ঙসি প্রধান মন্ত্রী শ্রী নরেন্দ্র মোদীনা ভিদিও মেসেজগী খুৎথাংদা কৌশল দীক্ষাত সমারোহ ২০২৩দা ৱা ঙাংখ্রে।
থৌরম অদুদা তিনখিবা মীয়ামদা ৱা ঙাংবদা প্রধান মন্ত্রীনা হায়খি খুৎ-শা হৈবা হেনগৎহন্নবা কুহ্মৈ অসিমক অখন্নবা অমনি অমসুং ঙসিগী লৈবাক শীনবা থুংবগী স্কিল দিবলপমেন্ত ইন্সতিতুসনশিংগী অপুনবা কনভোকেসন অমা পাংথোকপা অসি থাগৎনিঙাই ওইবা থবক অমনি। ঙসিগী ভারতকী মরুওইবশিং কৌশল দীক্ষাত সমারোহদা মমি তারে। ঙসিগী থৌরম তেক্নোলোজিগী খুৎথাংদা নহারোল লিশিং কয়া শরুক য়ারি অমসুং নহারোলশিংদা মহাক্কী য়াইফ-পাউজেল পীজরি।
প্রধান মন্ত্রীনা হায়খি লৈবাক অমগী মহৌশাগী লনশিং নত্ত্রগা মিনরেলশিং নত্ত্রগা শাংলবা সমুদ্র মপানশিং য়াওনা লৈবাক অমগী মরুওইবশিং শীজিন্নবদা নহারোলশিংগী শক্তি য়াম্না মরুওই অমসুং নহারোলশিংগী মপাঙ্গলনা লৈবাক্কী লন-থুমশিংদা অচুম্বা থবক পাংথোক্তুনা লৈবাক অমা হেন্না চাউখৎপা ঙমগনি। মমাঙদা অমুক্তা ওইখিদ্রিবা মওংদা ভারতকী নহারোলশিং শক্তি পীনবা থবক পায়খৎলে। হিরম অসিদা লৈবাক অসিনা মাইকৈ অনিদা থবক পায়খৎলে। স্কিল অমসুং ইজুকেসনগী খুৎথাংদা লৈবাক অসিগী নহারোলশিংদা অনৌবা খুদোংচাবশিং পীনবা ভারতনা থৌরাং তৌরি। চহি ৪০গী মতুংদা অনৌবা নেসনেল ইজুকেসন পোলিসি চৎনবা হৌরে।
প্রধান মন্ত্রীনা হায়খি সরকারনা মশিং য়াম্লবা অনৌবা মেদিকেল কলেজশিং অমসুং আই.আই.তিশিং, আই.আই.এমশিং নত্ত্রগা আই.তি.আইশিংগুম্বা স্কিল দিবলপমেন্ত ইন্সতিতুৎশিং লিংখৎলে অমসুং প্রধান মন্ত্রী কৌশল বিকাস য়োজনাগী মখাদা নহারোল করোর কয়া ত্রেনিং পীরে। অতোপ্পা অমদা, হান্নগী হিরমশিংনা থবক পীবগী চাং হেনগৎলে অমসুং থবক পীবা অমসুং ওন্ত্রেপ্রেনিউয়রশিপ য়োকখৎপা অনৌবা হিরমশিংসু পুক্নিং থৌগৎলে। পোৎ-চৈ মপান্দা থাদোকপা, মোবাইল মপান্দা থাদোকপা, ইলেক্ত্রোনিক মপান্দা থাদোকপা, সর্বিস মপান্দা থাদোকপা, দিফেন্স মপান্দা থাদোকপা অমসুং মেনুফেকচরিংদা ভারতনা অনৌবা রেকোর্দশিং থম্লে অমসুং মসিগা লোয়ননা স্পেস, স্তার্দঅপশিং, দ্রোনশিং, এনিমেসন, ইলেক্ত্রোনিক গারিশিং, সেমিকন্দক্তরশিং য়াওনা হিরম কয়াদা নহারোলশিংগী অনৌবা খুদোংচাবশিং পীরে।
প্রধান মন্ত্রীনা হায়খি ঙসিদি, চৎলিবা চহিচা অসি ভারতকী চহিচানি হায়বা মালেম পুম্নমক্না থাজরে। মসিগীদমক ভারতকী নহা ওইরিবা মীওইশিং মহাক্না থাগৎলি। মালেমগী লৈবাক কয়াদা অহল মশিং হেনগৎলক্লিবা মতম অসিদা, ভারতনা নোংম-নোংমগী নহারোল মশিং হেনগৎলক্লি। ভারতনা মসিগী অচৌবা খুদোংচাবা ফংলি। ভারতকী খুৎ-শা হৈরবা নহারোলশিংদা মালেম্না মীৎয়েং চঙলে। গ্লোবেল স্কিল মেপ্পিংগী মতাংদা জি-২০ মীফমদা ভারতনা পুখৎখিবা ৱাফম য়ানরে অমসুং মসিনা তুংগী নহারোলশিংগী হেন্না ফবা খুদোংচাবশিং শেমগৎপদা মতেং পাংগনি। খুদোংচাবা খুদিংমক লেম্না মাঙহল্লোইদবনি অমসুং নহারোলশিংদা খুদোংচাবশিং ফংহন্নবা সরকারনা থৌরাং তৌদুনা লৈরি।
