ইমা ভারতনা য়াইফরে!
ইমা ভারতনা য়াইফরে!
ইমা ভারতনা য়াইফরে!
ধেমাজির হারুৱা ভুমির পরা অখমবাখিক এই বিখেখ দিনথোৎ মই হুভেচ্ছা আরু অভিনন্দন জনাইছো!
ইচিল ইনাওশিং,
ফম্বাক্তা লৈবীরিবা অসমগী রাজ্যপাল, প্রোফঃ জগদিশ মুখীজী, মফম অসিগী ইকায় খুম্নরবা মুখ্য মন্ত্রী, শ্রী সর্বানন্দ সোনোৱালজী, ঐহাক্কী কেন্দ্রগী পেত্রোলিয়ম অমসুং নেচরেল গ্যাস মন্ত্রী, শ্রী ধরমেন্দ্র প্রধানজী, শ্রী রামেশ্বর তেলীজী, অসম সরকারগী মন্ত্রী, দাঃ হিমন্তা বিশ্বা শর্মজী, রাজ্য সরকারগী অতোপ্পা মন্ত্রীশিং, এম.পি., এম.এল.এ. অমসুং মশিং য়াম্না তিনবীরিবা অসমগী য়াম্লবা মীয়ামশিং!
ঐহাক্না ঙসি ধেমাজীদা অহুম্লক শুবা ওইনা লাক্তুনা নখোয়গী মরক্তা অমুক লাকপা ফংবা অসি ঐহাক্কী য়াম্না লাইবক ফবনি। ঐহাক্না মফম অসিদা লাকপা খুদিংগী মফমসিগী মীয়ামগী কোইদবা, মীয়াম্না ঐহাকপু নুংশিবীদুনা য়াইফ-পাউজেল পীবীবা অসিনা ঐহাকপু থবক তৌবদা লেপ্তনবা, অসমগী মীয়ামগীদমক্তা, অৱাং-নোংপোক্কী মীয়ামফীদমক্তা করিগুম্বা অনৌবা অমা তৌনবা ইথিল পীবিরি। ঐহাক্না মফম অসিগী গোগামুখতা লৈবা ইন্দিয়ন এগ্রিকলচর রিসর্চ ইন্সতিত্যুৎকী উরেপ-উয়ূং তম্বা লাকখিবা মতমদা ঐহাক্না অৱাং-নোংপোক ভারত অসিনা ভারতকী চাউখৎপা অমসুং শাহৌ-লৌবগী ইঞ্জিন ওইগনি হায়খি। ঐখোয়না ঙসিদি, ৱাফম অসিবু অওইবা ওইরকপগী মওং উবা ফংলে।
ইচিল ইনাওশিং,
মসিগী ব্রহ্মপুত্রগী অৱাং থংবা তোর্বান অসিদা দিকেদ কয়াগী মমাংদা অসমিয়া সিনেমানা মখোয়গী অহানবা খোঙচৎ, জোয়মতী ফিল্মগা লোয়ননা হৌখিবনি। মসিগী লমদম অসিনা অসমগী সংস্কৃতীবু হেন্না শক্নাইহনবা মীওই কয়া অমা পুথোকখি। রুপাঙ্কর জ্যোতী প্রসাদ অগ্রৱাল, কলাগুরু বিষ্ণু প্রসাদ রাভা, জগোই শাবা ফনি সরমা, মখোয়শিং অসিনা অসমগী শক্তাকপু অনৌবা থাক্তা পুখৎখি। ভারত রত্না, দাঃ ভুপেন হজারিকানা অসুম্না ইবীরম্মি – লুহতুর পার দুদি জিলিক উথিব রাতি, জবলি হৎ দেৱালির বন্তি। ব্রহ্মপুত্রগী তোর্বান অনিমক্তা দিৱালীদা থানবা থাউমৈনা পুমঙান ঙালহনগনি অমসুং ঙরাং ঐহাক্না য়াম্না মরু