জয় জগন্নাথ !
জয় মা সমলেস্বরি !
ওরিসাগী ইচিল ইনাওশিংগী মফমদা য়াইফ পাউজেল পীজরি
অনৌবা চহী অসিনা পুম্নমক্কী য়াইফবা পুরকপা ওইরসনু!
ইকায়খুম্নরবা ওরিসাগী গভর্নর প্রোফেসর লাল জী, মুখ্য মন্ত্রী অমদি ঐগী মরুপ শ্রী নবীন পত্নাইক জী, কেন্দ্রগী মন্ত্রী মন্দলদা য়াওরিবা ঐগী মরূপ দোক্তর রামেস পোখ্রিয়াল নিসঙ্ক জী, ওরিসাগী মনি মুক্তা ওইরিবা ভাই ধরমেন্দ্র প্রধান জী অমসুং শ্রী প্রতাপ জন্দ্র সারঙ্গ জী, ওরিসা লৈঙাক্কী মন্ত্রীশিং, এম.পি. অমসুং এম.এল.এ.শিং, আই.আই.এম. সম্বলপুরগী চেয়রপর্সন, শ্রীমতি অরুন্ধতি ভত্তচার্য়া, দাইরেক্তর প্রোফেসর মহাদেও জৈস্বাল জী, ফেকল্তী স্তাফ অমসুং ঐগী নহা ওইরিবা মরুপশিং!
ঙসি আই.আই.এম. কেম্পসগী উরেপ উয়ুং তম্বগা লোয়ননা ওরিসাগী নহাশিংগী মতিং নৌনা হাপ্নবা য়ুম্বী অমসুং য়ুংলে। আই.আই.এম. সম্বলপুরগী লেঙদ্রবা কেম্পস অসিনা ওরিসাগী মমীং লৈরবা নাৎ অমসুং মচাকশিংগা লোয়ননা মেনেজমেন্তকী তাইবঙসিদা ওরিসাগী অনৌবা মশক অমা পুরক্লগনি। অনৌবা চহী হৌরকপগী মতমসিদা নৌনা হৌদোক্লিবা অসিনসু নুংঙাইবগী চাং শরুক অনি ওইহল্লে।
মরূপশিং,
হৌখিবা চহী তরাগী খুজিং খরসিদা লৈবাক অসিদা অনৌবা চৎনরোল অমা উবা ফংলি; মশিং য়াম্লবা মল্তি-নেসনেল কয়া মফমসিদা লাক্লি অমদি মফমসিদগী মশা মরেং ফন্দোকখি। চৎলিবা চহী তরা অমদি চহীচা অসি ভারত্তা অনৌবা মল্তি-নেসনেলশিং শেমগৎপগী মতম ওইরি। মতমসি ভারতনা মাগী মতিং মালেমদা উত্থোকপগী খ্বাইদগী ফরবা মতম ওইরি। ঙসিগী স্তার্ত-অপশিং অসিনা হয়েংগী মল্তি-নেসনেল ওইগদৌরিবনি। অদুগা হায়রিবা স্তার্ত-অপশিং অসি অয়াম্বনা করম্বা ময়োল্লমদা ওইবগে? হায়রিবা স্তার্ত-অপশিং অসিগী ইনোৎ ঐখোয়না তিয়র-২ নৎত্রগা তিয়র-৩ হায়না খঙনবা ময়োল্লমশিংদা উবা ফংলি। হায়রিবা স্তার্ত-অপশিং, ভারতকী নহাশিংনা লিংখৎলিবা অনৌবা কম্পেনীশিং অসিবু খুমাঙ চাওশিলহন্নবা খ্বাইদগী ফবা মেনেজরশিং মথৌ তাগনি। ভারতকী অনৌবা মফমশিংদগী হৌগৎলক্লিবা মেনেজমেন্তকী খঙ-হৈরবশিং অসিনা মখোয়গী অনৌবা এক্সপিরিয়েন্স কয়াগা লোয়ননা ভারতকী কম্পেনীশিংদা অনৌবা চাওখৎপগী পন্দোল অমা তানফংনবা অচৌবা থৌদাং লৌগদৌরিবনি।
