ঙসি প্রধান মন্ত্রী শ্রী নরেন্দ্র মোদী নিউ দিল্লিগী জৱাহরলাল নেহরু স্তদিয়মদা ‘ওরিসা পর্বা ২০২৪’ থৌরমশিং শরুক য়াখ্রে। থৌরম অদুদা শরুক য়াখিবা ওরিসাগী ইনাওশিং অমসুং ইচলশিং মহাক্না তরাম্না ওকখ্রে। মহাক্না হায়খি চৎলিবা চহি অসি শ্বাভাব কবি গঙ্গধার মেহর লৈখিবদগী চহি ১০০শুবা চহিনি অমসুং মহাক্কী মফমদা ইকায়খুম্নবা উৎচরি। মহাক্না থৌরম অদুদা ভক্ত ভাওরি, ভক্ত সালাবেগা অমসুং ওরিয়া ভগবতগী অইবা শ্রী জগনাথ দাসকী মফমদা ইকায়খুম্নবা উৎখ্রে।
প্রধান মন্ত্রীনা হায়খি ওরিসা অসি মতম পুম্নমক্ত সাধুশিং অমসুং পন্দিৎশিংগী মফম অমা ওইদুনা লাক্লি। সারাল মহাভারত, ওরিয়া ভগবতগুম্বা অচৌবা সাহিত্য মীচম মীয়ামগী থোংজিলশিংদা য়ৌহন্দুনা, নাত অমসুং চৎনবীশিং চাউখৎহনবদা সাধুশিং অমসুং পন্দিৎশিংনা অচৌবা থৌদাং অমা লৌরি। ওরিয়া লোলদা মহাপ্রভু জগনাথকা মরী লৈনবা সাহিত্য কয়া মরাংকাইনা লৈরি। ভগবান জগনাথনা লাল মাংজিল থাখি অমসুং লানফমদা চংবা মতমদা মনিকা গৌরিনি কৌবা ভক্ত অমগী মখুত্তগী মহাক্না শঙ্গোম অফম্বা লৌখিবা ভগবানগী চমচবা অদু থাগৎপা ফোঙদোকচরি। মথক্কী ৱারি অসিদগী পারা কয়া তম্লে। মরুওইবা পারা অমদি করিগুম্বা ঐখোয়না অচুম্বা ৱাখলশিংগা লোয়ননা থবক তৌরবদি ঈশ্বর মশামক্না থবক অদু লমজিংই হায়বা অসিনি। ঈশ্বরনা মতম পুম্নমক্ত ঐখোয়গা লৈমিন্নরি অমসুং ঐখোয়না কৈদৌঙৈদা অৱাবা ফিবম অমদা ঐখোয় ইথন্ত ঙাইরে হায়না খল্লোইদবনি।
ওরিসা কবি ভিম ভোইগী শৈরেং পরেং অমা ‘ কনাগুম্বা অমনা অৱাবা কয়া য়াম্না মায়োক্নগনি হায়বা থিদনা, মালেম অসি কনগদবনি’ থিরদুনা, প্রধান মন্ত্রীনা হায়খি মসি ওরিসাগী চৎনবীনি। পুরি ধামনা এক ভারত শ্রেস্থা ভারতকী ৱাখল্লোন মপাঙ্গল কনখৎহল্লে। নিংতম ইহৌ শরুক য়াদুনা ওরিসাগী থৌনা ফরবা মপারিশিংনা লৈবাক অসিগী মাইকৈ তাকখি। ঐখোয়না কৈদৌঙৈদা পাইকা ক্রান্তিগী অথৌবশিংগী লমন শিংবা ঙম্লরোই। পাইকা ক্রান্তিগী নিংশিং পোস্তেচ স্তাম্প অমসুং শেনয়েক অমা ফোঙনবা খুদোংচাবা সরকারনা ফংবা অসি লাইবক ফবনি।