ওইবা অমা ওইনা নখোয়না মফম অসিদা দিৱালী করম্না পাংথোকপগে অমসুং থাউমৈ লিশিং লিশিং থানখিবা মতম অদু সোসিএল মিদিয়াদা উখি। থাউমৈদগী ঙাল্লকপা মঙাল অদুনা অসমগী তংদু-লৈতাবা অমসুং অমত্তা ওইদুনা চাউখৎপগী মমিনি। কেন্দ্র অমসুং অসম সরকার অনিনা পুন্দুনা রাজ্য অসিবু চাউখৎনবা কন্না হোৎনরি। অমসুং চাউখৎপগী খ্বাইদগী চাউনা য়ুম্ফম ওইবা য়ুম্বীদি ইনফ্রাস্ত্রকচরনি।
মরুপশিং,
অৱাং থংবা শরুক অসিদা তৌবা ঙম্বগী মতিক কয়া লৈরবসু, হান্নগী সরকারনা লমদম অসিবু লায়থোক্তুনা লৈখি। মফম অসিগী কন্নেক্তিবিতী, হোস্পিতাল, মহৈ তম্ফমশঙ, ইন্দস্ত্রীগী হীরমদা, মমাংগী সরকারনা হান্না পাংথোক্কদবনি হায়না মিৎয়েং অমত্তা চঙলমদে। মীয়ামগা লোয়ননা মীয়ামগী চাউখৎপা অমসুং মীয়ামগী থাজবগী মন্ত্রা অসিদা থবক তৌরিবা ঐখোয়গী সরকারনা মসিগী অচান-মীরায় খায়বা অসি লৈহনখিদে। লমদম অসিনা মতম কয়াদগী বোগীবীল থোংবু ঙাইরকপা অদু ঐখোয়গী সরকারগী খোঙজেল য়াঙনা পায়খত্তুনা লোইশিল্লে। নোর্থ বেঙ্ক অসিদা ব্রোদ-গেজ রেলৱে লাইন ঐখোয়গী সরকার লাক্লবা মতুংদা য়ৌরকখি। ব্রহ্মপুত্রদা অনিশুবা থোং, কলিয়াভুমুরা থোং অসিনা মফম অসিগী কন্নেক্তিবিতীবু হেন্না ফগৎহল্লগনি। মসিসু ঐখোয়না য়াম্না থুনা লোইশিন্নবা হোৎনরি। নোর্থ বেঙ্ক অসিদা লেন ৪গী নেস্নেল হাইৱেগী থবকসু য়াম্না য়াঙনা পায়খৎলি। মমাংগী চয়োলমক্তদা, মহাবাহু ব্রহ্মপুত্রগী খুত্থাংদগী মফম অসিদা ৱাতরৱেগী কন্নেক্তিবিতীদগী হৌদুনা অনৌবা থবক কয়া অমসু হৌদোকখ্রে। বোঙাইগাওগী জোগীঘোপাদা অচৌবা তর্মিনেল অমসুং লোজিস্তিক্স পার্ককী থবক অমসু হৌদোকখ্রে।
মরুপশিং,
মসিগী মনুং অসিদা, ঙসি, অসম্না করোর লিশিং ৩দগী হেনবা ইনর্জী অমসুং এজুকেসনগী ইনফ্রাস্ত্রকচর প্রোজেক্ত অমগী অনৌবা তেংবাং অমসু ফংলে। ধেমাজি অমসুং মুআলকুচী ইঞ্জিনীয়রিং কোলেজ ওইরো, বোঙ্গাইগাওগী রিফাইনরীদা হৌরিবা থবক ওইরো, দিব্রুগরদা সেকেন্দরী তেঙ্ক ফার্ম ওইরো, নত্ত্রগা তিন্সুকিয়াগী গ্যাস কম্প্রেসর স্তেসন ওইরো, মসিগী প্রোজেক্তশিং অসিনা চাউখৎপা অমসুং মহৈ-তম্বগী হব অমগী মওংদা লমদম অসিগী শক্তাকপু হেন্না মপাঙ্গল লৈহল্লগনি। মসিগী প্রোজেক্তশিং অসিনা অসমগা লোয়ননা খোঙজেল থুনা চাউখৎলক্লিবা ভারতকীসু খুদম অমা ওইরিবনি।
