স্বচ্ছতাগুম্না, ঈশিং য়োকশিনবা অসিসু মীয়াম্না শরুক য়াবা উরক্লিঃ মন কী বাত্তা প্রধান মন্ত্রী মোদী

ঐগী নুংশিজরবা ইরৈবাকচাশিং, খুরুমজরি। ঙসি অসি জনুৱারীগী তারিক ২৬নি। দেমোক্রেসীগী চাউরবা কুমহৈ অসিগীদমক্তা ময়ামদা হন্না হন্না য়াইফ পাউজেল পীজরি। ২০২০গী মান কী বাতকী অহানবা উনবনি, চহী অসিগী অহানবা থৌরম্নি, চহী তরাগী খুজিং অসিগীসু অহানবা থৌরম্নি। মরূপশিং গনতন্ত্র নুমিৎ পাংথোকপনা মরম ওইদুনা ময়ামদা মন কী বাত হায়জবা অসি মতম খরা শেমদোকপনা ফব্রা খন্দুনা শেমদোকচবনি। মরম অসিনা অতোপ্পা মতম অমা শেমজদুনা মীয়ামদা মন কী বাত লান্থোকচরি। মরূপশিং নুমিৎসু হোংলক্লি চয়োল, থা, চহীসু হোংলক্লি। অদুবু ভারত মচাশিংগী থম্মোয়দা ঐখোয় কনাদগীসু হন্থদে, ঐখোয়না করিগুম্বা খরা পাংথোক্কনি হায়বা ৱাখল্লোন অসিদি হোংবা লৈতে। ঐখোয় পাংথোকপা ঙম্মি হায়বা অরেপ্পা ৱাখল্লোন অসিদা ময়াম পুম্নমক লেংদনা লেপলি। লৈবাক অমদি সমাজগীদমক্তা করিগুম্বা খরা পাংথোক্লম্বগী ৱাখল্লোন অসি হান্নদগী হেন্না কনশিল্লক্লি। মরূপশিং, মন কী বাতকী প্লেতফোর্ম অসিদা ঐখোয় অমুক হন্না পুল্লরে। অনৌ অনৌবা হিরমশিংদা নৈনবগী লোয়ননা ইরৈবাকচাশিংগী অনৌ অনৌবা পান্দম ফংলকপবু হরাওবা ফোংদোকপা ওইনা, ভারতকী মায় পাকপগী হরাওবা ফোংদোকপা ওইনা মন কী বাত অসি পুন্না শরুক য়ামিন্নবা, অনৌবা তম্বা অমদি পুন্না চাউখৎমিন্নবগী অরাইবা প্লেৎফোর্ম অমা ওইরে। থা খুদিংগী মীওই লিশিং কয়ানা মখোয়গী ৱাখল্লোন, মখোয়না হোৎনজবা, মখোয়না ফংলকপা ৱাখল সেয়ার তৌরি। মদুদগী সমাজনা করিগুম্বা খরা পাংথোকপগী ৱাখল ফংলি। অসিগুম্বা ৱাখলশিং অসিদগী মীওইশিংগী তোঙানবা হোৎনজবশিংগী ৱাখলদা নৈনবগী খুদোংচাবা অদু ফংজৈ।

কনা অমনা পাংথোক্তুনা উৎলি, অদুদি ঐখোয়সু পাংথোকপা ঙম্মিনা। ৱাফম অসিবু লৈবাক শিনবা থুংনা নৈনদুনা অচৌবা অহোংবা অমা পুরকপা ঙমগদ্রা। মদুবু সমাজকী হৈনবি, চৎনবি অমা ওইনা লৌশিন্দুনা অহোংবা অদু লেংদনা থম্বা ঙমগদ্রা। অসিগুম্লবা ৱাহংশিংগী পাউখুম থি থিদুনা লাকপনা মন কী বাত্তা অপিল খরা, হায়জবা খরা অমদি করিগুম্বা খরা পাংথোক্তুনা উৎনবগী অরেপ্পা ৱাখলগী পরিং অসি লাক্লি। হৌখিবা চহী কয়া অসিদা ঐখোয়না অপিক অপিকপা ৱাফম খরদা ৱারেপ লৌদুনা লাক্লি। মদুদি ‘নো তু সিঙ্গল য়ুজ প্লাস্তিক’, খাদি অমদি ইরমদমগী পোত্থোক লৈবগী ৱাফম, লু নান্নবগী ৱাফম, ইচানুপীশিংবু ইকায় খুম্নবা অমদি মখোয়গী মরমদা চাউথোক্না নৈনবা, ‘লেস কেশ ইকোনোমী’গী মায়োন অমদি মসিবু শৌগৎপা, অসিগুম্লবা য়ামখ্রবা ৱারেপ অসি ঐখোয়গী মন কী বাত অসিদগী ওইখিবনি। অদুবু মসিবু পাঙ্গল হাপ্লিবদি অদোম ময়াম্নি।