প্রধান মন্ত্রীনা হায়খি মতম অসিদা লৈবাক শীনবা থুংবনা উতকাল কেসারি হরে কৃষ্ণ মেহতাব জিগী থবকশিং নিংশিংলি। মহাক্কী ১২৫ শুবা মপোক কুমওন সরকারনা পাক-শন্না পাংথোক্লি। হৌজিক ফাওবা ওরিসানা লৈবাক অসিদা থবক পাংথোকপা ঙম্বা লুচিংবা কয়া পুথোক্লি। ভারতকী রাস্ত্রপতি ওইরিবী দ্রৌপতি মুর্মু জি ত্রাইবেল ফুরুপ অমদগীনি। মসি ঐখোয় খুদিংমক চাউথোকচনবা মচাক অমনি। মহাক্কী ইথিলদগী, ঙসি ভারত্তা ত্রাইবেলশিং য়াইফনবা লুপা করোর লিশিং কয়াগী স্কিমশিং পায়খৎলে অমসুং হায়রিবা স্কিমশিং অসিনা ওরিসাগী ত্রাইবেল খুন্নাই কান্নবা ফংবা খক নত্তনা ভারত পুম্নমক্কী কান্নবা ফংহল্লে।
প্রধান মন্ত্রীনা হায়খি ওরিসা অসি নারী শক্তিগী লমদমনি অমসুং নারী শক্তিগী থৌনা অসি মাতা সুভদ্রগী মওংদা লৈরি। ওরিসাগী নুপীশিং চাউখৎলবা মতম খক্তদা ওরিসা চাউখৎকনি। নুমিৎ খরনিগী মমাংদা ওরিসাগী ঐগী ইমাশিং অমসুং ইচলশিংগীদমক সুভদ্র য়োজনা হৌদোকপগী খুদোংচাবা ঐনা ফংলে। মসিনা ওরিসাগী নুপীশিংদা কান্নবা পীরগনি।
শ্রী মোদীনা হায়খি ভারতকী সমুদ্রগী শক্তি হেনগৎহনবদা ওরিসানা পাংথোক্লিবা থবক অসিনা অনৌবা শক্তম অমা পীরে। কার্তিক পুর্নিমাদা কত্তক্তা মহানাদিগী তোর্বান্দা য়াম্না চাউনা পাংথোক্তুনা লাকপা বালি যাত্র ঙরাং ওরিসাদা লোইশিনখ্রে। বালি যাত্র অসি ভারতকী সমুদ্রগী শক্তিগী খুদম অমনি। ঙসিগী অনৌবা মতমগী তেক্নোলোজি অসিগুম্বা লৈত্রিঙৈদা ঐখোয়গী থৌনা ফরবা হিরোয়শিংনা সমুদ্র কয়া লানদুনা হোনখ্রে। ললোনবশিংনা জহাজদা ইন্দোনেসিয়াগী বালি, সুমাত্রা, জাবাদা চৎখি অমসুং মসিনা ললোন-ইতিক চাউখৎহনবদা মতেং পাংখি অমসুং তোঙান-তোঙানবা মফমশিংদা য়ৌবা ঙম্বা হেনগৎহনখি। বিকসিত ভারত অমগী পান্দম ফংনবা ঙসিদি ওরিসাগী সমুদ্রগী শক্তি অসিনা মরুওইবা থৌদাং অমা লৌরে।
প্রধান মন্ত্রীনা হায়খি মদুদি ওরিসা অনৌবা থাকশিংদা পুখৎনবা চহি ১০ লেপ্তনা হোৎনরকপা মতুংদগী ওরিসাগী অনৌবা তুংলমচৎ অমগী থাজবা লৈরে। ওরিসাগী মীয়ামগী থৌজালদগী থাজবা অসিদা অনৌবা থৌনা পীরে অমসুং সরকারগী অচৌবা মঙলানশিং লৈরি অমসুং অচৌবা পান্দমশিং থম্লি। ২০৩৬ দা ওরিসানা মপুংফাবা রাজ্য ওইরকপগী চহি ১০০ শুবা থৌরম পাংথোক্কনি। লৈবাক অসিগী রাজ্যশিংগী মনুংদা ওরিসা মপাঙ্গল কনবা, নুংঙাই-য়াইফবা অমসুং য়াংনা চাউখৎলক্লিবা রাজ্য অমা ওইহন্নবা সরকারনা থবক পায়খৎলি।
