প্রধান মন্ত্রী, শ্রী নরেন্দ্র মোদীনা ঙসি মহারাস্ত্রগী নাশিক্তা 27শুবা নেস্নেল য়ুথ ফেস্তিবেল হৌদোকখ্রে। শ্রী মোদীনা স্বামী বিবেকানন্দ অমসুং রাজমাতা জিজাবাইগী অয়েকপা শক্তমদা হৈকৎ-লৈকৎ তমখি। ‘বিকশিৎ ভারত @2047 – নহাশিংগীদমক্তা, নহাশিংগী খুত্থাংদা’ হায়বা থীমগা লোয়না রাজ্যগী তীম্না মার্চ পাস্ত চৎপা অমসুং নাৎকী ওইবা থৌরম কয়া পাংথোকপশিংবুসু মহাক্না মিৎয়েং তাখি। হায়রিবা থৌরমশিং অসিদা তান্থা নাইবা জিম্নাস্তিক, মল্লাখম্ব, য়োগাসন অমসুং নেস্নেল য়ুথ ফেস্তিবেলগী ঈশৈ-নোংমাইসু য়াওখি।
প্রধান মন্ত্রীনা ঙসি তিনখিবা মীয়ামদা ৱা ঙাঙবদা, ঙসি অসিদি ভারতকী নহাশিংগী পাঙ্গলবু শকখঙবা নুমিৎনি অমসুং মীখা পোল্লিঙৈ মতমদা লৈবাক্কী মফমদা অনৌবা পাঙ্গল অমসুং থৱাই য়াওবগী ইথিলনা থলহনখিবা অথোইবা মীওই, স্বামী বিবেকানন্দগী মফমদা কত্থোকপনি হায়না ফোংদোকখি। স্বামী বিবেকানন্দগী মপোক কুমওন্দা পাংথোক্লিবা নেস্নেল য়ুথ দেগী থৌরম অসিগা মরী লৈননা শ্রী মোদীনা মীয়ামদা য়াইফ পাউজেল পীখি। ঙসি অসিদি ভারতকী নুপীগী পাঙ্গলগী খুদম অমা ওইরিবা রাজমাতা জিজাবাইগী মপোক কুমওন তাবসিবুসু মহাক্না শকখঙখিবগা লোয়ননা ঙসিগী থৌরমসিদা মীয়াম্না শরুক য়াবগীদমক্তা মীয়াম্বু থাগৎখি।
মহারাস্ত্রগী লমদম অসিনা শক্নাইরবা মীওই কয়া ঙসি ফাওবদা পুথোক্তুনা লাক্লিবা অসি শুপ্নগী তান চান্নবা নত্তে, মসিদি মগুন লৈবা অমসুং থৌনা লৈবা লৈহাও অসিনা ওইহনবনি হায়না প্রধান মন্ত্রী মোদীনা হায়খি। রাজমাতা জিজাবাইগুম্বী শক্নাইরবী মীওইশিংগী খুত্থাংদগী লমদম অসিনা ছত্রপতি শিবাজী পুথোকখি, দেবী অহিলয়া হোলকর অমসুং রামাবাই অম্বেদকরগুম্বী নুপী লুচিংবী পুথোকখি, অদুগা লোকমানয়া তিলক, বীর সাবর্কর, অনন্ত কানহেরে, দাদাসাহেব পোতনিস অমসুং চাপেকার বন্ধুগুম্বা অতোপ্পা অথোইবা মীওই কয়াসু পুথোকখিবনি হায়না প্রধান মন্ত্রীনা মখা তাখি। “ভগ্বান শ্রী রাম্না নাশিক্কী পঞ্চবতী লমদমদা শাংলবা মতম কয়া লেনখি”, প্রধান মন্ত্রীনা অথোইবগী লমদম অসিদা কোক নোল্লদুনা হায়খি। হন্দক্কী চহিগী জনুৱারী 22গী মমাংদা, ভারতকী লাইনীংফমশিংদা লু-নানবগী কেম্পেন অমা চত্থসি হায়বা মহাক্কী খোল্লাওগী মতাংদা পল্লদুনা, প্রধান মন্ত্রীনা নাশিক্কী শ্রী কালারাম লাইশঙদা দর্শন অমসুং পুজা তৌবগী মতাংদা পনখি। লৈবাক্কী লাইনীংফম কয়াদা লু-নানবগী কেম্পেন চত্থবগী তঙাই ফদবগী মতাংদা মহাক্না অমুক্কা হন্না নীংশিংখি অমসুং অথুবা মতমদা শঙ্গারগদবা শ্রী রাম লাইশঙবু মীয়ামদা খুৎশিন্নদ্রিঙৈগী মমাংদা থবকশিং অসি পাংথোকসি হায়না মহাক্না ফোংদোকখি।