ঐহাক্না নুংশিজখ্রবা চিথী অমা ফংজৈ, বিহারদগী শ্রীমান শৈলেসতগী। তশেংবদি হৌজিক মহাক বিহারদা লৈত্রে। মহাক দিল্লীদা লৈদুনা এন.জি.ও. অমদা থবক তৌরি হায়না মহাক্না তাকপীরকই। মহাক্না ইবিরকই, মোদী জী নহাক্না মন কী বাত খুদিংদা অপিল খরা খরা তৌই। মদুদগী ঐহাক্না খরদি থবক ওইনা পাংথোকখ্রে। হন্দক্কী নিংথমথা অসিদা ঐহাক্না য়ুম য়ুমদগী ফী-রোল খোম্লগা দরকার লৈবা মীওইশিংদা য়েন্থোকখি। মন কী বাত্তা হায়খিবা ৱাফম কয়া ঐনা থবক ওইনা পাংথোক্লি। অদুবু অমুক তপ্না তপ্না ঐহাক্না ৱাফম খরা কাউথোকখ্রে। ঐহাক্না অনৌবা চহী লাকপসিদা মন কী বাত্তা চার্তর অমা শেম্লে। মসিদা ৱাফম কয়া পরেং লেংদুনা থম্লি। মীওই কয়ানা অনৌবা চহীনা লাকপদা ন্যু ইয়ার রিজোলুসন শেম্মি। মোদী জী মসি ঐগী অনৌবা চহীগী সোসিয়েল রিজোলুসন্নি। ঐনা খনবদা পুম্নমক অসি অপিক অপিকপা ৱাফম ঙাক্তনি অদুবু অচৌবা অহোংবা অমদি মসিনা পুরকপা ঙম্মি। চার্তর অসিদা অদোমগী ওতোগ্রাফ পীরগা ঐঙোন্দা অমুক হন্না থাবিরক্কেরা। শৈলেস জী অদোম্বু হন্না হন্না থাগৎচরি লোয়ননা য়াইফ পাউজেল পীজরি। অদোমগী অনৌবা চহীগী রিজোলুসনগীদমক মন কী বাতকী চার্তর অসি য়াম্না ইনোবেতিব ওই। ঐনা মসিদা ঐগী য়াইফ পাউজেল ইরগা অদোমগী মফমদা অমুক হন্না শোইদনা থাজরক্কে। মরূপশিং, মাগী মন কী বাতকী চার্তর অসি পারুবদা ঐহাক পুমঙক ঙক্লে। ওন্থোক্না য়ামখ্রবা ৱাফম্নি, হেশ তেগ ওন্থোক্না য়ামখ্রে, লোয়ননা ঐখোয় পুল্লগা পাংথোক্নবসু হোৎনসি। ঐখোয়না ‘সন্দেস তু সোলদিয়র’ পাংথোক্তুনা ঐখোয়গী লান্মীশিংগা থম্মোইগী মরী ফগৎহন্নবা হোৎনখি। খাদিগী মতাংদা ‘খাদি ফোর নেসন, খাদি ফোর ফেশন’ পাংথোক্তুনা খাদিগী পোত্থোকপু হেন্না শিৎনবা হোৎনখি। ইরমদমগী পোত্থোক লৈবা হায়বা ৱাখল্লোন অসি শাগোন্নরি। ঐখোয় ফিৎ ওইরবদি ভারতসু ফিৎ ওইরে হায়বা ৱাখল্লোন অসিনা ইশা ফবগী মতাংদা অহোংবা ৱাখল্লোন অমা পুরকখি। ঐগী অনানবা ভারত নত্রগা স্তেচু লু নান্নবগী হোৎনবা অসিনা লু নানবগী মায়কৈদা মীয়ামগী অচৌবা য়াওল অমা পুরকখি। # ‘নো তু দ্রগস’, # ‘ভারতকী লক্ষমি’, # ‘সেল্ফ ফোর সোসাইতী’, # স্ত্রেস ফ্রী এগজাম্স’, #‘ সুরক্ষা-বন্ধন’, #‘ দিজিতেল ইকোনোমী’, # ‘রোদ সেফতী’ য়ামখ্রে, ওন্থোক্না য়ামখ্রে।

শৈলেস জী অদোমগী মন কী বাতকী চার্তর অসি তশেংনা ওন্থোক্না শাংখ্রে, হোয়, খোংচৎ অসি মখা তানা চত্থমিন্নসি। মসিগী মন কী বাতকী চার্তর অসি অদোমগী অপাম্বা হিরম লৈরগসু হেশ তেগ শিজিন্নরগা পুক্নিং মকা লাম্না সেয়ার তৌবিয়ু। মরূপ মপাং ইমুং মনুং অমদি খ্বাই পুম্নমক্তা মসিগী মরম খংহনবিয়ু। ভারত মচা অমনা খোংথাং অমা থাংবা মতমদা ঐখোয়গী ভারত অসি খোংথাং কোতি ১৩০ থাংলিবনি। লেপ্তনা চৎলু হায়বা ৱাখল্লোন অসিগা লোয়ননা চৎমিন্নরসি।