মরুপশিং,
ভারতনা মরোমদোম লেপচবা লেপ্তনা ঙম্নবগীদমক্তা, ঐখোয়গী পাঙ্গল অমসুং থবক তৌবা ঙম্বগী মতিক হেনগৎহনবগী তঙাই ফদবা লৈ। হৌখিবা চহি কয়াদা, ঐখোয়না ভারতমক্তদা রিফাইনিং অমসুং ইমর্জেন্সীগীদমক্তা থাউ থম্ফমগী কেপাসিতীসু য়াম্না হেনগৎহনখ্রবনি। বোঙ্গাইগাও রিফাইনরীদসু রিফাইনিং কেপাসিতী অসি হেনগৎহনখ্রবনি। ঙসি শঙ্গাখ্রিবা গ্যাস য়ুনিৎ অসিনা মফম অসিগী এল.পি.জি. পুথোকপগী মতিকসু হেনগৎহল্লগনি। মসিনা অসম অমসুং অৱাং-নোংপোক লমদমগী মীওইশিংগী পুন্সি মহিংদসু লাইহল্লগনি অমসুং লমদম অসিগী নহাশিংগী ওইনসু থবক ফংবগী খুদোংচাবা য়াম্না হেনগৎহল্লগনি।
ইচিল ইনাওশিং,
করিগুম্বা মীওই অমনা খুদোংচাবা য়াম্না ফংলকপা মতমদা, মহাক্কী মশাদা থাদবগী চাংসু য়াম্না হেনগৎলকই। মসিগী থাজবা হেনগৎলকপা অসিনা লমদম অসিদা চাউখৎপা পুরক্কনি অমসুং লৈবাক অসিবুসু চাউখৎহনগনি। ঙসিদি ঐখোয়গী সরকারনা, মসিগী চাউখৎপগী হীরমশিং অসিবু হান্না য়ৌবা ঙমলদ্রবা মফমশিংদা য়ৌহন্নবা কন্না হোৎনরি। অহানবদদি, মীয়াম্বু মখোইনা থোকপা তৌজসনু হায়না থাদোক্লম্বনি। অমুক্তা খন্থবীয়ু, ইং ২০১৪গী মমাংদা, লৈবাক অসিগী ইমুং ১০০গী মনুংদা, শুপ্নগী ইমুং ৫০-৫৫ খক্তদা এল.পি.জি. গ্যাস কন্নেক্সন ফংলম্বনি। অসমদদি রিফাইনরী অমসুং অতোপ্পা খুদোংচাবা কয়া লৈজরবসু, মীওই ১০০গী মনুংদগী মীওই ৪০ খক্তগী মনাক্তা গ্যাস কন্নেক্সন ফংলম্মি। অতোপ্পা মীওই ৬০দদি লৈরমদে। লায়রবা ইচল-ইচানুপীশিংনা চাকখুমগী মৈখু অমসুং অনাবা কয়াগী মরক্তা লৈরকখিবা অসি মখোয়গী পুন্সিগী য়াম্না লাইবক থীবা থৌদোক্নি। ঐখোয়না মসিবু উজ্বালা য়োজনাগী খুত্থাংদগী ফীভম অসিদা অহোংবা পুরকখি। অসমদা ঙসি গ্যাস কন্নেক্সন ফংবগী চাং অসি চাউরাক্না চাদা ১০০ ওইরবগুম্বনি। মফম অসিগী বোঙ্গাইগাও রিফাইনরীগী মনুং চনবা জিলাশিংদা ইং ২০১৪গী মতুংদতা এল.পি.জি. কন্নেক্সন ফংবগী মশিঙ অসি শরুক ৩দগী হেন্না হেনগৎখিবনি। হন্দক্কী চহিগী কেন্দ্রগী বজেত্তা লায়রবা ইচে-ইচল করোর ১দা উজ্বালা এল.পি.জি. কন্নেক্সন লেম্না পীবগী খুদোংচাবা য়াওহনখ্রবনি।
