শক্নাইরবশিং,
প্রধান মন্ত্রী অলবানিস, প্রধান মন্ত্রী কিসিদা অমসুং প্রসিদেন্ত বাইদেন,
ঙসি ক্বাদ মীফম অসিদা ঐগী মরুপশিংগী মরক্তা শরুক য়াবা অসি ঐ হরাওই। ইন্দো-পেসিফিক লমদমদা শান্তি, তুংদু লৈতাবা অমসুং নুংঙাইবা পুরক্নবগীদমক মরুওইবা মফম অমা ওইনা ক্বাদ গ্রুপ লিংখৎখিবনি। ইন্দো-পেসিফিক লমদম অসি মালেমগী ললোন-ইতিক, ইন্নোবেসন অমসুং চাউখৎপগী ইঞ্জিন অমনি হায়বদা চিংনবা অমতা লৈতে। ইন্দো-পেসিফিক লমদমগী সেকুরিতি অমসুং মাইপাকপা অসি লমদম অসি খক্তগী নত্তনা মালেম পুম্নমক্কী মরুওইবনি হায়না ঐখোয় মত অমতা ওইনা য়ানরে। অফবা পান্দম অমদা, গনতন্ত্রগী গুনশিং শরুক য়ামিন্নদুনা, ঐখোয় মাঙলোমদা চঙশিল্লি।
মনিংতম্বা অমসুং অপুনবগী ওইবা ইন্দো-পেসিফিক লমদম অমগী ঐখোয়গী পান্দমদা ঐখোয়না থবক ওইনা পাংথোকলি। ক্লাইমেত চেঞ্জ, দিজাস্তর মেনেজমেন্ত, তেক্নোলোজি, সপ্লাই চেন, হেল্থ সেকুরিতি, মেরিতাইম সেকুরিতি, কাউন্তর তেরোরিজমগী লমদা ঐখোয় মতেং পীনবা হেনগৎলক্লি। লৈবাক কয়া অমসুং কাংবু কয়া মখোয়গী ওইবা ইন্দো-পেসিফিক লাল্লোং অমসুং পান্দম লাউথোক্লি। ঙসি ঐখোয়গী মীফম অসিনা, লমদম অসি শীনবা থুংনা মীয়াম চাউখৎনবা খন্ননবা খুদোংচাবা অমা পীগনি।
মালেমগী য়াইফনবা, মীওইবা য়াইফনবা, শান্তি অমসুং নুংঙাই-য়াইফবা পুরক্নবা ক্বাদ মখা তানা থবক তৌগনি হায়না ঐনা থাজবা থম্লি। মীফম অসিদা মাইপাক্না প্রসিদেন্ত ওইবগীদমক ঐনা প্রধান মন্ত্রী অলবানিস থাগৎলি। ২০২৪দা ঐখোয়না ক্বাদ লুচিংবশিংগী মীফম য়ুম্বু ওইগদৌরিবা অসিগীদমক ঐখোয় হরাওই।
অদোম থাগৎচরি।