মরূপশিং,
কোবিদকী লাংফম লৈজরবসু হৌখিবা চহীশিংগা য়েংনবদা চহী অসিদা ভারতনা য়ুনিকোর্ন মশিং হেন্না শেমগৎলি হায়না ঐনা মফম অমদা পাখি। ঙসিদি লৌউ-শিংউ অমসুং তরংগী সেক্তরদা হান্না পানরুদবা মওংদা পুরক্লিবা অওনবশিং অসিনা মরম ওইরগা স্তার্ত-অপকী মশকসু লেপ্পা নাইদনা চাউথোরক্লি। অসিগুম্বা অনৌবা তাঞ্জা কয়াসিগীদমক অদোম্না ইশাবু শেম শাবা মথৌ তারি। অদোম্না অদোমগী করিয়রবু ভারতকী মংলান অমদি নীংজবশিংগা চুননা শেমবা মথৌ তারি। ব্রান্দ ইন্দিয়াবু অনৌবা মালেমগী মশক অমা পীবগী থৌদাং ঐখোয় খুদিংমক্তা, মরু ওইনা নহারোলশিংদা লৈরি।.
মরূপশিং,
আই.আই.এম. সম্বলপুরগী পান্দমগী লাইৱাদি नवसर्जनम् शुचिता समावेशत्वम्। হায়বদি ইনোভেসন, ইন্তিগ্রিতী অমসুং ইনক্লুজিবনেস হায়বসিনি। হায়রিবা লাইৱাসিগী পাঙ্গলগা লোয়ননা লৈবাকসিগী মেনেজমেন্তকী স্কিলশিং অদোম্না উত্থোক্কদৌরিবনি। অদোম্না অনৌবা সেত-অপশিং পুক্নিং থৌগৎপদা নত্তনা পুম্নমক কোনশিনবা হায়বা ৱাফমসিদা অহেনবা মীৎয়েঙ থম্নবগীদমক অদোম্না চাওখৎপগী লমজেলদা মনিংদা লৈথহৌরিবা পুম্নমকপু পুনশিন্দুনা চৎমিন্নবা মথৌ তাই। আই.আই.এম.গী লেঙদ্রবা কেম্পস শাগৎকদৌরিবা মফমসিদা হান্ননা মেদিকেল য়ুনিভর্সিতী অমা ইঞ্জিনিয়রিং য়ুনিভর্সিতী অমা, অতোপ্পা য়ুনিভর্সিতী অহুম, সাইনিক স্কুল অমসুং সি.আর.পি.এফ. অমসুং পুলিসকী ত্রেনিং ইন্সতিত্যুৎশিং লৈরি। সম্বলপুরগী মরমদা কা হেন্না খঙদবশিংনা হৌজিক্তি মফম অসি আই.আই.এম.গুম্বা মমীং লৈরবা ইন্সতিত্যুৎ লিংখৎলক্লবা মতুংদা কয়া য়াম্না চাউবা মহৈ মশিংগী মকোন অমা ওইরক্লগদগে হায়বদু ৱাখলনা শাগৎপা ঙম্লগনি। আই.আই.