“ঐখোয়গী ত্রাইবেল ইচিল ইনাওশিংনা মায়পুননা অহোংবা পুরকখিবনি অমদি লৈঙাক্না পীবা য়াবা মতেং পীখি”
“গোধ্রাগী গোবিন্দ গুরু য়ুনিভর্সিতী অমসুং নর্মদাগী বির্সা মুন্দা য়ুনিভর্সিতী অৱাংবা থাক্কী মহৈ মশিংগী খ্বাইদগী ফবা মহৈশঙশিংনি”“অহানবা ওইনা, ত্রাইবেল খুন্নাইনা চাওখৎ থৌরাং অমসুং খুজিল থৌরাং য়াৎপদা শরুক হেন্না য়াবগী ইথিল অমা পোক্লক্লি”“ত্রাইবেলশিংগী চাওথোকচনিংঙাই ওইবা মফম অমদি লাইনিংগী মফমশিং শেমগৎপনা তুরিজমদা চাউনা ইনোৎ হাপকনি”প্রধান মন্ত্রী শ্রী নরেন্দ্র মোদীনা ঙসি গুজরাতকী পঞ্চমহলদা লৈবা জম্বুঘোরাদা লুপা করোর ৮৬০রোমগী ওইগদবা প্রোজেক্তশিং লৈবাক মীয়ামদা কত্থোকখ্রে অমদি উরেপ উয়ুং তমখ্রে।
তিল্লিবা মীয়ামগী মফমদা ৱা ঙাঙলদুনা, প্রধান মন্ত্রীনা ঙসি অসি গুজরাতকী আদিবাসি অমসুং ত্রাইবেল ফুরুপশিংগী য়াইফরবা নুমিৎ অমনি হায়খি। প্রধান মন্ত্রীনা ঙসি ঙল্লিঙৈদা মনগরদা চত্তুনা ভারতকী নীংতম লালদা থৱায় কৎখ্রবা গোবিন্দ গুরু অমদি অতৈ ত্রাবেল নীংতম লান্মী লিশিং কয়াগী মফমদা শ্রদ্ধাঞ্জলি কৎখিববু নীংশিংখি।
মফম অসিগা মহাক্কা মতম লৈনরকপা মরী নীংশিংলদুনা, প্রধান মন্ত্রীনা ভারতকী ত্রাইবেল ফুরুপশিংনা কত্থোকপগী থৌদোক কয়া থোকখ্রবা জম্বুঘোরাদা লেপ্লবদা চাউথোকচবা পোকই হায়না ফোঙদোকখি। “ঙসি ঐখোয়না সহীদ জোরিয়া পর্মেস্বর, রূপ সিংহ নায়ক, গলালিয়া নায়ক, রাবজিদা নায়ক অমসুং বাবরিয়া গল্মা নায়ক্নচিংবা মতম চুপ্পা মুৎনাইদনা লৈহৌরগদবা নীংতম লান্মীশিংগী মফমদা ইকায়খুম্নবা উৎচবসিদা ঐখোয়দা চাউথোকচবনা থনহল্লি”, হায়না প্রধান মন্ত্রীনা হায়খি।
ঙসি, লুপা করোর কয়াগী ওইগদবা লমদম অসোমগী ওইনা হকশেল, মহৈ মশিং অমসুং স্কিল দিভেলপমেন্তকী প্রোজেক্তশিং শঙ্গারি অমদি উরেপ উয়ুং তম্লি হায়না প্রধান মন্ত্রীনা হায়খি। গোবিন্দ গুরু য়ুনিভর্সিতীগী অনৌবা এদমিনিস্ত্রেতিব কেম্পস অমসুং কেন্দ্রিয় বিদ্যালয়গী মরমদা পল্লদুনা, প্রধান মন্ত্রীনা হায়রিবা প্রোজেক্তশিং অসিনা ত্রাইবেল অঙাংশিংদা চাউনা মতেং ওইরগনি হায়খি।
