প্রধান মন্ত্রী শ্রী নরেন্দ্র মোদী দিশেম্বর ৩০,২০২৩দা উত্তর প্রদেসকী অযোধ্যাদা চৎকনি।
অয়ুক পুং ১১:১৫ রোম তাবদা, প্রধান মন্ত্রীন অমুক হন্না শেমগৎলবা অযোধ্যা রেলৱে স্তেসন শঙ্গাগনি অমসুং অনৌবা অমৃত ভারত ত্রেনশিং অমসুং বন্দে ভারত ত্রেনশিং লমথাগনি। মহাক্না তোঙান-তোঙানবা অতোপ্পা রেলৱে প্রোজেকশিং মীয়ামদা কৎথোক্কনি। নুমিৎয়ুংবা মতুং পুং ১২:১৫ রোম তাবদা, প্রধান মন্ত্রীনা নৌনা শাবা অযোধ্যা এয়রপোর্ত শঙ্গাগনি। নুংথিল পুং ১ রোম তাবদা, প্রধান মন্ত্রীনা মীয়ামগী থৌরম অমা শরুক য়াগনি অমসুং মহাক্না রাজ্য অসিদা লুপা করোর ১৫,৭০০ হেনবগী তোঙান-তোঙানবা চাউখৎ-থৌরাংগী প্রোজেকশিং শঙ্গাগনি, মীয়ামদা কৎথোক্কনি অমসুং উরেপ-উয়ুং তমগনি। হায়রিবা প্রোজেকশিং অদুগী মনুংদা, অযোধ্যা অমসুং মসিগী অকোয়বা লমশিং শেমগৎনবা লুপা করোর ১১,১০০ রোমগী প্রোজেকশিং অমসুং উত্তর প্রদেস শীনবা থুংনা পায়খৎকদবা লুপা করোর ৪৬০০ রোমগী অতোপ্পা প্রোজেকশিং য়াওরি।
প্রধান মন্ত্রীগী মঙলান্দি অযোধ্যাদা মালেম থাক্কী ইনফ্রাস্ত্রকচরশিং শেমগৎপা, লম্বী-থোং ফগৎহনবা অমসুং সহর অসিগী মীয়ামগী খুদোংচাবশিং অমুক হন্না ফগৎহনবগা লোয়ননা সহর অসিগী ইনাকখুল্লবা পুৱারি অমসুং হেরিতেচ য়োকখৎপনি। মঙলান অসি থবক ওইনা পাংথোক্নবা, সহর অসিদা অনৌবা এয়রপোর্ত অমা, নৌনা শেমগৎলবা রেলৱে স্তেসন, অনৌবা সহরগী লম্বীশিং অমসুং সিবিক ইনফ্রাস্ত্রকচরশিং শঙ্গাগনি। মখা তানা অযোধ্যা অমসুং মসিগী অকোয়বা ফজনবা অমসুং মীয়ামগী খুদোংচাবশিং অমুক হন্না ফগৎহন্নবা অনৌবা প্রোজেক খর উরেপ-উয়ুং তমগনি।
অযোধ্যা এয়রপোর্ত
অৱাংবা থাক্কী এয়রপোর্ত অসিগী ফেজ-১ অসি লুপা করোর ১৪৫০ হেনবগী শেনফম চঙনা শেমগৎপনি। এয়রপোর্ত অসিগী তর্মিনেল বিল্দিং অসি ইসক্বার মিতর ৬৫০০ পাক-চাউগনি, চহি অমদা পেসেঞ্জর লাখ ১০ সেবা তৌবা ঙমগনি। তর্মিনেল বিল্দিংগী মমাইদা নৌনা শঙ্গাগদৌরিবা শ্রী রাম মন্দিরগী লাইশঙগী য়ুমশারোল হাপকনি। তর্মিনেল বিল্দিংগী মনুংদা লমদম অসিগী কলা, ভাগবান শ্রী রামগী পুন্সিগী অয়েকপা লাইশিং অমসুং মুরেলশিং য়াওরে। অযোধ্যা এয়রপোর্তকী তর্মিনেল বিল্দিং অসিদা ইন্সুলেতেদ রুফিং, এল.