এক্সিলেন্সী, রুসকী রাস্ত্রপতি অমসুং ঙসিগী মীফম অসিগী থৌরম মপু,
এক্সিলেন্সীশিং, ঐগী খোংলোই মরুপশিং,
অহানবমক্তদা, এস.সি.ও.বু হৈ-শিংনা লুচিংবীবগীদমক, অমসুং কোবিদ-১৯গী লাইচৎকী শিংনবশিং অমসুং অপনবা কয়া লৈজরবসু মীফম অসি শিনবীবগীদমক, রাস্ত্রপতি পুতিন্দা নুংঙাইবা ফোংদোকচরি। অসিগুম্বা অরুবা ফিভম অসি ওইজরবসু এস.সি.ও.গী মখাদা কোওপরেসন অমসুং ইন্তিগ্রেসনগী পাক চাউরবা অমসুং অহোংবা নাইবা এজেন্দা অসি মাংদা পুখৎপা ঙম্বগীদমক ঐহাক নুংঙাইবা ফাওই।
এক্সিলেন্সীশিং,
এস.সি.ও.দা ভারতকীদমক্তদি মসি মরুওইবা চহি অমনি। ঐখোয়না অহানবা ওইনা সমিৎকী থাক্তা এস.সি.ও. কাউন্সিল ওফ হেদ্স ওফ গোভর্নমেন্তকী মীফম শিল-লাংগদৌরি। মীফম অসিগীদমক্তা পাক-চাউরবা এজেন্দা অমা শেম শারে, মসিদা শেন্মিৎলোনগী তেংবাং পীনবগী ৱাফমদা অখন্নবা মিৎয়েং থমগনি। ঐখোয়না স্তার্তঅপ ইকোসিস্তেমদা ঐখোয়গী খঙলু উরুবা পুম্নমক অদু ফোংদোক্নবগীদমক্তা ইনোবেসন অমসুং স্তার্তঅপশিংদা স্পিসিএল ৱর্কিং গ্রুপ লিংখৎনবা ৱাফম পুখৎলি। ঐখোয়না ত্রেদিস্নেল মেদিসিনদা ৱর্কিং গ্রুপকীসু ৱাফম পুখৎখি, মরমদি এ.সি.ও.গী লৈবাকশিংদা থাইনদগী চৎনরক্লবা অমসুং থাইনগী অনা-লায়েংগী লৌশিং অমসুং মতম অসিগী অনা-লায়েংদা ওইরক্লিবা শাহৌ অসি অমনা অমগী মতেং ওইনবা য়ানবনি।
এক্সিলেন্সীশিং,
ভারতনা চেৎনা থাজবদি ইকোনোমিক মল্তিলেতরেলিজম অমসুং নেস্নেল কেপাসিতী বিল্দিংগী কম্বাইনেসন্দগী এস.সি.ও. লৈবাকশিংনা লাইচৎ অসিদগী ওইহল্লকপা শেন্মিৎলোনগী অমাং অতা মেনখৎপা ঙমগনি। ঐখোয় লাইচৎ মতুংগী মালেমদা “আত্মনির্ভর ভারত”কী মিৎয়েংগা লোইননা মাংদা চখৎলি। ঐনা থাজৈ মদুদি “আত্মনির্ভর ভারত” অসি মালেমগী শেন্মিৎলোনগীদমক্তা ফোর্স মল্তিপ্লেয়র অমা ওইবা ঙমগনি অমসুং এস.সি.ও. লমদমগী শেন্মিৎলোনগী শাহৌদা খোংজেল পীগনি।
এক্সিলেন্সীশিং,
