ঐখোয় শান্নবা হৌরসিঃ মন কী বাত্তা পি.এম মোদীনা শান্নপোৎকী লমদা মরোমদোম লেপচবা ঙম্নবা ইনোৎ পীবা

ঐগী নুংশিরবা লৈবাক মীয়ামশিং, খুরুমজরি‍। অতৈ মতমদদি হৌজিক্কী মতমসি কুমহৈ হরাওতনা থনবা মতম্নি; মফম কয়াদা মেলা পাঙথোক্নবা মতম্নি; হৌজিকসি লাইনিংগী ওইবা থৌরমশিংগী মতমসুনি‍।  কোরোনাগী চিরবা তানফমসিদা, নাকল অমদা মীয়ামসি পুক্নীং লাংতক্নবা অমদি চরাংনবনা থল্লি; অদুগা অমুকসু নাকল অমদনা ঐখোয়গী থম্মোয়বু শুমহৎপা হৌন-লোনচৎ অমসু লৈরি‍। চাউরাক্ন হায়রবদা মীয়াম মরক্তা থৌদাং য়ামিন্নবগী ৱাখল্লোন অমা লৈররি‍। মীয়াম্না মখোয় মশা অমসুং অতোপ্পশিংগী চেকশিন থৌরাং লৌজবগা লোয়ননা মখোয়গী নুংতিগী থবকশিংসু পাঙথোক্নরি‍। লৈবাকসিদা পাঙথোকপা থৌরম খুদিংমক্তা মরা তপ্পা অমদি ইচম চম্না পাঙথোক্নরিবসি হান্না খন্নরুদবা মওংনি‍। গনেসহোতসব ফাওবা মফম খরদা ওনলাইন্দা পাঙথোক্নরি; মফম অয়ামবনা ইকো-ফ্রেন্দলী ওইবা গনেসগী মীতম খিন্নরি‍। মরূপশিং, করিগুমবা ঐখোয়না কুপথনা য়েংলবদি ঐখোয়গী পুক্নীং শুকশোয় শোয়দনা চিংশিনগদবা ৱাফম অমদি ঐখোয়গী কুমহৈ হরাওশিং অমসুং মহৌশাগী অকোয়বগী ফীভম্নি‍। অনিসিগী মরক্তা মতম পুম্নমক্তা অচেৎপা মরী অমা অদুম্মক লৈরি‍। নাকন অমদা ঐখোয়গী কুমহৈ হরাওশিংনা মহৌশা অমদি মহৌশাগী অকোয়বগী ফীভমগা পুন্না চৎমিন্নবগী পাউজেল অমা ময়েক শেংনা পীরি; অদুগা নাকন অমদনা কুমহৈ কয়া অমদি মহৌশা লাইরেম্বীবু ঙাকথোক্নবগীদমক্তা অখন্ননা পাঙথোক্লি‍। খুদম ওইনা পল্লবদা, বিহারগী ৱেস্ত চম্পরন দিস্ত্রিক্তা থারু ত্রাইবকী মীওইশিংনা মখোয়গী মরোনদা ‘সাত ঘন্তে কে বর্ন’ হায়না খঙনবা পুং হুম্ফুগী লোকদাউন অমা চহী চা কয়া চুপ্না পাঙথোক্তুনা লাক্লি‍। থারু ফুরূপ্না বর্নবু মখোয়গী মহৌশা লাইরেম্বীবু ঙাকথোক্নবা চৎনবী অমা ওইনা লৌদুনা চহী চা কয়া অসি লাক্লি‍। হায়রিবা মতমসিগী ম নুংদা, কনাগুম্বা অমত্তনা খুলশিংদুদা চঙদে, কনামত্তনসু ময়ুমদগী হেন্দোক্তে, অমদি কনাগুম্বনা মপান থোক্লবদি নৎত্রগা করিগুমবা মফম অমদগী কনাগুম্বা অমনা মফমদুদা লাক্লবদি চত্থোক চৎশিন তৌবা অমদি নুংতিগী তৌবা থবক থৌওংশিংদুনা অনৌবা পাম্বীশিং অমদি উপাল-ৱাপালশিংবু মাঙ তাকহনগনি হায়না মখোয়না থাজনৈ‍। ঐখোয়গী ত্রাইবেল ইচিন ইনাউশিংনা বর্ন অসি চাউনা ঈরাৎপগী থৌরম অমগা লোয়ননা হৌদোকই অমদি ত্রাইবেল ঈশৈ, নোংমাই অমদি জগোয়গী নুংঙাইরবা চৎনবী অমগা লোয়ননা লোইশিল্লি‍।

মরূপশিং, হৌজিক্কী মতমসিদা, ওনম কুমহৈ হরাও তয়াম্বগা লোয়ননা পাঙথোক্নরি‍। কুমহৈ অসি চিঙ্গম থাদা লাকই‍। মতমসিদা মীয়াম্না অনৌবা পোৎলমশিং লৈনৈ, মখোয়গী য়ুমশিংবু লৈতেংই, পুকলম শেম্মি অমদি ওনম-সাদিয়া পাঙথোক্তুনা মখল মখা কয়াগী মশান্নশিং অমসুং চাংদম্নবশিংসু পাঙথোকই‍। ওনম কুমহৈগী নুংঙাইবা অসি ঙসিদি মপাল লৈবাকশিংগী অরাপ্পা মফমশিংদা য়ৌখ্রে‍। অমেরিকা, য়ুরোপ নৎত্রগা গল্ফ লৈবাকশিংদা ওইরবসু, ওনমগী ইৱাই ইনিল মফম খুদিংমক্তা ফংই‍। ওনম অসি মালেমগী কুমহৈ অমা ওইনা মমীং চৎলক্লি‍।

মরূপশিং, ওনম অসি ঐখোয়গী লৌউ-শিংউগা মরী লৈনবা কুমহৈ অমনি‍। মসি ঐখোয়গী খুঙ্গঙগী শেন্মিৎলোনগী অনৌবা মতম অমগী হৌরকপসুনি‍। ঐখোয়গী পুন্সি, ঐখোয়গী খুন্নাইনা লৌমীশিংগী থৌনাদগী হিংবগী পাঙ্গল লোকই‍। মখোয়গী হোৎনবা কনবনা ঐখোয়গী কুমহৈশিংদা মখল মখা কয়আগী মচু শঙলি‍।

