“গুরবানীদগী ঐখোয়না ফংখিবা লমজিং মৈরা অদু চাউখৎপা ভারত অমগী চৎনবী, থাজবা লোয়ননা মঙলান্নি”
“প্রকাশ পর্ব খুদিংমক্কী মঙলান্না লৈবাকপু লমজিংলি”“গুরু নানক দেবজীগী ৱাখল্লোন্না ইথিল পীদুনা লৈবাক অসিনা ভারত মচা করোর ১৩০গী য়াইফনবগী ৱাখল্লোনগা লোয়ননা মাংদা চংশিল্লি”“আজাদী কা অমৃত কালদা লৈবাক অসিনা জাতিগী মতিক-মঙাল অমসুং স্পিরিচুএল আইদেন্তিতীগীদমক চাউথোকচবগী ৱাখল্লোন নৌহৌনা পোকহনখি”“থৌদাং য়াবগী অথোইবা ৱাখল্লোনবু পুক্নিং থৌগৎনবগীদমক লৈবাক্না তাঙ্কক অসিবু কর্তব্য কাল হায়না পালন তৌনবা ৱারেপ লৌখি”ৱাহেগুরুজীগী খালসা, ৱাহেগুরু জীগী ফতহ, জো বোলে সো নিহাল! সৎ শ্রি অকাল! গুরুপুরবকী শেংলবা কুমহৈ অসিদা মফমসিদা তিনবিরিবা লৈঙাক্কী ঐগী মরূপশিং, শ্রী হরদীপ সিংহ পুরি জী, শ্রী জোন বর্লা জী, নেস্নেল মাইনোরিতী কম্মিসন চেয়রমেন শ্রী লালপুরা জী সিংহ ভাই রঞ্জিৎ সিংহ জী, শ্রী হর্মীৎ সিংহ কল্কা জী, অমদি ইচিল ইনাওশিং!
ঐনা ময়ামগী মফমদা, অমদি লৈবাক মীয়ামগী মফমদা গুরুপুরবকী, প্রকাস পর্বগী য়াইফ-পাউজেল পীজরি। ঙসি অসি লৈবাকসিদা দেব দীপাবলীসু পাঙথোক্লি। মরুওইনা কাসীদা চাউনা থৌরম পাঙথোক্লি, মৈরা লাখ কয়ানা লাইরেম্বী-লাইরেম্বা কয়াবু ওক্লি। ঐনা দেব-দীপাবলীগীসু য়াইফ-পাউজেল পীজরি।
মরূপশিং,
ময়ামসু খঙবিরি মদুদি থৌমী অমা ওইনা ঐনা শাংলবা মতম কয়া পঞ্জাবগী লৈহাউদা লেনখি অমদি মতমদুদা ঐ গুরুপুরবকী থৌরমদা কয়ারক হন্না অমৃৎসরদা হরমিন্দর সাহিবকী মাঙদা কোক নোন্না খুরুমজবগী খুদোংচাবা ফংজখি। হৌজিক লৈঙাক পায়রবা মতুংসিদা গুরুশিংগী অসুম মরু ওইখ্রবা প্রকাস পর্ব ঐখোয়গী লৈঙাক্কী মতমদা লাকপসি ঐগী অমদি ঐখোয়গী লৈঙাক্কী লাইবক ফবনি হায়না খল্লি। ঐখোয় গুরু গোবিন্দ সিংহ জীগী ৩৫০শুবা প্রকাস পর্ব পাঙথোক্নবগী তাঞ্জা ফংখি। ঐখোয় গুরু তেগবহাদুর জীগী ৪০০শুবা প্রকাস পর্ব পাঙথোক্নবগী তাঞ্জাসু ফংখি অদুগা হৌজিক হায়খিবগুম লাল কিলাদা পুৱারী ওইহৌরগদবা অমদি মালেম পুম্বদা পাউজেল পীগদবা থৌরম ওইখি। চহি অহুমগী মমাঙদা ঐখোয়না গুরু নানকদেব জীগী ৫৫০শুবা প্রকাসোত্সবসু মপুং ফানা লৈবাকসিদা অমদি অতোপ্পা লৈবাকশিংদা পাঙথোকখি।
মরূপশিং,
হায়রিবা অখন্নবা তাঞ্জাশিং অসিদা লৈবাকসিনা ঐখোয়গী গুরুশিংদগী ফংখিবা থৌজাল, মখোয়না পুক্নিং থৌগৎপিখিবশিংনা অনৌবা ভারত শেমগৎপগী থৌরাংদা মৈথৌ হাপ্লি। ঙসি ঐখোয়না গুরু নানকদেবজীগী চামঙা য়াঙ্খৈহুমদোইশুবা প্রকাস পর্ব পাঙথোক্লিবা অসিদা হৌখিবা চহিশিংসিদা লৈবাকসিনা গুরুগী থৌজালদগী পুৱারী ওইরগদবা পন্দোল কয়া লোমখিবা ঐখোয়না উরে।