এস.সি.ও.গী লমদমগা ভারতকা অচেৎপা নাৎকী অমদি পুৱারীগী মরী লৈনরক্লি। ঐখোয়গী ইপা-ইপুশিংনা মসিগী শরুক য়ামিন্নরিবা নাৎকী অমদি পুৱারীগী লন অসিবু মখোয়গী চোকথবা লৈতবা অমদি লেপ্তনা লোইনরকপনা হিংহন্দুনা থম্লি। ইন্তর্নেস্নেল নোর্থ সাউথ ত্রান্সপোর্ত কোর্রিদোর, চাবহার পোর্ত, আশগাবাৎকী য়ান-ৱারোল, অসিগুম্বা কনেক্তিবিতীগী মায়কৈদা ভারতকী খোংথাং অসিনা অচেৎপা ৱাশক অদু ফোংদোক্লি। ভারতনা থাজৈ মদুদি কনেক্তিবিতী অসি অমুক্কা হেন্না চেৎশিন্নবগীদমক্তা অমনা অমগী মনীং তম্বা, অমসুং তেরিতোরিয়েল ইন্তিগ্রিতীগী ইকাই খুম্নবগী মরু ওইবা ৱাখল্লোনশিং অদুগা লোইননা মাংদা চখৎপা অসি মথৌ তাই।
এক্সিলেন্সীশিং,
য়ুনাইতেদ নেসন চহি ৭৫ মপুং ফাখ্রে। অদুবু মায় পাকপা কয়াগী মতুংদসু য়ুনাইতেদ নেসনগী মপুং ওইবা পান্দম অদুদি হৌজিক মপুং ফাদ্রি। লাইচৎকী শেন্মিৎলোন অমসুং খুন্নাইগী অৱাবা খাংলিবা মালেম্না থাজরি মদুদি য়ু.এন.গী থৌরাংদা মশক থোকপা অহোংবা পুরক্কনি।
ঐখোয়গী অসিদা শাস্ত্রশিংদা হায়রি, “পরিবর্তনমেব স্থিরমস্তি” – অহোংবা অসিতনা অমত্তা ঙাইরবা অরেপ্পনি। ভারত, ২০২১দগী য়ু.এন. সেক্যুরিতী কাউন্সিলদা নন-পর্মানেন্ত মেম্বর অমা ওইনা শরুক য়ারগনি। ঐখোয়গী ৱাখল অসি মালেমগী লৈঙাক-শাসন্দা ওইথোকপা য়াবা অহোংবা পুরকপদা থমগনি।
ঙসিগী মালেমগী অচুম্বশিং অসিবু উৎলিবা ‘রিফোর্ম মল্তিলেতরেলিজম’ অমা, স্তেকহোল্দর পুম্নমক্কী অনীংবা অপাম্বা, মতম অসিগী শিংনবশিং, অমসুং মীওইবা খুন্নাইগী য়াইফনবা অসিনচিংবা হিরমশিংদা ৱারী শাগনি। হোৎনবা অসিদা ঐখোয়না এস.সি.ও.গী মেম্বর লৈবাকশিংদগী মপুং ফানা মতেং ফংগনি হায়না থাজবা থম্লি।
এক্সিলেন্সীশিং,
সর্বে ভবন্তু সুখিনঃ, সর্বে সন্তু নিরাময়াঃ ।
পুম্নমক্না নুংঙাইনা অমসুং পুম্নমক্না অনা অয়েক য়াওদনা লৈবীয়ু। মসিগী শান্তি মন্ত্র অসি ভারতকী মীপুম খুদিংমক্কী য়াইফনবগী মায়কৈদা থাজনবা খুদম অমনি। অমুক্তা ওইখিদ্রিবা মসিগী য়াম্না লুবা মতম অসিদা ভারতকী ফার্মা ইন্দস্ত্রীনা লৈবাক ১৫০দগী হেনবদা মথৌ তাবা হিদাকশিং থাখি। মালেমগী খ্বাইদগী য়াম্না ভেক্সিন পুথোকপা লৈবাক অমা ওইনা ভারতনা মসিগী ভেক্সিনগী পোৎথোক অমসুং য়েন্থোকপগী পাঙ্গল অসি চিরবা তাঞ্জা অসিগা মায়োক্নবদা মীওইবা খুন্নাই খুদিংমক্কী মতেং পাংনবগীদমক শিজিন্নগনি।