ভেদশিংদসু, ঐখোয়গী চীঞ্জা পীরিবা, অন্নদাতা, ঐখোয়গী লৌমীশিংগী হিংনবগী পাঙ্গলবু মমল লৈনা লৌনরি‍। রিগভেদগী লায়ৱা অমা লৈ –

অন্ননম পতায়েনমহ

ক্ষেত্রনম পতায়েনমহ

মসিগী ৱাহন্থোক্তি

চীঞ্জাক পীরিবশিংদা কোক নোল্লু

লৌমীশিংবু ইকায়খুম্নৌ

কোরোনাগী চিরবা তাঞ্জাসিদসু, ঐখোয়গী লৌমীশিংনা মখোয়গী থৌদাং য়াবা ঙম্বগী মতিং অদু উৎলি‍। ঐখোয়গী লৈবাকসিদা অসিগুম্বা মতমসিদা মমাঙ চহীগা চাংদম্নবদা নিংথম মহৈ মরোংশিং হুনবগী চাং চাদা ৭ হেনগৎলে‍। লৌ হুনবগী চাং চাউরাক্না চাদা ১০, হৱাই চেংৱাইগীনা চাদা ৫গী ময়াদা, কোর্স সিরিএলশিংগীনা চাদা ৩গী ময়াদা, থাউ মরূশিংগীনা চাদা ১৩গী ময়াদা অমদি লশিংগীনা চাদা ৩গী ময়াদা হেনগৎলে‍। মসিগীদমক্তা ঐনা ঐখোয়গী লৈবাকসিগী লৌমীশিংবু তরাম্না ওক্লি… ঐনা মখোয়গী হোৎনবা কনববু ইকায়খুম্নরি‍।

ঐগী নুংশিরবা লৈবাক মীয়ামশিং, কোরোনাগী মতম অসিদা, লৈবাক অসিনা চপ মান্নবা মতমদা তোঙান তোঙানবা মায়কৈদা লান্থেংনরি‍। অদুবু মতম অসিদসু, পুক্নীংদা তত্তনা হংলিবা ৱাহঙদি ঐগী অঙাঙ ওইরিবা মরূপশিংনা য়ুমদা মতম কুইনা লৈরকপা অসিদা মখোয়না কমদৌনা মতম লেল্লিবগে হায়বসিনি‍।

মরম অসিননি, ঐনা মালেমগী তোপ তোপ্পা চাংয়েং ওইরিবা চীল্দ্রেন য়ুনিভর্সিতী ওফ গান্ধীনগর, ভারত লৈঙাক্কী ৱুনেম এন্দ চাইল্দ দিবেলপমেন্ত মন্ত্রালয়, মহৈ মশিংগী মন্ত্রালয়, মাইক্রো-স্মোল অমদি মেদিয়ম এন্তর্প্রাইজেসকা পুন্না ঐখোয়গী অঙাঙশিংগীদমক ঐখোয়না করি তৌবা য়াবগে হায়না খন্নরি‍। মসি ঐগীদমক্তদি য়াম্না কান্নবা অমদি নুংঙাইবা ৱাফম অমনি, মরমদি মায়কৈ অমদা মসিনা ঐগীদমক্তদি করিগুম্বা অনৌবা  খরা খঙনবগী অমদি তম্নবগী তাঞ্জা অমা ওইরে‍।