মরূপশিং,
প্রকাস পর্বকী মতাঙদা সিখ চৎনবীদা লৈরিবা ৱাখল্লোন, মসিগী মরুওইবশিং খঙনা, ঙসি লৈবাকসিনা চপ চানা থৌদাং অমদি থৌগলগী চৎনবীদুবু মাঙদা পুখৎলি। প্রকাস পর্ব খুদিংমক্না মঙাল থোকপা লৈবাক অমা ওইহন্নবগী পুক্নিং থৌগৎলি। অসিগুম্লবা মরুওইখ্রবা থৌরমশিংদা হন্না হন্না শরুক য়াবা ফংজবা, থৌগল পাঙথোকচবদা শরুক য়াবা ফংজব ঐগীদমক্তদি লাইবক ফবনি। গুরুগ্রন্থ সাহিববু ইকোকসিনা শোকচবগী নুংঙাইবা ফংজবা, গুর্বানিগী খোয়থুম্নরবা খোঞ্জেল নাকোংদা তাবা ফংজবা, লঙ্গরগী লুক্লেন ফংজবা, পুন্সিদা পেনথোকচবগী নুংঙাইবা ফংজবা, অমদি খুন্নাইগী, লৈবাক্কী থৌগল কত্থোকপগা লোয়ননা তৌনবগী পাঙ্গল মাঙদনা লৈবা ওইহনবিসনু। থৌজাল অসিগীদমক গুরু নানকদেব জী অমদি ঐখোয়গী গুরু অতৈশিংগী খুয়াখাদা কয়ারক হন্নবা ইকোক নোঞ্জরবসু ৱাত্তুনতা লৈরগদবনি।
মরূপশিং,
গুরু নানক জীনা ঐখোয়দা পুন্সি হিংনবগী লম্বী তাকপিরম্মী। মহাক্না হায়বিরম্মী – “নাম জপো, কিরত করো, ৱন্দ ছকো”। ৱাহন্থোক্তি, তাইবং মপুগী মিংখৈ শোল্লু, থৌদাংগী লম্বীদা চত্তুনা হোৎনবা লেপকনু অমদি মশেল য়েন্নদুনা চামিন্নৌ হায়বনি। ৱাহৈ পরেং অমসিদা, নুংগী ওইবা ৱাহন্থোকসু য়াওরি, পানগী পোৎলমশিং মরাং কায়হন্নবগী অমদি খুন্নাইদা নুংশি চান্ননা লৈমিন্ননবগী পাউজেলসু য়াওরি। ঙসি নীংতম্বগী অমৃৎকাল অসিদা লৈবাকসিনা গুরুগী অসগুম্লবা লাইৱা অসি ইন্দুনা ভারত মচা করোর ১৩০গী পুন্সিদা য়াইফবা পুরক্নবগীদমক মাঙদা চঙশিল্লি। নীংতম্বগী অমৃৎকালসিদা লৈবাকসিনা মশাগী নাৎ, লন-থুম অমদি নুংগী ওইবা ৱাখল্লোনগী শক্তমদা চাউথোকচবা পোক্নবগী ইহুল হৌহল্লি। নীংতম্বগী অমৃৎকালসিদা লৈবাকসিনা থৌদাংগী পন্থুং য়ৌনবগীদমক অকক্নবা মতম লেপ্তুনা থবক পায়খৎলি। অদুগা নীংতম্বগী অমৃৎকাল অসিদা লৈবাকসিদা থোং মান্নবা, নুংশি-চান্নবা, খুন্নাই ৱায়েল অমদি অপুনবগী শক্তম পুরক্নবগীদমক ‘সবকা সাথ, সবকা বিকাস, সবকা বিস্বাস অমদি সবকা প্রয়াস’ হায়রিবা লাইৱাসি ইন্দুনা চৎলি। হায়বদি, চহিচা কয়াগী মমাঙদা গুরুৱানীদগী লৈবাকসিনা ফংহৌবা লম্বী পরিং ঙইই ঐখোয়গী চৎনবী অমদি লাইনিং ওইরি অমদি চাওখৎপা ভারতকী মঙলানসু ওইরি।
মরপশিং,
