প্রধান মন্ত্রীনা রাজস্থান্দা লুপা করোর ১৭০০০ হেনবগী তোঙান-তোঙানবা চাউখৎ-থৌরাংগী প্রোজেকশিং শঙ্গাগনি, মীয়ামদা কৎথোক্কনি অমসুং উরেপ-উয়ুং তমগনি
প্রোজেকশিংগী মনুংদা লম্বী, রেলৱেজ, সোলার ইনর্জি, পৱার ত্রান্সমিসন, থক্নবা ঈশিং অমসুং পেত্রোলিয়ম অমসুং নেচরেল গ্যাসগুম্বা মরুওইবা হিরমশিং য়াওরিহায়রিবা প্রোজেকশিং হৌদোকপা অসি রাজস্থানগী ইনফ্রাস্ত্রকচরগী ফিবম অওনবা পুরক্নবা অমসুং চাউখৎ-থৌরাংগী খুদোংচাবশিং পীনবা প্রধান মন্ত্রীনা লেপ্তনা হোৎনবগী শরুক অমনিপ্রধান মন্ত্রী শ্রী নরেন্দ্র মোদীনা ফেব্রুৱারি ১৬,২০২৪গী অয়ুক পুং ১১ তাবদা ভিদিও কনফরেন্সকী খুৎথাংদা ‘বিকসিত ভারত বিকসিত রাজস্থান’ থৌরমদা ৱা ঙাংগনি। প্রধান মন্ত্রীনা রাজস্থান্দা লুপা করোর ১৭০০০ হেনবগী তোঙান-তোঙানবা চাউখৎ-থৌরাংগী প্রোজেকশিং শঙ্গাগনি, মীয়ামদা কৎথোক্কনি অমসুং উরেপ-উয়ুং তমগনি। প্রোজেকশিংগী মনুংদা লম্বী, রেলৱেজ, সোলার ইনর্জি, পৱার ত্রান্সমিসন, থক্নবা ঈশিং অমসুং পেত্রোলিয়ম অমসুং নেচরেল গ্যাসগুম্বা মরুওইবা হিরমশিং য়াওরি।
প্রধান মন্ত্রীনা রাজস্থান্দা লুপা করোর ৫০০০ হেনবগী তোঙান-তোঙানবা নেসনেল হায়ৱেজ প্রোজেকশিং শঙ্গাগনি। প্রধান মন্ত্রীনা বাউনলি-ঝালাই লম্বীদগী মুই খুঙ্গং সেক্সন ফাওবা; হারদিওগঞ্জ খুঙ্গংদগী মেজ তুরেলগী শরুক; অমসুং তাকলিদগী রাজস্থান/মধ্য প্রদেস ঙমখৈ ফাওবগী ৮-লেন দিল্লি-মুম্বাই গ্রিন ফিল্দ এলাইনমেন্ত(এন ই-৪)গী পেকেজ অহুম শঙ্গাগনি। হায়রিবা শরুকশিং অসিনা লমদম অসিদা য়াংনা অমসুং নুংঙাইনা চৎথোক-চৎশিনগী খুদোংচাবা হেনগৎহনগনি। হায়রিবা শরুকশিং অসিদা মথক অমসুং মখাদা লম্লক্কী শা-উচেকশিং ফাওদুনা চৎপা য়ানবা খুদোংচাবা য়াওরি। লম্লক্কী শা-উচেকশিংদা চৈথেং পীবা হন্থহন্নবা অরাংবা খোঞ্জেল থিংনবা থবকশিং পায়খৎলে। দেবারিদা এন.ঐচ-৪৮দা চিত্তোগর-উদয়পুর হায়ৱে সেক্সনগা কায়া খুঙ্গংদা এন.ঐচ-৪৮কী উদয়পুর-সামলাজি সেক্সনগা শম্নবা ৬-লেন গ্রিনফিল্দ উদয়পুর বাইপাস প্রধান মন্ত্রীনা শঙ্গাগনি। বাইপাস অসিনা উদয়পুর সহরদা মী চিনবা হন্থহনগনি। রাজস্থানগী ঝুনঝুনু, অবু রোদ অমসুং তোক জিলাশিংদা লম্বী ফগৎহনগদবা অতোপ্পা প্রোজেক কয়াশু প্রধান মন্ত্রীনা শঙ্গাগনি।