মরূপশিং, ঐখোয়না খন্ন-নৈনখিবা হীরম অদুদি – শান্নপোৎনি অমদি মরূওইনা ভারতকী শান্নপোৎশিংনি‍। ঐখোয়না কমদৌনা ভারতকী অঙাঙশিংদা অনৌবা শান্নপোৎ ফংহনগদগে, কমদৌনা ভারতনা শান্নপোৎ পুথোকপগী অচৌবা মকোন অমা ওইবা ঙমগদগে হায়বসিনি‍। অদুগা ‘মন কী বাত’ তাবিরিবা মমা মপা ওইবশিংদা ঐনা নুংঙাইতবা ফোঙদোকচরি মরমদি মসিগী মতুংদগীদি মখোয়না শান্নপোৎ লৈবীনবগী অনৌবা অহেনবা দিমান্দ খরা তাবা ফংলগনি‍। মরূপশিং, শান্নপোৎশিংনা থবক থৌরমশিং মপুং ফাহল্লি, মখোয়না ঐখোয়গী পুক্নীংগী অপাম্ববু মশা পান্দুনা পায়হল্লি‍। শান্নপোৎশিংনা নুংঙাইহনবতা নত্তনা মখোয়না পুক্নীং ৱাখলবু শেমগৎলি অমদি মায় পাক্নবগী লম্বী অমসু তাকই‍। ঐনা মফম অমদা গুরুদেব রবিন্দ্রনাথ তেগোরনা শান্নপোৎকী মরমদা পাখিবদা, খ্বাইদগী ফবা শান্নপোত্তি শাবা লোইশিন্দবদুনি; অঙাঙশিংনা শান্ন-শান্নদুনা লোইশিনবা শান্নপোত্তুনি হায়বা ৱাফমসিনি‍। গুরুদেব তেগোরনা হায়রমবদা মহাক্না অঙাঙ ওইরিঙৈ মতমদা মহাক্না মহাক্কী শান্নপোৎশিং য়ুমদা ফংবা পোৎলমশিংনা মশাগী ৱাখল পুথোকচরগা শেমজরম্মি অমদি মমান্নবশিংগী শান্নখি‍। অদুবু নোংমদি অহলশিংনা অঙাঙ ওইরিঙৈগী নুংঙাইবতনা থল্লবা মীৎকুপতুদা অপনবা পীরক্লম্মি‍। কমদৌনা থোকখিবনো হায়বদা নোংমা মহাক্কী মরূপ অমনা মপান লমদগী পুশিল্লকপা অচৌবা অমদি ফজরবা শান্নপোৎ অমা পুরক্লম্মি‍। মতমদুদা মখোয়গী পুক্নীং অদু শান্নবগী মহুত্তা শান্নপোৎ অদু উত্থোকপরোমদা ওনশিনখি‍। শান্নরিবা মশান্নদুগী মহুত্তা শান্নপোৎ অদুনা ময়ামদুগী পুক্নীং চিংশিনবগী মফম ওইরকখি‍। অঙাঙ অদু হান্নদি শান্নদুনা ময়ামগা পুল্লম্মি, অমদি শান্নবদা পুক্নীং লুপ্লম্মি; হায়রিবা অঙাঙ অদু ময়াম মরক্তগী তোঙান্না তাবা হৌরক্লম্মি‍। মায়কৈ অমদা অঙাঙ অতৈদগী তোপ তোপ্পগী ৱাখল্লোন অমনা মহাক্কী পুক্নীংবু খুদুম চনখিরম্মি‍। মমল তাঙলবা শান্নপোৎ অদুদা শেমদোক্নবগী পোৎশক অমত্তা য়াওরমদে; নৎৎত্রগা তম্নবগী মচাক অমতা য়াওরমদে‍। মদুনা হৈশিংলবা অঙাঙ অমবু নমথখিরম্মি, লুমশিনখিরম্মি অমদি ময়োল খুইথহল্লম্মি‍। শান্নপোৎ অদুনা পোঙজবা, মরল মথুম লৈবা অমদি নোঞ্জবা হৈতবা মতৌ উৎলম্মি, অদুবু মদুনা অঙাঙ অমগী হৈশিংলবা ৱাখল্লোন শেনগৎপগী অমদি চাউখৎলকপগী ময়োলবুদি থৎখিরম্মি‍। শান্নপোৎ অদু লৈহৌখি অদুবু মশান্ন অদুদি লোইশিনখি অমদি অঙাঙ অদুগী ৱাখল ময়োল চোঙলকপসু লেপখিরম্মি‍। মরম অসিনা গুরুদেবনা হেক হেক হায়বদা শান্নপোৎ হায়বসি অঙাঙ অমগী অঙাঙ ওইবগী মতৌদুবু পুথোরকপা অমদি মখোয়গী হৈশিংবগী মতৌ উৎহনবা পোৎশক ওইগদবনি হায়বসিনি‍। নেসনেল এজুকেসন পোলিসীদা শান্নপোৎনা অঙাঙগী পুন্সিগী তোঙান তোঙানবা মশকশিংদা পীবা শাফমগী মতাংদা পুক্নীং য়াম্না চিংশিল্লি‍। শান্ন-শান্ননা তমবা, শান্নপোৎ শাবা তমবা, শান্নপোৎ শাফমদা চৎপা হায়রিবশিং অসি করিকুলমগী শরুক অমা ওইহল্লে‍। মরূপশিং, ঐখোয়গী লৈবাক্তা ইরমদমগী শান্নপোৎকী ইনাক খুল্লবা চৎনবী অমা লৈ‍। অফবা শান্নপোৎশিং শাবদা মখুৎ নাইরবা হৈশিংলবা খুৎহৈবা কয়া লৈরি‍। ভারতকী মফম খরদি শান্নপোৎকী কলচর হায়বদি শান্নপোৎকী মকোন ওইনা চাউখৎলক্লি‍। কর্নাতকাগী রামনগরমদা লৈবা চন্নপত্না, অন্ধ্র প্রদেশগী কৃষ্ণদা লৈবা কোন্দাপল্লি, তামিল নাদুগী থঞ্জবুর, অসামগী ধুবরি, উত্তর প্রদেশকী বরানসীনচিংবা মফম কয়া লৈরি, ঐখোয়না মমীং কয়া পনবা য়াই‍। মালেমগী শান্নপোৎকী ইন্দস্ত্রী অসি লুপা করোর লাখ ৭ হেনবগী মমল লৈ খঙবদা অদোম ঙকপা ফাওরমবা য়াই‍। অসিগুম্লবা চাউরবা লুপা করোর লাখ ৭গী লল্লোন ইতিক্কী মফমসিদা ভারতকী শরুক্তি য়াম্না পীক্লি‍।  হৌজিক পুৱারীগী লন, চৎনবী, খেন্নবা অমদি নহা ওইরিবা মীশিং য়াম্না লৈবা লৈবাক অমনা শান্নপোৎকী কৈথেলদা শরুক মচা অমত্তং কনবসিদা পুক্নীংদা নুংঙাইবা ফাওগদ্রা হায়বসি খন্থদুনা য়েংবীয়ু‍। কৈদৌদসু ফাওরোই, অদোমসু ৱাফমসি তারবা মতুংদা পুক্নীংদা নুংঙাইবা ফাওরোই‍। মরূপশিং শান্নপোৎকী ইন্দস্ত্রী অসি খোঙজেল য়াম্না য়াঙনা চৎলি‍। কোত্তেজ ইন্দস্ত্রী, অপীকপা ইন্দস্ত্রী, এম.এস.এম.ই.শিং ওইজরবসু হীরমসিদা অচৌবা ইন্দস্ত্রীশিং অমসুং লনাই ওন্ত্রপ্রিনরশিংসু মসিগী মনুংদা চল্লি‍। লৈবাকসিনা পুন্না কনমিন্নদুনা য়োকখৎমিন্নবা তাই‍। অসিগুম্বশিংগী মরক্তা অন্ধ্র প্রদেশগী ভিসাখপত্নমগী মিস্তর সি.ভি. রাজু লৈরি‍। মতম অমদা মহাক্কী খুঙ্গঙগী এতি-কোপ্পকা শান্নপোৎশিং অসি য়াম্না পাম্নরম্মি‍। শান্নপোৎশিং অসিগী তোপ তোপ্পা মশক হায়রগদি – মখোয়সি উনা শাবনি, অদুগা অনিশুবদা শান্নপোৎশিং অসিদা অদোম্না চিথেক নাইবা নৎত্রগা কাচিন অমত্তা উবা ফংলোই‍। হায়রিবা শান্নপোৎশিং অসি মায়কৈ খুদিংদা মতুম তাই মরম অসিনা মসিনা অঙাঙ শোকহনবগী মরম অমত্তা লৈতে‍। সি.ভি. রাজুনা মহাক্কী খুঙ্গঙগী খুৎহৈবশিংগা লোয়ননা এতি-কোপ্পিকা শান্নপোৎশিংগী অনৌবা ইহৌ অমা হৌরক্লি‍। অফবা ক্বালিতীগী এতি-কোপ্পিকা শান্নপোৎশিং শাদুনা সি.ভি. রাজুনা হায়রিবা লমদমদুগা শান্নপোৎশিংগী মাঙলুরবা মিংচৎ অমুক হন্না পুরক্লে‍। ঐখোয়না শান্নপোৎকী খুত্থাঙদা তৌবা য়াবা থবক অনিদি – ঐখোয়গী পুন্সিগী হৌখ্রবা মিংচৎশিং অমুক হন্না পুরকপা অমদি ঐখোয়গী তরং তরংবা তুংগী পুন্সি অমা শেমগৎপা হায়বসিনি‍। ঐগী স্তার্ত-অপগী মরূপশিংদা, ঐখোয়গী অনৌবা ওন্ত্রপ্রিন্যুরশিংদা ঐনা হায়রি – শান্নপোৎশিংগীদমক পুনশিন্সি… ঐখোয় পুনশিন্দুনা শান্নপোৎ পুথোকসি‍। মীপুম খুদিংমক্কী ওইনা হৌজিক ইরমদমগী শান্নপোৎশিংগীদমক খোঞ্জেল থোকপা  মতম্নি‍। লাক্লো, ঐখোয় ঐখোয়গী  নহাশিংগীদমক অফবা মখলগী শান্নপোৎশিং শারসি‍। শান্নপোৎশিং অসি অঙাঙ ওইবগী মতৌবু শাত্তোকহনবা অমদি মোমোন মীনোক পুরকপা ঙমবা ওইগদবনি‍। মহৌশাগী অকোয়বগী ফীভমগসু চানবা শান্নপোৎ ঐখোয় শাসি‍।