প্রধান মন্ত্রীনা হায়খি ওরিসা য়াওনা ভারতকী নোংপোক থংবা রাজ্যশিং চাউখৎতে হায়না খন্নবা মতম অমা লৈরমখি। ভারতকী নোংপোক থংবা শরুক অসি লৈবাক অসি চাউখৎনবা ইঞ্জিন্নি হায়না মহাক্না খল্লি। মরম অদুনা, নোংপোক থংবা ভারত চাউখৎনবা সরকারনা মরুওইনা থবক পায়খৎলে অমসুং হৌজিক লম্বী-থোং, হকশেল, লাইরিক-লাইশুগা মরী লৈনবা থবক খুদিংমক নোংপোক ভারত শীনবা থুংনা য়াংনা পায়খৎলে। চহি ১০ গী মমাঙদা পীরম্বা অদুদগী শরুক অহুম হেন্না ঙসি ওরিসানা কেন্দ্র সরকারদগী বজেত ফংলে। চহি অসিদা, ওরিসাগী চাউখৎ-থৌরাংগীদমক হৌখিবা চহিদগী বজেত চাদা ৩০ হেন্না পীরে। পুৱারি ওইনা ওরিসা চাউখৎনবা হিরম খুদিংমক্ত সরকারান য়াংনা থবক পায়খৎলি। হিথাংফমদা য়ুম্ফম ওইবা উদ্যোগ চাউখৎনবা খুদোংচাবা কয়া ওরিসাগী লৈরি। মরম অদুনা ধামরা, গোপালপুর, অস্তারঙ্গা, পালুর অমসুং সুবরনারেখাদা হিথাংফমশিং শেমগৎতুনা ললোন-ইতিক চাউখৎহনগনি। ওরিসা ভারতকী মাইনিং অমসুং ধাতুগী পৱারহাওসনি। মসিনা স্তিল, এলুমিনিয়ম অমসুং ইনর্জি সেক্তরদা ওরিসাগী ফিবম ফগৎহল্লে। হায়রিবা হিরমশিং অসিদা মীৎয়েং থমদুনা, ওরিসাদা নুংঙাই-য়াইফবগী অনৌবা খুদোংচাবা কয়া হাংদোকপা য়ারগনি।
প্রধান মন্ত্রীনা হায়খি ওরিসাদা কাজু, লিমোন, লশিং, য়াইঙং অমসুং থাউ থোকপা মরুশিং মরাংকাইনা পুথোক্লি। হায়রিবা পোৎথোকশিং অসি অচৌবা কৈথেলশিংদা য়ৌহন্নবা অমসুং মদুগী কান্নবশিং লৌমীশিংদা ফংহন্নবা সরকারনা থবক পায়খৎলে। ওরিসাদা সি-ফুদ প্রোসেসিং ইন্দস্ত্রি পাকথোক-চাউথোক্নবা খুদোংচাবা কয়া লৈরি অমসুং ওরিসা সি-ফুদ ব্রান্দ অমা শেমগৎতুনা মালেমগী কৈথেলদা পাম্নহন্নবা সরকারনা থবক পায়খৎলে।