য়ুবাশক্তিবু খ্বাইদগী অথোইবা ওইনা থম্বগী চৎনবীদা মহাক্না মীয়ামগী পুক্নিং চীংশিল্লদুনা, পি.এম. মোদীনা শ্রী ঔরোবিন্দো অমসুং স্বামী বিবেকানন্দগী মমিং পনখি অমসুং ভারতনা মালেমগী মকোক থোংবা শেন্মিৎলোন মঙাগী মনুংদা চনবা ঙম্লিবসি নহাশিংগী পাঙ্গলননি হায়না ফোংদোকখি। লৈবাক্কী নহাশিংগী পাঙ্গলনা মরম ওইরগা ভারতনা স্তার্তঅপকী মকোক থোংবা ইকোসীস্তেম অহুমগী মনুং চল্লিবা, রেকোর্দ ওইরবা পেতেন্ত মশিং লৈবা, অমসুং অচৌবা মেন্যুফেকচরিং হব অমা ওইরক্লিবা অসিগী মতাংদসু মহাক্না পনখি।
‘অমৃত কাল’গী হৌজিক চৎলিবা মতম অসি ভারতকী নহাশিংগী তোপ-তোপ্পা পুঙফম অমনি হায়বসিদা প্রধান মন্ত্রীনা মিৎয়েং চঙখি। এম বিসবেস্বরাইয়া, মেজর ধ্যান চান্দ, ভগৎ সিংহ, চন্দ্রসেখর আজাদ, বাতুকেশ্বর দত্ত, মহাত্মা ফুলে, সাবিত্রী বাই ফুলেগুম্বা শক্নাইরবা মীওইশিংনা পুৱারী শেম্বা ঙম্বা শরুক তম্লম্বশিংবু অমুক্কা হন্না নীংশিংলদুনা, মখোয়না লৌরম্বা থৌদাংগা মান্ননা ঙসিগী নহাশিংনা অমৃত কালগী মতমসিদা থবক তৌসি হায়না প্রধান মন্ত্রীনা হায়খি। লৈবাকপু অনৌবা অৱাংবা থাক্তা পুসি হায়না মহাক্না নহাশিংদা হায়খি। মসিগুম্বা তোপ-তোপ্লবা খুদোংচাবা অসিগী মতাংদা প্রধান মন্ত্রীনা অসুম্না হায়খি, “ঐহাক্না অদোমশিং অসিবু ভারতকী পুৱারীগী ওইনা খ্বাইদগী লাইবক ফবা চারোন শুরোন্নি হায়না লৌই। ভারতকী নহাশিংনা ঐখোয়গী পান্দমশিং অসি ফংবা ঙমগনি হায়বা ঐহাক খঙই”। নহাশিংনা মাই ভারত পোর্তেলগা মরী লৈনরক্লিবা খোঙজেল অসিদা প্রধান মন্ত্রীনা নুংঙাইবা ফাওই হায়খি। নুমিৎ 75কী মনুংদা, নহা করোর 1.10না পোর্তেল অসিদা রেজিস্তর তৌখ্রে।
হৌজিক পাল্লিবা সরকার অসিনা সমুদ্রগুম্বা পাক চাউবা খুদোংচাবা কয়া পীরিবা অমসুং চহি 10 শক্তি পায়রকপা অসিদা ভারতকী নহাশিংগী শিংনবা খুদিংমক লৌথোকখ্রে হায়না প্রধান মন্ত্রীনা পাউদমখিবগা লোয়ননা এজুকেসন, ইমপ্লোয়মেন্ত, ওন্তোপ্রিনর্শিপ, ইমর্জিং সেক্তর, স্তার্তঅপ, স্কিল অমসুং স্পোর্তকুম্বা সেকতরশিংদা মতমগা চুনবা অমসুং মতিক লৈবা ইকোসীস্তেম কয়া শেমগৎপা ঙম্লিবা অসিগী মতাংদসু পনখি। এজুকেসনগী অনৌবা পোলিসী অমা চৎনবা হৌবা, মতমগা চুনবা স্কিলিং ইকোসীস্তেম অমা শেমগৎপা, আর্তিস্ত অমসুং হেন্দিক্রাফ সেক্তরগীদমক্তা পি.