প্রধান মন্ত্রী শ্রী নরেন্দ্র মোদীনা ভিদিও মেসেজগী খুত্থাংদা ঙসি অমেথি সন্সদ খেল প্রতিয়োগীতা 2023গী লোইশিনবগী থৌরমদা ৱা ঙাংখ্রে।
তিল্লিবা মীয়ামদা ৱা ঙাংলদুনা প্রধান মন্ত্রী নরেন্দ্র মোদীনা হায় অমেথি সন্সদ খেল প্রতিয়োগীতা 2023দা শরুক য়ারিবশিংগা ৱারী শাবা ফংবা অসিদা অখন্নবা ইহুল অমা ফাওই। এসিয়ন গেম্সতা ভারতকী শান্নরোইশিংনা মেদল চামগী মথক্তা লৌরকখিবা অসিনা মরম ওইরগা থা অসি স্পোর্তকী ওইনা অফবা থানি হায়না পল্লদুনা প্রধান মন্ত্রীনা হায়, অমেথিদগী শান্নরোই কয়ামরুম্না মসিগী থৌরমশিং অসিগী চৈরক্তা অমেথি সন্সদ খেল প্রতিয়োগীতাদা শরুক য়াদুনা মখোয়গী শান্ন-খোৎনবগী লমদা হৈথোই শিংথোইবা অদু উৎথোকখ্রে। মহাক্না হায় মসিগী কম্পিতিসন অসিদগী এথলিৎশিংনা ফংবা অনৌবা শক্তি অমসুং থাজবা অসি উবা ফংই অমসুং অফবা ফলশিং পুরক্নবা মসিগী ইনোৎ অসি মথৌ হাপ্পা অমসুং শেমগৎপা মতম ওইরে। “অদোম্না হৌখিবা নুমিৎ 25 অসিগী মনুংদা ফংখিবা এক্সপরিএন্স অসি নখোয়গী স্পোর্তিং কেরিয়রগী য়াম্না মরুওইবা লন অমনি” হায়না প্রধান মন্ত্রীনা ফোঙদোকখি। ওজা, কোচ, স্কুল নত্রগা কোলেজগী মীহুৎশিং ওইনা থৌদাং লৌরদুনা মসিগী অচৌবা কেম্পেন অসিদা শরুক য়াদুনা নহা ওইরিবা শান্নরোইশিং অসিবু মতেং পাংখিবা অমসুং পুক্নীং থৌগৎখিবা মীপুম খুদিংমকপু মহাক্না থাগৎপা ফোঙদোকখি। শান্নরোই লাখ অমা হেন্না তিনখিবা অসি য়াম্না চাউনা মাইপাকপা অমনি অমসুং মসিগী থৌরম অসিবু চাউনা মাইপাকপা পুরকপদা অচৌবা থৌদাং লৌখিবা অমেথিগী এম.পি. স্মৃতি ইরানিবু থাগৎপা ফোঙদোকচরি হায়না মহাক্না ফোঙদোকখি।
“স্পোর্ত অমসুং শান্নরোইশিংবু মখোঙ শোম্বীনবা খুদোংচাবা ফংহন্নবা খুনাই অমা হেক্তদা চাউখৎ থৌরাং পুরকপা হায়বসি য়াম্না মরুওইবা অমনি” হায়না প্রধান মন্ত্রীনা ফোঙদোকখি। নহাশিংদা পর্সনেলিতী দিভেলপ তৌবগী থৌওং অসি স্পোর্তকী খুত্থাংদা মহৌশনা পাংথোকই মরমদি মখোয়না পান্দমশিং ফংনবা কন্না হোৎনৈ, মাইথিরবসু অমুক হন্না হোৎনৈ অমসুং তীমদা শরুক য়াদুনা মাংলোমদা চংশিল্লি হায়না মহাক্না ফোঙদোকখি। শ্রী মোদীনা হায়, হৌজিক পাল্লিবা সরকার অসিগী এম.পি. চা কয়ানা মখোয়গী মরী লৈনবা কন্সতিত্যুন্সীশিংদা স্পোর্ত কম্পিতিসনশিং শিন্দুনা খুনাইগী চাউখৎ থৌরাংগী অনৌবা লম্বেল অমা শেম্লি অমসুং লাক্কদৌরিবা চহিশিংদা মসিগী ফলশিং অসি ময়েক লানা উবা ফংলগনি। লাক্কদৌরিবা চহিশিংদা নেস্নেল অমসুং ইন্তরনেস্নেলগী থাক্তা অমেথিদগী হৌরকপা নহা ওইরিবা শান্নরোইশিংনা শোইদনা মেদল লৌবা ঙম্লগনি অমসুং মসিগুম্বা কম্পিতিসনশিং অসিগী ফংলকপা এক্সপরিএন্স অদু য়াম্না কান্নবা ওইগনি হায়না প্রধান মন্ত্রীনা ফোঙদোকখি।
