প্রধান মন্ত্রী শ্রী নরেন্দ্র মোদীনা রিপব্লিক ওফ রৱান্দা (জুলাই ২৩-২৪), রিপব্লিক ওফ উগান্দা (জুলাই ২৪-২৫) অমসুং রিপব্লিক ওফ সাউথ আফ্রিকা (জুলাই ২৫-২৭)দা চৎকনি। মসি ভারতকী প্রধান মন্ত্রী অমগী অহানবা রৱান্দাগী খোংচৎ ওইরগনি অমদি ঐখোয়গী প্রধান মন্ত্রীগী চহি ২০ মতুংদা চৎপা উগান্দাগী খোংচৎ ওইরগনি। খা আফ্রিকাগী খোংচৎ অসি ব্রিক্স সমিৎকী ৱাফমগা মরি লৈনরি।
রৱান্দা অমসুং উগান্দাদা প্রধান মন্ত্রীগী ওফিসিয়েল ওইবা এঙ্গেজমেন্তা রাষ্ট্রপতিশিংগা নাকল অনিগী ওইবা মীফমশিং, মীহুৎ কাংবুগী থাক্তা ৱারী শানবা অমসুং ললোন ইতিক অমদি ইন্দিয়ন কমুনিতীশিংগা মীফম পাংথোকপা য়াওরি। রৱান্দাদা প্রধান মন্ত্রীনা গেনোসাইদ মেমোরিয়েলদা চৎকনি অমদি রাষ্ট্রপতি পাউল কাগেমনা হৌদোকপা নেস্নেল সোসিয়েল প্রোতেক্সন স্কিম অমা ওইরিবা গিরিনকা (ইমুং অমদা ষণবী অমা)গী থৌরমদা শরুক য়াগনি। উগান্দাদা প্রধান মন্ত্রীনা উগান্দাগী পর্লিয়ামেন্তদা কীনোৎ এদ্রেস অমা পীগনি – উগান্দাগী পর্লিয়ামেন্তা ৱা ঙাংবা ভারতকী অহানবা প্রধান মন্ত্রী ওইরগনি।
খা আফ্রিকাদা, প্রধান মন্ত্রীনা খা আফ্রিকাগী রাষ্ট্রপতিগা লোয়ননা নাকন অনিগী ওইবা মীফম পাংথোক্কনি অমদি ব্রিক্স সমিৎ অমসুং ব্রিক্সকা মরি লৈনবা অতোপ্পা মীফমশিংদা শরুক য়াগনি। ব্রিক্স মীফমশিংগী মথক্তা শরুক য়ারিবা লৈবাকশিংগা লোয়ননা নাকল অনিগী ওইবা মীফমশিং পাংথোক্নবসু থৌরাং তৌরি। খোংচৎ অসিগী মনুংদা দিফেন্স, ত্রেদ, কলচর, এগ্রীকলচর অমসুং দাইরী কোওপরেসনগী লমশিংদা য়ানা ৱারোলশিং খুৎয়েক পীনগনি।
হৌখিবা চহি খরা অসিদা ঐখোয়না আফ্রিকাগী লৈবাকশিংগা তোঙান তোঙানবা লমশিংদা এঙ্গেজ তৌরি অমদি হৌখিবা চহি মরি অসিদা রাষ্ট্রপতি, উপ-রাষ্ট্রপতি অমসুং প্রধান মন্ত্রীগী থাক্তা আফ্রিকাদা মপাল লমগী খোংচৎ ২৩ চৎখ্রে। আফ্রিকা অসি ভারতকী ফোরেন পোলিসীগী মকোক থোংবা প্রায়োরিতী ওইরি। প্রধান মন্ত্রীগী রৱান্দা, উগান্দা অমসুং খা আফ্রিকাগী খোংচৎ অসিনা আফ্রিকান মহাদেশকা লোয়ননা লৈনরিবা ঐখোয়গী মরি অসি হেন্না চেৎশিলহল্লগনি।