লমদম অসিগী রেল ইনফ্রাস্ত্রকচর মপাঙ্গল কনখৎহন্নবা, প্রধান মন্ত্রীনা রাজস্থান্দা লুপা করোর ২৩০০ রোমগী মরুওইবা রেলৱে প্রোজেক ৮ লৈবাক মীয়ামদা কৎথোক্কনি অমসুং উরেপ-উয়ুং তমগনি। মীয়ামদা কৎথোক্কদবা রেলৱে প্রোজেকশিংগী মনুংদা জোধপুর-রাই কা বাঘ-মেরতা রোদ-বিকানর সেক্সন(কিমি ২৭৭); জোধপুর-ফালোদি সেক্সন(কিমি ১৩৬); অমসুং বিকানর-রত্নগর-সাদুলপুর-রেৱারি সেক্সন(কিমি ৩৭৫) য়াওনা রেল লম্বীশিং ইলেক্ত্রিক ফংহন্নবা প্রোজকশিংনি।
প্রধান মন্ত্রীনা ‘খাতিপুরা রেলৱে স্তেসন’ মীয়ামদা কৎথোক্কনি। রেলৱে স্তেসন অসি জয়পুরগী সেতেল্লাইত স্তেসন অমা ওইনা শেমগৎপনি অমসুং মসিদা ত্রেনশিং চেন হৌনবা অমসুং পন্থুংফম ওইনা ‘তর্মিনেলগী খুদোংচাবা’ য়াওরে। প্রধান মন্ত্রীনা উরেপ-উয়ুং তমগদৌরিবা রেলৱে প্রোজেকশিংগী মনুংদা ভাগত কি কোথি(জোধপুর)দা বন্দে ভারত স্লিপ্পর ত্রেনশিং শেমজিন্নবা মফম; খাতিপুরা(জোধপুর)দা বন্দে ভারত, এল.ঐচ.বিগুম্বগী মখল খুদিংমক্কী রেকশিং শেমফম; হনুমানগরদা ত্রেনশিং শেমজিন্নবা কোচ কিয়ার কমপ্লেক্স শাগৎপা অমসুং বান্দিকুইদগী অগ্রা ফোর্ত রেল লাইন দবল ওইহনবা য়াওরি। রেল সেক্তরগী প্রোজেকশিংনা রেল ইনফ্রাস্ত্রকচর মতমগা চুনবা মওংদা শেমগৎপা, অশোই-অঙাম থোকহন্দনবা থবকশিং ফগৎহনবা, মীয়াম অমসুং পোৎ-চৈ চৎথোক-চৎশিন অমসুং পুথোক-পুশিনগী থবকশিং হেন্না ফগৎহন্নবা পান্দম থম্লি।
লমদম অসিদা রিনিউএবল ইনর্জি পুথোকপা হেনগৎহন্নবা, প্রধান মন্ত্রীনা রাজস্থান্দা লুপা করোর ৫৩০০ রোমগী মরুওইবা সোলার প্রোজেকশিং উরেপ-উয়ুং তমগনি অমসুং মীয়ামদা কৎথোক্কনি। রাজস্থানগী বিকানর জিলাদা বরসিংসার থর্মেল পৱার স্তেসন ময়া নক্না লিংখৎকদবা মেগাৱাত ৩০০গী সোলার পৱার প্রোজেক অমা, এন.এল.সি.আই.এল বরসিংসার সোলার প্রোজেক প্রধান মন্ত্রীনা উরেপ-উয়ুং তমগনি। অত্মনির্ভর ভারতকী পান্দমগা লোয়ননা ভারত্তা শাবা অফবা মখলগী বাইফেসিএল মোদুলশিংগা লোয়ননা অৱাংবা থাক্কী অনৌবা তেক্নোলোজি শীজিন্নদুনা সোলার প্রোজেক অসি লিংখৎকদবনি। মহাক্না রাজস্থানগী বিকানরদা, সি.পি.এস.য়ু স্কিম ফেজ-২(ত্রাঞ্চ-৩)গী মখাদা এন.ঐচ.পি.সি লিমিতেদকী মেগাৱাত ৩০০ সোলার পৱার প্রোজেক শানবা উরেপ-উয়ুং তমগনি। প্রধান মন্ত্রীনা রাজস্থানগী বিকানরদা শেমগৎপদা মেগাৱাত ৩০০গী এন.তি.পি.সি গ্রিন ইনর্জি লিমিতেদ নোখ্রা সোলার পি.ভি প্রোজেক মীয়ামদা কৎথোক্কনি। সোলার প্রোজেকশিংনা গ্রিন ইনর্জি পুথোক্কনি, কার্বোন দাইওক্সাইদ থাদোকপা হন্থহনবদা মতেং পাংগনি অমসুং লমদম অসিগী শেন-থুমগী ফিবম ফগৎহনগনি।