এম. বিশ্বকর্মা য়োজনা পায়খৎপা, পি.এম. কৌশল বিকাস য়োজনা চলায়দুনা নহা করোর কয়াগী স্কিল হেনগৎহনবা অমসুং লৈবাক অসিদা অনৌবা IIT, IIM কয়া লিংখৎলিবা অসিগী মতাংদসু প্রধান মন্ত্রীনা পাউদমখি। “মালেম্না ভারত্তা স্কিল লৈরবা অনৌবা শাফু অমা ওইনা য়েংলি”, মালেমদা মশাগী স্কিল উৎপা পাম্বা নহাশিংদা ত্রেনিং পীবগী মতাংদা পল্লদুনা শ্রী মোদীনা হায়খি। সরকার অসিনা ফ্রান্স, জর্মনী, য়ু.কে., ওস্ত্রেলিয়া, ইতালী, ওস্ত্রিয়ানচিংবা লৈবাকশিংগা মোবিলিতীগী মতাংদা পুরকখিবা য়ানবশিংনা লৈবাক্কী নহাশিংদা য়াম্না চাউনা কান্নবা কয়া পীরি হায়না মহাক্না হায়খি।
পি.এম. মোদীনা হায়খি, “ঙসিদি, খুদোংচাবগী অনৌবা ইপাক অমা নহাশিংগীদমক্তা হাংদোক্লে অমসুং সরকারনা মশাগী লৈজবা পাঙ্গলগা লোয়ননা মসিগীদমক্তা থবক পায়খৎলি”। দ্রোন, এনিমেসন, গেমিং, কোমিক, ভিজুএল ইফেক্ত, এতোমিক, স্পেস অমসুং মেপ্পিংগুম্বা সেক্তরশিংগীদমক্তা তেংবাংনবা অকোয়বগী ফিভম কয়া শেমগৎলিবশিংগী মতাংদা মহাক্না পনখি। হৌজিক পাল্লিবা সরকারগী মখাদা পুরক্লিবা খোঙজেল য়াঙলবা চাউখৎ থৌরাংশিংদা মিৎয়েং চঙলদুনা, প্রধান মন্ত্রীনা হাইৱে, মতমগা চুনবা ত্রেন, মালেমগী থাক্কী এয়রপোর্ত কয়া লৈদুনা শাহৌ লৌরকপা, ভেক্সিন কাপ্পগী সর্তিফিকেত পীবগুম্বা দিজিতেল সর্ভিস অমসুং দেতা হোঙবনা লৈবাক্কী নহাশিংগী মফমদা খুদোংচাবা কয়াগী অনৌবা থোঙ হাংদোক্লে হায়না মখা তাখি।
“ঙসিদি, লৈবাক্কী মওং-মতৌ পুম্নমক নহাগী মওং-মতৌমক্কা মান্নরে”, প্রধান মন্ত্রীনা ঙসিগী নহাশিংনা পন্থনা লৈত্রে, লম্বী ওইনা তাক্লে হায়রদুনা ফোংদোকখি। মরম অদুনা, ভারতনা তেক্নোলোজীগী হীরমদা লুচিংবা অমা ওইরক্লিবনি হায়না প্রধান মন্ত্রীনা হায়খি অমসুং চন্দ্রয়ান 3 অমসুং অদিত্য L1 মিসনগী খুদম পীখি। মহাক্না ‘ভারত্তা শাবা’ INS বিক্রান্ত, নিংতম্বা নুমিত্তা গন সেল্যুত পীবদা শিজিন্নবা লৈবাক অসিদা শাজবা তোপ, অমসুং তেজস ফাইতর প্লেনগী মতাংদসু ৱাফম থমখি। অতোপ্পা হীরম কয়াগী মনুংদগী, প্রধান মন্ত্রীনা লৈবাক্কী অপীকপা দুকানশিংদগী হৌরগা খ্বাইদগী চাউরবা শোপ্পিং মোলশিংদা UPI পাক্তক্ননা শিজিন্নরিবা অসিগী মতাংদসু পনখি। “অমৃত কাল লাকপনা ভারতপু চাউথোকচহল্লে”, প্রধান মন্ত্রীনা হায়রদুনা লৈবাক্কী নহাশিংনা ভারতপু অমৃত কাল মনুংদা ‘বিকশিৎ ভারত’ অমা ওইহন্নবা তুংলমচত্তা পুনবা হায়খি।