জম্বুঘোরাবু শেংলবা মফমগা চাংদম্নদুনা, প্রধান মন্ত্রীনা মফমসিগী ইচঙ থৌরবা ত্রাইবেলগী থৌনা অমদি নীংতম লালগী পুৱারীবু নীংশিংখি। মহাক্না ১৮৫৭গী য়াওল ইহৌদা খোঙহৌ হাপখিবা নাইকদা ইহৌগী মরমদা মহাক্না ৱাফম কয়া ফোঙদোকখি। পর্মেস্বর জোরিয়ানা ইহৌ অদুবু পাকথোক চাউথোকহনখি অমদি রূপ সিংহ নায়কসু মহাক্কী মতুং ইন্দুনা য়াওশিনখি। মহাক্না ১৮৫৭গী লালহৌদা লুচিংবগী শক্লোন লৌখিবা তাত্য তোপেগা লোয়ননা লাল শোক্নখি হায়না প্রধান মন্ত্রীনা নীংশিংখি। থৌনা ফরবশিংবু বৃতিশশিংনা থৌরী য়ান্দুনা হাৎখিবা উ অদুদা খুরুমবগী তাঞ্জা ফংখিবদা প্রধান মন্ত্রীনা থৌদোকশিংদু নীংশিংখিবনি। মফম অদুদা ২০১২দা লাইরিক অমসু ফোঙখি।
প্রধান মন্ত্রীনা গুজরাত্তা মতম কুইনগী মমাঙদগী লৈরক্লবা মহৈশঙশিংবু মরৈবাক নীংবা মীওইশিংগী মমিং লৌদুনা থোনবগী চৎনবীবু নীংশিংখি। ভাদেক অমসুং দান্দিয়াপুরাগী প্রাইমারী স্কুলশিং সন্ত জোরিয়া পর্মেস্বর অমসুং রূপ সিংহ নায়ক্কী মমীং লৌদুনা থোনখিবনি। ঙসি, হায়রিবা স্কুলশিং অসিগী অনৌবা শক্তম উবা ফংলে হায়না প্রধান মন্ত্রীনা পাউদমখি। মহৈ মশিংগী অমদি নীংতম লালহৌদা ত্রাইবেল খুন্নাইনা লৌখিবা থৌদাংগী মরমদা মরুওইবা মফমশিং ওইরবা হায়রিবা স্কুল অসিদা ত্রাইবেল হীরোশিংগী অচৌবা মীতম অমা শঙ্গাখ্রে হায়না মহাক্না হায়খি।
প্রধান মন্ত্রীনা চহি কুনলোমগী মমাঙদা মহাক্কী মফমদা গুজরাতকী থৌগল তৌবা ফংনবগী তাঞ্জা পীনবিরকপা মতমদা মমাঙগী লৈঙাকশিংনা থম্বিরম্বা চাওখৎ থৌরাংগী থবক্তা লৈরম্বা অহোবশিং নীংশিংখি। ত্রাইবেলগী মফমশিংদা মহৈ মশিং, ন্যুত্রিসন অমসুং ঈশিংগী লমদা তঙায় ফদনা চঙদ্রবা য়াদ্রবশিং য়াম্না ৱাৎলম্মী। “ফীভম অদু মায়োক্ননবগীদমক, ঐখোয়না সবকা প্রয়াস হায়বা ৱাখল্লোন্দা থবক পায়খৎলম্মী। ঐখোয়গী ত্রাইবেল ইচিল ইনাওশিংনা চাওখৎপগী মায়কৈদা অহোংবা পুরকপগী থবক মায়পুননা পায়খৎখি, অদুগা লৈঙাক্না মখোয়গী মরূপ অমা ওইনা পাংবা য়াবা মতেং পাংখি”, হায়না মহাক্না হায়খি। প্রধান মন্ত্রীনা পুরক্লিবা অহোংবশিং অসি নোংমখক্তদা পুরকখিবা নত্তে, ত্রাইবেল ইমুং লাখ কয়ানা লেপ্পা লৈতনা হোৎনখিবদুগী মহৈনি হায়বা ৱাফম থমখি। প্রধান মন্ত্রীনা ত্রাইবেল