প্রধান মন্ত্রী, শ্রী নরেন্দ্র মোদীনা ঙসি কুনো নেস্নেল পার্কতা – ভারত্তগী মুৎখ্রবা – লমলক্কী চীতাহশিং থাদোকখ্রে। নামীবিয়াদগী পুরকখিবা চীতাহশিং অসি মালেমগী ইহান হানবা ইন্তর-কন্তিনেন্তেল লার্জ ৱাইল্দ কার্নিবোর ত্রান্সলোকেসন প্রোজেক্ত ওইরিবা প্রোজেক্ত চীতাহগী মখাদা ভারত্তা পুরকখিবনি। চীতাহ নিপানগী মনুংদা মঙানা অমোমনি অমসুং অহুমনা লাবনি।
প্রধান মন্ত্রীনা কুনো নেস্নেল পার্ক্কী রিলিজ পোইন্ত অনিদা চীতাহশিং অসি থাদোকখি। প্রধান মন্ত্রীনা চীতাহ মিত্রাশিং, চীতাহ রিহেবিলিতেসন মেনেজমেন্ত গ্রুপ অমসুং মহৈরোয়শিংগা লোয়ননা থৌরম পাঙথোক্লিবা মফমদা ৱারী শাখি। প্রধান মন্ত্রীনা পুৱারী ওইরবা থৌরম অসিদা জাতিদা ৱা ঙাংখি।
প্রধান মন্ত্রীনা কুনো নেস্নেল পার্কতা লমলক্কী চীতাহ থাদোক্কদৌরিবসি ভারতকী লমলক্কী শা-উচেকশিং অমসুং মখোয়গী লৈফম চাফম অমুক হিংগৎহন্নবা অমদি মখল মথেল শুনা থম্ননবগী থৌরাংগী শরুক অমনি। চীতাহ অসি ভারত্তগী মুৎখ্রে হায়না ১৯৫২দা লাউথোকখ্রবনি। থাদোক্লিবা চীতাহশিং অসি নামীবিয়াদগী চহি অসিগী অঙনবা শরুক্তা খুৎয়েক পীনখিবা এম.ও.য়ু. অমগী মখাদা পুরকপনি। ভারত্তা চীতাহ থাদোক্লিবা অসি মালেমগী ইহান হানবা ইন্তর-কন্তিনেন্তেল লার্জ ৱাইল্দ কার্নিবোর ত্রান্সলোকেসন প্রোজেক্ত অমা ওইরিবা প্রোজেক্ত চীতাহগী মখাদা পাঙথোকপনি।
চীতাহনা ভারতকী ওপন ফোরেস্ত অমসুং গ্রাসলেন্ত ইকোসিস্তেম অমুক হঞ্জিলহনবদা মতেং ওইগনি। মসিনা বাইওদাইভর্সিতী য়োকখৎপদা অমদি ঈশিং মরাং কায়হনবা, কার্বোন সিক্বেস্ত্রেসন অমসুং লৈহাউগী ইনিল ঙাক্তুনা থম্বনচিংবা ইকোসিস্তেম সর্ভিসশিং ফগৎহনবদা মতেং পাংদুনা খুন্নাইদা চাউনা কান্নহনগনি। থৌরাং অসি অকোইবগী ফীভম ঙাকথোকপা অমদি লমলক্কী শা-উচেকশিং য়োকখৎপা হায়রিবা প্রধান মন্ত্রীগী ফিরেপগী পরিংদা পায়খৎপনি অমদি ইকো-দেবেলপমেন্ত অমসুং ইকোতুরিজম থৌওংশিংগী খুত্থাংদা লোকেল কম্ম্যুনিতীদা হিংনবগী পাম্বৈগী খুদোংচাবা হেন্না ফগৎহনগনি।