এম. সম্বলপুর, মফমসিদা তম্লিবা মহৈরোয়শিং অমদি প্রফোসনেলশিংগীদমক্তা খ্বাইদগী মরু ওইবা ৱাফমদি মফম পুম্বা অসি মওং অমদা অদোমগীদমক্তা প্রাক্তিকেল হব অমা ওইরগনি। মহৌশাগী মীৎয়েঙদা য়েংলবসু মফম অসি মমীং লৈরবা ওরিসাগী মীংচৎ ওইরিবা হিরাকুদ দাম য়াম্না লাপত্রে। দাম অসিগী মনাক্তা লৈরিবা দেব্রিগর সেংচুএরী অসিসু মশাগী ওইবা তোপ তোপ্পা মশক লৈজরি, অদুগা মফমসিগী ময়ায় চবুক্তা বীর সুরেন্দ্র সাই জীনা মাগী মফম শেমগৎলম্বা শেংলবা মফম অমসু লৈরি। মফম অসিগী লমকোয়বগী মতি হেনগৎহন্নবগীদমক মহৈরোয়শিংগী ৱাখল্লোন অমদি মেনেজরিএল স্কিলগী কান্নবসু লাক্কনি। বন্ধা-ইকৎ ফি অমদি মাগী তোপ তোপ্পা ময়েক, মওং অমদি মশক অসিসু অখন্নবা অমনি। মতৌ অসুম্না মফমসিদা মশিং য়াম্লবা খুৎশা হৈবগী, লুপাগী লৈতেং, নুংদা হকপা, উ শুবগী হৈ-শিংবা, কোলুগী পোৎলমশিং অমদি ঐখোয়গী ত্রাইবেও ইচিন ইনাউশিংনা হীরমশিং অসিদা হৈথোই শিংথোইবা মতিং কয়া লৈরি। সম্বলপুরগী পোত্থোকশিংগীদমক ভোকেল ফোর লোকেল পুরকপদা আই.আই.এম. সম্বলপুরগী মহৈরোয়শিংগী মরুওইবা থৌদাং লৈ।
মরূপশিং,
সম্বলপুর অমসুং মাগী থংনবা মফমশিং অসি মখোয়গী মিনরেল অমসুং খনিগী পোত্থোকশিংগী লৈরিবা মপাঙ্গলগীদমক্তা মীয়াম্না খংনৈ হায়বসিসু অদোম্না মমুৎ তানা খঙলম্লগনি। অৱাংবা থাক্কী শুংদোক্ত্রিবা য়োৎ, বোক্সাইত, ক্রোমাইত, মেঙ্গানিজ, কোইলা শুনুনুংদগীনা সনা, লৈতেংগী নুং অমদি দাইমন্দনচিংবনা মফমসিগী মহৌশাগী লনবু শরুক কয়া হেনগৎহল্লি। অদোম্না লৈবাকসিগী অসিগুম্লবা মহৌশাগী লনশিংবু কমদৌনা হেন্না ফবা মওংদা মেনেজমেন্ত তৌগদগে অমদি মফম পুম্বা অসি কমদৌনা চাওখৎহনগদগে অমসুং মীয়ামগী ফীভম ফগৎহনগদগে হায়বা হীরমসিদা অনৌবা ৱাখল্লোনশিং পুথোকপসু মথৌ তাগনি।
মরূপশিং,
ঐনা অদোমদা হায়রিবসি খুদম খরখক্তনি। উমংগী লন, মিনরেল, রঙ্গবতি ঈশৈ নোংমাই, ত্রাইবেল আর্ত অমদি ক্রাফ্ত অমসুং মহৌশাগী ৱাকম গঙ্গাধর মেহেরগী শৈরেংশিং – ওরিসাদা ফংদববু করি লৈরিবগে? অদোমগী মরক্তগী মীওই কয়া অমনা সম্বলপুরগী ফিরোল নৎত্রগা কতক্কী লৈতেংগী পোৎলমশিংবু মালেমগী ওইবা মশক অমা পীননবা অমদি মফমসিদা তুরিজম চাউখৎহন্নবা অদোমগী স্কিলশিং শীজিন্নরকপা মতমদা মদুনা আত্মনিরভর ভারত কেম্পেনবু অহেনবা অনৌবা ইনোৎ পীবখক্তা নত্তনা ওরিসাগী মপুং ওইবা চাউখৎ থৌরাংদা চাউনা কান্নবা পীগনি।
মরূপশিং,
