প্রধান মন্ত্রী শ্রী নরেন্দ্র মোদীনা ঙসি জপানগী প্রধান মন্ত্রী ফুমিও কিসিদাগা লোয়ন্না লৈবাক অনিগী ওইবা মীফম অমা পাংথোকখ্রে। প্রধান মন্ত্রী কিসিদানা প্রধান মন্ত্রী মোদীগা লোয়ন্না চাক্লেন অমশু চামিন্নখি। লৈবাক অনিগী অমসুং মালেমগী ওইবা ৱাফমশিং য়াওনা তোঙান-তোঙানবা হিরমশিংদা লৈবাক অনিগী লৈনরিবা মরীশিং ফগৎহন্নবগী মতাংদা লুচিংবশিংনা কান্নবা ৱাফম কয়া খন্নখি।
দিফেন্স মেনুফেকচরিং য়াওনা লৈবাক অনিগী মরক্তা লৈনরিবা সেকুরিতি অমসুং ঙাক-শেনগী মতেং পাংনবা অসি মখা তানা ফগৎহনবা হায়না লুচিংবা অনিনা য়ানখি। মথংগী ফোরেন অমসুং দিফেন্স মিনিস্তরশিংগী ২+২ মীফম অথুবা মতমদা জপান্দা পাংথোকপা হায়না মখোয়না য়ানখি।
লৈবাক অনিগী মরক্তা লৈনরিবা শেন-থুমগী মরী ফগৎলকপদা লুচিংবা অনিনা থাগৎখি। সরকার অমসুং লনাইনা শেন থাদবদা য়েন ত্রিল্লিয়ন ৫ য়ৌহন্নবা অমসুং মথং চহি ৫দা জপানদগী ভারত্তা শেন থাদনবা লৌখিবা মখোয়গী ৱারেপশিং থবক ওইনা পাংথোক্নবা নাকল অনিমক্না পুন্না থবক তৌমিন্নবা হায়না মখোয়না য়ানখি। লাইনা ললোন-ইতিক্কী থবক পাংথোকপা হেনগৎহন্নবা অমসুং গাতি শক্তি থৌরাংগী মখাদা লোজিস্তিক্কী থবকশিং ফগৎনবা ভারত সরকারনা পায়খৎলিবা থবকশিং প্রধান মন্ত্রীনা পাউদমখি অমসুং জপানগী কম্পেনিশিংনা ভারত্তা শেন হেন্না থাদরক্নবা মতেং পাংনবা প্রধান মন্ত্রী কিসিদাদা তকশিনখি। অসিগুম্বা শেন থাদবা অসিনা মপুংফানা পোৎ-চৈশিং ফংহনবদা মতেং পাংগনি অমসুং নাকল অনিমক কান্নবা ফংগনি। হিরম অসিগী মতাংদা, মখোয়না ভারত্তা শেন থাদবা হেনগৎলকপগীদমক প্রধান মন্ত্রী মোদীনা জপানগী কম্পেনিশিং থাগৎখি অমসুং তোঙান-তোঙানবা পি.এল.আই স্কিমশিংগী মখাদা জপানগী কম্পেনি ২৪ মাইপাক্না শরুক য়ারে।