ই.দি লাইত, নোংগী ঈশিং লোকশিনফম, ঈশিং পেরেশিং, ঈশিং শেংদোক্নবা প্লান্ত, অমোৎপা শেংদোক্নবা প্লান্ত, সোলার পৱার প্লান্ত অমসুং গ্রিহা-ফাইব স্তার রেতিং য়ৌবা ঙম্নবা অতোপ্পা খুদোংচাবা কয়া য়াওরে। এয়রপোর্ত অসিনা লমদম অসিদা তুরিজম, ললোন-ইতিক অমসুং থবক ফংবগী খুদোংচাবশিং হেনগৎহল্লগনি।
অযোধ্যা ধাম রেলৱে স্তেসন
অমুক হন্না শেমগৎপা অযোধ্যা রেলৱে স্তেসনগী ফেজ-১ অসি অযোধ্যা ধাম জঙ্কসন রেলৱে স্তেসন হায়না খঙনদুনা লুপা করোর ২৪০ হেন্না চঙনা শেমগৎপনি। মথোল অহুম লৈবা অনৌবা রেলৱে স্তেসন অসি মতমগা চুনরবা খুদোংচাবশিং হায়বদি লিফ, ইসকালেতরশিং, চাফম, পুজাগী পোৎলমশিংগী দুকানশিং, পোৎ-চৈ থমফম, অঙাংশিংগী লৈফম, মী ঙাইফম হোলশিং য়াওরে। স্তেসন বিল্দিং অসি মীওই খুদিংমক শীজিন্নবা য়াগনি অমসুং গ্রিন স্তেসন বিল্দিং ওইনা আই.জি.বি.সিনা শক্তাক্লে।
অমৃত ভারত ত্রেনশিং, বন্দে ভারত ত্রেনশিং অমসুং অতোপ্পা রেলৱে প্রোজেকশিং
অযোধ্যা ধাম জঙ্কসন রেলৱেস স্তেসন্দা পাংথোক্কদবা থৌরমদা প্রধান মন্ত্রীনা লৈবাক অসিদা খ্বাইদগী য়াংবা ত্রেনশিংগী অনৌবা কাংলুপ অমা ওইরিবা অমৃত ভারত এক্সপ্রেস লমথাগনি। অমৃত ভারত ত্রেন অসি এয়র-কন্দিসন য়াওদবা কোচশিংগী এল.ঐচ.বি পুস পুল ত্রেননি। হেন্না য়াংনা থৌবা য়ানবা ত্রেন অসিনগী অরোইবা মতোল অনিমক্তা লোকোশিং য়াওরি। মসিদা ফজরবা সিতশিং, হেন্না ফবা পোৎ-চৈ থমফম, মোবাইল চার্জ তৌফম অমসুং চুনবা মোবাইল থমফম, এল.ই.দি লাইতশিং, সি.সি.তি.বি, মীয়ামদা লাউথোক্নবা সিস্তেম য়াওরি। প্রধান মন্ত্রীনা অনৌবা বন্দে ভারত ত্রেন তরুকশু লমথাগনি।
প্রধান মন্ত্রীনা অনৌবা অমৃত ভারত ত্রেন অনি হায়বদি দারভঙ্গা-অযোধ্যা-অনন্দ বিহার তর্মিনেল অমৃত ভারত এক্সপ্রেস অমসুং মালদা তাউন-সার এম. বিসবেশবরায়া তর্মিনস(বেঙ্গালুরু) অমৃত ভারত এক্সপ্রেস লমথাগনি।