মরুপশিং,
গ্যাস কন্নেক্সন ওইরো, মৈ ফংবা ওইরো, হার ফংদবগী হীরম ওইরো, মসিদা খ্বাইদগী য়াম্না অৱাবা মাইয়োক্নরিবা মীওইশিং অসি লৈবাক অসিগী লায়রবশিংনি, লৈবাক অসিগী অপিকপা লৌমীশিংনি। নিং-তম্বা ফংলবা মতুংগী দিকেদ ৭ ফাওবদা মৈ ফংদবা খুঙ্গং ১৮,০০০গী মনুংদা অয়াম্বদি অসম অমসুং অৱাং-নোংপোক লমদমদগীনি। লমদম অসিগী তোঙান-তোঙানবা হারগী ইন্দস্ত্রীশিং অসি গ্যাস লৈতবদগী থিংজিনখিবা নত্ত্রগা নীংথিনা মথৌ তৌদ্রে হায়না হায়খিবনি। মসিগী অৱাবদি কনানা নঙই? মসিনা লায়রবা, তঙাই ফদবা অমসুং মিদ্দল ক্লাসকী মীওইশিং অমসুং নহাশিংদা অৱাবা কয়া নংহল্লি অমসুং সরকারনা মসিগী হীরম অসিবু শেমদোক্নবা হোৎনরি। ঙসিদি, প্রধান মন্ত্রী উর্জা গঙ্গা য়োজনাগী মখাদা নোংপোকথংবা ভারত অসি মালেমগী খ্বাইদগী চাউবা পাইপলাইনগা শম্নহনবগী থবক চত্থরি। থৌওং অমসুং ৱাখল্লোন্না চুম্লবদি, থবক-থৌরমদসু অহোংবা লাকই। লান্না খনবগী মতম লোইরক্কনি অমসুং চুম্না তৌবা মীওইশিংগী পুন্সিদসু অহোংবা পুরকই। লৈবাক অসিদা ঙসি গ্যাসকী পাইপলাইনগী নেৎৱর্ক শেম্লক্লিবা অসিগা লোয়ননা লৈবাক অসিগী খুঙ্গং খুদিংদা ওপ্তিকেল ফাইবর তিংলিবা, ইমুং খুদিংদা ঈশিং ফংহন্নবা পাইপ য়ৌহল্লিবা, ইমা ভারতকী তম্বাক্তা ইনফ্রাস্ত্রকচ্র কয়া থাদরিবা অসিনা অনৌবা ভারতকী পুন্সি লেপকদবা লৈই অমনি।
ইচিল ইনাওশিং,
মরোমদোম লেপচবা ভারত অমা ওইহবদা ঐখোয়গী হৈ-শিংলবা সাইন্তিস্ত, ইঞ্জিনীয়র অমসুং তেক্নিসিয়নশিংনা অচৌবা থৌদাং য়াওরি। হৌখিবা চহিশিংদা, নহাশিংনা স্তার্ত-অপশিংগী খুত্থাংদা লৈবাক অসিগী শিংনবা কয়াগী ৱারোইশিন পুরকপা ঙম্বা অকোয়বা অমা শানবা ঐখোয়না কন্না হোৎনদুনা লাক্লি। ঙসিদি, মালেম পুম্বনা ভারতকী ইঞ্জিনীয়রশিংবু মশক খঙলি। অসমগী নহাশিংদা তৌবা-ঙম্বগী শিংথানীংঙাই ওইরবা মতিক লৈ। মসিগী মতিক অসিবু হেনগৎহন্নবগীদমক্তা