প্রধানমন্ত্রী শ্রী নরেন্দ্র মোদীনা জনুৱারী ৩১, ২০১৮দা নই দিল্লীগী ইন্দিরা গান্ধী স্তেদিয়মদা অহানবা ভারতকী স্কুল গেমগী খেলো ইন্দিগী থৌরম হৌদোক্কনি।
খেলো ইন্দিয়া থৌরম অসিগী পান্দম মখোংদগী হৌনা শান্ন-খোৎনবগী চৎনবী-নাৎ অসি অমুক হন্না হিংগৎহনবনি। মসিগীদমক্তা লৈবাক অসিদা শান্নরিবা মশান্না খুদিংমক্কীদমক্তা অচেৎপা মশক অমা শেমগৎপনি মসিনা ভারত অসি শান্ন-খোৎনবগী লমদা মাংজিল থাবা লৈবাক অমা ওইনা শেমগৎপা ঙমগনি। প্রধানমন্ত্রী নরেন্দ্র মোদীগী মিৎয়েং খেলো ইন্দিয়াদা ৱাখল থম্লদুনা স্কুলগী মশান্নদা নহা ওইরিবা তেলেন্তশিং অদু খঙদোক্কনি অমসুং মখোয়বু তুংলমচৎকী চেম্পিয়ন অমা ওইনা শেমগৎপদা মতেং পাংগনি।
অৱাংবা থাক্কী কমিতী অমনা মতিং লৈরবা শান্নরোইশিংবু শক খঙদোক্কনি অমসুং মখোয়বু চহি নিপাল চুপ্না চহি খুদিংগী লুপা লাখ মঙাগী ওইবা শেলগী তেংবাং পীগনি।
খেলো ইন্দিয়া অসি জনুৱারী ৩১দগী হৌরগা ফেব্রুৱারী ৮ ফাওবা পাংথোক্কনি। চহি ১৭কী মখাদা লৈবা নারোলশিংবু মখাগী মশান্না ১৬তা শান্ননবা কৌখি, মখোয়শিং অদুদি – আর্চরী, এথলেতিক্স, বেদমিন্তল, বাস্কেৎবোল, বোক্সিং, ফুৎবোল, জিমনাস্তিক্স, হোক্কী, জুদো, কবদ্দী, খো-খো, শুতিং, স্বিমিং, বোলীবোল, ৱেৎলিফতিং অমসুং রেস্তলিংনি। থৌরম অসিদা ভারতকী নহারোলশিংগী মতিং উৎথোরক্কনি অমসুং মদুনা মরম ওইদুনা লৈবাক অসিগী শান্ন-খোৎনবগী খৌনা অদুসু মশক খঙবা ঙম্লগনি।
খেলো ইন্দিয়া স্কুল গেম অসিদা সনাগী মেদল ১৯৯, লুপাগী মেদল ১৯৯ অমসুং শেঞ্জেংগী মেদল ২৭৫ পীগনি। চহি ১৭ মখাগী লৈবাক অসিগী খ্বাইদগী মতিং লৈবা শান্নরোইশিংনা গেম অসিদা শরুক য়াগনি।