মরূপশিং, মতৌ অসুম্না কম্প্যুতর অমসুং স্মার্তফোনগী মতম অসিদা, কম্প্যুতর গেমশিংগী চৎনবী অমসু  চাউনা লাক্লি‍। হায়রিবা মশান্নশিং অসি অঙাঙ অমসুং অহল খাক্তনা শান্নরি‍। অদুবু হায়রিবা মশান্নশিং অসিদসু মখোয়গী থীমশিংদি কান্নদবনা অয়ামবা ওইরি‍। ঐখোয়গী লৈবাক অসিদা ৱাখল, ৱাখল্লোন কয়া লৈরি; ঐখোয়গী পুৱারী য়াম্না ইনাক খুল্লি‍। ঐখোয়না মদুদা য়ুম্ফম ওইদুনা গেম শেমবা য়াবরা? ঐনা লৈবাকসিগী হৈশিংলবা নহাশিংদা হায়রি – ভারত্তা গেম শেম্মু অমদি ভারত্তা য়ুম্ফম ওইবা গেমসু শেম্মু‍। মসিমসু হায়রি, মশান্ন অসি হৌহল্লসি! মরম অসিনা ঐখোয় হীরমসিদা মায় ওনশিল্লসি‍।

মরূপশিং, ভর্চুএল গেমশিং ওইরবসু, শান্নপোৎশিং ওইরবসু ইরোমদোম লেপচবা ভারত কেম্পেন্দা পুম্নমক্না মরুওইবা থৌদাং য়াগদৌরিবনি অমদি মদুদা খুদোংচাবশিংসু তাদুনা লৈরবনি‍। চহী চাম্মগী মমাঙদা নন-কোওপরেসনগী ইহৌ হৌরকপদা গজান্ধীজিনা ইরমখি – “নন-কোওপরেসন ইহৌ অসি লৈবাক মীয়ামদা মখোয়গী মশানা মশাবু ইকায়খুম্নজবা অমদি মখোয়গী মপাঙ্গলদুবু খঙহন্নবা থৌরাং অমনি”‍।

ঙসি, ঐখোয়না লৈবাকসিবু মরোমদোম লেপচবা ঙম্নবা হোৎনরকপা  মতমদা ঐখোয়না চপ চানা থাজবা অমগা লোয়ননা চঙশিনগদবনি; লৈবাকসিবু হীরম খুদিংদা মরোমদোম লেপচবা ঙমহনগদবনি‍। নন-কোওপরেসন ইহৌগী মশক্তা হুনখিবা মরূদু হৌজিক্তি মরোমদোম লেপচবা ভারতকী খোঙনাং পাম্বী অমদা ওন্থোকপা হায়সি ঐখোয় পুম্নমক্কী থৌদাং ওইরে‍।

ঐগী নুংশিরবা লৈবাক মীয়ামশিং, ভারত মচাশিংনা অনৌবা ৱাখল্লোন অমসুং পাম্বৈশিং পীবগী লমদা তৌবা ঙম্বশিং মীপুম খুদিংমক্না খঙনরে, অদুগা কত্থোকপা অমদি পুক্নীং ইহুল খঙবা হায়বা ৱাফমশিংসি লৈরবা মতমদা হায়রিবা মঙম অসিগী পনখৈ লৈরোই‍। থাসিগী হৌরকপা মতমদা লৈবাকসিগী নহাশিংগী মফমদা এপ পুথোকপগী চেলেঞ্জ অমা থমখি‍। ঐখোয়গী নহাশিংনা হায়রিবা আত্ম নিরভর ভারত এপ ইনোভেসন চেলেঞ্জ অসিদা ইচঙ থৌনা শরুক য়াখি‍। এন্ত্রী লিশিং ৭গী ময়াদা ফংখি; মসিগী মনুংদসু, শরুক অহুম থোকপগী অনিগী ময়াদি অনিশুবা অমদি অহুমশুবা থাক্কী ময়োল্লমশিংদা লৈবা নহাশিংনা শেম্লকপনি‍। মসি মরোমদোম লেপচবা ভারতকী, লৈবাকসিগী তুংগীদমক য়াম্না য়াইফরবা খুদম্নি‍। আত্ম নিরভর ভারত এপ ইনোভেসন চেলেঞ্জকী মহৈ উরবদি অদোম শোয়দনা পেনগনি‍। নীংথিনা খন্দোক খঞ্জিন তৌরবা মতুংদা তোঙান তোঙানবা কাঙলুপ্তা এপ দজন অনিগী ময়াদা মনাশিং পীখি‍। হায়রিবা এপশিং অসি খঙজিনহৌরো অমদি মখোয়গা শম্নহল্লো‍। অদোমসু অসিগুম্বা এপশিং শেম্নিংবগী ইথিল পোকহল্লকপসু য়াই‍। হায়রিবশিংসিগী মনুংদা ‘কুতুকি কিদ্স লর্নীং এপ’ কৌবা অমা য়াওরি‍। মসি অঙাঙশিংনা ঈশৈ অমসুং ৱারীগী খুত্থাঙদা চৈশিংলোন অমদি কাংলোনগী মরমদা লায়না তমবা য়াবা ইন্তরেক্তিব এপ অমনি‍। মসিদা থবক থৌওংশিং অমসুং গেমশিংসু  য়াওরি‍। অসুম্না মাইক্রো ব্লোগ্গিং ফম্পাক্কী এপ অমসু য়াওরি‍। মসিগী মমীং ককু কৌই‍। মসিদা ঐখোয়না ঐখোয়গী ৱাখল্লোনশিং ফোঙদোকপা অমদি ইমালোনদা ৱাহৈ, ভিদিও নৎত্রগা ওদিওগী খুত্থাঙদা ৱারী ৱাতায় তৌনবা য়াই‍। মতৌঔ অসুম্না চিঙ্গারি এপসি নহাশিংগী মরক্তা পাম্নবা হেনগৎলক্লি‍। অস্ক সর্কার কৌবা এপ অমসু য়াওরি‍। মসিদা অদোম্না চেত বোতকী খুত্থাঙদা ৱারী  ৱাতায় তৌবা য়াই অমদি লম্বী অহুম – ৱাহৈ, ওদিও অমদি ভিদিওগী খুত্থাঙদা লৈঙাক্কী স্কিম অমা হেক্তগী মতাংদা মরীক চুম্বা ইন্ফোর্মেসন ফংবা য়াই‍। মসিনা অদোমদা চাউনা মতেং ওইগনি‍। স্তেপ সেত গো কৌবা অতোপ্পা এপ অমসু লৈরি‍। মসি ফিতনেস এপনি অমদি মসিনা অদোম্না কয়া য়াম্না খোঙনা চৎলবগে, অদোম্না কেলোরি কয়া য়াম্না তুমহনখ্রবগে হায়বশিং য়েংশিল্লি; মসিনা দেতাশিং য়েংশিন্দুনা অদোমবু তিঞ্জঙ কায়জঙদনা লৈবদা পুক্নীং থৌগৎলি‍।