শ্রী মোদীনা হায়খি ঐখোয়গী সরকারনা স্কিলগী মরুওইবা খঙলে অমসুং মসিগী তোখায়বা মিনিস্ত্রি অমা শেম্লে, তোখায়বা বজেৎ লৈরে। ভারতনা হান্নদগী হেন্না লৈবাক অসিগী নহারোলশিংগী স্কিলগী শেন হেন্না থাদরে অমসুং প্রধান মন্ত্রী কৌশল বিকাস য়োজননা নহারোলশিংগী থৌনা হাপ্লে। স্কিম অসিগী মখাদা, হৌজিক ফাওবদা নহারোল করোর ১.৫ ত্রেনিং পীখ্রে। ইন্দস্ত্রিনা মখোয়গী দরকার ওইবশিং শীজিন্নবা ঙম্নবা ইন্দস্ত্রিয়েল ক্লস্তরশিং ময়ামদা অনৌবা স্কিল সেন্তরশিং লিংখৎলে অমসুং মসিনা নহারোলশিং হেন্না ফবা থবক ফংনবা খুদোংচাবশিং পীনবা দরকার লৈবা স্কিলশিং শেমগৎলে।
স্কিল্লিং, অপস্কিল্লিং অমসুং রি-স্কিল্লিংগী মরুওইবশিং পল্লদুনা, প্রধান মন্ত্রীনা হায়খি লেপ্তনা হোঙলক্লিবা থবক্কী মওংশিং অমসুং দরকার ওইবা মতুংইন্না স্কিলশিং হেনগৎহনগদবনি। উদোগ, রিছার্স অমসুং স্কিল দিবলপমেন্ত ইন্সতিতুসনশিংগী মরুওইবা অসি হৌজিক্কী মতমগা চুন্নবা শেমগৎপা অসি য়াম্না মরুওই। হৌখিবা চহি ৯দা লৈবাক অসিদা অনৌবা আই.তি.আই লিশিং ৫ লিংখৎলে অমসুং অনৌবা আই.তি.আই সিত লাখ ৪ হেন্না হাপচিল্লে। মোদেল আই.তি.আইশিং লিংখৎতুনা অৱাংবা থাক্কী মগুন লৈবা ত্রেনিং পীনবা থবক পায়খৎলে।
প্রধান মন্ত্রীনা হায়খি ভারত্তা স্কিল হেনগৎহনবগী চন্নফম লেপ্তনা হেনগৎলক্লি। ঐখোয় শুপ্নগী মেকানিকশিং, ইঞ্জিনিয়ারশিং, তেক্নোলোজি নত্ত্রগা অতোপ্পা থবকশিং খক্তদা লৈগদবা নত্তে। নুপীগী সেল্ফ হেল্প গ্রুপশিং দ্রোন তেক্নোলোজিগী থৌরাং তৌরে। ঐখোয়গী নুমিৎ খুদিংগী পুন্সিদা বিশ্বকর্মাশিং য়াম্না মরুওই। বিশ্বকর্মাশিংনা মখোয়গী মমাঙঙৈগী খুৎ-শা হৈবগী লৌশিং অদুগা অনৌবা তেক্নোলোজি অমসুং খুৎলায়শিংগা শম্নহল্লে।
প্রধান মন্ত্রীনা হায়খি ভারতকী শেন-থুমগী থবকশিং হেনগৎলকপগা লোয়ননা নহারোলশিংগী অনৌবা খুদোংচাবশিং শেমগৎলে। ভারত্তা থবক ফংবগী চাং অনৌবা থাক অমদা য়ৌরে অমসুং চহি ৬ অসিদা ভারত্তা থবক ফংদবগী চাং খ্বাইদগী য়াম্না নেম্লে। ভারতকী সহর অমসুং খুঙ্গংগী মফমশিংদা থবক ফংবদা অঙকপা ফংনা হন্থরক্লে। চাউখৎপগী কান্নবশিং চপ মান্ননা খুঙ্গংশিং অমসুং সহরশিংদা য়ৌরে। ভারতকী শিন্মীশিংদা নু্পী মশিং মমাঙদা অমুক্তা ওইখিদ্রিবা ফিবমদা হেনগৎলে অমসুং হৌখিবা চহি খর অসিদা ভারত্তা হৌদোকখিবা স্কিমশিং অমসুং কেম্পেনশিংনা নুপীশিংদা শক্তি পীবদা কান্নবা ফংলে।
ইন্তরনেসনেল মোনিতরি ফন্দনা হন্দক ফোঙখিবা মশিংগী মতাংদা প্রধান মন্ত্রীনা হায়খি লাক্লিবা চহিশিংদা ভারতনা য়াংনা চাউখৎলক্লিবা মরুওইনা ইকোনোমি ওইনা লেংদনা লৈখিগনি। মালেমগী মকোক থোংবা অচৌবা ইকোনোমি অহুমগী মনুংদা ভারত য়াওহনবা হায়বসি সরকার অসিগী পান্দম্নি অমসুং মথং চহি ৩-৪দা ভারতনা মালেমগী মকোক থোংবা ইকোনোমি অহুমগী মনুং চনবা ঙমগনি হায়না আই.এম.এফনা থাজবা থম্লি। মসিনা লৈবাক অসিদা থবক ফংনবা অমসুং মশানা মশাবু থবক পীজনা অনৌবা খুদোংচাবশিং শেমগনি।
লোইশিল্লকপদা প্রধান মন্ত্রীনা হায়খি হৈথোই-শিংথোইবা মীওইশিং পীনবা মালেমদা ভারতনা খ্বাইদগী চাউবা স্কিল মেনপৱারগী মফম অমা ওইনবা থবক পায়খৎলে। তম্বা, তাকপীবা অমসুং মাঙলোমদা চঙশিনবগী থবক মখা চৎথগনি। অদোমগী পুন্সিগী খোঙথাং খুদিংমক মাইপাকপা ওইরসনু।