ঐগী নুংশিজরবা ইরৈবাকচাশিং, ঐখোয়না মন কী ৱাতকী চার্তরগী মতাংদা ৱারী শানরে। লু নানবগী মতাংদা মীয়াম্না থৱাই য়াওখিবগুম্না হৌজিকসু অনৌবা লম অমদা মীয়াম্না থৱাই য়াম্না য়াওনরক্লি মদুদি ঈশিং য়োকশিনবা। ঈশিং য়োকশিনবগীদমক্তা অচৌবা অমদি অনৌবা থৌরাং কয়া লৈবাক্কী মফম খুদিংদা চত্থরক্লি। ৱাফম অসিদা ঐহাক হেন্না নুঙাইজৈ মরমদি মমাংগী নোংজু পন্থাদগী হৌখিবা জল শক্তি অভিয়ান অসিদা মীয়াম্না শরুক য়াম্না য়াবিবদগী হেন্না মায় পাক্না মাংদা চংশিল্লি। মীয়াম্না পুখ্রি, পাৎ অনৌবা থৌরাং তৌরি। খ্বাইদগী নুঙাইবা ৱাফম অমনা খোংজং অসিদা সমাজকী মীওই কাংলুপ খুদিংনা মখোয়না অঙম অঙম্বা মতেং পীরক্লি। রজস্থানগী ঝলোর জিলাদা ইতিহাসকা মরী লৈনবা পুখ্রী অনী অমোৎপা অমদি ফৎতা হৌদিনা পিক থন্না লৈরম্লবনি। অদুদগী ভদ্রায়ুন অমদি থানৱালা পঞ্চায়ৎকী মীওই চা কয়ানা জল শক্তি অভিয়ানগী মথাদা অমুক হন্না নৌনা শেমগৎনবা থৌরাং লৌখৎখি। নোং তারক্ত্রিঙৈ মমাংদা মখোনা পুখ্রিশিং অদুদা পৈশিন্দুানা লৈরম্বা ফৎতা হৌদীশিং অমোৎ অকায়শিং অমদি লৈখোম লৈনাংশিং অদু শেংদোক্লে। খোংজং অসিগীদমক্তা খরনা মশানা থবক য়াওখি, খরনা শেলগী তেংবাং পীখি। মদুগী মহৈ কয়ানা ঙসিদি পুখ্রিশিং অদু মফম অদুগী মীওইশিং অদুগী পুন্সীগী চংদ্রবা য়াদ্রবা পোৎশক অমা ওইরে। উত্তর প্রদেশকী ৱরাবঙ্কিদসু অসিগুম্বা থৌদোক খরা, ৱারী খরা লৈরি।
হেক্তর ৪৩মুক পাক চাউবা সারাহি পাৎ অসি মপুন্সী লোইগদবগী ঙাইদুনা লৈরবনি অদুবু মফম অদুগী খুঞ্জাশিংনা কন্না হোৎনদুনা অনৌবা মপোক অমা পীবিরে। অদুক চাউখ্রবা থবক অদুদা মখোয়না করিগুম্বা অমত্তা ৱাৎহনখিদে। খুঙ্গং অমগী মথংদা অমা, মথং মথং খুৎশম্নদুনা চৎখি। মখোয়না পাৎকী মায়কৈ মরিদা মীতর অমা ৱাংবা পল খাগৎলে। হৌজিক্তি পাৎ অদু ঈশিংনা পিক চোল্লে লোয়ননা অকোয়বগী ফিভমদসু অহোংবা লাক্লে, উচেকশিংগী ফজবা খোংজেলনা মায়কৈ শিনবা থুংনা নিল্লরে।