ঐনা খুদম খরখক পনবনি‍। অতোপ্পা এপ কয়া অমসু  চেলেঞ্জ অসিদা মায় পাকখি‍। ইস ইক্বেল তু, বুক্স এন্দ এক্সপেন্স, জোহো ৱর্কপ্লেস অমদি এফ.তি.সি. তেলেন্ত নচিংবা লল্লোন ইতিক্কী অমদি গেমিং এপশিংসু য়াওরি‍। মখোয়সিং অসি নেততা থিরগা হায়রিবা এপশিংসিগী মতাংদা ৱাফম কয়া থেংনবিগনি‍। মাঙদা থোরকউ – অনৌবা ৱাখল্লোন খরা পুথোকউ; থবক খরা পায়খৎলু‍। ঙসি অপীকপা স্তার্ত-অপ ওইনা অদোম্না হোৎনখিবা অসিনা হয়েংদি অচৌবা কম্পেনী ওল্লক্কদৌরিবনি অমদি মালেমগী ভারতকী খুদম ওইরক্কদৌরি‍বনি‍। ভসি মালেমসিদা লৈরিবা অচৌবা কম্পেনীশিং অসি মতম অমদা স্তার্ত-অপশিং ওইরম্লিবনি‍ হায়বসি অদোম্না কাউরোইদবনি‍।

নুংশিরবা লৈবাক মীয়ামশিং, ঐখোয়গী অঙাঙশিংনা অমদি ঐখোয়গী মহৈরোয়শিংনা মখোয়গী খ্বায়দগী ফবা মতিক মঙম উত্থোক্নবগীদমক মখোয়গী তৌবা ঙম্বদু উত্থোকপিয়ু; লোয়ননা মচি ওইবা চীঞ্জাক অমসুং নীংথিনা য়োকপী-থাকপীবনসু অচৌবা থৌদাং লৌরিবনি‍। সেপ্তেম্বর থা অসি লৈবাক পুম্বদা ন্যুত্রিসন থা ওইনা পাঙথোক্কদৌরি‍। লৈবাক অমসুং মচি ওইবা চীঞ্জাক অনিসি য়াম্না অনকপা মরী লৈনৈ‍। ঐখোয়গী হায়নবা অমা লৈ – “য়থা অন্নম তথা মন্নম” মসিগী ৱাহন্থোক্তি পুক্নীং অমসুং ৱাখল ফবা হায়বসি ঐখোয়না চারিবা চীঞ্জাক্কা হকথেংননা মরী লৈনৈ‍। খঙ-হৈরবশিংনা হায়বদা অঙাঙশিংনা পিবুক্নুংদা লৈরিঙৈ অমদি অঙাঙ ওইরিঙৈ মতমদা মচি ওইবা চীঞ্জাক নীংথিনা  চাবা ফংলিমখৈ মখোয়গী পুক্নীং ৱাখল ফবা হেল্লি অমদি মখোয়না মশা মউ ফনা লৈবা ঙম্মি‍। অঙাঙশিং নীংথিনা য়োক-থাক্ননবা মমাশিংনা অফবা চীঞ্জাক মরাং কায়না চাবা হায়বসিসু চপ মান্ননা মরুওই‍। মচি ওইবা চীঞ্জাক হায়বসিদা অদোম্না চারিবখক্তা নত্তনা কয়া য়াম্না চাবা অমদি কয়াম তোয়না চাবা হায়বসিসু মথৌ তাই‍। মসিনা তাকপদি অদোম্না মথৌ তাবা মচাকশিং নীংথিনা ফংলবরা হায়বসিনি‍। অদোম আইরন, কেলসিয়ম , সোদিয়ম, ভিতামিন চাবা ফংলিবরা নৎত্রগা ফংদবরা হায়বসিনি‍। হায়রিবা পুম্নমক অসি মচি ওইবা চীঞ্জাক্কী মরুওইবা মচলশিংনি‍।