আই.আই.এম.গী নহা ওইরিবা মরূপ পুম্নমক্তা লমদমসিগী পোত্থোকশিংগী মালেমগী থাক্তা পুখৎনবা অনৌবা অমদি ইনোভেতিব ওইবা পাম্বৈশিং পুথোক্কদবনি। লৈবাকসিগী মরোমদোম লেপচবগী পান্দম অসিদা মাঙদা চঙশিনবদা লমদমসিগী পোত্থোকশিং অমদি মালেমগী খুৎশম্নবগী থৌরাংগী মরক্তা ঐখোয়গী আই.আই.এম.শিংনা থোং ওইনা থবক তৌরক্কনি হায়না ঐনা থাজৈ। মালেমগী কাচিন কোয়া শিন থুংনা লৈরিবা অদোমগী পাক চাউরবা এলুম্নাই নেতৱর্কনা হীরম অসিদা চাউনা মতেং ওইগনি। ২০১৪ ফাওবদা ঐখোয়গী আই.আই.এম. ১৪ লৈরম্মী। হৌজিক্তি লৈবাকসিদা আই.আই.এম. ২০ লৈরে। অসিগুম্লবা চাউরবা হৈথোই শিংথোইরবা মীওইশিং অসিনা আত্মনিরভর ভারত কেম্পেনদা মতেং ওইগদৌরিবনি।
মরূপশিং,
করিগুম্বা মালেমসিদা অনৌবা তাঞ্জা কয়া লৈরবদি মেনেজমেন্তকী তাইবংদা লৈরিবা শিংনবশিংসু অনৌবা ওইগদৌরিবনি। অদোম্না হায়রিবা শিংনবশিং অসি খংজিনবা মথৌ তাই। খুদম ওইনা, এদিতিব প্রিন্তিং নৎত্রগা ৩দি প্রিন্তিংনা পোত্থোক পুথোকপগী শেন্মিৎলোন পুম্বদা অহোংবা পুরক্লি। কম্পেনী অমনা চেন্নাইদা মমাঙ থাদা মথোল অনিগী বিল্দিং অপুম্বা অমগী ৩দি প্রিন্ত দিজাইন তৌখিবদু অদোমসু পাউদা তারম্লগনি। পোত্থোক পুথোকপগী মওং মতৌ হোংলকপগা লোয়ননা লোজিস্তিক অমসুং সপ্লাই চেনগী থৌরাং পুম্বসু হোংলক্কদৌরিবনি। মতৌ অসুম্না ঙসিদি মফমগী খুদোংচাদবা কয়া তেক্নোলোজীনা মাংহল্লক্লি। নোংথক্কী কনেক্তিভিতীনা ২০শুবা চহীচাগী লল্লোন ইতিক্কী থৌওংবু অপনবা লৈতবা ওইহনবগুম দিজিতেল কনেক্তিভিতীনা ২১শুবা চহীচাগী লল্লোন ইতিক্তা অওনবা পুরক্কদৌরিবনি। মফম অমদগী হেক্তা থবক তৌবগী ৱাখল্লোনদা মালেম পুম্বসি গ্লোবেল ভিলেজদগী গ্লোবেল ৱর্কপ্লেস ওইরক্লে। হৌখিবা থা খরসিদা ভারতনসু হীরম অসিদা মথৌ তাবা অওনবশিং পুরকখ্রে। ঐখোয়গী পান্দমদি মতমগা লোয়ননা চৎপখক্তা নত্তনা মতমগী মাংওইননা চৎপনি।
মরূপশিং,