এক্সিলেন্সীশিং,
ভারতকী শান্তি, ঙাক-শেল অমসুং চাউখৎপা অসিদা মপুং ফানা থাজৈ। অমসুং ঐখোয়না মতম পুম্নমক্তা তেরোরিজম, আইন্না য়াদনা খুৎলাই ললোনবা, দ্রগ অমসুং মনী লোন্দরিংগী মায়োক্তা লাওরি। ভারত এস.সি.ও. চার্তরদা অরেপ্পা পান্দমগী মতুং ইন্না এস.সি.ও.গী মখাদা থবক তৌনবগীদমক ফোংদোকখিবা ৱাফমদা লেংদনা লৈরি।
অদুবু, মসি লাইবক থিবনি মদুদি এস.সি.ও. এজেন্দাদা হান্না হন্না মথৌ তাদবা মওংদা এস.সি.ও. চার্তর অমসুং শংঘাই স্পিরিৎকী মায়োক্তা লৈবা নাকল অনিগী ওইবা ৱাফম পুশিল্লক্নবা হোৎনরি। অসিগুম্বা মখলগী হোৎনবা অসি এস.সি.ও.বু ৱাহন্থোক পীরিবা অমত্তা ওইনা য়ানবা অমদি তেংবাং পীনবগী ৱাখল্লোনগী ওন্ন-তৈনবনি।
এক্সিলেন্সীশিং,
ঐনা কুমজা ২০২১দা এস.সি.ও.গী ২০শুবা চহিগী থৌরমদা “এস.সি.ও. নাৎকী চহি” ওইনা পাংথোক্নবা মপুং ফানা শৌগৎচরি। ভারতকী নেস্নেল ম্যুজিয়ম অসি চহি অসিদা ঐখোয়গী শরুক য়ামিন্নরিবা বুদ্ধগী লন-থুমদা অহানবা এস.সি.ও. এগজিবিসন পাংথোক্নবা শেম-শাদুনা লৈরে। ভারতকী সাহিত্য একাদমীনা রুসী অমসুং চাইনীজ লোন্দা ভারতকী সাহিত্যগী লাইরিক তরা হন্দোকপগী থবক লোইরে।
অমসুং ঐনা থাজৈ মদুদি মথংগী চহিদা ভারত লাইচৎ-য়াওদ্রবা ফিভমদা এস.সি.ও. ফুদ ফেস্তিবেলগী য়ুম্বু ওইগনি। এস.সি.ও. লৈবাক অপুনবগী ওফিসিএলশিং অমসুং দিপ্লোমেৎশিংনা হন্দক্তা বৈজিংদা এস.সি.ও. সেক্রেতরিয়েৎকী মতেংদগী পাংথোকখিবা য়োগগী থৌরমদা অদুক্কী মতিক শরুক য়াখিবা অদু ঐনা অপেনবা ফাওই।
এক্সিলেন্সীশিং,
ঐনা অমুক্কা হন্না রাস্ত্রপতি পুতিনবু মহাক্কী হৈ-শিংনা অমসুং মায় পাক্না লুচিংবীবগীদমক নুংঙাইবা ফোংদোকচরি। অমসুং মীফম অসিগীদমক্তা মহাকপু থাগৎপা ফোংদোকচরি। ঐনা রাস্ত্রপতি ইমোমলী রহমোনবু মথংগী চহিগীদমক্তা এস.সি.ও. শিনবীনবগীদমক নুংঙাইবা অমদি য়াইফ-মঙ্গল পীজরি।
অমসুং তাজিকিস্তান্না মায় পাক্না শিনবীনবগীদমক ভারতনা মপুং ফানা শৌগৎকনি হায়বগী থাজবা পীজরি।
হন্না হন্না থাগৎচরি।