প্রধান মন্ত্রীনা হায়খি মদুদি ওরিসা শেন থাদবা মীওইশিংনা পাম্নবা মফম অমা ওইহন্নবা সরকারনা থবক পায়খৎলে। ওরিসাদা ললোন-ইতিক্কী থবক লাইনা পাংথোকপা য়ানবা মহাক্কী সরকারনা থবক পায়খৎলে অমসুং উতকার্স উতকালগী খুৎথাংদা শেন থাদবা পুক্নিং থৌগৎলে। ওরিসাদা অনৌবা সরকার অমা হেক লাকখিবা অহানবা নুমিৎ ১০০দা লুপা করোর লিশিং ৪৫ গী শেনফম থাদরকখ্রে। ঙসিদি ওরিসা মশাগী পান্দম অমসুং লম্বী লৈজরে, মসিনা শেন থাদবা হেনগৎহন্নবা অমসুং অনৌবা থবকশিং পীনবা খুদোংচাবশিং পীরগনি। মখোয়গী থবকশিং অসিগীদমক চীফ মিনিস্তর মোহন চরন মানঝি জি অমসুং মহাক্কী কাংবু থাগৎপা ফোঙদোকচরি।
প্রধান মন্ত্রীনা হায়খি ওরিসাগী খুদোংচাবশিং অচুম্বা মাইকৈদা শীজিন্নদুনা, রাজ্য অসি চাউখৎপগী অনৌবা থাকশিংদা পুখৎপা ঙমগনি। রাজ্য অসিনা মরুওইবা মফমদা লৈরুবগী কান্নবশিংগী ওরিসানা লৌবা ঙমগনি। রাজ্য অসিদগী লৈবাক অসিগী অমসুং মালেমগী কৈথেলশিং ইরাই লাইনা য়ৌবা ঙম্লে। ওরিসা অসি নোংপোক অমসুং খা-নোংপোক এসিয়াগী ললোন-ইতিক্কী মরুওইবা মফম অমনি। তুংদা মালেমগী ভেলু চেনশিংদা ওরিসাগী মরুওইবা হেনগৎলক্কনি। রাজ্য অসিদগী মপান লৈবাকশিংদা থাদোকপা হেনগৎহন্নবা পান্দমদা সরকারনা থবক পায়খৎলি।
প্রধান মন্ত্রীনা হায়খি মদুদি সহর শেমগৎনবগী খুদোংচাবা কয়া ওরিসাদা মরাংকাইনা লৈরি। মাইকৈ অসিদা মহাক্কী সরকারনা চপ চাবা থবকশিং পায়খৎলি। অচৌবা অমসুং মপুংফানা শম্নরবা সহরশিং শেমগৎনবা সরকারনা থবক পায়খৎলে। ওরিসাগী তয়র-২ গী সহরশিং হায়বদি ওরিসাগী নোংচুপ থংবা জিলাশিংদা অনৌবা ইনফ্রাস্ত্রকচরশিং শেমগৎতুনা অনৌবা খুদোংচাবশিং পীনবা সরকারনা থবক কয়া পায়খৎলে। ওরিসা অসি লৈবাক শীনবা থুংবগী মহৈরোয়শিংগী অনৌবা থাজবা অমা ওইরে অমসুং লাইরিক-লাইশুগী লমদা মাংজিল থানবা রাজ্য অসি ইথিল পীবা জাতি অমসুং ইন্তরনেসনেলগী ইন্সতিতুৎ কয়া রাজ্য অসিদা লৈরে। হায়রিবা থবকশিং অসিনা রাজ্য অসিদা স্তার্দঅপকী থবকশিং পুক্নিং থৌগৎলে।
প্রধান মন্ত্রীনা হায়খি ওরিসাগী কলাশিংনা মীয়ামগী পুক্নিং চিংশিল্লি, মসি ওদিসি জগোয় ওইবা য়াই নত্ত্রগা ওরিসাগী অয়েকপা লাইশিং ওইবা য়াই নত্ত্রগা পাত্তাচিত্রশিং নত্ত্রগা সৌরা অয়েকপা লাইশিং ওইবা য়াই। কনাগুম্বা অমনা ওরিসাগী সম্বলপুরি, বোমকাই অমসুং কোতপাদকী ফিশাবশিংগী হৈথোই-শিংথোইবা উবা ফংগনি। ঐখোয়না কলা অমসুং খুৎ-শাগী