মচি ওইবা চীঞ্জাক্কা মরী লৈনবা ইহৌ অসিদা মীয়াম্না শরুক য়াবা হায়বসি য়াম্না মরু ওই‍। মীয়াম্না শরুক য়াবনা মসিবু মায় হনগদৌরিবনি‍। ঐখোয়গী লৈবাকসিদা হৌখিবা চহী খরসিদা, মায়কৈ অসিদা থরাং কয়া লৌখৎখ্রে‍। মরুওইনা ঐখোয়গী খুঙ্গঙশিংদা, মীয়াম্না শরুক য়াদুনা মসিবু মীয়ামগী ইহৌ অমা ওন্থোক্লে‍। ন্যুত্রিসন চয়োল ওইরবসু ন্যুত্রিসন থা ওইরবসু, থৌরাং অসিগী খুত্থাঙদা মীয়ামদা হেন্না হেন্না পাক শন্না খঙহল্লি‍। মহৈ তম্ফমশঙশিংসু মসিদা য়াওশিনহল্লে‍। অঙাঙশিংগী মরক্তা চাংদম্নবা হেলহন্নবা থৌরাং পায়খৎলি, মীয়ামদা পাক শন্না খঙহন্নবসু হোৎনরি‍। সেক্সন অমদা ক্লাস মোনিতর অমা লৈবগুম্না ন্যুত্রিসন মোনিতর অমা লৈগদবনি অদুগা রিপোর্ত কার্দ লৈবগুম্না ন্যুত্রিসন কার্দসু হৌদোক্কদবনি‍। হায়রিবশিং অসি হৌজিক হৌদোক্নবা চঙশিল্লিবা থৌরাংশিংগী মরক্তা খরনি‍। ন্যুত্রিসন থা মনুংসিদা, মাই গোভ পোর্তেলনা চীঞ্জাক অমসুং মচি ওইবা মচলগী মতাংদা কুইজ অমা পাঙথোক্কদৌরি, অমদি মিম চাংদম্নবা অমসু পাঙথোক্কদৌরি‍। মরম অসিনা মসিদা শরুক য়াবীয়ু অমদি অতৈবুসু পুক্নীং থৌগৎপিয়ু‍। মরূপশিং, করিগুম্বা অদোমদা গুজরাত্তা লৈবা সর্দার বল্লবভাই পতেলগী স্তেচু ওফ য়ুনিতীদা চৎপগী খুদোংচাবা ফংখিদ্রগসু, মসিনা লাইচৎ অসিগী মতুংদা হাংদোরকপা মতমদা, অদোম্না মফমসিদা চৎনবগী তাঞ্জা ফংলকখিগনি‍। মফমদুদা তোপ তোপ্পা মখলগী ন্যুত্রিসন পার্ক অমা শেমগৎলে‍। অদোম্না মফমদুদা নুংঙাইরবা থৌওং কয়াগা লোয়ননা মচি ওইবা চীঞ্জাক্কী মরী লৈনবা মহৈ মশিং কয়া উবা ফংগনি‍।

মরূপশিং, ভারত অসি চীঞ্জাক অমসুং থক্নবা মহী মনাইশিংগী লমদা খেন্নবা মখল কয়া লৈবা অচৌবা লৈবাক অমনি‍। ঐখোয়গী লৈবাকসিদা তোঙান তোঙানবা থারুক তরুক লৈ, অইং অশাগী ফীভম খেন্নবগী মতুং ইন্না তোঙান তোঙানবা মফমশিংদা তোঙান তোঙানবা মহৈ মরোংশিং পুথোকই‍। মরম অসিনা অকক্নবা মফম অমদা লৈরিবা থারুক্কী মতুং ইন্না, লমদমদুগী চানবা চেং-হৱাই, উহৈ-ৱাহৈ অমদি মফমদুদা থাবা মনা মশিংশিং য়াওহন্নবা নীংথিনা চাং কক্লবা অমদি মচি ওইবা মচাক মরাং কায়না য়াওরবা দাইতকী প্লান অমা শেমগদবনি‍। খুদম ওইনা হায়রবদা, রাগি/ ফিঙ্গর মিল্লেত অমসুং জোৱার/সোর্ঘুমনচিংবা কোর্স গ্রেনশিং য়াওরবা মিল্লতশিং অসি কান্নরবা মচি ওইবা চীঞ্জাকশিংনি‍। এগ্রিকলচরেল ফন্দ ওফ ইন্দিয়া অমা শেমগৎলি, মসিদা দিস্ত্রিক খুদিংমক্তা থাবা মহৈ মরোংশিংগী অমদি মখোয়গী মচি ওইবা মচলগী মরমদা মরীক চুম্বা ৱাফম য়াওগনি‍। ফন্দ অসিনা অদোম পুম্নমক্তা চাউনা কান্নবা পীগনি‍। লাক্লো, ন্যুত্রিসন থা মনুংসিদা ঐখোয় মীপুম খুদিংদা মচি ওইবা চীঞ্জাক চাননবা অমদি হকচাঙ ফনা লৈননবা পুক্নীং থৌগৎলসি‍।

নুংশিরবা লৈবাক মীয়ামশিং, চয়োল খরগী মমাঙদা ঐখোয়না ঐখোয়গী নীংতম্বগী নুমিৎ পাঙথোক্লিঙৈদা, নুংঙাইরবা পাউ অমনা ঐগী পুক্নীং চিংশিনখি‍। পাউ অসি ঐখোয়গী থৌনা ফরবা লান্মী অনিগী মরমদনি‍।অমনা সোফিনি অদুগা অতোপ্পা অমদুনা ভিদানি‍। সোফি অমসুং ভিদা চীফ ওফ আর্মী স্তাফ ‘কমেন্দেসন কার্দ’ পীখিবা ভারত লান্মীগী হুই অনিনি‍।সোফি অমসুং ভিদানা ইকায়খুম্নবা অসি মখোয়না পুক্নীং চঙনা লৈবাকপু ঙাকথোক্নবগীদমক পাঙথোকখিবা থৌদাংগীদমক ফংখিবনি‍। ঐখোয়গী খুৎলয়া পায়বা লান্মীশিং অমসুং ঙাকশেলগী লান্মীশিংগী লৈবাক্কীদমক হিংলিবখক্তা নত্তনা লৈবাক্কীদমক থৱায় কৎখ্রবা থৌনা ফরবা হুই কয়াসু লৈরি‍। অসুগুম্বা হুইশিং অসিনা মশিং থিঙমদ্রবা বোম পোখায়গদবা অমদি তেরোরিস্তশিংগী খুজিল থৌরাং কয়া মায় পাকহনদনবা থবক্তা অচৌবা মরুওইবা থৌদাং লৌখি‍। মতম খরগী মমাঙদা লৈবাক্কী ঙাকশেলগী লমদা হুইশিংগী থৌদাংশিংগী মতাংদা অকুপ্পা ৱারোল কয়া খঙখি অমদি ৱারী কয়াসু তাবা ফংখি‍। বলরাম কৌবা অসিগুম্বা হুই অমনসু অমরনাথ য়াত্রাগী লম্বীদা খুৎশু খুৎলায়শিং থম্লমবা মনম নমদুনা পুথোকখি‍। হুই ভাবনানা ২০০২দা আই.ই.দি. থিখি‍। আই.ই.দি. লৌথোক্নবা হোৎনরিঙৈদা তেরোরিস্তশিংনা বোম অমা পোকখায়হল্লকপদগী হুই অদু থৱায় থাখি‍। চহী অনি অহুমগী মমাঙদা ছত্তিসগরগী বিরাপুরদা, সি.আর.পি.এফ.কী স্নিফর হুই ক্রেক্করসু আই.ই.দি. পোকখায়বা থৌদোক অমদা থৱায় থাখি‍। অদোম্না নুমিৎ খরনিগী মমাঙদা বীদ পুলিসনা মখোয়গী হুই রোক্কীদা ইকায়খুম্নবা মপুং ফানা কায়ন-থৌরম পাঙথোকপগী য়াম্না পুক্নীং নুংশিবা সীন অমা উবা ফংলমগনি‍। রোক্কীনা পুলিসপু কেস ৩০০ হেনবগী ৱারোয়শিন পুরকপদা মতেং পাংখি‍। দিজাস্তর মেনেজমেন্ত অমদি মী কনবগী মিসনশিংদা হুইশিংগী মশক থোকপা থৌদাং লৈ‍। ভারত্তা এন.দি.আর.এফ., নেসনেল দিজাস্তর রেস্পোন্স ফোর্সকী অখন্ননা তাকপী তম্বীরবা হুই দজন কয়া লৈ‍। য়ুহার হায়বা মতমদা, বিল্দিং নীংখায়বা মতমদা, হায়রিবা হুইশিং অসি অতেক অকায়শিংগী মরক্তা চপ্তুনা লৈবা মী থিবদা য়াম্না হৈথোই শিংথোই‍।