থবক তৌবগী মওংদা হোংলকপগা লোয়ননা মেনেজমেন্ত স্কিলগী দিমান্দসু হোংলক্লি। হৌজিক অসি তোপ দাউন নৎত্রগা তোপ হেভী মেনেজমেন্তকী মহুত্তা পুনশিন্নদুনা থবক তৌমিন্নবা, ইনোভেতিব অমদি ত্রান্সফোর্মেতিব মেনেজমেন্তকী মতম্নি। পুন্না থবক তৌমিন্নবা হায়বসি লেং মান্নবশিংগীদমক্তা মরুওই অদুগা বোত অমসুং অল্গোরিথমশিংসু হৌজিক্তি তীম মেম্বর ওইরে। মরম অদুনা ঙসি মীওইবগী মেনেজমেন্ত হেন্না মথৌ তারবদি মদুগা মান্ননা তেক্নোলোজিকেল মেনেজমেন্তসু মথৌ তাগনি। হীরমসিগী মতাঙদা লৈবাক শিনবা থুংনা লৈরিবা আই.আই.এমশিং অমদি বিজিনেস মেনেজমেন্ত স্কুলশিংদা ৱাফম খর থমজনিংই। কোরোনা লাইচৎকী মতমসিদা লৈবাকসিনা তেক্নোলোজী অমসুং তীমৱর্ককী ৱাখল্লোনদা কমদৌনা থবক পায়খৎখিবগে, ভারত মচা করোর ১৩০বু ঙাকথোক্নবগীদমক খোঙথাঙশিং, থৌদাংশিং অমদি পুনশিন্নবা থৌরাংশিং কমদৌনা লৌখৎখিবগে, অমদি মীয়াম্না পুন্না শরুক য়ামিন্নবগী কেম্পেন অমা পায়খৎখিবগে হায়বদু নৈনমিন্নবা মথৌ তাই। হায়রিবা হীরম খুদিংমকসিদা থিজিন হুমজিন্দুনা চে চাং নীংথিনা থমজিনবা মথৌ তাগনি। কমদৌনা মীওই করোর ১৩০গী লৈবাকসিনা মতম মতমগী মতুং ইন্না ইনোভেত তৌবগে? তেনখ্রবা মতমসিদা ভারতনা মাগী মঙম অমসুং মতিং কমদৌনা হেনগৎহনখিবগে? মসিদা মেনেজমেন্তকী চাউরবা পরা অমা য়াওরি। লৈবাকসিনা কোবিদকী পি.পি.ই. কিত, মাস্ক অমসুং ভেন্তিলেতরকী লেঙদ্রবা পাম্বৈ ফংখ্রে।
মরূপশিং,
ঐখোয়দা খুদোংচাদবা ফীভমগী পাম্বৈ পুথোকপগী লমদা অতেনবা মতমগী থৌরাং পায়খৎপগী চৎনবী অমা লৈরি। হৌজিক্তি লৈবাক অসিনা ৱাখল্লোন অদুগী ৱাংমা লাল্লক্লে। হৌজিক্তি ঐখোয়না খুদক্কী ওইবা মথৌ তাবগী ৱাংমদা অশানবা মীৎয়েংলোমদা মায় ওনশিল্লে। অদুগা মসিদগী মীওই অমনা মেনেজমেন্তকী কান্নরবা পরা অমা তম্বা ফংগনি। অরুন্ধতিজী ঐখোয়গী ইরক্তা য়াওরি। লৈবাকসিগী জন ধন একাউন্ত হাংবগী থৌরাং য়াৎপা, পায়খৎপা অমদি মেনেজমেন্তকী থৌওং পুম্নমক মহাক্না বেঙ্ককী ইন-চার্জ ওইবা মরম্না লোয়না খঙখিবনি। মপুন্সিদা বেঙ্কদা চৎলিদ্রিবা লায়রবা মীওই করোর ৪০গী বেঙ্ক একাউন্ত হাংদোকপা হায়বসি অরায়বা অমদি নত্তে। ৱাফমসি ঐনা হায়রিবগী মরমদি মেনেজমেন্ত হায়বসি অচৌবা কম্পেনীশিং শেন্নবখক্তা নত্তে। ভারতকুম্বা লৈবাক অমগীদমক্তদি মেনেজমেন্তকী তশেংবা ৱাহন্থোক্তি পুন্সি কয়াবু তশেংনা শেন্নবনি। ঐনা অতোপ্পা খুদম অমগা পীগে অমদি মসি ওরিসাগী হৈথোই শিংথোইরবা মীওই ধর্মেন্দ্র প্রধান জীনা মসিদা অচৌবা থৌদাং লৌখিবনা মরম ওইরগা মরুওইবা ৱাফম্নি।