প্রধান মন্ত্রীনা অনৌবা বন্দে ভারত ত্রেন তরুকশু লমথাগনি। ত্রেনশিংগী মনুংদা শ্রী মাতা বৈষ্ণো দেবী কার্ত-নিউ দিল্লি বন্দে ভারত এক্সপ্রেস; অমৃতশর-দিল্লি বন্দে ভারত এক্সপ্রেস; কোয়ম্বতুর-বেঙ্গালুরু কেন্ত বন্দে ভারত এক্সপ্রেস; মঙ্গালুরু-মাদগাউন বন্দে ভারত এক্সপ্রেস; জলনা-মুম্বাই বন্দে ভারত এক্সপ্রেস অমসুং অযোধ্যা-অনন্দ বিহার তর্মিনেল বন্দে ভারত এক্সপ্রেস য়াওরি।
লমদম অসিগী রেল ইনফ্রাস্ত্রকচর মপাঙ্গল কনখৎহন্নবা লুপা করোর ২৩০০ রোমগী রেলৱে প্রোজেক অহুম প্রধান মন্ত্রীনা মীয়ামদা কৎথোক্কনি। প্রোজেকশিংগী মনুংদা রোমা চাকেরি-চান্দেরি অহুমশুবা লাইন প্রোজেক; জাউনপুর-তুলসি নাগর, অকবারপুর-অযোধ্যা, সোহাৱাল-পাতরঙ্গা অমসুং জাউনপুর-অযোধ্যা-বরাবঙ্কি দব্লিং প্রোজেক্কী সাফদারগঞ্জ-রাসাউলি সেক্সনশিং অমসুং মহালহাওর-দালিগঞ্জ রেলৱে স্তেসনগী দব্লিং অমসুং মৈ ফংহনবগী প্রোজেকশিং য়াওরি।
অযোধ্যাদা মীয়ামগী ইনফ্রাস্ত্রকচর ফগৎহনবা
শঙ্গাগদৌরিবা শ্রী রাম মন্দির য়ৌবা লম্বীগী খুদোংচাবা হেনগৎহন্নবা, অযোধ্যা-রামপথ, ভক্তিপথ, ধর্মপথ অমসুং শ্রী রাম জন্মভুমি পথতা অমুক হন্না শেমগৎলবা, পাকথোক্লবা অমসুং ফজহল্লবা লম্বী মরি প্রধান মন্ত্রীনা শঙ্গাগনি।
অযোধ্যা অমসুং মসিগী অকোয়বা মফমশিং ফজনবা অমসুং মীয়ামগী ইনফ্রাস্ত্রকচর মপাঙ্গল কনখৎহন্নবা প্রোজেক কয়া প্রধান মন্ত্রীনা শঙ্গাগনি অমসুং মীয়ামদা কৎথোক্কনি। শঙ্গাগদৌরিবা প্রোজেকশিংগী মনুংদা রাজর্ষি দশর্থ ওতোনোমস স্তেৎ মেদিকেল কলেজ; অযোধ্যা-সুলতানপু রোদ-এয়রপোর্ত শম্নবা লেন মরিগী লম্বী; এন.ঐচ-২৭ বাইপাস মহোব্রা বাজার ফাওরগা তেধি বাজার শ্রী রাম জন্মভুমি ফাওবগী লেন মরিগী লম্বী; সহরগী লম্বীশিং ফজহনবা অমসুং অযোধ্যা বাইপাস; এন.ঐচ-৩৩০এগী জগদিসপুর-ফাইজাবাদ সেক্সন; মাহোলি-বরাগাউন-দিওধি লম্বী পাকথোকপা অমসুং জসারপুর-ভাউপর-গঙ্গরমন-সুরেসনগর লম্বী; পঞ্চকোসি পরিক্রমা মার্গতা বাদি বুয়া রেলৱে ক্রোসিংদা আর.ও.বি; পীখাউলি খুঙ্গংদা সোলিদ ৱেস্ত ত্রিৎমেন্ত প্লান্ত; দোক্তর ব্রজকিশ্বর হোমিওপেথি কলেজ অমসুং হোস্পিতালদা অনৌবা বিল্দিং অমসুং ক্লাসরুমশিং য়াওরি। মুখ্যমন্ত্রী নগর শ্রীজন য়োজনাগা মরী লৈনবা থবকশিং অমসুং পার্কিং মঙা অমসুং ললোন-ইতিক্কী মফমশিং প্রধান মন্ত্রীনা শঙ্গাগনি।