রাজ্য সরকারনসু কন্না হোৎনরি। অসম সরকারগী হোৎনজমন্দগী ঙসি মফম অসিদা ইঞ্জিনীয়রিং কোলেজ ২০দগী হেন্না লৈরবনি। মসিগী ফিভম অসি ঙসিদি, ধেমাজী ইঞ্জিনীয়রিং কোলেজ শঙ্গাখিবা অমসুং সুৱালকুচী ইঞ্জিনীয়রিং কোলেজকী উরেপ-উয়ুং তমখিবা অসিনসু হেন্না মপাঙ্গল লৈহল্লে। অতোপ্পা ইঞ্জিনীয়রিং কোলেজ অহুমগী থবক অমসু কন্না চত্থরি হায়না ঐহাক্কী মফমদা পাউদমলকখি। নুপীমচাশিংগী ওইবা অখন্নবা কোলেজ ওইরো, পোলিতেক্নিক ওইরো, নত্ত্রগা অতোপ্পা লুপশিং ওইরো, অসম সরকারনা হীরম অসিগী মতাংদা পাংথোকপা য়াবা থবক খুদিংমক পায়খৎলি।
ইচিল ইনাওশিং,
অসম সরকারনা অথুবা মতমদা নেস্নেল এজুকেসন পোলিসীবুসু থবক্তা ওন্থোক্নবা কন্না হোৎনরি হায়না মহাক্না লাউথোকখি। মসিনা মহৈ তম্বীবদা মফম-মফমগী লোলদা তাকপীগদৌরিবা ওইবনা অসমগী মীয়ামদা, মরু ওইনা চা বগানগী থৌমীশিং, সেদ্যুল ত্রাইবশিংদা কান্নবা য়াম্না পীগনি অমসুং মফম-মফমশিংগা মরী লৈনবা খুন্নাই চাউখৎপগী থৌওংদসু য়ুম্ফম ওইগনি। মফম-মফমগী লোলদা মেদিকেলগী মহৈ, তেক্নিকেলগী মহৈ তাকপীবা মতমদা খ্বাইদগী লায়রবা অঙাংশিংসু দাক্তর, ইঞ্জিনীয়র ওইবা ঙম্লগনি অমসুং লৈবাক্কীসু কান্নবা তৌবা ঙম্লগনি। লায়রবা অঙাংশিংগী মমা-মপাশিংগী মঙলানসু মঙফাওনরগনি। অসমগুম্বা রাজ্য অসিদা চা, তুরিজম অমসুং হেন্দিক্রাফকী মতাংদা মরোমদোম লেপচবগী মপাঙ্গল লৈ। অসিগুম্বা ফিভম অসিদা, মফম অসিগী নহাশিংনা স্কুল অমসুং কোলেজতা স্কিল তম্লক্লবদি, হেন্না কান্ননবা ওইগনি। মরোমদোম লেপচবা ঙম্বগী ৱাফম অসি মসিগা মরী লৈনরিবনি। হন্দক্কী বজেৎ অসিদা ত্রাইবেলগী মফমশিংদা এক্লাব্যা মোদেল স্কুল চাম্মা-চাম্মা হাংদোকপগী খুদোংচাবা য়াওরি অমসুং মসিনা অসমগী ওইনা য়াম্না কান্নবা ওইগনি।
মরুপশিং,
ব্রহ্মপুত্রগী থৌজালদগী মফম অসি লৈহাও য়াম্না চেনবা মফম অমা ওইরি। মফম অসিগী লৌমীশিংনা মখোয়গী পোত্থোকশিং হেনগৎহন্নবা, লৌউ-শিংউগী মতাংদা মতমগা চান্নবা খুদোংচাবা ফংহন্নবা, মখোয়গী চাগা হেনগৎহন্নবগীদমক্তা রাজ্য অমসুং কেন্দ্র সরকারনা পুন্না থবক তৌমিন্নরি। লৌমীশিংগী