ঙসি প্রধান মন্ত্রী শ্রী নরেন্দ্র মোদীনা রাজস্থানগী চিত্তোরগরদা লুপা করোর 7000 রোমগী তোঙান-তোঙানবা চাউখৎ-থৌরাংগী প্রোজেকশিং উরেপ-উয়ুং তমখ্রে অমসুং মীয়ামদা কৎথোকখ্রে। প্রোজেকশিংগী মনুংদা মেহসানা-ভতিন্দা-গুর্দাস্পুর গ্যাস পাইপলাইন, অবু রোদতা লৈবা HPCLগী LPG প্লান্ত অমা, অজমের বোত্তলিং প্লান্ত, IOCL, রেলৱেজ অমসুং লম্বীগী প্রোজেকশিং, নাথদ্বারাদা তুরিজমগী খুদোংচাবশিং অমসুং কোতাদা ইন্দিয়ান ইন্সতিতুৎ ওফ ইনফোর্মেসন তেক্নোলোজিগী পর্মনেন্ত কেম্পস য়াওরি।
তিনখিবা মীয়ামদা ৱা ঙাংবদা, প্রধান মন্ত্রীনা মহাত্মা গান্ধী অমসুং লাল বহাদুর শাস্ত্রিগী মপোক কুমওনশিং নিংশিংখি। ঙরাং ওক্তোবর ১দা লৈবাক্কী মফম কয়াদা পাংথোকখিবা লু-নানবগী খোঙজং অদু মহাক্না পনখি অমসুং মসি মীয়ামগী খোঙজং অমা ওইহনবগীদমক মীয়াম থাগৎপা ফোঙদোকখি।
লু-নানবা, মশাগী ওক্নবা পুথোকপা অমসুং চাউখৎ-থৌরাংগী মতাংদা মহাত্মা গান্ধীগী ফিদমশিং ফোঙদোক্লদুনা প্রধান মন্ত্রীনা হায়খি মহাক্কী ফিদমশিং অসি পাকথোক-চাউথোকহন্নবা হৌখিবা চহি ৯ অসিদা লৈবাক অসিনা থবক তৌরি অমসুং মসি ঙসিগী লুপা করোর 7000 হেনবগী চাউখৎ-থৌরাংগী প্রোজেকশিং অসিদা মমি তারে।
প্রধান মন্ত্রীনা হায়খি গ্যাসতা য়ুম্ফম ওইবা শেন্মিৎলোন অমা শেমগৎনবা, মমাঙদা অমুক্তা ওইখিদ্রিবা মওংদা লৈবাক শীনবা থুংনা গ্যাস পাইপলাইনশিং ফুম্বগী থবক পায়খৎলি। ঙসি মীয়ামদা কৎথোকখিবা মেহসানা-ভতিন্দা-গুর্দাস্পুর গ্যাস পাইপলাইনগী হনুমানগর সেক্সন্না রাজস্থান্দা উদোগ চাউখৎহনগনি অমসুং থবক ফংবা হেনগৎহনগনি। মসিনা চাকখুমশিংদা পাইপতা গ্যাস ফংহনবা হেনগৎহল্লগনি।
প্রধান মন্ত্রীনা হায়খি ঙসি হৌদোক্লিবা রেলৱে অমসুং লম্বীগা মরী লৈনবা প্রোজেকশিং অসিনা মেৱার লমদমগী মীয়ামগী পুন্সি হিংবদা লাইহল্লগনি। মসিনা অনৌবা থবক কয়া পীনবা খুদোংচাবশিং পীরগনি। IIIT কেম্পস শেমগৎপগা লোয়ননা, লাইরিক-লাইশু তম্ফম অমা ওইনা কোতাগী শক্তম মপাঙ্গল কনখৎহল্লগনি।
প্রধান মন্ত্রীনা হায়খি রাজস্থান হৌখ্রবা মতমগী অফবা পুৱারি লৈবা, হৌজিক মপাঙ্গল কনবা অমসুং তুংগী খুদোংচাবা কয়া লৈবা রাজ্য অমনি। নাথদ্বারা তুরিস্ত অমসুং কলচরেল সেন্তর অসি জয়পুরগী গোবিন্দ দেব জি লাইশঙ, সিকারগী খাতু শ্যাম মন্দির অমসুং রাজসামন্দগী নাথদ্বারা য়াওবা তুরিস্ত সর্কুইতকী শরুক অমনি। মসিনা রাজস্থানগী ফজবা হেনগৎহনগনি অমসুং তুরিজম ইন্দস্ত্রিদা কান্নবা পীগনি।
