প্রধান মন্ত্রী, শ্রী নরেন্দ্র মোদীনা ভীদিও কনফরেন্সিংগী খুত্থাংদা ২০২২গী জনুৱারীগী ১৭তা আই.এস.তি.দা নুমিদাংগী পুং ৮.৩০ তাবা মতমদা ৱার্লদ ইকোনোমিক ফোরমগী দাভোস এজেন্দাদা ‘স্তেত ওফ দ ৱার্লদ’ অখন্নবা পাউজেল পীরগনি।
ভর্চুৱলগী ওইবা থৌরম অসি ২০২২গী জনুৱারী ১৭দগী ২১ ফাওবা পাংথোক্লগনি। মসিদা জাপানগী প্রধান মন্ত্রী, কিশিদা ফুমিয়ো; য়ুরোপিয়ন কমিসনগী প্রসিদেন্ত, উর্জুলা ভোন দর লায়েন; ওস্ত্রেলিয়াগী প্রধান মন্ত্রী, স্কোত মোরিসন; ইন্দোনেসিয়াগী প্রসিদেন্ত, জোকো ৱিদোদো, ইজরেলগী প্রধান মন্ত্রী, নাফতালি বেন্নেত; পীপল্স রিপব্লিক ওফ চাইনাগী প্রসিদেন্ত, ঝি জিনপিং য়াওনা হেদ ওফ স্তেত কয়া অমনা পাউজেল পীরগনি। থৌরম অদুদা মকোক থোংবা ইন্দস্ত্রীগী লুচিংবশিং, ইন্তর্নেস্নেল ওর্গনাইজেশনশিং অমসুং সিভিল সোসাইতীনা শরুক য়াবা থেংনরগনি, মখোয়শিং অদুনা ঙসি মালেম অসিদা থেংনরিবা বাম্না মরু ওইবা শিংনবশিংগী মতাংদা নিংথিনা খন্থরগা অমসুং মখোয়শিং অদুবু করম্না কোকহনগদে হায়বগী মতাংদা খন্নরগনি।