খুন্দাবা পরিংদা লিংখৎখিবা প্রাইমারীদগী সেকেন্দরী থাক ফাওবগী অনৌবা মহৈশঙ লিশিং ১০, এক্লব্যা মোদেল স্কুল দজন কয়া, নুপীমচাশিংগী অখন্নবা রেসিদেন্সিএল স্কুলশিং অমসুং আশ্রম সালাশিং খুদম ওইনা পীখি। প্রধান মন্ত্রীনা নুপীমচাশিংদা বসতা লেম্না চত্থোক চৎশিন তৌবগী খুদোংচাবা অমদি মহৈশঙশিংদা মচি লৈবা চীঞ্জাক ফংহনবগী ৱাফমশিংসু ফোঙদোকখি।
কন্যা সিক্সা রথবু নীংশিংলদুনা, প্রধান মন্ত্রীনা মীয়ামদা মখোয়গী মচানুপীশিংবু মহৈশঙদা থারক্নবা পুক্নিং থৌগৎনবগীদমক লৈঙাক্না পায়খৎখিবা থৌরাংশিং পনখি। মহৈশঙশিংদা সাইন্তিফিক এজুকেসন ৱাৎপনা ত্রাইবেল বেল্ততা শোত্থহল্লিববু শিংনবা অমা ওইনা পল্লদুনা, হৌখিবা চহি কুনলোমসিদা, সাইন্স কলেজ ১১, কম্মর্স কলেজ ১১, আর্তস কলেজ২৩ অমসুং হোস্তেল চা কয়া ত্রাইবেল দিস্ত্রিক্তশিংদা লিংখৎখ্রে হায়না মহাক্না পাউদমখি।
প্রধান মন্ত্রীনা চহি ২০-২৫গী মমাঙদা ত্রাইবেলগী মফমশিংদা মহৈশঙ শাথিনা ৱাৎপগী ওইরম্বা ফীভমসু নীংশিংখি। “ঙসিদি ত্রাইবেল য়ুনিভর্সিতী ২ লৈরে, গোধ্রাগী গোবিন্দ গুরু য়ুনিভর্সিতী অমসুং নর্মদাগী বির্সা মুন্দা য়ুনিভর্সিতী অৱাংবা থাক্কী মহৈ মশিংগী খ্বাইদগী ফবা মহৈশঙশিং ওইরি”, হায়না মহাক্না মখা তাখি। গোবিন্দ গুরু য়ুনিভর্সিতীদা ফংলিবা খুদোংচাবশিং অনৌবা কেম্পস অসি শঙ্গারবা মতুংদগী হেন্না পাকথোক চাউথোরক্লগনি হায়না প্রধান মন্ত্রীনা মখা তানা ফোঙদোকখি। অহমদবাদকী স্কিল য়ুনিভর্সিতীগী অনৌবা কেম্পস অসিনু পঞ্চমহল য়াওনা ত্রাইবেল মফমশিংদা লৈরিবা নহাশিংদা কান্নবা পীরগনি হায়না মহাক্না ফোঙদোকখি। “মসিনা দ্রোন পাইলোৎ লাইসেন্স পীনবগীদমক রিকোগনিসন ফংবা লৈবাকসিগী অহানবা য়ুনিভর্সিতীনি”, হায়না শ্রী মোদীনা ফোঙদোকখি।
হৌখিবা চহি তরারোমসিদা ত্রাইবেল দিস্ত্রিক্তশিংদা মায়কৈ শুবা চাওখৎপা পুরকপদা বনবন্ধু কল্য়ান য়োজনানা লৌখিবা অচৌবা থৌদাং পুথোক্লদুনা, প্রধান মন্ত্রীনা হৌখিবা চহি ১৪-১৫ অসিদা ত্রাইবেল মফমশিংদা স্কীম অসিগী মখাদা লুপা করোর লাখ ১ হেন্না থাদখ্রে হায়খি। গুজরাত লৈঙাক্না লাক্কদৌরিবা চহিশিংদা লুপা করোর লাখ ১গসু মখা তানা থাদনবা ৱারেপ লৌরে হায়না মহাক্না মখা তানা পাউদমখি।