হৌজিক্কী মতমসিদি নহাশিংনা মখোয়গী মঙলানবু মশা পালহনবগী মতম্নি হায়না প্রধান মন্ত্রীনা নহা ওইরিবা চারোন শুরোনশিংগী মফমদা হায়খি। “ঐখোয়না হৌজিক শিংনবা কয়াগী ৱারোইশিন পুরকপা খক্তা নত্তনা, ইশাগী ওইবা অনৌবা অচৌবা পান্দম কয়া থমফম থোক্লি”, প্রধান মন্ত্রীনা হায়খি অমসুং ত্রিলিয়ন দোল্লর 5কী শেন্মিৎলোন অমা ওইবা, খ্বাইদগী অহুমশুবা চাউবা শেন্মিৎলোন অমা ওইবা, মেন্যুফেকচরিংগী হব অমা ওইবা অমসুং ক্লাইমেত চেঞ্জ থোকহন্দনবা থবক তৌবা অমসুং নেচরেল ফার্মিংবু খুমাং চাউশিলহনবা হায়বা অনৌবা পান্দম কয়াসু থমখি।
প্রধান মন্ত্রীনা নহা ওইরিবা চারোন শুরোনশিংদা অশুক য়াম্না থাজবা করিগীদমক্তা থম্লিবনো হায়না শন্দোক্না তাক্লদুনা অসুম্না হায়খি, “মতমসিগী মনুংদা, মীখা পোনবগী পোৎলুম অমসুং ইথিলদগী মপুং ফানা নিংতম্লবা অনৌবা চারোন শুরোন অমা লৈবাক অসিদা শেম শারি। হৌজিক্কী চারোন শুরোনগী নহাশিংনা মশাদা থাজবগা লোয়ননা চাউখৎপা পুরক্লসি অমসুং হেরিতেজপুসু ঙাক শেল্লসি হায়বা ৱাফম অমসু থম্লি”। মালেম্না য়োগ অমসুং অয়ুর্বেদগী মগুন খঙলক্লে অমসুং ভারতকী নহাশিংনা য়োগ অমসুং অয়ুর্বেদগী ব্রান্দ এম্বেসেদরসু ওইনরে হায়না মহাক্না হায়খি।
নহাশিংনা মখোয়গী মপু-মধৌশিংনা মখোয়গী মতমদা চানরম্বা বাজ্রাগী তল, কোরো-কুতকী, রাগী-জোৱারগী মতাংদা হংবীয়ু হায়না প্রধান মন্ত্রীনা হায়রদুনা মসিগুম্বা চিঞ্জাক্কা লাইরবগা মরী লৈনহল্লম্লিবা অসিদি মীখা পোনবগী ৱাখল্লোন অদুননি অমসুং হৌজিক্তি মসিনা ভারতকী চাকখুম ৱাংমা লাল্লে হায়না মখা তাখি। সরকার অসিনা মিল্লেত অমসুং অপৌবা হৱাই-চেংৱাইবু সুপরফুদ হায়বা অনৌবা শক্তাক অমা পীরে অমসুং মখোয়না শ্রী অন্না হায়রদুনা ভারতকী ইমুংশিংদা অমুক হঞ্জিল্লক্লে হায়না মহাক্না হায়খি। “অদোম্না হায়রিবা সিরিএলশিং অসিগী ব্রান্দ এম্বেসেদর ওইরবনি। অদোমগী হকশেল ফগৎলগনি অমসুং মসিদগী লৈবাক্কী লৌমীশিংসু কান্নবা য়াম্না ফংনরগনি”, শ্রী মোদীনা মখা তাখি।
নহাশিংনা রাজনীতি তৌদুনা লৈবাক্কী সেবা তৌবসু য়াই হায়না প্রধান মন্ত্রীনা হায়খি। মালেমগী লুচিংবশিংনা ভারত্তা নৌনা থাজবা থম্নরক্লিবা অসিগী মতাংদা মহাক্না ৱাফম কয়া থমখি। “মসিগুম্বা থাজবা, অপাম্বা অমা থম্লিবা অসিগী মরম লৈ। মরম অসিদি ভারত অসি গনতন্ত্রগী মমা ওইবগীনি। নহাশিংনা গনতন্ত্রগী থৌরমশিংদা মশিং য়াম্না শরুক য়াবা হেল্লিবমখৈ, লৈবাক অসিগী তুংগী মতম্না য়াইফবা হেনগদৌরিবনি”, মহাক্না হায়খি। মখোয়না শরুক য়ারকপনা শাগৈগী রাজনীতিগী চৎনবী থুগাইবা ঙমগনি হায়না মহাক্না হায়খি। নহাশিংনা ভোত থাদদুনা মশাগী ৱাখল ফোংদোক্নবা মহাক্না হায়খি। “অহানবা ওইবা ভোত থাদবা মীওইশিংনা ঐখোয়গী গনতন্ত্রদা অনৌবা পাঙ্গল অমসুং ইথিল পীগনি”, মহাক্না মখা তাখি।