ভারত্তা চীতাহ অমুক হন্না লৈহন্নবা পুৱারী ওইরবা খোঙথাং অসি হৌখিবা চহি নিপান অসিদা সস্তেনেবিলিতী অমসুং অকোইবগী ফীভম ঙাকশেন্নবগীদমক খোঙথাংশিং মথং-মথং মতম শাংনা পাইখৎখিবা অসিগী শরুক অমনি, মসিনা অকোইবগী ফীভম ঙাকশেনবা অমসুং সস্তেনেবিলিতী লৈহন্নবগী লমদা শীংথানীংঙাই ওইনা মাইপাকপা ঙমখি। ইং কুমজা ২০১৪দা প্রোতেক্তেদ এরিয়াশিংনা কোনবা মফম অসি লৈবাক অসিগী জিওগ্রাফিকেল এরিয়াগী ৪.৯০% ওইরম্বা অদু হৌজিক ৫.০৩%দা হেনগৎহনখি। মসিদা লৈবাক অসিগী প্রোতেক্তেদ এরিয়া অসি ২০১৪দা স্ক্যের কিমি ১,৬১,০৮১.৬২ ওইবগা লোয়ননা ৭৪০ ওইরম্বদগী হৌজিক্না স্ক্যের কিমি ১,৭১,৯২১গী এরিয়াগা লোয়ননা ৯৮১দা হেনগৎহনখিবা অদু য়াওরি।
হৌখিবা চহি মরিদা উমুং-ৱামাংনা কোনশিনবা মফম অসি স্ক্যের কিমি ১৬,০০০ হেনগৎহনখি। উমংনা কোনশিনবা মফম লেপ্পা লৈতনা হেনগৎলক্লিবা মালেমগী লৈবাক খরগী মনুংদা ভারতসু চল্লি।
কম্ম্যুনিতী রিজর্বশিংগী মশিংদসু হেনগৎলকখি। ২০১৪দা মখোয়গী মশিং অসি শুপ্নগী ৪৩ লৈরম্বদগী ২০১৯দা ১০০ হেন্না হেনগৎলকখি।
ভারত অসি মালেমগী থাক্তা লমলক্কী কৈগী মশিং চাউরাক্না ৭৫% লৈবগা লোয়ননা রাজ্য ১৮দা স্ক্যের কিমি এরিয়া চাউরাক্না ৭৫,০০০ কোনশিনবগা লোয়ননা তাইগর রিজর্ব ৫২ লৈ। ভারতনা পান্দম থমখিবা চহি ২০২২দগী মাংজৌননা চহি মরি ঙনখৎনবা ২০১৮মক্তদা কৈগী মশিং শরুক অনি হেনগৎহন্নবগী থমখিবা পান্দম ফংবা ঙমখি। ভারত্তা লৈরিবা কৈগী মশিং অসি ২০১৪দা ২,২২৬ ওইরম্বদগী ২০১৮দা ২,৯৬৭তা হেনগৎহনখি।
কৈ ঙাকশেন্নবগীদমক কাইথখিবা বজেৎ অসি ২০১৪দা লুপা কোর ১৮৫ ওইরম্বদগী ২০২২দা লুপা করোর ৩০০দা হেনগৎহনখি।
২০১৫দা নোংশা ৫২৩ লৈরম্বদগী চাদা ২৮.৮৭কী চাংদা (হৌজিক ফাওবগী খ্বাইদগী ৱাংবা গ্রোথ রেতশিংগী মনুংদা অমা ওইরিবা) মশিং ৬৭৪ য়ৌদুনা এসিয়াতিক লায়নশিংগী মশিং অসি লেপ্পা লৈতনা হেনগৎলক্লি।
ভারত্তা হৌজিক (২০২০) ২০১৪দা কবোকৈ ৭৯১০ লৈ হায়না পানখিবা অদুগা চাংদম্নবদা কবোকৈ ১২,৮৫২ লৈরে। মশিংদা ৬০% হেন্না হেনগৎলকখিবগী রেকোর্দ তৌখি।
থৌরম অসিদা মধ্য প্রদেশকী রাজ্যপাল, শ্রী মঙ্গুভাই পতেল; মধ্য প্রদেশকী মুখ্য মন্ত্রী, শ্রী শিবরাজ সিংহ চৌহান; কেন্দ্রগী মন্ত্রীশিং, শ্রী নরেন্দ্র সিংহ তোমর, শ্রী ভুপেন্দ্র য়াদব; শ্রী জ্যোতিরাদিত্য এম. সিন্ধিয়া অমসুং শ্রী অশ্বিনি চোবেনা শরুক য়াখি।