অযোধ্যাদা অনৌবা প্রোজেকশিং উরেপ-উয়ুং তম্বা
অযোধ্যাগী মীয়ামগী খুদোংচাবশিং অমুক হন্না ফগৎহনবগা লোয়ননা সহর অসিগী ইনাকখুল্লবা পুৱারি অমসুং হেরিতেচ মপাঙ্গল কনখৎহন্নবা অনৌবা প্রোজকশিং প্রধান মন্ত্রীনা উরেপ-উয়ুং তমগনি। প্রোজেকশিংগী মনুংদা অযোধ্যাদা পুৱারি ওইরবা হোর্জং মরি ঙাক-শেনবা অমসুং ফজহনবা; গুপ্তার ঘাত অমসুং রাজঘাতকী মরক্তা অনৌবা কনক্রিত ঘাতশিং শাবা অমসুং হান্না শারম্বা ঘাতশিং শেমজিনবা; নয়া ঘাত্তগী লক্সমী ঘাত ফাওবা শেমগৎপা অমসুং ফজহনবা; দিপোউৎসব অমসুং রাম কি পাইরিদা পাংথোকপা অতোপ্পা মেলাশিংগী ভিজিতর গেল্লরি অমা শেমগৎপা; রাম কি পাইরিদগী রাজ ঘাত ফাওবা অমসুং রাজ ঘাত্তগী রাম মন্দির ফাওবা লাইফমগী লম্বী ফগৎহনবা য়াওরি।
প্রধান মন্ত্রীনা অযোধ্যাদা লুপা করোর ২১৮০ চঙনা শেমগৎকদবা গ্রিনফিল্দ তাউন্সিপ অমগী অমসুং লুপা করোর ৩০০ চঙনা পায়খৎকদবা বসিস্থা কুঞ্জ রেসিদেন্সিএল স্কিম উরেপ-উয়ুং তমগনি।
প্রধান মন্ত্রীনা এন.ঐচ-২৮(অনৌবা এন.ঐচ-২৭) লখনৌ-অযোধ্যা সেক্সন; হৌজিক লৈরিবা অযোধ্যা বাইপাসকী এন.ঐচ-২৮(অনৌবা এন.ঐচ-২৭) ফগৎহনবা অমসুং শেমদোকপা; অযোধ্যাদা সিপেত সেন্তর অমা লিংখৎপা; মিউনিসিপাল কোওপরেসন অযোধ্যা অমসুং অযোধ্যা দিবলপমেন্ত ওথোরিতি ওফিস শেমগৎ-শাগৎপগী থবক উরেপ-উয়ুং তমগনি।
উত্তর প্রদেস শীনবা থুংনা পায়খৎকদবা অতোপ্পা প্রোজেকশিং
প্রধান মন্ত্রীনা মীয়ামগী থৌরম মনুংদা উত্তর প্রদেস শীনবা থুংবগী তোঙান-তোঙানবা চাউখৎ-থৌরাংগী প্রোজেকশিং শঙ্গাগনি, মীয়ামদা কৎথোক্কনি অমসুং উরেপ-উয়ুং তমগনি। প্রোজেকশিংগী মনুংদা গোসাইন কি বাজার বাইপাস-বরানসী(ঘাঘ্রা থোং-বরানসী) (এন.ঐচ-২৩৩) লেন মরি ওইহনবা; এন.ঐচ-৭৩০গী খুতারদগী লখিম্পুর সেক্সন ফগৎহনবা; অমেথি জিলাগী ত্রিসুলদা এল.পি.জি প্লান্তগী কেপাসিতি হেনগৎহনবা; পানখাদা ৩০ এম.এল.দি অমসুং জাজমাউদা ১৩০ এম.এল.দিগী সিৱেজ ত্রিৎমেন্ত প্লান্ত; উন্নাউ জিলাদা খোঙবালশিং থৈদোকপা অমসুং সিৱেজ ত্রিৎমেন্ত প্লান্ত; অমসুং কানপুরগী জাজমাওদা তেন্নরি ক্লস্তরগী সি.ই.তি.পি য়াওরি।
