ঙসি নিউ দিল্লিদা প্রধান মন্ত্রী শ্রী নরেন্দ্র মোদীনা ভুতানগী নিংথৌ জিগমে খেসার নাময়েল ৱাংচুক অমসুং ভুতানগী মহারানি জেতসুন পেমা ৱাংচুক তরাম্না ওকখ্রে। প্রধান মন্ত্রীনা নিংথৌ অমসুং মহারানিদা মহাক্কী য়াইফ-পাউজেল পীখ্রে অমসুং মার্চ ২০২৪ দা মহাক্কী ভুতান খোঙচৎ মনুংদা ভুতান সরকার অমসুং ভুতানগী মীয়াম্না মহাক তরাম্না ওকখিবা অদু প্রধান মন্ত্রীনা নিংশিংখ্রে।
চাউখৎ-থৌরাংগী মতেং পাংনবা, ক্লিন ইনর্জগী মতেং, ললোন-ইতিক অমসুং শেন থাদবা, স্পেস অমসুং তেক্নোলোজিগী মতেং পাংনবা অমসুং মীগা মীগা লৈনবা মরীশিং য়াওনা লৈবাক অনিগী অফবা মরীশিংদা প্রধান মন্ত্রী অমসুং নিংথৌনা অপেনবা ফোঙদোকখ্রে। হিরম খুদিংমক্তা ভারত অমসুং ভুতানগী মরক্ত লৈনরিবা তমজনিঙাই ওইরবা মরী মখা তানা মপাঙ্গল কনখৎহন্নবা মখোয়গী থাজবা লুচিংবশিংনা অমুক হন্না পীনখ্রে।
লৈবাক অনিগী মরক্তা শেন-থুমগী মতেং পাংনবা হেনগৎলক্লিবা অসি লুচিংবশিংনা মখোয়গী ওইবা ৱাফমশিং ফোঙদোক্নখ্রে অমসুং ভুতানগী চাউখৎপা য়াংখৎনবা অমসুং ভারতকা নক্নবা ঙমখৈগী মফমশিংগা শম্নবা হেনগৎহন্নবা নিংথৌনা লুচিংদুনা পায়খৎলিবা প্রোজেক জেলেফু মাইন্দফুলনেস সিতি ইনিসিয়েতিপগী মতাংদা ৱাফম কয়া ফোঙদোক্নখ্রে।
ভুতানগী শেন-থুম চাউখৎনবা ভারতনা মতেং পাংলিবা অদু প্রধান মন্ত্রীনা অমুক হন্না ফোঙদোকখ্রে অমসুং ভুতানগী ১৩শুবা চহি মঙাগী থৌরাংদা ভারতনা ভুতানগী মতেং পাংবা শরুক অনি হেনগৎলকপা অসি ফোঙদোকখ্রে। ভুতানগী নুংঙাইবা, চাউখৎপা অমসুং নুংঙাই-য়াইফবা লৈনবা ভুতানগী অনিংবশিং ফংনবা শৌগৎপগীদমক নিংথৌনা প্রধান মন্ত্রী অমসুং ভারতকী মীয়ামদা তৌবীমল খঙবা উৎখ্রে।
মীফম অদুগী মতুংদা নিংথৌ অমসুং মহারানি ইকায়খুম্নবা উৎপা ওইনা প্রধান মন্ত্রীনা চাক্লেন অমা কৌখ্রে।
অমনা অমবু থাজনবা, মতেং পাংনবা অমসুং লৈবাক অনিগী মরক্তা লৈনরিবা মরীশিংগী মরুওইবা অদু খঙদুনা, মীফম অসি লৈবাক অনিগী মরক্তা মহৌশাদগী চৎনদুনা লাকপা অৱাংবা থাক্কী মীফমশিংগী শরুক অমা পাংথোকপনি।
