“তমিল নাদুগী য়ুম্থোং খুদিংদগী পোঙ্গলগী হরাও-নুংঙাইবগী ইচেল কয়া চেন্থনরক্লিবা অসিগা লোয়ননা, ঐহাক্না মীপুম খুদিংগী পুন্সিবু নুংঙাই য়াইফবনা থল্লসনু হায়বগী য়াইফ পাউজেল পীজরি”
“ঙসি ফাওরিবা ৱাখল্লোন অসিগা ইমুং-মনুং অমসুং মরুপশিংগা লোয়ননা কুহ্মৈদা শরুক য়াবগা মান্নরি”“মহৈ-মরোং, লৌমী অমসুং খুঙ্গংশিংনা কুহ্মৈ অয়াম্বগী ময়োলদা লৈ”“মিল্লেতপু হেন্না খুমাং চাউশিলহনবা অসিনা অপীকপা লৌমী অমসুং নহা ওইরিবা ওন্তোপ্রিনরশিংদা কান্নবা পীরি”“পোঙ্গল কুহ্মৈদা এক ভারত, শ্রেস্থ ভারতকী লৈবাক পুম্বগী ইথিলগী মমি তারি”“মসিগী অমত্তা ওইবগী ৱাখল্লোন অসিনা ইং 2047 ফাওবদা বিকশিৎ ভারত অমা শেম্বগী খ্বাইদগী চাউবা শাফু অমা ওইরি”প্রধান মন্ত্রীনা ঙসি নই দিল্লীদা লৈবা কেন্দ্র মন্ত্রী, শ্রী এল. মুরুগনগী ময়ুমদা পাংথোকপা পোঙ্গলগী হরাও নুংঙাইবা ফোংদোকপগী থৌরমদা শরুক য়াখ্রে।
ঙসিগী থৌরমদা ৱা ঙাঙবা ওইনা, প্রধান মন্ত্রীনা পোঙ্গলগী য়াইফ পাউজেল পীখি অমসুং তমিল নাদুগী য়ুম খুদিংদগী মসিগুম্বা কুহ্মৈগী নুংঙাইবগী ইথিল থোক্লকপগী শক্তম উবা ফংই হায়না মখা তানা ফোংদোকখি। মীয়ামগী পুন্সিদা নুংঙাইবা, য়াইফবা অমসুং পেনবগী ইচেলনা লেপ্তনা চেন্থবা ওইসনু হায়না শ্রী মোদীনা য়াইফ পাউজেল পীখি। ঙরাং পাংথোকখিবা লোহরী কুহ্মৈ, ঙসি পাংথোক্লিবা মকর উত্তরায়নগী কুহ্মৈগী নুংঙাইবা, হয়েং পাংথোক্কদৌরিবা মকর শঙ্ক্রান্তী অমসুং বিহু কুহ্মৈসু য়াম্না থুনা লাক্লগনি হায়না মহাক্না পনখি। লৈবাক অসিদা হৌজিক চৎলিবা কুহ্মৈগী মতমসিদা শ্রী মোদীনা মীয়াম খুদিংগী মফমদা য়াইফ পাউজেল পীখি।
প্রধান মন্ত্রীনা ঙসি শকখঙবা মায়থোং কয়া উবা ফংবদা নুংঙাইবা ফোংদোকখি অমসুং মমাংগী চহিগী তমিল পুথান্দুগী থৌরমদা মখোয়গা উন্নখিবগী মিৎকুপশিংবুসু অমুক হন্না নীংশিংখি। কেন্দ্র মন্ত্রী, শ্রী এল. মুরুগনবু ঙসিগী থৌরমসিদা শরুক য়াবীনবা পাউজেল পীরকপগীদমক্তা থাগৎলদুনা, প্রধান মন্ত্রীনা ঙসি ফাওরিবা নুংঙাইবগী মতৌ অসিদি ইমুং-মনুং অমসুং মরুপশিংগা কুহ্মৈদা শরুক য়াবগী নুংঙাইবগী মতৌগা মান্নৈ হায়না ফোংদোকখি।