হৈথোই-শিংথোইবা হেন্না শন্দোক্লিবমখৈ অমসুং য়োক্তুনা থম্লিবমখৈ, ওরিসাগী মীয়ামগী ইকায়খুম্নবা হেনগৎলক্কনি। ওরিসাগী য়ুমশারোল অমসুং সাইন্সকী লন কয়া মরাংকাইনা লৈরি। সাইন্স, য়ুমশারোল অমসুং কোনার্ককী সন তেম্পল, লিঙ্গরাজ অমসুং মুক্তেশ্বরগুম্বা অরিবা লাইশঙশিংগী পাক-চাউবা, ফজবা অমসুং খুৎ-শাবা হৈবগী মমি অসিনা মীওই খুদিংমক অঙকপা পোকহল্লে।
প্রধান মন্ত্রীনা হায়খি ওরিসা অসি তুরিজমগী লমদা খুদোংচাবা কয়া মরাংকাইনা লৈবা লমদম অমনি। হায়রিবা খুদোংচাবশিং অসি থবক ওইনা পাংথোক্নবা হিরম খুদিংমক্ত থবক তৌবা দরকার ওইরে। ঙসিদি ওরিসা অমসুং লৈবাক অসিদা ওরিসাগী হেরিতেচ অমসুং মসিগী শক্তম ইকায়খুম্নবা সরকার অমা লৈরে। হৌখিবা চহিদা জি-২০ গী মীফম অমা ওরিসাদা পাংথোকখি। লৈবাক কয়াগী লুচিংবশিং অমসুং দিপ্লোমেতশিংগী মমাঙদা সরকারনা সন তেম্পলগী ফজবা উহনখ্রে। মহাপ্রভু জগনাথ লাইশঙ কমপ্লেক্সকী গেত মরিমক লাইশঙগী রত্ন ভন্দারগা লোয়ননা হাংদোকপা অসিদা অপেনবা ফাওই।
প্রধান মন্ত্রীনা হায়খি মালেমদা ওরিসাগ মশক তাক্নবা অনৌবা থবকশিং পায়খৎপা দরকার ওইরে। বালি যাত্র নুমিৎ লাউথোকপা য়াগনি অমসুং বালি যাত্র মমিং চৎনবা অমসুং মালেমগী ফম্বাক্ত য়োকখৎনবা থবক পায়খৎপা য়াগনি। ওরিসা জগোয়গুম্বা কলাগী ওরিসা নুমিৎ পাংথোকপনা তোঙান-তোঙানবা ত্রাইবেল হেরিতেচশিং হরাওবা ফোঙদোক্নবা খুদোংচাবা ফংগনি। তুরিজম অমসুং অপীকা উদ্যোগশিংগা মরী লৈনবা খুদোংচাবশিং মীয়ামদা খঙহন্নবা স্কুলশিং অমসুং কলেজশিংদা অখন্নবা থৌরমশিং পাংথোক্কদবনি। হন্দক ভুবনেশ্বরদা প্রভাসি ভারতিয় সম্মেলন পাংথোক্লনি অমসুং মসি ওরিসাগীদমক অচৌবা খুদোংচাবা অমনি।
প্রধান মন্ত্রীনা হায়খি মালেম শীনবা থুংনা মমালোল অমসুং নাত কাউথোকপগী চৎনবী অমা লাক্লে। ওরিয়া মীয়াম্না লৈরুবা মফম খুদিংমক্ত, মতম পুম্নমক্ত রাজ্য অসিগী নাত, রাজ্য অসিগী লোল অমসুং রাজ্য অসিগী কুহ্মৈশিং হিংহল্লি। হন্দক মহাক্না গয়ানাদা চৎলুবা অদুদা কমদৌনা মমালোল অমসুং নাতনা কনাগুম্বা অমা মখোয়গী মমা লৈবাক্কা শম্নহনবগে হায়বা অমুক হন্না খঙলে। চহি ২০০ গী মমাঙদা