ঙসি প্রধান মন্ত্রী শ্রী নরেন্দ্র মোদীনা শিঙ্গাপুরগী প্রধান মন্ত্রী লাউরেন্স ৱোংগা উনখ্রে। প্রধান মন্ত্রী ৱোংনা পর্লিয়ামেন্ত হাওসতা প্রধান মন্ত্রী মোদী চৎনবী মতুংইন্না তরাম্না ওকখি।
মখোয়না ৱারি শান্নবদা, ভারত-শিঙ্গাপুর লৈবাক অনিগী মরীশিং খুমাঙ চাউশিনবগী মতাংদা হন্না য়েংশিনখি। লৈবাক অনিগী তোঙান-তোঙানবা মরীশিং অমসুং খুদোংচাবশিং য়েংদুনা, মরী অসি কমপ্রেহেন্সিপ স্ত্রাতেজিক পার্তনরশিপ অমগী থাক্তা পুখৎনবা মখোয়না ৱারেপ লৌখ্রে। মসিনা ভারতকী এক্ত ইস্ত পোলিসিদা অচৌবা ইনোৎ অমা পীরগনি। শেন-থুমগী মরীশিং ফগৎলক্লিবা অসিগী ফিবম য়েংশিল্লদুনা, লৈবাক অনিগী মরক্তা মখা তানা ললোন-ইতিক অমসুং শেন থাদবা হেনগৎহন্নবা লুচিংবশিংনা তকশিনখি। শিঙ্গাপুরনা ভারত্তা য়ু.এস দোল্লর বিল্লিয়ন ১৬০ রোম থাদদুনা শেন-থুমগী ওইনা ভারতকী মাংজিল থাবা মরুপ অমা ওইরি হায়না প্রধান মন্ত্রী মোদীনা ফোঙদোকখি।
মহাক্না হায়খি ভারত্তা য়াংনা চাউখৎলকপা অসিনা শিঙ্গাপুরগী কেম্পেনিশিংনা শেন থাদরক্নবগী খুদোংচাবা কয়া মরাং কাইনা লৈরে। ঙাক-শেন অমসুং সেকুরিতি, মেতিতাইম, লাইরিক-লাইশু, এ.আই, ফিনতেক, অনৌবা তেক্নোলোজিশিং, সাইন্স অমসুং তেক্নোলোজি অমসুং লৌশিং পীথোক-পীশিনগী লমদা হৌজিক লৈনরিবা মরীশিংগী ফিবম মখোয়না হন্না য়েংশিনখি। শেন-থুম অমসুং মীগা-মীগা লৈনবা মরীশিং ফগৎহন্নবা লৈবাক অনিগী মরক্তা চৎথোক-চৎশিন হেনগৎহন্নবশু লুচিংবশিংনা খন্নখ্রে। গ্রিন কোরিদোর প্রোজেকশিং য়াংনা লোইশিন্নবশু মখোয়না খন্নখ্রে।
ওগস্ত ২০২৪ দা শিঙ্গাপুরদা পাংথোকখিবা ২শুবা ইন্দিয়া-শিঙ্গাপুর মিনিস্তরিয়েল রাউন্দতেবলদা খন্নখিবা ৱাফমশিং লুচিংবা অনিনা খন্নখি। মিনিস্তরিয়েল রাউন্দতেবল অদু অখন্নবা থৌরাং অমনি অমসুং লৈবাক অনিগী মরক্তা মতেং পাংন্নবা অনৌবা হিরমশিং মশক খঙদোক্নবা অমসুং থবক ওইনা পায়খৎনবা লৈবাক অনিমক্কী সেনিয়ার মিনিস্তরশিংনা পায়খৎখিবা থবক অদু লুচিংবা অনিনা থাগৎপা ফোঙদোকখি। এদভান্স মেনুফেকচরিং, কন্নেক্তিবিতি, দিজিতেলাইজেসন, অনা-লায়য়েং অমসুং মেদিসিন, স্কিল হেনগৎহনবা অমসুং স্তেনেবিলিতিগী লমদা মতেং পাংন্নবা মিনিস্তরিয়েল রাউন্দতেবলদা মশক খঙদোকখিবা অদু য়াংনা থবক ওইনা পায়খৎনবা লুচিংবা অনিনা তকশিনখ্রে। সেমিকন্দক্তরশিং অমসুং মরুওইবা অমসুং নৌনা থোক্লকপা তেক্নোলোজিশিংগী লমদা লৈবাক অনি মতেং পাংন্নবা অনৌবা পন্দুব অমা হাংদোকপা অসিনা ঐখোয়গী মরীশিং তুংকোইনা চৎনগনি হায়না লুচিংবশিংনা ফোঙদোকখি।
২০২৫ দা লৈবাক অনি মরী লৈনরকপগী চহি ৬০ মপুংফারকপগী থৌরম পাংথোক্নবগী মতাংদশু লুচিংবশিংনা খন্নখ্রে। লৈবাক অনিগী মরক্তা লৈনরিবা নাতকী মরীশিং অসি হায়রিবা মরীশিং অসিগী মরুওইবা মচাক অমনি হায়না ফোঙদোক্লদুনা, শিঙ্গাপুরদা ভারতকী অহানবা তিরুবাল্লপুর কলচরেল সেন্তর হাংদোক্লগনি হায়না প্রধান মন্ত্রী মোদীনা লাউথোকখি। ভারত-অসিয়ানগী মরীশিং অমসুং ইন্দো-পেসিফিক লমদমদা ভারতকী পান্দম য়াওনা লৈবাক অনিনা দরকার ওইবা লমদম-লমদম অমসুং মালেমগী মরুওইবা ৱাফমশিং লুচিংবশিংনা খন্নখ্রে।
সেমিকন্দক্তরশিং, দিজিতেল তেক্নোলোজিশিং, স্কিল দিবলপমেন্ত অমসুং অনা-লায়য়েংগী লমদা মতেং পীন্নবা এম.ও.য়ুশিং খুৎশীন্নবা থৌরমদা লুচিংবা অনিমক শরুক য়াখি। মসি হৌজিক ফাওবদা পাংথোকখিবা ভারত-শিঙ্গাপুর মিনিস্তরিয়েল রাউন্দতেবল অনিগী মনুংদা লৌখিবা ৱারেপশিংগী ফলশিংনি। প্রধান মন্ত্রী ৱোং ভারত্তা লাক্নবা প্রধান মন্ত্রী মোদীনা চেবাউ পীখি অমসুং মহাক্না মদু য়াখ্রে।