“অমৃত কালগী মথংগী চহি 25 অসিদি অদোমগী ইশাগী থৌদাং পাংথোকপগী মতম্নি”, প্রধান মন্ত্রীনা হায়খি অমসুং “অদোম্না ইশাগী থৌদাংনা খ্বাইদগী মরু ওইনা অমসুং ৱাংনা থম্লবা মতমদা, খুন্নাই অমসুং লৈবাক্না চাউখৎলক্কনি” হায়না মখা তাখি। মহাক্না লাল কিলাদগী হায়জখিবা ৱাফম অমা নীংশিংলদুনা, প্রধান মন্ত্রীনা নহাশিংনা লোকেল পোত্থোক শিজিন্নবীয়ু, ভারত্তা শাবা পোত্থোকখক শিজিন্নবীয়ু, নিশাদগী লাপথোক্না লৈবীয়ু, অমসুং ইমা, ইচে, ইচলগী মিং পন্দুনা ঙাঙবা অকাম্পেৎকী মাইয়োক্তা লেপ্পীয়ু অমসুং মসিগুম্বা ফত্তশিংবু লোইশিনবীয়ু হায়বা ৱাফমশিং অমুক্কা হন্না ফোংদোকখি।
প্রধান মন্ত্রীনা মশাগী ৱারোল লোইশিনবা ওইনা, ভারতকী নহাশিংনা মশাগী থৌদাং খুদিংমক থম্মোই শেংনা পাংথোক্কনি হায়বগী অচেৎপা থাজবা লৈ হায়না ফোংদোকখি। “মপাঙ্গল লৈবা, মতিক লৈবা অমসুং মথৌনা লৈবা ভারত অমা শেম্নবা ঐখোয়না থানগদৌরিবা থাউমৈ অসিনা শিবা নাইদবা য়ুগ অসিদা মালেমগীদমক্তা থানবা মুৎপা নাইদ্রবা থাউমৈ অমা ওইগনি”, প্রধান মন্ত্রীনা হায়রদুনা মহাক্কী ৱারোল লোইশিনখি।
মহারাস্ত্রগী মুখ্য মন্ত্রী, শ্রী একনাথ শিন্দে, উপ-মুখ্য মন্ত্রী, শ্রী দেবেন্দ্র ফদনাবিস অমসুং শ্রী অজিত পাৱার, স্পোর্ত অমসুং য়ুথ এফিয়র্সকী কেন্দ্র মন্ত্রী, শ্রী অনুরাগ সিংহ থাকুর অমসুং স্পোর্ত অমসুং য়ুথ এফিয়র্সকী কেন্দ্রগী রাজ্য মন্ত্রী, শ্রী নিতিশ প্রমানিকসু ঙসিগী থৌরম অসিদা শরুক য়াখি।
বেকগ্রাউন্দ
লৈবাক অসিগী চাউখৎ থৌরাংগী খোঙচত্তা নহাশিংবু মরু ওইবা শরুক অমা ওইহন্নবা প্রধান মন্ত্রীনা য়াম্না কন্না হোৎনদুনা লাক্লি। মহাক্কী হোৎনজমন অসিগী অতোপ্পা শরুক অমা ওইনা, প্রধান মন্ত্রীনা নাশকিতা 27শুবা নেস্নেল য়ুথ ফেস্তিবেল (NYF) হৌদোকখ্রে।
নেস্নেল য়ুথ ফেস্তিবেল চহি খুদিংগী জনুৱারী 12তগী 16 ফাওবা পাংথোক্তুনা লাক্লি। অমসুং, জনুৱারী 12 অসিসু স্বামী বিবেকানন্দগী মপোক কুমওন্সু ওইরিবনি। কুহ্মৈ অসিবু হন্দক্কী চহিদা য়ুম্বু ওইগদৌরিবা রাজ্যনা মহারাস্ত্র ওইবনি। কুহ্মৈ অসিগী থীম্না - “বিকশিৎ ভারত @2047: নহাগীদমক্তা, নহাগী মতেংদগী” হায়বসিনা ওইগনি।