লমদম অসিগী মপুং ওইবা চাওখৎ থৌরাংগী মরমদা ফোঙদোক্লদুনা, প্রধান মন্ত্রীনা তোতি ঈশিংগী খুদোংচাবা, মাইক্রো-ইরিগেসন অমসুং ত্রাইবেল মফমশিংগী দেরী সেক্তরদা থম্লিবা মীৎয়েঙবু খুদম ওইনা পীখি। সখি মন্দলশিং ত্রাইবেল ইচে ইচলশিংবু মপাঙ্গল কনখৎহন্নবা অমদি মখোয়গী শেন্থোক হেনগৎহন্নবা শেমখিবনি হায়নসু মহাক্না পাউদমখি। ত্রাইবেল নহাশিংনা গুজরাত্তা খোঙজেল য়াঙনা চঙশিল্লক্লিবা ইন্দস্ত্রিএলাইজেসনগী কান্নবা লৌহৌবা মথৌ তাই হায়রদুনা, প্রধান মন্ত্রীনা ত্রাইবেল নহা লাখ ১৮রোম ত্রেনিং পীদুনা থবক পীবদা মতেং পাংখিবা ভোকেস্নেল সেন্তরশিং, আই.তি.আই.শিং অমসুং কিসান বিকাস কেন্দ্রনচিংবা মতমগা চুনবা ত্রেনিং সেন্তরশিং হাংদোকপগী মরমদা ফোঙদোকখি।
চহি ২০-২৫গী মমাঙদা সিকল সেল লায়নানা শোকহনখিবা নীংশিংলদুনা, প্রধান মন্ত্রীনা ত্রাইবেল দিস্ত্রিক্তশিংদা দিস্পেন্সরীশিং লৈরমদে অমদি অচৌবা লায়েংশঙ অমদি মেদিকেল কলেজ মশিং খজিকখক্তমক লৈরম্মী। “ঙসিদি, দবল-ইঞ্জিন লৈঙাক অসিনা খুঙ্গংগী থাক্তা অপীকপা লায়েংশঙ চা কয়া লিংখৎলে অমদি ত্রাইবেল মফমশিংদা হেল্থ ঐন্দ ৱেলনেস সেন্তর ১৪০০ হেন্না হাংদোক্লে”, হায়না মহাক্না হায়খি। গোধ্রা মেদিকেল কলেজকী অনৌবা বিল্দিংগী পায়খৎলিবা থবক অসিনা দোহোর, বনস্কন্থ অমসুং বালসদতা শাগৎলিবা মেদিকেল কেলজশিংদা লৈগদবা পোৎলুমশিং হন্থহল্লগনি হায়বা ৱাফমসু মহাক্না ফোঙদোকখি।
“সবকা প্রয়াসনা মরম ওইরগা, ত্রাইবেল দিস্ত্রিক্তশিংদা লৈরিবা খুঙ্গং খুদিংদা অফবা লম্বীগা লোয়ননা পুং ২৪ চুপ্না মৈ ফংলে”, হায়না মহাক্না হায়খি। দং হায়রিবা ত্রাইবেল দিস্ত্রিক্ত অসিনা গুজরাতকী পুং ২৪ চুপ্না মৈ ফংবা অহানবা দিস্ত্রিক্ত ওইদুনা ত্রাইবেলশিংগী মফমদা ইন্দস্ত্রীশিং পাকথোক চাউথোকপা হেনগৎলকখি হায়না মহাক্না পাউদমখি। “গুজরাতকী গোল্দন কোরিদোরগা ইরোয়ননা, ত্বীন সিতীশিং শেমগৎলি। হালোল-কালোলদা খুৎলৈ থুনা ইন্দস্ত্রী চাওখৎলক্লি”, হায়না মহাক্না পাউদমখি।