বেঙ্ক একাউন্ততা হকথেংননা শেল হাপ্পা ওইরো, মখোয়গী পেন্সনগী য়োজনা হৌদোকপা ওইরো, মখোয়গী হেল্থ কার্দ শাবা ওইরো, মখোয়গী খুদোংচাবা কয়া য়েংলগা থবক কয়া অমা পায়খৎলি। ঙা-য়োকপদা অহেনবা মিৎয়েং চঙলদুনা ঐখোয়গী সরকারনা হীরম অসিগা মরী লৈনবা তোঙানবা মন্ত্রালয় অমা হান্ননা শেমখ্রবনি। ঙা-য়োকপবু খুমাং চাউশিলহন্নবা নিং-তম্বা ফংলবা তুংদা থাদখিবা শেনফমশিংদগী য়াম্না হেন্না ঐখোয়না সরকারনা হৌজিক থাদরি। ঙা-য়োকপগা মরী লৈনবা লৌমীশিংগীদমক্তা লুপা করোর লিশিং ২০গী য়াম্না চাউরবা স্কিম অমসু শেমখ্রবনি অমসুং মসিদগী অসমগী ঙা-য়োকপগা মরী লৈনবা ঐহাক্কী মরুপশিংনা কান্নবা কয়া ফংগনি। লৈবাক্কী লৌমীশিং, অসমগী লৌমীশিংগী পোত্থোকশিং অসি মালেমগী কৈথেলদা য়ৌহনবা ঙম্নবা সরকারনা হোৎনরি। মরম অসিগীদমক্তা, লৌউবগা মরী লৈনবা আইন কয়াদসু শেমদোকপগী থৌওং পাংথোক্লিবনি।
মরুপশিং,
অৱাং থংবা তোর্বানগী চা বগানশিংনা অসমগী শেন্মিৎলোন্দা মরু ওইবা থৌদাং লৌরী মসিগী চা বগানশিংদা থবক তৌরিবা মীওইশিংগী পুন্সি মহিং লাইহনবা অসিদসু ঐখোয়না সরকারনা থবক কয়া পয়ায়খৎলি। ঐহাক্না অসম সরকারনা চা পাম্বী মশিং য়ামদনা থাবা মীওইশিংদা লম ৱায়হনবগী খোঙথাং অমা চত্থবগীদমক্তা থাগৎপসু ফোংদোকচরি।
ইচিল ইনাওশিং,
লৈবাক অসিবু দিকেদ কয়াদগী লৈঙাক্তুনা লাক্লিবা মীওইশিংনা দিসপুর অসি দিল্লীদগী য়াম্না লাপ্না লৌরম্লে। মসিগী ৱাখল্লোন অসিনা মরম ওইদুনা অসম্না অৱাবা কয়া মায়োক্নরিবনি। অদুবু হৌজিক্তি দিল্লীসে অদোমদগী য়াম্না লাপ্ত্রে। দিল্লী অসি নখোয়গী থোঙমক্তদা লৈরবনি। হৌখিবা চহি কয়াদা, কেন্দ্র সরকারগী মন্ত্রী কয়া অমা মফম অসিদা থাখি। মসি নখোয়গী শিংনবশিং, নখোয়গী লমদম অসিদা পাংথোক্লিবা থবকশিং য়েংশিন্নবা, অমসুং নখোয়গী তঙাই-ফদবশিং য়েংদুনা চান্নবা স্কিম শেম্নবগীদমক্তনি। ঐহাকসু নখোয়গী চাউখৎপগী খোঙচৎ অসিদা নখোয়গা শরুক য়ামিন্নবা ফংনবগীদমক্তা অসমদা কয়ারক লাকখ্রিবনি। অসমদা লমদম অসিগী মীয়ামদা য়াইফবা পুন্সি অমা ফংহন্নবা তঙাই ফদবা হীরম