শিন্মী চা কয়া ভারত থাদোকখি, অদুবু মখোয়গা লোয়ননা মখোয়না রামচরিত মনাস পুখি অমসুং ঙসি ফাওবা মখোয়না ভারতকা শম্নরি। ঐখোয়গী নাত অমসুং চৎনবী ঙাকপা অসিনা, চাউখৎপা অমসুং অহোংবা লাকপা মতমদা ফাওবা মীওই খুদিংমক্না মসিগী কান্নবা ফংগনি। মসিগা চপ মান্নবা মওংদা, ওরিসা অনৌবা থাকশিংদা পুখৎপা ঙমগনি।
প্রধান মন্ত্রীনা হায়খি ঙসিগী অনৌবা যুগ অসিদা, ঐখোয়গী হৌরকফমশিং মপাঙ্গল কনখৎহনবগা লোয়ননা অনৌবা অহোংবশিং লৌশিনবা মরুওই। ওরিসা ফেস্তিবেলগুম্বা থৌরমশিং অসি মসিগী পাম্বৈ অমা ওইগনি। লাক্লিবা চহিশিংদা ওরিসা পর্বা হেন্না পাকথোক-চাউথোকহনগদবনি অমসুং মসি দিল্লি খক্তদা পাংথোক্লোইদবনি। মীওই কয়া, স্কুলশিং অমসুং কলেজশিং মসিদা হেন্না শরুক য়ানবা থবকশিং পায়খৎকদবনি। দিল্লিদা লৈবা অতোপ্পা রাজ্যশিংগী মীওইশিং শরুক য়াহনগদবনি অমসুং ওরিসাগী মরমদা হেন্না খঙহনগদবনি।
লোইশিল্লকপদা, প্রধান মন্ত্রীনা হায়খি তুংদা, কুহ্মৈ অসি মীয়াম শরুক য়ানবা অফবা মফম অমা ওইহন্দুনা, কুহ্মৈ অসিগী মচুশিং ওরিসা অমসুং ভারতকী কাচিন-কোয়া শীনবা থুংনা য়ৌহনগদবনি।
থৌরম অদুদা শরুক য়াখিবশিংগী মনুংদা রেলৱেজ, ইনফোর্মেসন আমসুং ব্রোদকাস্তিং, ইলেক্ত্রোনিক্স অমসুং আই.তিগী য়ুনিয়ন মিনিস্তর শ্রী অশ্বিনি বৈষ্ণব অমসুং ইজুকেসনগী য়ুনিয়ন মিনিস্তর শ্রী ধর্মেন্দ্র প্রধান, ওরিসা সমাজগী প্রসিদেন্ত শ্রী সিদ্ধার্থ প্রধান য়াওখি।
নুঙগীৱারোল
ওরিসা পর্বা অসি নিউ দিল্লিদা লৈবা ত্রস্ত অমা, ওরিয়া সমাজনা পাংথোকপা মরুওইবা থৌরম অমনি। থৌরম অসিগী খুৎথাংদা, মখোয়না ওরিসাগী নাত অমসুং চৎনবীশিং য়োকখৎপা অমসুং চাউখৎহনবদা মমল য়াম্লবা মতেং কয়া পাংলি। চৎনবী অসি মখা চৎথরকপা ওইনা, চহি অসিগী ওরিসা পর্বা নবেম্বর ২২ দগী নবেম্বর ২৪ ফাওবা পাংথোকপনি। মসিনা ওরিসাগী মখল কয়াগী নাতকী শক্তমশিং উৎকনি অমসুং রাজ্য অসিগী খুন্নাইগী, নাত অমসুং রাজনিতিগী ওইবা চৎন-লোনচৎ কয়া উৎকনি। তোঙান-তোঙানবা হিরমশিংগী শক্নাইরবা মীওইশিং অমসুং অখঙ-অহৈশিংনা শরুক য়াদুনা জাতি থাক্কী সেমিনার নত্ত্রগা মীফম অমসু পাংথোকখ্রে।