প্রধান মন্ত্রীনা রাজস্থান্দা লুপা করোর ২১০০ হেন্না চঙনা শেমগৎপা পৱার ত্রান্সমিসন সেক্তর প্রোজেকশিং মীয়ামদা কৎথোক্কনি। হায়রিবা প্রোজেকশিং অসি রাজস্থান্দা সোলার ইনর্জি পুথোকপা মফমশিংদগী পৱার লৌথোকখিবনি অমসুং মসিনা লমদম অসিদগী পুথোকপা সোলার পৱার মৈ শীজিন্নগদবা মীওইশিংদা য়ৌহনবা ঙমগনি। প্রোজেকশিংগী মনুংদা ফেজ-২ পার্ত এগী মখাদা রাজস্থানগী সোলার ইনর্জি জোনশিংদগী গিগাৱাত ৮.১গী পৱার পুথোকখিনবা ত্রান্সমিসন সিস্তেম মপাঙ্গল কনখৎহনবা; ফেজ-২ পার্ত বিগী মখাদা রাজস্থানগী সোলার ইনর্জি জোনশিংদগী গিগাৱাত ৮.১গী পৱার পুথোকখিনবা ত্রান্সমিসন সিস্তেম মপাঙ্গল কনখৎহনবা; অমসুং বিকানর(পিজি), ফাতেগর-২ অমসুং ভাদলা-২দা আর.ই প্রোজকশিংগা শম্ননবা ত্রান্সমিসন সিস্তেম শেমগৎপা য়াওরি।
রাজস্থান্দা অফবা থক্নবা ঈশিং ফংহন্নবা পান্দমদা জল জিবন মিসনগী মখাদা লুপা করোর ২৪০০ রোমগী তোঙান-তোঙানবা প্রোজেকশিং প্রধান মন্ত্রীনা উরেপ-উয়ুং তমগনি। লৈবাক অসিগী য়ুমথোং খুদিংদা অফবা থক্নবা ঈশিং ফংহন্নবা প্রধান মন্ত্রীগী কৎথোকপা অসি প্রোজেকশিং অসিনা হেন্না মরুওইহল্লে।
প্রধান মন্ত্রীনা জোধপুরদা ইন্দিয়ান ওইলগী এল.পি.জি হান্নবা প্লান্ত লৈবাক মীয়ামদা কৎথোক্কনি। বোত্তলিং প্লান্ত অসি অনৌবা ইনফ্রাস্ত্রকচরনি অমসুং থবক তৌনবা অমসুং অশোই-অঙাম থোক্তনবা ওতোমেতিক সিস্তেম য়াওরি অমসুং মসিনা থবক ফংবা হেনগৎহনগনি অমসুং লমদম অসিগী মীওই লাখ কয়াগী দরকার ওইবা এল.পি.জি ফংহনবা ঙমগনি।
হায়রিবা প্রোজেকশিং হৌদোকপা অসি রাজস্থানগী ইনফ্রাস্ত্রকচরগী ফিবম অওনবা পুরক্নবা অমসুং চাউখৎ-থৌরাংগী খুদোংচাবশিং পীনবা প্রধান মন্ত্রীনা লেপ্তনা হোৎনবগী শরুক অমনি।
মরুওইবা থৌরম জোধপুরদা পাংথোকপগা লোয়ননা থৌরম অসি রাজস্থানগী জিলা শীনবা থুংবগী মফম ২০০ রোমদা পাংথোক্কনি। রাজ্য শীনবা থুংনা পাংথোক্কদৌরিবা থৌরম অসিদা তোঙান-তোঙানবা সরকারগী স্কিমশিংগী বেনিফিসরি লাখ কয়া শরুক য়াগনি। থৌরম অদুদা রাজস্থানগী চীফ মিনিস্তর, রাজস্থান সরকারগী অতোপ্পা মিনিস্তরশিং, এম.পিশিং, এম.এল.এশিং অমসুং পঞ্চয়াত থাক্কী মীয়ামগী মীহুৎশিং শরুক য়াগনি।