মরূপশিং,
ঐখোয়গী লৈবাকসিদা চাকথোং গ্যাস অসি নীং তম্লবা চহী ১০রোমগী মতুংদা লাকখি। অদুবু মতুংগী চহীশিংদা চাকথোঙ গ্যাস অসি লকজরী ওইরকখি। মসি ইনাক খুল্লবা মীওইশিংগী ইজৎকী ৱাফম ওইরকখি। মীয়াম্না গ্যাস কনেক্সন অমা লৌননবা কোইচেন চেন্নখি অদুবু মখোয়না ফংবদি ঙমখিদে। ওইরম্লিবা ফীভমদুদি ২০১৪ ফাওবদা, চহী তরুক্কী মমাঙদা লৈবাকসিদা এল.পি.জি. কভরেজ অসি চাদা ৫৫ খক্তনি। ফীভমসিনা লেঙদ্রবা পাম্বৈ পুরকপগী ৱাখল্লোন লৈরমদবা মরম্না ওইখিবনি। চহী ৬০সিদা এল.পি.জি. কভরেজ অসি চাদা ৫৫ খক্তনি। করিগুম্বা লৈবাক অসিনা খোঙজেল অসিদা চৎলম্লবদি মীপুম খুদিংদা গ্যাস কনেক্সন পীবদা চহী ৫০ অমগা চঙখিগনি। ঐখোয়গী লৈঙাক ২০১৪দা শেম্লবা মতুংদা ঐখোয়না লেঙদ্রবা পাম্বৈ অমা লৈহনবা মথৌ তাই হায়না ফিরেপ অমা লৌখি। ঙসি লৈবাকসিদা গ্যাস কভরেজ কয়া য়াম্না লৈরবগে অদোম খঙবিবরা? চাদা ৯৮ হেল্লে। মেনেজমেন্ততা লৈরিবা অদোম পুম্নমক্না অনৌবা থৌরাং অমা হৌদোক্তুনা ফীভম খরদা অহোংবা পুরকপা হায়বসি অরায়বনি হায়বসি খঙবিরমগনি। তশেংনা লৈরিবা শিংনবদি চাদা চাম্মা কভরেজ পীবদুনি।
মরূপশিং,
লৈরিবা ৱাহংদি ঐখোয়না মসি কমদৌনা ফংবা ঙমখিবগে হায়বসিনি। মসি অদোমগুম্বা মেনেজমেন্তকী মপাংশিংগীদমক্তা য়াম্না ফরবা কেস স্তদী অমনি।
মরূপশিং,
ঐখোয়না খুদোংচাদবা ফীভমবু নাকল অমদা থম্লগা লেঙদ্রবা পাম্বৈনা নাকল অমদা থম্লি। থেংনরিবা শিংনবদি অনৌবা দিস্ত্রিব্যুতরশিংনি। ঐখোয়না অনৌবা গ্যাস দিস্ত্রিব্যুতর ১০,০০০ কম্মিসন তৌখি। মদুদগী অমুক থেংনখিবা শিংনবদু বোত্লিং প্লান্ত কেপাসিতীনি। ঐখোয়না লৈবাক শিনবা থুংনা অনৌবা বোত্লিং প্লান্তশিং লিংখত্তুনা লৈবাকসিগী কেপাসিতী হেনগৎহনখি। ইম্পোর্ত তর্মিনেল কেপাসিতীসু শিংনবা অমা ওইখি। মদুসু ঐখোয়না পাম্বৈ পুথোকখি। শিংনবা থেংনখিবসি পাইপ-লাইন কেপাসিতীনি। ঐখোয়না হীরমসিদা লুপা করোর লিশিং কয়া থাদখি অমদি ঙসিমকসু মখা চত্থরি। লায়রবা বিনিফিসিয়রিংশিং খনবদা শিংনবা থেংনখি। মদুদসু ঐখোয়না লৌথুপ লৌকোয় লৈতনা, অখন্ননা উজ্বলা য়োজনা হৌদোক্তুনা তৌখি।