ভারতকী ত্রাইবেল খুন্নাইশিংগী থাক ৱাংখৎহনবদা কেন্দ্র লৈঙাক্না হোৎনরিবশিং পাউদম্লদুনা, প্রধান মন্ত্রীনা ত্রাইবেল খুন্নাইগীদমক তোখাইবা মন্ত্রালয় অমা অহানবা ওইনা লিংখৎখিবা অমদি বন ধনগুম্বা স্কীমশিং মায় পাক্না চৎনহনখিবা অসি বি.জে.পি. লৈঙাক্ননি হায়খি। মহাক্কী ৱাফম মখা চত্থরদুনা, প্রধান মন্ত্রীনা, বৃতিশ মতমদগী চৎনদুনা লাক্লবা ৱা থাবা অমদি য়োনবা থিংলমবা লো মুত্থৎখিবা, উমংগী পোত্থোকশিং মীরায়বিরম্বা, উমংগী পোত্থোক ৮০ হেনবদা ত্রাইবেলশিংদা এম.এস.পি.গী কান্নবা পীবা, অমদি ত্রাইবেলগী পুন্সি হেন্না লায়হন্দুনা মখোয়দা চাউথোকচবগী ইথিল হেনগৎহন্নবা পায়খৎখিবা থৌরাংশিংবু খুদম ওইনা পীখি। “অহানবা ওইনা, ত্রাইবেল খুন্নাইনা চাওখৎ থৌরাং অমসুং খুজিল থৌরাং য়াৎপদা হেন্না শরুক য়ানিংবগী ইথিল অমা ফাওরক্লি”, হায়না প্রধান মন্ত্রীনা হায়খি। ভগৱান বির্সা মুন্দাগী মপোক কুমওনবু জঞ্জাতিয় গৌরব দিৱস হায়না থৌরম পাঙথোক্নবগীদমক লৈঙাক্না লৌরিবা ফিরেপকী মতাঙদা মহাক্না পাউদমখি।
লায়রবা, তুহৎপিরবা, শোত্থহৌরবা অমদি ত্রাইবেল ফুরুপকীদমক দবল-ইঞ্জিন লৈঙাক্না লেপ্পা লৈতনা থবক থৌরাং কয়া পায়খৎলি হায়নসু প্রধান মন্ত্রীনা ফোঙদোকখি। লেম্না চেঙ-হৱাই পীবা, লেম্না কোবিদ ভেক্সিন কাপ্পা, লায়রবশিংদা লুপা লাখ ৫ ফাওবগী লায়েংবগী খুদোংচাবা, মীরোনবী নুপীশিংদা মচি ওইবা চীঞ্জাক ফংহন্নবগীদমক তেংবাং পীবা, অমদি অপীকপা লৌমীশিংদা হার, মরূগী লোন লৌনবা অমদি ইলেক্ত্রিসিতী বিলনচিংবা থিনবগীদমক পি.এম. কিসান সম্মান নিধী য়োজনানচিংববু প্রধান মন্ত্রীনা খুদম ওইনা পীখি। “হকথেংননা মতেং পাংবা নৎত্রগা পক্কাগী য়ুম, তোইলেৎ, গ্যাস কন্নেক্সন অমসুং ঈশিংগী কন্নেক্সন্নচিংবা খুদোংচাবশিং খ্বাইদগী মশিং য়াম্না ফংলবসি ত্রাইবেল, দলিৎ অমদি শোত্থহৌরবা কাঙলুপকী ইমুংশিংনি”, হায়না শ্রী মোদীনা হায়খি।
ভারতকী নাৎ অমসুং লাইনিং কনবদা অচৌবা থৌদাং লৌখিবা ত্রাইবেল হীরোশিংগী পুৱারীগী মরমদা পাউদম্লদুনা, প্রধান মন্ত্রীনা চম্পানের, পাবাগর, সোম্নাথ অমসুং হল্দিঘাতীগী খুদমশিং পীখি। “হৌজিক্তি পাবাগর লাইশঙ নৌনা শেমজিল্লে অমদি ফিরাল মনিং তম্না পাইহল্লে। মতৌ অসুম্না, অম্বাজী মাতাগী ধাম অমসুং দোবমোগ্রা মা লাইশঙনচিংবশিং শেমগৎনবগীদমক লেপ্পা লৈতনা হোৎনরি”, হায়না মহাক্না ফোঙদোকখি।