উত্তরাখন্দগী অলমোরা-হল্দৱানি হায়ৱেদা লৈবা সুনিয়াকোৎ খুঙ্গংদসু মীয়াম্না শরুক য়াবগী অচৌবা খুদম অমা উরি। খুঙ্গংগী খুঞ্জাশিংনা ঈশিংগী অৱাবা অসি কোকহন্ননবগীদমক্তা মখোয় মশানা খুল তান্না ঈশিং য়ৌরকহন্নবগীদমক্তা লেপ্নরে। খুঞ্জাশিংনা পৈশা খাইজিন্নরে, প্লান শেম্লে, মখোয় মশানা থবক শুরে, চাউরাক্না কিলোমীতর অমা লাপ্পদগী পাইপ তিংলে। পম্পিং স্তেসন শেম্লে অদুদগী উনা উনা চহী কুন হেন্না ৱারম্বা অদু কোক্লে। তামিলনাদুদসু বোরৱেলবু ঈশিং য়োকশিন্নবগী পাম্বৈ ওইনা শিজিন্নবা অদু ঐখোয়না উবা ফংলে। লৈবাক পুম্বদা ঈশিং য়োকশিন্ননবগী মরমদা মশিং থিঙমদ্রবা ৱারী কয়া অমা লৈরি। মসিনা অনৌবা ভারত অমা শেম্বগী ৱাখল্লোনদা থৌনা হাপখি। হৌজিক্তি ঐখোয়গী জল শক্তিদা ঐখোয়গী মায় পাকপগী ৱারী কয়া তাননবগীদমক লৈবাক পুম্বা মথুম মরাং হৌরি। ঐনা ময়ামদা হায়জরি মদুদি ঈশিং য়োকশিনবদা অদোম্না লৌখিবা থৌদাংশিং অদুগী ৱারী, ফোতো অমদি ভিদিওনচিংবা অদু #Jalshakti4Indiaদা শোইদনা সেয়ার তৌবিয়ু।
ঐগী নুংশিজরবা ইরৈবাকচাশিং, থোইদোক্না নহা ওইরিবা মরূপশিং, ঙস মন কী বাতকী খুত্থাংদা অসাম সরকার অমসুং অসামগী মীয়াম্না শিন্দুনা খেলো ইন্দিয়া নিংথিনা পাংথোকপা অসিদা হন্না হন্না থাগৎপা ফোংদোকচরি। মরূপশিং জনুৱারী ২২দা গুৱাহাতিদা ৩শুবা খেলো ইন্দিয়া মায় পাক্না পাংথোক্তুনা লোইশিনখ্রে। মসিদা রাজ্যশিংদগী শান্নরোই লিশিং ৬না শরুক য়াখি। শান্নবগী অচৌবা কুমহৈ অসিদা অনৌবা রেকোর্দ ৮০ থুগাইখ্রে, অদুগা ঐহাক্না য়াম্না হেন্না চাউথোকচরিবনা মদুদা রেকোর্দ ৫৬তি ঐখোয়গী ইচানুপীশিংনা থুগায়খি। মসি ইচানুপীশিংগী অচৌবা মায়পাকপনি। ঐহাক্না মায় পাকখ্রবা নহাশিং অমসুং শরুক য়াখিবা পুম্নমকপু য়াইফ পাউজেল অমদি নুঙাইবা ফোংদোকচরি। লোয়ননা খেলো ইন্দিয়াবু মায় পাক্না পাংথোকপদা শরুক য়াখিবা মীওইশিং, ওজাশিং অমদি তেক্নিকেল ওফিসারশিংবু থাগৎপা ফোংদোকচরি।

চহী খুদিংগী খেল্লো ইন্দিয়া মশান্না অসিদা শান্নরোইশিং শরুক য়াবা হেল্লক্লি, মসি ঐখোয় পুম্নমক্কী য়াম্না নুঙাইবা ৱাফম অমনি। মসিনা তাকপদি স্কুল লেবেলগী মশান্না অসিদা মীয়াম্না য়াম্না পাম্নরক্লি হায়বনি। খেলো ইন্দিয়া মশান্না অসি ২০১৮দা হৌদোকখিবনি অদুগা শুপ্নতগী শান্নরোই ৩৫০০না শরুক য়াখি। অদুবু শুপ্নতংগী চহী অহুমদা শান্নরোই লিশিং তরুক হেনখ্রে, হায়বদি শরুক অনি হেল্লবগুম্বনি। মসিতসু নত্তনা শুপ্নতগী চহী অহুম অসিদা মগুন লৈরবা নহা শান্নরোই ৩২০০ পুথোক্লে। মখোয়শিংগী মনুংদা অৱাৎপনা পিক থল্লবা লায়রবা ইমুংগী অঙাং কয়া য়াওরি। খেলো ইন্দিয়া গেম্সতা শরুক য়ারিবা অঙাংশিং অমদি মখোয়গী মমা মপাগী পুক্নিং চেৎপা লেংদবা ৱাখল অসিনা ভারত মচা খুদিংদা অনৌবা ইনোৎ হাপ্লগনি। গুৱাহাতিগী পুর্নিমা মন্দলনা গুৱাহাতি ম্যুনিসিপাল কোর্পোরেসন্দা শেংবা খোৎপগী থবক তৌরি, অদুবু মাগী মচানুপী মালবিকানা ফুতবোলদা মচানুপা সুর্জিৎনা খো খোদা অদুগা অনিশুবা মচানুপা প্রদিপনা হোক্কীদা অসামগী মহুৎ শিন্দুনা শান্নরি, মখোয়গী থৌনা হৈশিংবা উৎলি।