NYFনা এক ভারত, শ্রেস্থ ভারতকী ইথিলগা লোয়ননা ভারতকী তোঙান-তোঙানবা মফমদগী লাকপা নহাশিংবু অমত্তা ওইনা পুনশিন্দুনা মপাঙ্গল লৈবা অমসুং অমত্তা ওইবা লৈবাক অমগী অকনবা ফম্বাক অমা শেম্নবা মখোয়গী ৱাখল্লোন লান্নবগী ফোরম অমা শেম্বগী পান্দম থম্মি। লৈবাক শিনবা থুংবগী নহা দেলিগেত চাউরাকপা 7500না নাশিক্তা পাংথোক্কদৌরিবা কুহ্মৈ অসিদা শরুক য়ারি। কলচরেল পরফোর্মেন্স, ইন্দিজিনিয়স স্পোর্ত, দিক্লেমেসন অমসুং থীমেতিক বেজ প্রজেন্তেসন, য়ং আর্তিস্ত কেম্প, পোস্তর শেম্বা, ৱারী ইবা, য়ুথ কনভেন্সন, চিঞ্জাক কুহ্মৈনচিংবা তোঙান-তোঙানবা থৌরম কয়া অমা ফেস্তিবেল অসিগীদমক্তা শিন-লাঙলি।
आज मुझे कालाराम मंदिर में दर्शन करने का, मंदिर परिसर में सफाई करने का सौभाग्य मिला है।
— PMO India (@PMOIndia) January 12, 2024
मैं देशवासियों से फिर अपना आग्रह दोहराउंगा कि राम मंदिर में प्राण प्रतिष्ठा के पावन अवसर के निमित्त, देश के सभी मंदिरों में स्वच्छता अभियान चलाएं, अपना श्रमदान करें: PM @narendramodi pic.twitter.com/B6ItrbRLsT
श्री ऑरोबिन्दो, स्वामी विवेकानंद का मार्गदर्शन आज 2024 में, भारत के युवा के लिए बहुत बड़ी प्रेरणा है। pic.twitter.com/tm6ih2ESjx
— PMO India (@PMOIndia) January 12, 2024
भारत के युवाओं के लिए समय का सुनहरा मौका अभी है, अमृतकाल का ये कालखंड है।
— PMO India (@PMOIndia) January 12, 2024
आज आपके पास मौका है इतिहास बनाने का, इतिहास में अपना नाम दर्ज कराने का। pic.twitter.com/LMTOgBcnnF
10 वर्षों में हमने पूरा प्रयास किया है कि युवाओं को खुला आसमान दें, युवाओं के सामने आने वाली हर रुकावट को दूर करें: PM @narendramodi pic.twitter.com/HUJM5qE0Cg
— PMO India (@PMOIndia) January 12, 2024
आज देश का मिजाज भी युवा है, और देश का अंदाज़ भी युवा है। pic.twitter.com/nqyVEQYD8f
— PMO India (@PMOIndia) January 12, 2024
इस कालखंड में देश में वो युवा पीढ़ी तैयार हो रही है, जो गुलामी के दबाव और प्रभाव से पूरी तरह मुक्त है। pic.twitter.com/mxcaSRyKFg
— PMO India (@PMOIndia) January 12, 2024
लोकतंत्र में युवाओं की भागीदारी जितनी अधिक होगी, राष्ट्र का भविष्य उतना ही बेहतर होगा: PM @narendramodi pic.twitter.com/l1FEugO8Vk
— PMO India (@PMOIndia) January 12, 2024
