২০১৯গী নবেম্বর ১৩-১৪দা ব্রাজিলগী ব্রাসিলিয়াদা পাংথোক্কদবা ১১শুবা ব্রিক্স মীফমদা প্রধান মন্ত্রী নরেন্দ্র মোদী শরুক য়াগনি। চহি অসিগী ব্রিক্স মীফমগী থিমদি “অনৌবা তুংলমচৎ অমগীদমক শেন-থুমগী ফিবম ফগৎহনবা” হায়বনি।
প্রধান মন্ত্রী নরেন্দ্র মোদীনা ব্রিক্স মীফম শরুক য়াবা অসি হন্দক্কী অসিনা তরুকলক শুবনি। অহানবা ব্রিক্স মীফম ২০১৪দা ব্রাজিলগী ফোরতালেজাদা পাংথোকখি।
লৈবাক মঙাগী ললোন-ইতিক্কী মীওইশিং শরুক য়াগদৌরিবা ব্রিক্স বিজিনেস ফোরম শরুক য়ানবা ভারতকী মশিং য়াম্লবা ললোন-ইতিক্কী মীহুৎ কাংবু অমা শরুক য়ারবা য়ারি।
ব্রিক্স বিজিনেস ফোরম লোইশিনবগী থৌরম অমসুং ১১শুবা ব্রিক্স সমিৎকী লোইশিনবা অমসুং প্লেনারি মীফমশিং শরুক য়াবগী মথক্ত প্রধান মন্ত্রীনা রুসিয়াগী প্রসিদেন্ত ব্লাদিমির পুতিন অমসুং চাইনাগী প্রসিদেন্ত সি জিনপিংগা লোয়ন্না নাকল অনিগী ওইবা মীফমশিং পাংথোক্কনি।
লোইশিনবগী মীফমদা, হৌজিক্কী মালেম অসিদা লৈবাক অমনিগী মনিংতম্বা শীজিন্নবদা থেংনরিবা খুদোংচাবশিং অমসুং শিংনবগী মতাংদা খন্নগনি। মসিগী মতুংদা ব্রিক্স প্লেনারি মীফমদা লুচিংবশিংনা ব্রিক্স লৈবাকশিংগী শেন-থুম চাউখৎনবা ব্রিক্স মতেং পাংনবগী মতাংদা খন্নগনি।
তুংদা, ব্রাজিলিয়ন ব্রিক্স বিজিনেস কাউন্সিল অমসুং অনৌবা দিবেলপমেন্ত বেঙ্কগী প্রসিদেন্তনা পাউদমশিং পীগদৌরিবা ব্রিক্স লুচিংবশিংগী ব্রিক্স বিজিনেস কাউন্সিলদা প্রধান মন্ত্রী শরুক য়াগনি।
তুংদা, ললোন-ইতিক চাউখৎহন্নবা লৈরিবা লুপশিংগী মরক্ত ব্রিক্স এম ও য়ু অমা খুৎয়েক পীনগনি।
মীফমগী অরোইবদা লুচিংবশিংনা অপুনবা দিক্লারেসন অমা ফোংগনি।
মালেমগী অপুনবা মশিংগী চাদা ৪২ ওইবা চাউখৎলক্লিবা অচৌবা ইকোনোমি ৫ পুন্দুনা ব্রিক্স শেম্লি, মসিদা মালেমগী জি দি পিগী চাদা ২৩ লৈরি অমসুং মালেমগী ললোন-ইতিক্কী চাদা ১৭ পাংথোক্লি।
ব্রিক্সনা ললোন-ইতিক, ফাইনান্স, হকশেল, এজুকেসন, সাইন্স, তেক্নোলোজী, লৌউ-শিংউ, কম্যুনিকেসন অমসুং আই তিগী লমদা লৈবাকশিংনা পাম্নবা মওংদা মতেং পীনরি।