প্রধান মন্ত্রী মোদীনা হায়, “শান্নরোইশিংনা ফিল্দ চংবা মতমদা মখোয় মশামক অমসুং তীমগী মাইপাকপা পুরকপা হায়বা মখোয়গী পান্দম অমখক্তমক লৈ। লৈবাক্না মাংদা থমদুনা লৈবাক পুম্বনা ঙসিগী শান্নরোইশিং অসিগুম্না ৱাখল খল্লি হায়না মহাক্না ফোঙদোকখি। শান্নরোইশিংগী মতাংদা পল্লদুনা শ্রী মোদীনা হায়, মখোয়না থৱাই খুবাক্তা হাপ্তুনা লৈবাক অসিগীদমক শান্নরি অমসুং মতম অসিমক্তদা লৈবাক অসিনসু অচৌবা পান্দম অমগী মাইকৈদা চংশিল্লি। লৈবাক অসিগী জিলা খুদিংমক্কী নাগরিক খুদিংমক্না ভারত অসি চাউখৎপা লৈবাক অমা ওইহন্নবা থৌদাং অমমম লৌগদবনি। প্রধান মন্ত্রীনা হায় মসিগীদমক সেক্তর খুদিংমক্না ৱাখল্লোন অমা, পান্দম অমা অমসুং ৱারেপ অমগা লোয়ননা মাংলোমদা চংশিনগদবনি। মহাক্না নহারোলশিংগী TOPS অমসুং খেলো ইন্দিয়া গেম্সকুম্বা স্কিমশিংগী মতাংদা মহাক্না পনখি। TOPS স্কিম অসিগী মখাদা শান্নরোই চা কয়াদা লৈবাক অসিগী অমসুং মপানগী কোচশিংদা ত্রেনিং পীখ্রে অমসুং লুপা করোর কয়াগী শেলগী তেংবাং ফংহনখ্রে হায়না মহাক্না ফোঙদোকখি। খেলো ইন্দিয়া গেম্সকী মখাদা শান্নরোই লিশিং 3গী মথক্তা থাগী লুপা 50,000গী শেলগী তেংবাং ফংহল্লি অমসুং মসিনা মখোয়না ত্রেনিং, কোচিং, কিত, মথৌতাবা ইক্বিপমেন্ত অমসুং অতোপ্পা চাদিং তৌবদা মতেং পাংলি হায়নসু মহাক্না ফোঙদোকখি।
প্রধান মন্ত্রীনা হায়, ঙসিগী অওংবা ভারত অসিদা অপীকপা সহরশিংদগী লাকপা তেলেন্তশিংনা মনিং তম্না মাংলোমদা চংশিন্নবা খুদোংচাবা অমা ফংবা ঙমখ্রে অমসুং ভারতপু স্তার্ত-অপ হব অমা ওইহনবদা অপীকপা সহরশিং অসিনা তম্লিবা শরুক অদুগী মতাংদসু পনখি। ঙসিগী মালেম অসিদা মমিং লৈরিবা শান্নরোই কয়ামরুম্না অপীকপা সহরশিংদগী হৌরকখিবগী মতাংদা পল্লদুনা নহারোলশিংনা মাংলোমদা চংশিনবা য়াবগী অমসুং মখোয়গী হৈথোই শিংথোইবা উৎপগী খুদোংচাবা অমা পীরিবা সরকার অসিগী ত্রান্সপরেন্ত এপ্রোচ অসিবু থাগৎপা ফোঙদোকখি। মহাক্না এসিয়ন গেম্সকী মেদল লৌরকখিবা এথলিৎ অয়াম্বনা অপীকপা সহরশিংদগী হৌরকখিবা অসিবু খুদম ওইনা পনখি। সরকারনা মখোয়গী তেলেন্তবু ইকাই খুম্নবা উৎপা অমসুং পীবা য়াবা খুদোংচাবা খুদিংমক ফংহনখিবা অদুগী মহৈ অদু ঙসি উবা ফংলে হায়না প্রধান মন্ত্রীনা ফোঙদোকখি। উত্তর প্রদেশকী অনু রানি, পারুল চৌধরী অমসুং সুধা সিংহগী পর্ফোমেন্সকী মতাংদা পল্লদুনা “মসিগী এথলিৎশিং অসিনা মহৈ অসি ফংহনবা ঙম্বনি” প্রধান মন্ত্রীনা ফোঙদোকখি। সন্সদ খেল প্রতিয়োগীতা অসি মসিগুম্বা তেলেন্ত লৈরবা শান্নরোইশিং অসি পুথোক্নবা অমসুং লৈবাক অসিগীদমক মখোয়গী স্কিলশিং হেনগৎহনবা অচৌবা মেদিয়ম অমনি হায়না প্রধান মন্ত্রীনা ফোঙদোকখি।
ৱারোল অসিবু লোইশিল্লদুনা প্রধান মন্ত্রীনা হায়না এথলিৎশিং অসিগী কন্না হোৎনজবগী মহৈশিং অসি লাক্কদৌরিবা চহিশিংদা উবা ফংলগনি অমসুং এথলিৎ কয়ামরুম্না লৈবাক অমসুং মচু অহুমগী ফিরাল অসিগী মিংচৎ পুরকপা ঙম্লগনি হায়না থাজবা ফোঙদোকখি।