খুদিংমক লৈ। হৌজিক্কী ওইবা অসমগী মীওইশিংগী তঙাই ফদবা অসিদি চাউখৎপা অমসুং শাহৌ লৌবগী ইঞ্জিন অনি অসিগী মপাঙ্গল কনখৎহন্নবা মতম লাকপা অসিদা নখোয়না তেংবাংবা অসিনি। ঐহাক্না অসমগী মীয়ামদা থাজবা পীরি, মদুদি, নখোয়গী তেংবাংদগী, থৌজালদগী, অসমগী চাউখৎপগী খোঙচত্তা হেন্না খোঙজেল থুগৎলগনি অমসুং চাউখৎপগী অনৌবা থাক অমদা য়ৌরগনি।
ইচিল ইনাওশিং,
নখোয়না মীখল ঙাইরমগনি হায়বা ঐহাক্না খঙই। মমাংগী মীখলগী মতম লাউথোকখিবা অদু মার্চতা ওইখিবিরা হায়না ঐহাক্না খরা-খরা নীংশিংলি। হন্দক্কী চহিদসু, মার্চকী মরক্কী চয়োলদা মীখল লাউথোরকপা য়াবগী ওইথোকপা লৈ হায়না ঐহাক্না খল্লি। মসিদি ইলেক্সন কম্মিসনগী মথৌনি, মখোয়না অদুম তৌজসনু। অদুবু, মীখল লাউথোক্ত্রিঙৈ মমাংদা, অসম, বেঙ্গোল, কেরলা, তমিল নাদু, পুদুচেরীদা চৎপগী তাঞ্জা ফংলিবমখৈ চৎনবা ঐহাক্না হোৎনগনি। করিগুম্বা, মার্চ ৭কী মনুংদা মীখল লাউথোক্লবসু, মতম খরদি অদুমক লৈরি। মমাংগীদা মার্চ ৪দা লাউথোকখিবনি। হন্দকসু, মসিগী মতম অসিগী মরক্তা ওইবা য়াই। অমবু ওইরো, ঐহাক্না নখোয়গী মনাক্তা লাক্নবা হোৎনগনি। অমসুং, ইচিল-ইনাওশিং, ঙসি নখোয় ময়াম অমনা মীশিং য়াম্না লাক্তুনা ঐখোয়বু থৌজাল পীরি। ঐখোয়না চাউখৎপগী মতাংদা লৈরিবা ৱাখল্লোন অসিবু নখোয়না হেন্না মপাঙ্গল হাপ্পীরে। মসিগীদমক্তা, ঐহাক্না নখয়বু থমোয় শেংনা থাগৎচরি। মসিগী থাজবা অসিগা লোয়ননা, চাউখৎপগী প্রোজেক্ত কয়া অসিগীদমক্তা মরোমদোম লেপচবা ঙম্বা অসম অমা শেম্নবগীদমক্তা, ভারতপু চাউখৎহন্নবা অসম্না থৌদাং লৌরিবা অসিগীদমক্তা, অসমগী হৌরক্লিবা চারোল-শুরোনশিংগী য়াইফবা হয়েং অমা শেম্নবগীদমক্তা, অসমগী ঙামীশিং, লৌমীশিং, ইমাশিং, ইচলশিং, ঐহাক্কী অসমগী ত্রাইবেল ইচিল-ইনাওশিংগীদমক্তা ঙসি স্কিম কয়া অমগী উরেপ-উয়ুং তম্লে। মসিগীদমক্তা ঐহাক্না নখোয়বু থাগৎচরি অমসুং য়াইফ-পাউজেল পীরি। খুত্তুম অনি তাশিল্লগা ঐহাক্কা লোয়ননা ভারত ইমানা য়াইফরে হায়না অমুক্তা হায়বীয়ু – ভারত ইমানা য়াইফরে, ভারত ইমানা য়াইফরে, ভারত ইমানা য়াইফরে।