শ্রী মোদীনা হায়খি ভাগবান কৃষ্ণদা কৎথোক্লবা চিত্তোরগর ময়াগী শ্বারিয়া সেথ লাইশঙ অসি স্পিরিচুএলিতিগী মফম অমনি। শ্বারিয়া সেথ খুরুম্নবা চহি খুদিংগী ভক্ত লাখ কয়া লাক্লি। লাইশঙ অসিনা ললোনবশিংদা কান্নবা য়াম্না পীরি। শ্বাদেস দর্সন স্কিমগী মখাদা লাইশঙ অসিদা মতমগা চুনবা অনৌবা খুদোংচাবশিং হাপচিল্লে অমসুং ৱাতর-লেজর শো অমা, লমকোয়বশিংগী মফম অমা, এম্ফিথিয়েতর অমা অমসুং কেফেতেরিয়া অমা লৈরে। হায়রিবা খুদোংচাবশিং অসিনা লাই খুরুম্বা লাকপশিংদা হেন্না নুংঙাইহল্লগনি।
প্রধান মন্ত্রীনা হায়খি রাজস্থানগী চাউখৎ-থৌরাং পায়খৎপা হায়বসি ভারত সরকারনা য়াম্না মরুওইনা লৌবা হিরম অমনি। রাজস্থান্দা এক্সপ্রেসৱেশিং, হায়ৱেশিং অমসুং রেলৱেশিং শেমগৎনবা ঐখোয়না মীৎয়েং চঙলে। দিল্লি-মুম্বাই এক্সপ্রেসৱে ওইগেরা, নত্ত্রগা অমৃতশর-জামনাগর এক্সপ্রেসৱে ওইগেরা, মখোয়না রাজস্থান্দা পোৎ-চৈ পুথোক-পুশিন্দা অনৌবা থৌনা অমা পীরগনি। হন্দক উদয়পুর-জয়পুর বন্দে ভারত ত্রেন লমথাখ্রে। ভারতমালা প্রোজেক্কী খ্বাইদগী কান্নবা ফংলবা রাজ্যশিংগী মনুংদা রাজস্থানসু য়াওরি।
প্রধান মন্ত্রীনা মখা তানা হায়খি থৌনা, অফবা অমসুং চাউখৎপগা লোয়ননা ঐখোয় মাঙলোমদা চঙশিনগদবনি হায়না রাজস্থানগী পুৱারিনা ঐখোয়দা তাক্লি। ঙসিগী ভারতসু মসিগা চপ মান্ননা থবক তৌরি। মীয়ামগা লোয়ননা, চাউখৎলবা ভারত অমা শেমগৎনবা ঐখোয় থবক তৌরি। মমাঙদা চাউখত্তনা লৈরম্বা মফমশিং অমসুং কাংলুপ, ঙসিদি মখোয় চাউখৎহনবা হায়বসি লৈবাক অসিনা মরুওইনা লৌরে।
হৌখিবা চহি ৫দা লৈবাক অসিদা মাইপাক্না পায়খৎলিবা এস্পিরেসনেল দিস্ত্রিক প্রোগ্রামগী মতাংদা প্রধান মন্ত্রীনা হায়খি কেম্পেন অসিগী মখাদা রাজস্থানগী জিলা কয়া শেমগৎলে। এস্পাইরিং ব্লোকশিং মশক খঙদোকপা অমসুং মখোয় য়াংনা চাউখৎহনবগী থবকশিংদা হৌজিক কেন্দ্র সরকারনা পুক্নিং চঙলে। তুংদা, রাজস্থানগী ব্লোক কয়া কেম্পেন অসিগী মখাদা শেমগৎলগনি।
তোল্লবশিংদা মীৎয়েং চঙবগী মতাংদা, প্রধান মন্ত্রীনা হায়খি কেন্দ্র সরকারনা ভাইব্রেন্ত ভিলেজ প্রোগ্রামশু হৌদোক্লে। মতম অমদা অরোইবনি হায়না খন্নরম্বা ঙমখৈদা লৈবা খুঙ্গংশি, মখোয় অহানবা খুঙ্গংশিংনি হায়না লৌদুনা হৌজিক ঐখোয়না মখোয় শেমগৎলে। রাজস্থানগী ঙমখৈগী খুঙ্গং কয়া মসিদগী কান্নবা শোইদনা ফংগনি।
নুঙগীৱারোল