অথোইবা সন্ত, থিরুবল্লুবরগী ৱারোল খরা পল্লদুনা, প্রধান মন্ত্রীনা লৈবাক শেম্বগী থৌওংশিংদা মহৈ হৈরবা মীয়াম, পুকচেল শেংনা কারবার তৌবা মীওই অমসুং অফবা মহৈ-মরোংগী থৌদাংশিং পল্লদুনা, পোঙ্গলগী মনুংদা অতেকপা অমসুং নৌনা লোকপা মহৈ-মরোংশিংবু ঈশ্বরগী মফমদা কৎনৈ অমসুং থৌওং অসিমক্না ‘অন্নদাতা কিসান’শিংবু কুহ্মৈ অসিগী মসিগুম্বা চৎনবী অসিগী ময়োলদা থম্নৈ হায়না মহাক্না হায়খি। ভারতকী কুহ্মৈ খুদিংগা খুঙ্গং, মহৈ-মরোং অমসুং লৌমীশিংগা লৈনরিবা মরীগী মতাংদা মহাক্না মিৎয়েং চঙখি। মমাংগী চহিদা মহাক্না মিল্লেত অমসুং তমিলগী চৎনবীগী মরক্তা লৈনবা মরীগী মতাংদা থমখিবা ৱাফম্বু মহাক্না অমুক্কা হন্না নীংশিংখি। সুপরফুদ শ্রী অন্নাগী মতাংদা হৌজিক্কান মীয়াম্না নৌহৌননা খঙনবা হৌনরক্লিবা অসিদা নুংঙাইবা ফাওই হায়না মহাক্না হায়রদুনা নহা কয়া অমনা মিল্লেত-শ্রী অন্নাগা মরী লৈনবা স্তার্তঅপকী থবক কয়া অমসু পায়খৎনরক্লে হায়না শ্রী মোদীনা হায়খি। মিল্লেত থারিবা লৌমী করোর 3 হেনবনা মিল্লেতপু খুমাং চাউশিলহনবগীদমক্তা কান্নবা কয়া হকথেংননা ফংনরি হায়না মহাক্না মখা তাখি।
পোঙ্গলগী হরাও কুহ্মৈ মরক্তা তমিল খুন্নাইগী নুপীশিংনা য়ুমগী মপান্দা কোল্লম লৌথোকপগী চৎনবীদা মিৎয়েং তারদুনা, প্রধান মন্ত্রীনা থৌওংশিং অসিবু মুন্না য়েংলদুনা য়াম শিজিন্নদুনা দোত কয়ানা মখল কয়াগী দিজাইন শেম্বা, দিজাইন খুদিংমক অমনা অমদগী তোঙানবা, অমসুং দোতশিং অসি পুনশিন্নদুনা মচু কয়ানা থলহনবা মতমদা কোল্লমগী তসেংবা মশক্না হেন্না নীংথিজবা অমা ওইরক্তুনা চাউরবা আর্তৱর্ক শেম্বগী মতৌদা পুক্নিং লুপ্না য়েংখি। ভারতকী দাইবর্সিতীগা কোল্লমগা মান্নবা মতৌদা মিৎয়েং চঙলদুনা, প্রধান মন্ত্রীনা লৈবাক্কী মফম খুদিংনা অমগা অমগা ৱাখল মান্ননা মরী লৈনরকপা মতমদা, লৈবাক্কী পাঙ্গলনা অনৌবা শক্তম অমা লৌরকই হায়না ফোংদোকখি। “পোঙ্গল কুহ্মৈনা এক ভারত, শ্রেস্থ ভারতকী লৈবাক্কী ইথিলগী মমি উবা ফংহল্লি”, শ্রী মোদীনা হায়খি। মসিগা চপ মান্নবা ইথিল অসিমক তমিল খুন্নাইগী মীওইশিংনা থৱাই য়াওবগী মতৌগা লোয়ননা মশিং য়াম্না শরুক য়ামিন্নবা কাশি-তমিল শঙ্গমম অমসুং সৌরাস্ত্রা-তমিল শঙ্গমম্না হৌদোকখিবা চৎনদসু উবা ফংই হায়না মহাক্না পাউদমখি।
প্রধান মন্ত্রীনা হায়খি, “মসিগুম্বা অমত্তা ওইবগী ৱাখল্লোন অসিদি ইং 2047 ফাওবদা বিকশিৎ ভারত অমা শেম্বগী থৌওংগী খ্বাইদগী চাউবা শাফু অমা ওইরি। ঐহাক্না লাল কিলাদগী লাউথোকখিবা পাঞ্চ প্রনগী ক্বহাইদগী মরু ওইবা মচং অদুদি লৈবাক্কী অমত্তা ওইবগী মতৌবু মপাঙ্গল হাপ্পনি অমসুং মতৌ অসিবু হেন্না চেৎশিনহনবনি”। ঙসিগী পোঙ্গলগী শেংলবা পুঙফম অসিদা লৈবাক্কী অমত্তা ওইবগী মতৌবু হেন্না চেৎশিলহন্নবা ঐখোয়না অমুক্কা হন্না ৱাশক লৌরসি হায়বা পাউজেলগা লোয়ননা মহাক্না মহাক্কী ৱারোল লোইশিনখি।