থবক পীবগী চাং হেনগৎহনবদা তুরিজম্না লৌরিবা মরুওইবা শক্লোনবু প্রধান মন্ত্রীনা শকখঙখি। তুরিজমগী মীৎয়েঙদা ইনাক খুল্লবা পঞ্চমহলগুম্বা মফম, থাইনগী আর্কিতেকচরগী লমদা মমিং চৎলবা চম্পানের-পাবাগর, জম্বুঘোরা, হথনি মাতা ৱাতরফোলদা লৈরিবা লমলক্কী শা উচেকশিং, ধনপুরী, করা দাম, ধনেস্বরী মাতা লাইশঙ, অমসুং জন্দ হনুমান জীগী ইকো-তুরিজম সাইতশিং মহাক্না পনখি অমদি তুংদা হায়রিবা মফমশিং অসি তুরিজম সর্কিৎ ওইনা শেমগত্তুনা থবক পীনবগী অনৌবা খুদোংচাবশিং থোরক্কনি হায়বা ৱাফম থমখি। “ত্রাইবেলশিংগী চাওথোকচনিংঙাই ওইবা মফম অমদি লাইনিংগী মফমশিং শেমগৎপনা তুরিজমদা চাউনা ইনোৎ হাপকনি”, হায়না মহাক্না মখা তাখি।
মহাক্কী ৱারোল লোইশিল্লকপদা, প্রধান মন্ত্রীনা দবল-ইঞ্জিন লৈঙাক্না চাওখৎ থৌরাংগী লমদা পাক শন্না কোনশিল্লিববু থাগৎখি অমদি চাওখৎপগী কান্নবা মীপুম খুদিংদা য়ৌগনি হায়খি। “ঐখোয়গী পান্দমদি তশেং তশেংই, কত্থোকপগা লোয়ননা কন্না হোৎনদুনা লৈমায়দা অহোংবা পুরকপদুনি। ঐখোয় পুন্না চাওখৎলবা গুজরাত, অমদি চাওখৎলবা ভারত শেমগৎকনি” হায়বা ৱাফম ফোঙদোক্তুনা মহাক্কী ৱারোল লোইশিনখি।
গুজরাতকী মুখ্য মন্ত্রী, শ্রী ভুপেন্দ্র পতেল, পার্লিয়ামেন্তকী মেম্বরশিং, অমসুং গুজরাত লৈঙাক্কী মন্ত্রীশিং থৌরমদুদা শরুক য়াখি।
বেকগ্রাউন্দ
প্রধান মন্ত্রীনা জম্বুঘোরা, পঞ্চমহলদা লুপা করোর ৮৬০রোমগী ওইগদবা প্রোজেক্তশিং মীয়ামদা কত্থোকখি অমদি উরেপ উয়ুং তমখি। মহাক্না শ্রী গোবিন্দ গুরু য়ুনিভর্সিতী, গোধ্রাকী অনৌবা কেম্পস, বাদেক খুঙ্গংদা লৈবা সন্ত জোরিয়া পরমেস্বর প্রাইমারী স্কুল এন্দ মেমোরিএল, অমসুং দান্দিয়াপুরা খুঙ্গংদা লৈবা রাজা রুপ সিংহ নায়ক প্রাইমারী স্কুল এন্দ মেমোরিএল মীয়ামদা কত্থোকখি।
প্রধান মন্ত্রীনা গোধ্রাদা কেন্দ্রিয় বিদ্যালয়গী শঙ শানবগী উরেপ উয়ুং তমখি। মহাক্না গোধ্রা মেদিকেল কলেজ শেমগৎ শাগৎপগী অমদি কৌসাল্য – দি স্কিল য়ুনিভর্সিতী পাকথোক চাউথোকপগী লুপা করোর ৬৮০ হেনবগী প্রোজেক্তশিংসু উরেপ উয়ুং তমখি।