গুরুগ্রন্থ সাহিবকী মওংদা থম্বিরম্লিবা অমৃৎবানী অসিগী মতিং, মাগী মরুওইবা মতম অমদা মালেমগী ঙমখৈনা ফাজিন্দুনা থম্বা ঙমদে। লাংফম্না চাউরিবমখৈ পাম্বৈগী মরুওইবসু হেনগৎলকপা ঐখোয়না উরি। ঙসি মালেম পুম্বদা চরাংনবা, লৈতদবা লৈরিবা অমদি অরুবা তানফম অমদা চৎলিবা অসিদা গুরু সাহিবনা তাকপিরম্বশিং অমদি গুরু নানক দেব জীগী পুন্সিনা লমজিং মৈরাগী মতৌ লৌদুনা লম্বী তাক্লি। গুরু নানক জীগী নুংশিনবগী পাউজেলনা অচৌবা অহোবা কয়াসু শমজিন্নহনবা ঙমগনি, অমদি মসিগী খুদম ভারতকী লৈমায়সিনা পীরি। লোল, লোলথৈ, চীঞ্জাক অমদি পুন্সি মহিং খেন্নবা কয়া লৈজরবসু ঐখোয়না হিন্দুস্তানি ওইনা হিংলি, লৈবাক্কী চাওখৎনবগীদমক ইশাগী হুমাংমল পুথোক্লি। মরম অসিনা ঐখোয়না ঐখোয়গী গুরুশিংনা তাকপিরম্বা ফিদমগী লম্বীদা চৎলিবমখৈ ঐখোয়না খেন্নবা কয়াবু হুন্দোক্লমদুনা ‘এক ভারত, শ্রেস্থ ভারত’কী ৱাখল্লোন কনশিলহনবা ঙমগদৌরিবনি। ঐখোয়না মীওইবগী লীচৎকী মমল হেন্না খঙলিবমখৈ ঐখোয়গী গুরুশিংগী খোঞ্জেলশিং হেন্না মমল লৈরক্কনি অমদি মালেমগী মীপুম খুদিংদা য়ৌহনবা ঙমগদৌরিবনি।
মরূপশিং,
হৌখিবা চহি ৮সিদা গুরু নানক দেব জীগী থৌজালদগী সিখ চৎনবীবু য়োকখৎনবগীদমক লেপ্পা লৈতনা থবক পায়খৎনবা খুদোংচাবা ফংজখি। অদুগা হায়রিবা খুদোংচাবসি লেপ্পা নাইদনা ফংহনবিবা ওইসনু। অদোম খঙবিরমগনি, নুমিৎ খরনিগী মমাঙদা উত্তরাখন্দগী মানা খুঙ্গঙদা চৎখি। খোঙচৎ অদুদা ঐ গোবিন্দঘাত্তগী হেলকুন্দ সাহিব ফাওবগী রোপৱে প্রোজেক্ত উরেপ উয়ুং তম্নবগী খুদোংচাবা ফংখি। মতৌ অসুম্না, দিল্লীদা বন্দে ভারত এক্সপ্রেসসু হৌদোকখি। মসিনা আনন্দপুর সাহিব চৎকদবা লাইনিংবশিংগীদমক অনৌবা মতমগা চুনবা খুদোংচাবা অমা ফংহল্লে। মসিগী মমাঙদা গুরু গোবিন্দ সিংহ জীগা মরী লৈনবা মফমশিংদা রেলগী ফেসিলিতীশিং মতমগা চুনহন্নবা থবক পায়খৎখ্রে। ঐখোয়গী লৈঙাক্না দিল্লী-কতরা-অমৃৎসর এক্সপ্রেসৱে শেমগৎনবগী থবকসু পায়খৎলি। মসিনা দিল্লী অমদি অমৃৎসরগী মরক্তা চত্থোক চৎশিনগী মতম পুং ৩-৪ হন্থহল্লগনি। মসিদা ঐখোয়গী লৈঙাক্না লুপা করোর লিশিং ৩৫ হেন্না থাদগদৌরি। হর্মিন্দর সাহিব খুরুমজবদা হেন্না লায়হন্নবগীদমক্তসু ঐখোয়গী লৈঙাক্না মপুং ফানা হোৎনরি।
অদুগা মরূপশিং,