থোইদোক্না চাউথোকচনিঙাই ওইরবা মথক্কী ৱারী অসিগী মান্নবা অমা তামিল নাদুগী য়োগনথনগী লৌখৎপা য়াই। মহাক মশামক বিরী য়োনবগী থবক তৌবা মীওইনি। মহাক্কী মচানুপী পুর্নশ্রীনা শনাগী তকমান লৌরগা মীয়ামগী থম্মোই জয় তৌরে। ঐহাক্না দেবিদ বেখামগী মিং পল্লকপদা মীয়াম্না ইন্তরনেস্নেল ফুতবোলরদুরা হায়না শুকশোই শোইদনা হায়রক্কনি। মীয়াম্না খংবিগদবা অমদি ঐখোয়গীসু দেবিদ বেখাম অমা লৈরে। মহাক্না গুৱাহাতিগী য়ুথ গেম্সতা সাইক্লিং মশান্নদা শনাগী তকমান লৌখি। ঐহাক্না থোইদোক্না নুঙাইজবা ৱাফম অমনা ঐহাক্না অন্দমান নিকোবর চৎলুবদা খংলকখি, কার নিকোবরদা লৈবা দেবিদ অসি অঙাং ওইরিঙৈদা মমা মপা কায়নখ্রে। মহাক্কী মখুরানা ফুতবোলর ওইহন্নিংবদগী মহাক্কী মমিং অফাওবা ফুতবোলর অমগী মিং থোনখি। অদুবু মহাক্কী পুক্নিংদদি সাইক্লিংগী অপাম্বা লৈখি। খেলো ইন্দিয়া স্কিমগীদমক মহাকপু খনখি অদুগা মহাক্না সাইক্লিংদা অনৌবা রেকোর্দ অমা শেম্বা ঙমখি। জাতিগী ওইবা শান্ন-খোৎনবা চাংদম্নবগী খুত্থাংদা শান্নরোইশিং অদুনা মখোয়না হৈ শিংবা অদু উৎচনবগী খুদোংচাবা ফংবগা লোয়ননা অতোপ্পা রাজ্যশিংগী চৎন লোনচৎসু খংবা ঙমই। মরম অদুনা ঐখোয়না খেলো ইন্দিয়া য়ুথ গেম্সকী মওংদা চহী খুদিংগী খেলো ইন্দিয়া য়ুনিবর্সিতী গেম্স পাংথোক্নবা ৱারেপ লৌরে।

মরূপশিং, মথংগী থা ফেব্রুৱারী ২২দগী মার্চ ১ ফাওবা ওরিশাগী কতক অমসুং ভুবনেশ্বরদা অহানবা খেলো ইন্দিয়া য়ুনিবর্সিতী গেম্স পাংথোক্কদৌরি। মসিদা শরুক য়ানবগীদমক শান্নরোইশিং ৩০০০ হেন্না ক্বালিফাই তৌরে।

নুংশিরবা ইরৈবাকচাশিং, পরিক্ষাগী মতম লাক্লে, মহৈরোই খুদিংমক মাগী মাগী ঙমজবি থাদুনা হোৎনবা মতম্নি। লৈবাক অসিগী মহৈরোই কোতি কয়াগা পরিক্ষা পে চর্চা উরুবা তুংদা ঐহাক্না য়াম্না থাজবগা লোয়ননা হায়জনিংবদি লৈবাক অসিগী নহা খুদিংমক অসি মশানা মশাবু থাজবগা লোয়ননা শিংনরপকা খুদিংমক মায়োক্ননবা হোৎনরি।

মরূপশিং, অমরোমদা পরিক্ষাশিং অদুগা অমরোমদা নিংথমথাগী মতম অনি অসিগী মরক্তা ঐহাক্না হায়জনিংবদি ইশাবু ফিৎ ওইহনবিয়ু, এক্সরসাইজ খজিক্তং তৌবিয়ু, শান্ন খোৎনবা খরসু তৌশি, শান্নবনা ফিৎ ওইনা লৈনবগী বিশয়নি। ঐহাক্না উজবদা ফিৎ ইন্দিয়াগা মরী লৈননা ইবেন্ত কয়া অমা পাংথোক্লি। জনুৱারী ১৮দা লৈবাক পুম্বনা নহাশিংনা সাইক্লোথোন পাংথোকখি। মদুদা শরুক য়াখিবা ইরৈবাকচা খুদিংমক্না ফিৎনেসকী পাউজেল পীখি। ঐখোয়গী ন্যু ইন্দিয়া অসি মপুং ফানা ফিৎ ওইনবগীদমক হোৎনরিবশিং অসি থোইদোক্না পুক্নিং থৌগৎনিঙাই ওইরি। মমাংগী চহীগী নবেম্বর থাদা হৌদোকখিবা ফিৎ ইন্দিয়া স্কুল কেম্পেন অসিসু হৌজিক ফাওবদা মায় পাক্লি। ঐঙোন্দা হায়রকখিবদা হৌজিক ফাওবদা স্কুল ৬৫০০০ হেনবনা ওনলাইন রেজিস্ত্রেসন তৌরগা ফিৎ ইন্দিয়া স্কুলগী সর্তিফিকেৎ ফংখ্রে।