মরূপশিং,
ঙসি লৈবাকসিদা গ্যাস কনেক্সন করোর ২৮ হেন্না লৈরিবসি ঐখোয়না লেঙদ্রবা পাম্বৈ পুথোক্নবা হোৎনখিবদুগী মহৈনি। ২০১৪গী মমাঙদা লৈবাকসিদা গ্যাস কনেক্সন করোর ১৪ লৈরম্মী। মসিদা খন্থবিয়ু, চহী ৬০দা গ্যাস কনেক্সন করোর ১৪! ঐখোয়না হৌখিবা চহী তরুকসিদা গ্যাস কনেক্সন করোর ১৪ হেন্না পীরি। হৌজিক্তি মীয়াম্না চাকথোং গ্যাসকীদমক কোইচেন চেন্নবগী মথৌ তাদ্রে। ওরিসাদসু, উজ্বলা য়োজনাগী মখাদা লায়রবা ইমুং লাখ ৫০রোম্না গ্যাস কনেক্সন ফংখ্রে। ওরিসাগী দিস্ত্রিক্ত ১৯দা সিতী গ্যাস দিস্ত্রিব্যুসন নেতৱর্ক পায়খৎলবসি স্কিম অসিগী মখাদা লৈবাকসিদা পায়খৎখিবা কেপাসিতী বিল্দিং অদুনা ঙম্লিবনি।
মরূপশিং,
ঐনা হায়রিবা খুদমশিং অসি পীরিবগী মরমদি অদোম্না লৈবাকসিগী মথৌ তাবশিংগা শম্নরিবমখৈ অমদি লৈবাকসিগী শিংনবশিং খঙলিবমখৈ অদোম্না হেন্না ফবা মেনেজরশিং ওইগদৌরিবনি অমদি খ্বাইদগী ফবা পাম্বৈ পীবা ঙমগদৌরিবনি। অৱাংবা থাক্কী মহৈ তম্ফমশঙশিংগীদমক্তা মখোয়গী হৈ-শিংবদা মীৎয়েঙ থম্বখক নত্তনা মখোয়গী মীৎয়েং পাকথোক চাউথোকহনবসু মথৌ তাই হায়না ঐনা খল্লি। মফমসিদা লাক্লিবা মহৈরোয়শিংনা লৌগদবা চাউরবা থৌদাং লৈরি। অনৌবা নেসনেল এজুকেসনেল পোলিসী অসিনা মীৎয়েঙ পাক চাউবা, দিসিপ্লিন য়ামবা অমদি পুম্নমক কোনশিল্লবা থৌওং অমদা মীৎয়েঙ চঙলি। প্রোফেসনেল এজুকেসনগী লম্বীদা লৈরিবা উয়ুংশিং লৌথোক্নবা থৌরাং পায়খৎলি। ঐখোয়না মীপুম খুদিংমকপু লৈবাকসিগী চাউখৎপগী লম্বী পরিংদা পুরকপা পাম্মি। মসিমকসু পুম্নমক পুনশিনবগী মওংনি। অদোম্না অদোমগী মীৎয়েং খঙলক্কনি হায়না ঐনা থাজৈ। অদোমগী অমদি আই.আই.এম. সম্বলপুরগী থৌরাংনা মরোমদোম লেপচবা ভারতকী কেম্পেনবু মহৈ য়ালহনগদৌরিবনি। য়াইফ-পাউজেল অসিগা লোয়ননা অদোম পুম্নমকপু থাগৎচরি। খুরুমজরি!