মরূপশিং, ভারতকী হুই মখলশিংগী অসি য়াম্না ফৈ অমদি তৌবা ঙম্মি হায়না ঐঙোন্দা হায়‍। ভারতকী হুই মখলশিংগী মরক্তা মুধোল হাউন্দ অমদি হিমাচলি হাউন্দশিং য়াম্না ফবা হুইশিংনি‍। রাজাপলায়ম, কন্নি, চিপ্পিপরাই অমদি কোম্বাইসু অফবা ভারতকী হুই মখলশিংনি‍। মখোয়সি মমল য়ামদে অমদি ভারতকী অকোয়বগী ফীভম অমদি ঈশিং নুংশিৎকা হেন্না চাশিন্নৈ‍। হৌজিক্তি ঐখোয়গী সিক্যুরিতী এজেন্সীশিংনা অসিগুম্বা ভারতকী হুই মখলশিং অসি মখোয়গী সিক্যুরিতী স্ক্বাদতা লৌশিল্লি‍। কুইদ্রিবা মতমদা, মুধোল হাউন্দ হুইশিং অসি ত্রেন তৌদুনা আর্মী, সি.আই.এস.এফ. অমসুং এন.এস.জি.গী দোগ স্ক্বাদতা লৌশিনখ্রে; কোম্বাই হুইসু সি.আর.পি.এফ.তা লৌশিনখ্রে‍। মখোয়বু হেন্না ফগৎহন্নবা অমদি হেন্না কান্নবা ওইহন্নবা ইন্দিয়ন কাউন্সিল ওফ এগ্রিকলচর রিছর্চনা ভারতকী হুই মখলশিংগী মতাংদা থিজিল্লি‍। হায়রিবা হুই মখলশিংসিগী মরমদা ইন্তরনেত্তা থিয়ু অমদি মখোয়গী মরমদা হেন্না খঙজিল্লু – হায়রিবা হুই মখলশিং অসিগী ফজবা অমদি মতিক ময়াইনা অদোমবু ঙকহনগনি‍। মথংদা অদোম্না হুই অমা য়োক্কে খল্লক্লবদি, অসিগুম্বা ভারতকী হুই মখলসিদগী অমা য়ুমদা পুরক্নবা ৱাখল খনবীয়ু‍। আত্মনির্ভর ভারতনা মীয়ামগী লাইৱা ওইরক্লিবা মতমসিদা মসিগী ইথিলদগী হীরম অমবু করম্না য়ৌহন্দনা থমগদগে?

ঐগী নুংশিরবা লৈবাক মীয়ামশিং, ঙসিদগী নুমিৎ খরগী মতুংদা সেপ্তেম্বর ৫দা ঐখোয়না ওজাগী নুমিৎ পাঙথোক্কদৌরি‍। ঐখোয়গী পুন্সিগী লম্বীদা ঐখোয়না ফংখ্রিবা মায় পাকপশিংগী মরমদা খল্লুবা মতমদা ওজা অমা নৎত্রগা অমা হেক্তা নীংশিংলকই‍। থুনা হোংলক্লিবা মতম অমসুং কোরোনা লাংফমনা ঐখোয়গী ওজাশিংদা অনৌবা শীংনবা অমা থেংনরি‍। ঐখোয়গী ওজাশিংনা শীংনবা অসিবু লৌশিনবখক্তা নত্তনা মসিবু খুদোংচাবা তাঞ্জা অমা ওন্থোরকপসিদা ঐঙোন্দা নুংঙাইবা ফাওই‍। মহৈ মশিং তমবদা তেক্নোলোজী হেন্না হেন্না শীজিন্ননবা, অনৌবা খুৎলায়শিং হাপচিন্নবা, মহৈরোয়শিংবু অপনবা লৈতনা মতেং পাংননবা লম্বী কয়া ঐখোয়গী ওজাশিংনা শীজিন্নরি… মখোয়না হায়রিবা থৌওংশিং অসি মখোয়গী মহৈরোয়শিংদসু থংথরম্মি‍। ঙসিদি লৈবাক শিনবা থুংনা, হীরম খরদা নৎত্রগা খরদা অনৌবা ৱাখল্লোনশিং পুথোক্নরক্লি‍। মহৈরোয়শিং অমসুং ওজাশিংনা অনৌবা খরা তৌননবা পুনশিন্নরি‍। নেসনেল এজুকেসন পোলিসীনা লৈবাকসিদা অনৌবা অহোংবা অমা পুরক্কনি অমদি ঐখোয়গী ওজাশিংনা মসিগী কান্নবা মশকশিং ঐখোয়গী মহৈরোয়শিংদা মমুৎ তানা খঙহনবগী মশক থোকপা থৌদাং য়ারক্কনি হায়না ঐনা থাজৈ‍।