নুংশিরবা ইরৈবাকচাশিং, চয়োল অনিগী মমাংদা ঐখোয়গী ভারতকী তোঙান তোঙানবা শরুকশিংদা তোঙান তোঙানবা কুমহৈ কয়া পাংথোকখি। পঞ্জাবতা হরাও তয়াম্বগা লোয়ননা লোহরি পাংথোকখি, তামিল নাদুগী ইচিল ইনাও অমসুং ইচল ইচেশিংনা পোঙ্গাল কুমহৈ পাংথোকখি, অসামদা বিহুগী হরাও তয়াম্বা উখি। অমরোমদা গুজরাত্তা উতরায়নগী নুঙাইবগা লোয়ননা তেলঙ্গানা থল্লবা অতিয়া উবা ফংখি। অসিগুম্বা তঞ্জা অসিদা দিল্লীদা পুৱারীগী মশক ওইরবা থৌদোক অমা থোকখ্রে। দিল্লীদা য়াম্না মরুওইবা য়ানাচে অমদা খুৎয়েক পীনখ্রে। মসিগা লোয়ননা চহী ২৫শুরবা ব্রু-রিয়াং রিফ্যুজী ক্রাইসিসকী য়াম্না নুঙাইতবা তাঙ্কক অদু মতম চুপ্পগী ওইনা লোইশিনখ্রে। ইশাগী চিল্লবা মতম অমসুং কুমহৈ ফিয়োংগী মতম ওইবনা পুৱারীগী মশক ওইরবা য়ানখিবা অসিগী মতাংদা ময়াম মুন্না খংলমগদবা মান্দে খন্দুনা মতাং অসি মন কী বাতকী থৌরম অসিদা শোইদনা লৌখৎলগে হায়দুনা খনখি। সমস্য অসি চহী ৯০গী চহী পরিংগী মতমগীনি, ১৯৯৭তা কাংলুপ মশেল উংখৎনবগী থৌদোক্তা ব্রু-রিয়াং চিংমী কাংলুপকী মীওইশিং অসি মিজোরামদগী থোরক্লগা ত্রিপুরাদা চংজফম লৌখি। মখোয়শিং অসি নোর্থ ত্রিপুরাগী কঞ্চনপুরদা শাবা কেম্পশিংদা লৈহনখি। য়াম্না নুঙাইতবা ৱাফম অমনা ব্রু-রিয়াং কাংলুপকী মীওইশিং অসিনা মখোয়গী পুন্সীগী মমল য়াম্লবা শরুক কয়া রিফ্যুজী ওইনা লেনখ্রে। কেম্পতা পুন্সী লেনবা হায়বগী অর্থদি খুদোংচাবা পুম্নমক মাংজবা হায়বনি। চহী ২৩ অসি য়ুম ইংখোল, ইমুং মনুং, অনা লায়েং, অঙাংশিংগী মহৈ মশিং পুম্নমক অসি অমত্তা য়াওদনা লৈরক্লবনি। অমুক্তা খন্দুনা য়েংবিয়ু চহী ২৩ কেম্পতা লেনবা হায়বসে কয়াদা খুদোং চাদবা মায়োক্নরমগদবনো। সরকার কয়া লাকখ্রে অদুবু মখোয়গী খুদোংচাদবা নুঙাইতবশিং অসিগীদমক্তদি করিমত্তা তৌবিরমদে। অদুম ওইনমক অসুক ৱারবা খুদোং চাদবা মরক অসিদা মখোয়না ভারতকী সংবিধান অমসুং চৎন লোনচৎপু চেৎনা থাজজৈ। মসিগী থাজবা অসিনা মখোয়গী পুন্সীদা ঙসি অনৌবা অয়ুক অমা লাক্লে। য়ানখিবা অসিগী মতুং ইন্না হৌজিক মখোয়গী পুন্সী অদু নুঙাইনা হিংজনবগী লম্বেল অমা লাক্লে। মমৈথংদা ২০২০গী অনৌবা চহী তরাগী মতম অসিনা ব্রু-রিয়াং কাংলুপকী মীওইশিংদা হিংনবগী অনৌবা অশা অমসুং থৌনাগী ময়োল চোংহল্লে। চাউরাক্না রিফ্যুজী ওইনা লৈরম্বা ব্রু-রিয়াং ৩৪০০০বু ত্রিপুরাদা খুন্দা লৈতাহনবা য়াহল্লে। মসিদা নত্তনা মখোয়গী নৌনা খুন্দা লৈতাহনবা অমসুং হিরম খুদিংমক্তা চাউখৎহন্ননবা কেন্দ্র সরকারনা চাউরাক্না লুপা কোতি ৬০০কী তেংবাং পীগদৌরি। মসিগা লোয়ননা মখোয়বু রসনগী খুদোংচাবসু ফংহনগনি। নৌনা খুন্দারিবা ইমুং খুদিংমক্তা প্লোতসু পীগনি, য়ুম শাবদা মতেং পীগনি। হৌজিক মখোয় কেন্দ্র অমসুং রাজ্য সরকারগী খুদোংচাবশিং লৌবা য়ারগনি। য়ানা চেরোল অসি হিরম কয়াদা য়েংলগা য়াম্না মরু ওই। মসিনা কোওপরেত ফেদরেলিজমগী ৱাখল্লোন উৎলি। য়ানবা অদুদা ত্রিপুরা অমসুং মিজোরাম অনিমক্কী মুখ্য মন্ত্রীশিং য়াওখি। য়ানা ৱারোল অসি রাজ্য অনিমক্কী মীয়ামগী অয়াবা অমসুং য়াইফ পাউজেলনা ওইথোক্লিবনি। মরম অদুনা ঐহাক্না রাজ্য অনিমক্কী মীয়াম অমসুং মরুওইনা মুখ্য মন্ত্রীশিংদা তৌবিমল খংবা উৎচরি। য়ানা ৱারোল অসিনা ভারতকী চৎন লোনচৎতা য়াওরিবা মীনুংশিং অমসুং পুকচেল চাউবা অদু ময়েক শেংনা উৎলি। ঐহাক্না অমুক্কসু হন্না রাজ্যশিং অসিগী মীয়াম অমসুং মরুওইনা ব্রু-রিয়াং কাংলুপকী মীয়ামদা য়াইফ পাউজেল পীজরি।

