ঐ মে ২৩দগী ২৪, ২০২২ ফাওবা জপানগী প্রধান মন্ত্রী হিস এক্সেলেন্সী মিস্তর ফুমিও কিসিদাগী পাউকৎ ফংবদগী তোকিও, জপান্দা চৎকদৌরি।
মার্চ ২০২২দা, ঐনা প্রধান মন্ত্রী কিসিদাবু ১৪শুবা ইন্দিয়া-জপান এনুএল সম্মিত্তা ওকচবগী তাঞ্জা ফংখি। ঐগী তোকিও খোঙচৎ মনুংদা, ইন্দিয়া-জপান স্পিসিএল স্ত্রেতেজিক এন্দ গ্লোবেল পার্ত্নরসিপ হেন্না মপাঙ্গল কনখৎহন্নবগী পান্দমদা ঐখোয়গী ৱারী মখা চত্থনবা পান্দম থম্লি।
জপান্দা, ক্বাদ লৈবাক মরিগী লুচিংবশিংনা ক্বাদ ইনিসিএতিবকী খোঙজেল য়েংশিন্নবা খুদোংচাবা অমা পীগদৌরিবা অনিসুবা ইন-পর্সন ক্বাদ লীদর্স সম্মিত্তসু শরুক য়াগনি। ঐখোয়না ইন্দো-পেসিফিক রীজন্দা ওইরক্লিবা ফীভম অমসুং পুম্নমক্কী ওইবা ৱাফমদা লৈরিবা মালেমগী ইসুশিংগী মতাঙদসু ৱাখল্লোন ফোঙদোক্নগনি।
ঐনা প্রসিদেন্ত জোসেফ বাইদেনগা নাকল অনিগী ওইবা মীফম পাঙথোক্তুনা য়ু.এস.এ.গা লৈনরিবা মমায় কয়া লোঙবা নাকল অনিগী ওইবা মরী হেন্না চেৎশিলহন্নবগী ৱারী মখা তানা খন্নগনি। ঐখোয়না রীজনেল দেভেলপমেন্ত অমসুং হৌজিক লৈরিবা মালেমগী ওইবা ৱাফমশিংগী মতাঙদসু ৱারী মখা তানা শাগনি।
নৌনা মীখল মায় পাক্লক্লবা ওস্ত্রেলিয়ন প্রধান মন্ত্রী এন্থোনী অল্বানীজ অহানবা ওইনা ক্বাদ লীদর্স সম্মিক অসিদা শরুক য়াগদৌরি। ঐনা মহাক্কা নাকল অনিগী ওইবা মীফম পাঙথোক্তুনা কম্প্রিহেন্সিব স্ত্রেতেজিক পার্ত্নরসিপকী মখাদা মমায় কয়া লোঙবা ভারত অমসুং ওস্ত্রেলিয়াগী তেংবাংনবগী মরী অমসুং রীজনেল অমদি মালেমগী ওইবা ৱাফমশিং খন্ননবা পান্দম থম্লি।
ভারত অমসুং জপানগী মরক্তা শেন্মিৎলোনগী ওইবা তেংবাংনবগী থৌওং অসি স্পিসিএল স্ত্রেতেজিক এন্দ গ্লোবেল পার্ত্নরসিপকী মরুওইবা মশক অমনি। মার্চ মীফমদা, পি.এম. কিসিদা অমদি ঐনা লাক্কদৌরিবা চহি মঙাসিদা জপান্দগী ভারত্তা পব্লিক অমসুং প্রাইভেৎ ইনভেস্তমেন্ত ওইনা জে.পি.ৱাই. ত্রিলিয়ন ৫ খোমগৎনবা ৱাখল্লোন লাউথোকখি। চৎকদৌরিবা খোঙচৎ মনুংসিদা হায়রিবা পান্দম অসি ফংনবগীদমক ঐখোয়গী লৈবাক অনিসিগ মরক্তা শেন্মিৎলোনগী মরী কনখৎহন্নবগীদমক জপানগী লল্লোন ইতিক্কী লুচিংবশিংগী উনগনি।
জপান অসি ভারত মচা ৪০,০০০রোমগী য়ুম ওইদুনা হায়রিবা ভারত মচাশিং অসিনা ঐখোয়গা জপানগী লৈনরিবা মরী অসিবু লেঙহন্দনা ফাদুনা থম্লিবনি। মখোয়গা ৱারী ৱাতায় শাননবগীদমকসু ঐনা পান্দম থম্লি।