মরূপশিং, মরূওইনা ঐগী ওজা ওইরিবা মরুপশিং, ২০২২দা ঐখোয়গী লৈবাকসিনা নীং তম্বগী চহী ৭৫ শুবগী থৌরম পাঙথোক্কদৌরি‍। নীং তমদ্রিঙৈ মমাঙদা, ঐখোয়গী লৈবাক্কী নীংতমবগী লানগী শাংলবা পুৱারী লৈ‍। মতমদুদা, নীংতম লালহৌবশিংনা থৱায় কৎখিদবা অমদি লৈবাক্কীদমক কত্থোকলখিদবা লৈবাকসিগী মফম অমত্তা লৈতে‍। ঙসিগী মীরোলসিদা ঐখোয়গী মহৈরোয়শিংনা অসিগুম্বা নীংতম লালহৌগী লান্মীশিং খঙজিনবা; মখোয়গী ৱাখল্লোনশিং মখোয় মখোয়গী দিস্ত্রিক অমদি এরিয়াশিংদা ইথিল পীবা মথৌ তাই‍; নীংতম ইহৌদা করি থোকখিবগেও কনানা মপুন্সি কৎখিবগে, কনাবুনা কৈশুমশঙদা কয়াম কুইনা থমখিবগে – হায়বনচিংবা নীংতম লানগী পুৱারীশিংগী মতাংদা অমদি মখোয়গী লমদমদুদা থোকলখিবা থৌদোকশিংগী মতাংদা ঐখোয়গী মহৈরোয়শিংদা খঙহল্লবা মতমদতা ঐখোয়গী মহৈরোয়শিংগী পুন্সিদা অদুগুম্বা ইথিলশিংদুগী মমী তারক্কনি‍। মায়কৈ অসিদা থবক কয়া তৌবা মথৌ তারি অমদি ঐখোয়গী ওজাশিংনা মসিদা মশক থোকপা থৌদাং লৌরি‍। খুদম ওইনা হায়রবদা, অদোম্না লৈরিবা দিস্ত্রিক্তুদা হৌখিবা চহীচাসিদা নীংতম লানগী মতমদা করিগুম্বা থৌদোক থোকখিবা লৈবরা? মসিনা ঐখোয়গী মহৈরোয়শিংগী থিজিনবগী হীরম অমসু ওইগনি‍। স্কুলশিংগী খুৎনা ইবা লোগ অমা শেমবা য়াই… করিগুম্বা নীংতম ইহৌগা মরী লৈনবা মফম অমা অদোমগী মনাক্তা লৈরবদি মফমদুদা মহৈরোয়শিংগী খোঙচৎ অমা শীন্বিবা য়াই‍। মহৈ তম্ফমশঙ খরগী মহৈরোয়শিংনা ঐখোয়গী নীংতম্বগী চহী ৭৫ শুরকপগী থৌরমবু মশক তাক্নবা ঐখোয়গী নীংতম ইহৌগী হিরোশিংগী মতাংদা শৈরেং অমসুং থিএত্রিকেল ৱারী ৭৫ ইনবা ফিরেপ লৌবা য়াই‍। অদোমগী হোৎনজমল অদুনা মতমগী ইরোলনুংদা মাঙখ্রবা লৈবাক্কীদমক হিংখিবা অমদি থৱায় কৎখিবা শিংথানবিদ্রবা হিরো লাখ কয়াগী ৱারী মাঙদা পুথোরক্কদৌরিবনি‍। ঐখোয়গী নীংতম্বগী চহী ৭৫ শুরকপসিদি অসিগুম্বা মীওইশিংগী থৌদাংশিং নীংশিংবা অমদি মশক খঙবা হায়বসিনা মখোয়গী মফমদা মতিক চাবা ইকায়খুম্নবা ওইগনি‍। সেপ্তেম্বর ৫দা ওজাগী নুমিৎ পাঙথোক্কদৌরিবসিগা লোয়ননা ঐনা ঐখোয়গী ওজা ওইরিবা মরূপশিংগী মফমদা শেম শাবা হৌদুনা মীপুম খুদিংমকপু হীরমসিদা চিংশিন্দুনা পুরক্নবা ফীভম অমা খুৎশম্ননা শেমগৎপিনবা পুক্নীং চিংশিঞ্জরি‍।

ঐগী নুংশিরবা লৈবাক মীয়ামশিং, লৈবাক অসিনা মহাক্না থোংদোরক্লিবা চাউখৎপগী লম্বীদা চৎলি অমদি খোঙচৎ অসি মীপুম খুদিংমক্না খোঙচৎসিগী শরুক অমা ওইনা অমদি লম্বীসিদা চৎলিবা মীওই অমা ওইনা শরুক য়ারবখক্তদা নুংঙাইবা খোঙচৎ ওইগনি‍। মসি ওইহন্নবগীদমক, মীপুম খুদিংমক হকচাঙ ফনা অমদি পুক্নীং মকা লাম্না লৈবা অমসুং কোরোনাবু মায়থিবা পীননবা ঐখোয়গী অপুনবা থৌদাংগী শরুক অমা ওইমিন্নবা মথৌ তাই‍। “মিতর অনিগী অরাপ্পা, তঙাই ফদনা মায়খুম” সোসিএল দিস্তেন্সিংগী চৎন-পথাপ ঙাকপা অমদি মায়খুম শোয়দনা উপ্পা হায়বা কাংলোন অসি ঙাক্তুনা ঐখোয়গী হকচাঙ ফনা থম্বনা কোরোনা মায়থিবা পীবদা মতেং ওইগনি‍। হায়রিবা চৎন-পথাপশিং অসি ঙাক্না চৎননবা ঐনা অদোমদা নোল্লুকচরি অমদি ঐনা অদোমগী হকচাঙ ফনা লৈনবগীদমক থৌনীজরি‍। হকচাঙ ফনা অমদি নুংঙাইনা লৈবীয়ু হায়বা য়াইফরোল ৱাহৈসিগা লোয়ননা ঐখোয় মন কী বাতকী মথঙগী তাঙ্কক্তা অমুক উনরসি‍। হন্না হন্না থাগৎচরি‍।

খুরুজরি‍।