থবক থৌরমশিং অসি খুদোংচাবা অমদি লমকোয়বশিংখক্তদা মীৎয়েঙ থম্লগা পায়খৎখিবা নত্তে। মসিদা ঐখোয়গী লাইফমশিং, সিখ চৎনবীগী নাৎকী লনশিংগী মরমদা হেন্না পাকথোক চাউথোক্না খঙহন্নবগী পান্দমসু য়াওরি। মসি থৌগল, নুংশিবা, ইশাগী ওইবা অমদি লাইনিংগী ৱাখল্লোন্নি। কতারপুর সাহিব কোরিদোর চহিরা কয়াগী মতুংদা হাংদোরকপা মতমদা ৱাহৈনা ফোঙদোকপদা ঐ খুদোংচাদবা মায়োক্নখি। সিখ চৎনবী, সিখকী নাৎকী লনথুম মপাঙ্গল কনখৎহন্নবা ঐখোয়না হোৎনরি। মতম খরগী মমাঙদা অফঘানিস্তান্দা মতৌ করম্না ফীভম কায়থরকখিবগে হায়বা অদোম নীংথিনা খঙবিরমগনি। মফমদুদগী হিন্দু-সিখ ইমুংশিংবু পুরক্নবগীদমক ঐখোয়না থৌরাং পায়খৎখি। গুরুগ্রন্থ সাহিবকী শক্তমশিংবুসু তেক্ত-কায়দনা পুরকখি। দিসেম্বর ২৬দা গুরুগোবিন্দ সিংহ জীগী সাহিবজেদেশিংগী অথোইবা কত্থোকপগী নীংশিং থৌরমদা ‘বীর বাল দিবস’ পাঙথোকপা হৌনবা লৈবাকসিনা থৌরাং য়াৎলি। লৈবাক্কী মচি মচিদা, ভারতকী ঙসিগী মীরোল, ভারতকী তুংগী মীরোলশিংনা অথোইবা লৈবাক অসিগী চৎনবী করিনো হায়বদু খঙহনগদবনি। ঐখোয়না পোক্লরিবা লৈবাক, ঐখোয়গী ইমা লৈবাক অসিগীদমক সাহিবজাদেশিংনা কত্থোকখিবা, থৌদাং য়াখিবা মালেম পুম্বগী পুৱারীদা তাঙনা থোক্কনি।
মরূপশিং,
শেত্তোক্নবদা ঐখোয়গী পঞ্জাবকী মীওইশিংনা, লৈবাক মীয়াম্না কত্থোকখিবশিংগী নীংশিং খুদম ওইনা লৈবাকসিনা পার্তিসন হোরর মেমোরিএল দেগী থৌরম পাঙথোকপা হৌগদৌরি। শেত্তোক্নখিবদা অৱাবা নংখ্রবা হিন্দু-সিখ ইমুংশিংগীদমক ঐখোয়না সি.এ.এ. কাঙলোন পুরক্তুনা মখোয়দা লৈবাকসিগী মী ওইবগী অয়াবা পীদুনা অনৌবা লম্বী অমা পীননবা থৌরাং পায়খৎলি। অদোমসু উবিরমগনি, গুজরাতনা মীরমদা অৱাবা নংলবা সিখ ইমুংশিংবু লৈবাকসিগী মী ওইবগী মঙম পীদুনা মালেমগী মফম অমা হেক্তদা লৈরিবা সিখশিংবু মতম পুম্নমক্তা ভারত অসি মখোয়গী য়ুম্নি হায়বগী থাজবা পীরি। গুজরাতকী মুখ্য মন্ত্রী ওইনা লৈরিঙৈ গুরুদ্বারা কোত লখপত সাহিব শেমজিন-শাজিনবগী খুদোংচাবা ফংখি।
মরূপশিং,
অসুম্না লেপ্তনা চত্থরিক্লিবা পরিং অসি গুরুনানক দেব জীনা তাকপিরম্বা লম্বীদুগী মপান্ননি। লেপ্তনা চত্থরক্লিবা অসিগী নুংদা গুরু অরজ্নদেব অমসুং গুরু গোবিন্দ সিংহগী লোইনাইদ্রবা কত্থোকপশিংগী লমন তোনশিল্লবনি। মসিবু খোঙথাঙ খুদিং লমন শিংজবা লৈবাকসিগী থৌদাংনি। গুরুশিংগী থৌজালদগী ভারতনা সিখ চৎনবীগী চাউথোকচবা হেনগৎলক্কখিগনি, অমদি চাওখৎপগী লম্বীদা মাঙদা চঙশিনখিগনি হায়না ঐনা থাজৈ। হায়রিবা ৱাখল্লোন অসিগা লোয়ননা ঐনা অমুক্কা হন্না গুরুগী খুয়াখাদা ইকোক নোঞ্জরি। অমুক্ক হন্না ময়াম, লৈবাক মীয়াম পুম্বগী মফমদা গুরু পুরবকী য়াইফ-পাউজেল পীজরি! হন্না হন্না থাগৎচরি!