নুংশিরবা ইরৈবকচাশিং, চাউরবা খেলো ইন্দিয়া গেম্স মায় পাক্না শিনবা ঙম্বা অসামদা য়াম্না চাউরবা থবক অমসুং পাংথোকখ্রে। ময়াম্না পাউদা উবিরমগনি অসামদা তোঙান তঙানবা লালহৌলুপ নিপালগী লালহৌবা ৬৪৪না খুৎলায় থাদোক্তুনা চংজরকখ্রে। অহানবদা হিংসাগী লম্বেলদা চৎলুরবা মখোয়না মশাগী থাজবা অমগা লোয়ননা শান্তিগী লম্বেলদা লাক্তুনা লৈবাক্কী চাউখৎনবা হোৎনবদা শরুক য়াগে হায়না লেপ্লি। হিংসাগী পাম্বৈনা সমস্যাশিং কোকপা ঙমগনি হায়না খল্লুরবা মখোয়না হৌজিক অমুক শান্তি অমসুং অপুনবনা মসিগী অমত্তা ঙায়রবা পাম্বৈনি হায়না থাজবা ঙমলক্লে। ইরৈবাকচাশিং ৱাফম অসি তাবদা ময়াম য়াম্না নুঙাইবিগনি অৱাং নোংপোক্তা লালহৌবগী ইরাং অসি য়াম্না হন্থরে। লৈবাক অসিগী লোইজিং লোয়াদা হৌজিক ফাওবা খুৎলায় পায়দুনা সমস্যা কোক্ননবা লম্বেল থিরিবা পুম্নমক্তা ঐহাক্না ঙসি গনতন্ত্র নুমিৎকী শেংলবা তঞ্জা অসিদা খুৎলায় থাদোকপীরো হায়না হায়জরি। হীরম খুদিংমক ইংনা তপ্না খন্নরগা পাংথোক্নবা ইশাগী অমসুং লৈবাক্কী থৌনাদা থাজবা থম্বিয়ু। ঐখোয়না হৌজিক হিংলিবা অসি বিজ্ঞান অমসুং মীয়ামগী লৈঙাক্লোনগী মতম ২১শুবা চহীচানি। ময়াম হিংসানা মীয়ামগী পুন্সীদা য়াইফবা পুরকপা তাবিরব্রা অদুগা অমুক ইং তপ্পা অমসুং নুংশিং চান্ননা লৈবনা মীয়ামগী পুন্সীদা খুদোংচাদবা পুরকই হায়বদি তাবিরব্রা। হাৎন-শুনবনা য়াইফবা অমত্তা পুরকপা ঙম্লোই, সমস্যা অমত্তা অতোপ্পা সমস্যা অমনা কোকহনবা ঙম্লোই। মদুগী মহুৎতা মদু কোকহন্ননবা উপায় থিবনা অফবা ওইগনি। লাক্লো ঐখোয় ময়াম পুল্লগা শান্তিনা ৱাহং খুদিংমক্কী পাউখুম পীবা ঙম্বা অনৌবা ভারত অমা শেম্লসি।

ঐগী নুংশিজরবা ইরৈবাকচাশিং, ঙসিগী গনতন্ত্র নুমিৎকী শেংলবা তঞ্জা অসিদা স্পেসক্রাফকী মতাংদা পাউদমজবা অসিদা থোইদোক্না নুঙাইবা ফাওজৈ। লৈবাক অসি মায়কৈ অসোমদা খোংথাং অমগা হেন্না চংশিনবা ঙম্লে। চহী ২০২২দা ঐখোয়গী লৈবাক অসি নিং তমখিবা চহী ৭৫ মপুং ফাগদৌরিবনি। মদুগী তঞ্জা অদুদা স্পেসক্রাফ মিসনগা লোয়ননা ভারত মচা অমা স্পেসকী খোংচৎ অসিদা য়াওননবগী ৱারেপ অদো মায় পাকহনগদৌরিবনি। স্পেসক্রাফ মিসন অসি ২১শুবা চহীচা অসিগী ভারতকী ওইনা সাইন্স অমসুং তেক্নোলোজীগী লমদা পুৱারীগী মশক ওইবা মায়পাকপা অমনি। অনৌবা ভারত অসিগী মসি মাইলস্তোন অমা ওইগদৌরিবনি। মরূপশিং ময়াম খংবিরমগনি মিসন অসিগীদমক এস্ত্রোনোৎ মরি খল্লবনি। নহা মরিমক অসি ইন্দিয়ান এয়ার ফোর্সকী পাইলোতনি। থৌনা লৈরবা নহা মরি অসি ভারতকী হৈশিংবা, থৌনা লিংজেল অমসুং মংলানগী খুদম্নি। ঐখোয়গী মরূপ মরি অসি য়াম্না থুনা ত্রেনিংগীদমক রসিয়াদা চৎকদৌরিবনি। ঐনা থাজৈ মসি ভারত অমসুং রসিয়াগা মরূপ মপাং ওইবা অমসুং তেংবাংনবগী তাঙ্কক অমসুং ওইগদৌরিবনি। মখোয় মফম অদুদা চহী অমা হেন্না ত্রেনিং তৌগদৌরিবনি। মসিগী তুংদা লৈবাক অসিগী নিংজবা অমসুং পামজববু মালংদা পাইহনবগী থবক অদু মখোয় অসিগী মরক্তগী অমনা তৌগদৌরিবনি। ঙসি গনতন্ত্র নুমিৎকী শেংলবা তঞ্জা অসিদা নহা মরি অমসুং মিসন অসিগা লোয়ননা ভারত অমদি রসিয়াগী বৈজ্ঞানিক অমসুং ইঞ্জিনীয়রশিংবু য়াইফ পাফজেল পীজরি।

