ব্রাজিলগী রিও দে জেনিরোদা নবেম্বর ১৯,২০২৪ দা পাংথোকখিবা জি-২০ মীফমগী নাকলদা ভারতকী প্রধান মন্ত্রী শ্রী নরেন্দ্র মোদী অমসুং অস্ত্রেলিয়াগী প্রধান মন্ত্রী এন্থোনি অলবানিস অনিশুবা ভারত-অস্ত্রেলিয়া চহিগী মীফম পাংথোকখ্রে। প্রধান মন্ত্রী অলবানিসকী ভারত খোঙচৎ মনুংদা নিউ দিল্লিদা মার্চ ১০,২০২৩ দা অহানবা চহিগী মীফম পাংথোকখ্রে।
ইন্দিয়া-অস্ত্রেলিয়া কমপ্রেহেন্সিপ স্ত্রাতেজিক পার্তনরশিপ মপাঙ্গল কনখৎহন্নবা মখোয়না শৌগৎপা প্রধান মন্ত্রীশিংনা অমুক হন্না ফোঙদোকখ্রে। দিফেন্স অমসুং সেকুরিতি, ললোন-ইতিক অমসুং শেন থাদবা, লাইরিক-লাইশু, স্কিল অমসুং মোবিলিতি, রিন্যুএবল ইনর্জি, স্পেস, স্পোর্তস অমসুং মীগা মীগা লৈনবা মরীশিংগী হিরমশিংদা মতেং পাংননবা মখোয়না খন্নখ্রে। থৌরম অসিদা অপুনবা ৱারোল অমা থোকখ্রে। রিন্যুএবল ইনর্জি পার্তনরশিপ হৌদোকপদা প্রধান মন্ত্রীশিংনা তরাম্না ওকখ্রে।
লৈবাক অনিনা নাকল অনিনা দরকার ওইবা লমদম লমদমগী অমসুং মালেমগী থৌদোক-ৱাথোকশিংগী মতাংদা ৱাফম কয়া ফোঙদোক্নখ্রে। মালেমগী আইন ইকায়খুম্নবদা য়ু্ম্ফম ওইদুনা, শান্তি, তুংদু-লৈতাবা অমসুং নুংঙাই-য়াইফবা ইন্দো-পেসিফিক লমদম অমা ওইহন্নবা মখোয়গী থাজবা অমুক হন্না ফোঙদোকখ্রে।