গ্যাসতা য়ুম্ফম ওইবা শেন্মিৎলোন খুমাং চাউশিলহনবগী অতোপ্পা খোঙথাং অমদা, প্রধান মন্ত্রীনা মেহসানা-ভতিন্দা-গুর্দাস্পুর গ্যাস পাইপ্লাইনবু মীয়ামদা কৎথোকখ্রে। পাইপ্লাইন অসি চাউরাক্না লুপা করোর 4500 চঙনা শাখিবনি। প্রধান মন্ত্রীনা অবু রোদতা লৈবা HPCLগী LPG প্লান্ত অমা মীয়ামদা কৎথোকখ্রে। প্লান্ত অসিদা বোত্তলিং তৌবগা লোয়ননা চহিদা সিলিন্দর লাখ 86 য়েন্থোকপা ঙমগনি অমসুং সিলিন্দর পুদুনা চৎপা ত্রকশিং চেনবগী চাংদা চহিদা চাউরাক্না মিলিয়ন কিলোমীতর 0.75 হন্থহনবা ঙমগনি, মসিনা মখা তানা CO2 থাদোকপগী চাং চহিদা চাউরাক্না মিলিয়ন তন 0.5 হন্থহনবদা তেংবাংগনি। প্রধান মন্ত্রীনা অজমর বোত্তলিং প্লান্ত, IOCL দা পোৎ থম্বগী অহেনবা মফমসু মীয়ামদা কৎথোকখ্রে।
প্রধান মন্ত্রীনা দরাহ-ঝলাৱর-তীন্ধর সেক্সনগী NH-12 (অনৌবা NH-52)তা লেন মরিগী শোরোকমসু মীয়ামদা কৎথোকখ্রে, হায়রিবা শোরোক অসি লুপা করোর 1480 হেন্না চঙনা শাখিবনি। প্রোজেক্ত অসিনা কোতা অমসুং ঝলাৱর জিলাগী খোনীশিংদগী পুথোকপা পোত্থোকশিং পুথোক পুশিন তৌবদা হেন্না নুংঙাইহল্লগনি। মখা তারকপদা, মহাক্না সৱাই মাধোপুরগী রেলৱে ওভর ব্রিজ (ROB) শাবা অমসুং লেন অনিদগী লেন মরিদা পাকথোক চাউথোকপগী উরেপ উয়ুং তমখি। প্রোজেক্ত অসিনা লম্বী চিনবগী খুদোংচাদবশিং কোকহনগনি।
প্রধান মন্ত্রীনা মীয়ামদা কৎথোকখিবা রেলৱে প্রোজেক্তশিংগী মনুংদা চিত্তোরগর-নীমুক রেলৱে লাইন অমসুং কোতা-চিত্তোরগর ইলেক্ত্রিফাইদ রেলৱে লাইন দব্লিং তৌবগী থবক য়াওবা প্রোজেক্তশিং য়াওরি। হায়রিবা প্রোজেক্তশিং অসি লুপা করোর 650 হেন্না চঙদুনা লোইশিনখিবনি অমসুং মসিনা লমদম অসিগী রেল ইনফ্রাস্ত্রকচরগী মপাঙ্গল হেনগৎহনবগা লোয়ননা রাজস্থানগী পুৱারী ওইবা মফমশিংগী তুরিজমসু হেনগৎহনগনি।
প্রধান মন্ত্রীনা স্বদেশ দর্শন স্কিমগী মখাদা নাথদ্বারদা শেমগৎখিবা তুরিজম ফেসিলিতীশিংবু মীয়ামদা খুৎশিন্নখি। নাথদ্বার হায়বসি সন্ত বল্লবচার্য়না হৌদোক্লম্বা পুশ্তিমার্গকী তুং ইনবা মীওই মিলিয়ন কয়াগী মরু ওইবা লাইনীংফম অমনি। মতমগা চুনবা ‘তুরিস্ত ইন্তর্প্রিতেসন অমসুং কলচরেল সেন্তর’ অমসু নাথদ্বারদা শেমগৎলে, মফমসিদা লমকোয়বশিংনা শ্রীনাথজীগী পুন্সিগী ৱাফম কয়া খঙবা অমসুং এক্সপেরিএন্স তৌবা ঙমগনি। মখা তারকপদা, প্রধান মন্ত্রীনা কোতাদা লৈবা ইন্দিয়ন ইন্সতিত্যুত ওফ ইনফোর্মেসন তেক্নোলোজীগী পর্মানেন্ত কেম্পস অমসু মীয়ামদা কৎথোকখ্রে।