ঐগী নুংশিজরবা ইরৈবাকচাশিং, মমাং চহীগী মার্চ থাদা ভিদিও অমখক মিদিয়া অমসুং সোসিয়েল মিদিয়াদা য়াম্না খন্নখি। খন্নখিবা ৱাফমদি মতৌ করম্না চহী ১০৭শুরবী ইমা অমনা রাস্ত্রপতি ভবনদা পাংথোকপা থৌরম অমদা প্রোতোকোল থুগায়রগা চংলগা রাস্ত্রপতিদা য়াইফ পাউজেল পীখিবগে। নুপী অদু কর্নাতকাগী সালুমারাদা তিমাকানি, মফম অদুদা মহাক ব্রিক্সা মাতা হায়বদি উ-ৱাগী মমা হায়রগা খংনবিনি। অদুগা থৌরমদুনা পদ্ম এৱার্দ য়েন্থোকপগী থৌরমনি। য়াম্না চম্বা ইমুং অমদগী হৌরকখিবি তিমাকাগী থোইদোকপা থৌদাংবু লৈবাক অসিনা খংলদুনা মঙোন্দা ইকায় খুম্নবা উৎখি, মঙোন্দা পদ্ম শ্রীগী ইকায় খুম্নবা পীখি।

মরূপশিং, ঙসি ভারতনা মহাক্কী অথোইবা মীওইশিংগীদমক্তা চাউথোকচবা ফাওরি। লৈবাক অসিগীদমক থবক তৌবশিংদা ইকায় খুম্নবা উৎপদা নুঙাইবা ফাওরি। চহী খুদিং পাংথোকপগুম ঙরাং নুমিদাংৱাইরম পদ্ম এৱার্দ লাউথোকখ্রে। ঐহাক্না হায়জনিংবদি ময়াম্না মখোয়গী মরমদা শোইদনা পাবিয়ু, মখোয়গী থৌদাংশিং অমসুং মখোয়গী ইমুং মনুংগী মতাংদা খন্নবিয়ু। পদ্ম এৱার্দ ২০২০গীদমক চহী অসিদা মীওই ৪৬০০০তগী হেনবনা থাজল্লকখি। মসি ২০১৪গা য়েংনবদা শরুক ২০ হেল্লবনি। মশিং অসিনা তাক্লিবদি মীয়াম্না পদ্ম এৱার্দ অসি পিপল এৱার্দনি হায়না থাজরে হায়বসিনি। হৌজিক্তি পদ্ম এৱার্দকী থবক থৌরম খুদিংমক ওনলাইন্নি। হান্নদি মসিগী ৱারেপ অসি মীওই খরা খক্তনা লৌরম্মি অদুবু হৌজিক্তি মসি মপুং ফানা পিপল দ্রাইবন ওইরে। অমরোমদা হায়রবদা পদ্ম এৱার্দকী মতাং অসি লৈবাক মীয়াম পুম্নমক্না থাজবগা লোয়ননা ইকায় খুম্নরে। অদুনা ঐহাক্না অমুক্কা হন্না পদ্ম এৱার্দ ফংলবশিংদা য়াইফ পাউজেল পীজরি অদুগা ময়াম্না মখোয়গী মরমদা পাবীদুনা হেন্না খংজিনবিনবা হায়জরি। মখোয়গী পুন্সীগী থোইদোকপা ৱারীনা সমাজ অসিদা অশেংবা থৌনা হাপলক্কনি।

ঐগী নুংশিজরবা ইরৈবাকচাশিং, অমুক্কা হন্না গনতন্ত্র নুমিৎকী য়াইফ পাউজেল পীজরি। চহী তরাগী মতম অসি ময়ামগী পুন্সী অমসুং ভারতকী পুন্সীদা অনৌবা ৱারেপশিংগী অনৌবা মায় পাকপা ওইরসনু। মালেম্না ভারতকী মফমদা থম্লিবা থাজবা অদু পাংথোকপা ঙম্বগী থৌনা অদু ভারতনা ফংবা ঙম্বা ওইরসনু। থাজবা অসিগা লোয়ননা অনৌবা চহী তরা অসি হৌরসি। অনৌবা ৱারেপকা লোইননা ইমা ভারত অসিগীদমক ইথৌ পাংলসি। হন্না-হন্না থাগৎচরি। খুরুমজরি।