অসিনা য়ানিংদবা ফোঙদোকপা লেপখিদে। হৌজিক ফাওবদা মখোয়গী মরু ওইবা লুচিংবা অমত্তনা অপুনবগী মীতম অসিদা চৎখিদ্রি। করিগীনো? মরমদি মখোয়দি য়ানিংদবা ফোঙদোক্কদবনি।
মরুপশিং, লায়রবশিংগী ওইনা ১০%গী শরুক পীবগী ৱাফমগী ৱারেপ লৌখিবা মতমদসু মখোয়না মসিগী মায়োক্তা লেপখি। নবেম্বর ২৬তা সংবিধানগী নুমিৎ পাঙথোকপগী মতাংদসু মখোয়না য়েৎখি। মসি মখোয়না দাঃ বাবাসাহেব অম্বেদকরবু য়ানিংদবা উৎলিবনি। মরুপশিং, মমাং থাদা রাম মন্দির শাবা হৌবগী ভুমি পুজন পাঙথোকখি। মীওইশিং অসিনা অহানবদা সুপ্রীম কোর্ত্তা রাম মন্দির শাবগী মতাংদা য়েৎখি অমসুং মসিগী মতুংদা ভুমি পুজন পাঙথোকপদা অমুক য়েৎখি। মতম অসুম হৌজিল্লকপগী মতুং ইন্না মখোয়না য়ানিংদবা উৎপগী থৌওংশিং অসি লৈবাক অসিদা নোঙম নোঙমগী মগুন মাঙশিল্লক্লে। মসিদি ৱাখল থেনবা অমসুং পেন্দবগী থৌওংনি। লৈবাক অসিবু চারোন-শুরোন মরিনা লৈঙাক্লম্বা ইমুং অমগী অদুগুম্বা পার্তী অমনি। ঙসিদি অতোপ্পগী লেংজুমদা তোংদুনা লৈবাক্কী কান্নবা হীরম খুদিংদা অয়েৎপা পীদুনা মশাগী ওইজবা তানবগী মতৌবু মীমাঙ থোকহল্লে।
মরুপশিং, শক্তি পায়বা ফংদবা পার্তী মচা কয়া অমা লৈবাক অসিদা লৈরি। মখোয়শিং অসিনা হেক শেম্লকপদগী অয়াম্বা মতমদি ওপোজিসন্দা লৈদুনা লাক্লি। অদুবু অসুক কুইনা ওপোজিসন্দা লৈরক্লবসু লৈবাক্কী ওইবা হীরমশিংদদি লৈবাক মায়োক্তা কৈদৌনুংদা লৈরক্তে। অদুবু মীওই খরদি চহি খরা খক্তদগী ওপোজিসন্দা লৈরক্লি। মহাক্কী লিচৎ কমদৌই, থৌওং কমদৌই হায়বা খঙদুনা লৈবাক অসিদা থোক্লিবা থবকশিং য়েংলি, খঙলি। মখোয়গী ওইজবা তানবগী থৌওংগী মরক অসিদা অমসুং মরোমদোম লেপচবা ঙমহন্নবা হোৎনরিবা শেমদোকপা কয়া পুরক্লিবা অসি লৈবাক অসি চাউখৎহন্নবনি, লৈবাক অসিবু লায়রবদগী নিং-খা তমহন্নবনি, লৈবাক অসি হেন্না মপাঙ্গল হাপ্নবনি অমসুং থৌওংশিং অসি অদুম চত্থখিগনি।
ঐহাক্না অমুক্কা হন্না মীয়াম্বু চাউখৎপগী প্রোজেক্ত অসিগা মরী লৈননা থাগৎপা ফোঙদোক্লি।
ঐহাক্না মীয়াম্না ইশা-ইশাবু চেকশিনবীয়ু হায়না অমুক্কা হন্না হায়জরি। হকশেল ফনা লৈবীয়ু, তেক্ত কায়দনা লৈবীয়ু। বাবা কেদরনা মীয়াম্বু চানবীবা ওইসনু।
অদোমগী য়াইফ পাউজেলগীদমক্তা থাগৎচরি। জয় গঙ্গে।
Today, every terrorist knows the consequences of wiping Sindoor from the foreheads of our sisters and daughters: PM
