ভারতনা হেরিতেজ ঙাক শেন্নবা গ্লোবেল কোওপরেসন খুমাং চাউখৎহনবা অমসুং লোকেল কম্ম্যুনিতীশিংবু শরুক য়াহনবগী থৌওংদা খোঙফম চেৎলি
“ভারত অসি অদুমক্কী মতিক লিরে, হৌজিক্কী পুঙফম খুদিংনা য়াইফরবা থাইনগী মতম ৱারী লিরি”“হেরিতেজকী অরীবা পোৎলম হন্দোক্লকপা অসিদি মালেমগী মবুকচেল ফবা অমসুং পুৱারীবু ইকায় খুম্নবগী মতৌনি”“অৱাং নোংপোক্তগী য়ুনেস্কো ৱর্ল্দ হেরিতেজ লিস্ততা খ্বাইদগী হান্না মনুং চল্লিবা মাইদম অসি মদুগী তোপ-তোপ্পা মতৌনা অখন্নবা ওইহল্লি”“ভারতকী হেরিতেজ অসি শুপ্নগী পুৱারী নত্তে। ভারতকী হেরিতেজ অসিদি সাইন্সশু ওইরিবনি”।“অমনা অমগী হেরিতেজ চাউখৎহন্নবা অমসুং মীওইবা খুন্নাইনা নুংঙাই য়াইফনা হিংবগী ইথিলবু হেনগৎহন্নবা মালেম্না অমত্তা ওইনা পুল্লসি হায়বসি ভারতকী খোল্লাওনি”“ভারতকী পান্দমদি – চাউখৎপগা লোয়ননা হেরিতেজশু শকখঙবা হায়বসিনি – বিকাস ভি, ভিরাসত ভি”ভারতনা ৱর্ল্দ হেরিতেজ কম্মিত্তী মীফম অসি হন্দক অহানবা ওইনা য়ুম্বু ওইবনি।প্রধান মন্ত্রী শ্রী নরেন্দ্র মোদীনা ঙসি নই দিল্লীগী ভারত মন্দপমদা ৱর্ল্দ হেরিতেজ কম্মিত্তীগী 46শুবা সেসন হৌদোকখ্রে। ৱর্ল্দ হেরিতেজ কম্মিত্তীনা চহি খুদিংগী উন্নৈ অমসুং ৱর্ল্দ হেরিতেজকী হীরম খুদিংমক খন্নবগা লোয়ননা ৱর্ল্দ হেরিতেজ লিস্ততা করম্বা মফম হাপকদগে হায়বগী ৱাফমশু খন্নৈ। ভারতনা ৱর্ল্দ হেরিতেজ কম্মিত্তী মীফম অসি হন্দক অহানবা ওইনা য়ুম্বু ওইবনি। থৌরম অসিদা উৎখিবা একজিবিসন কয়া প্রধান মন্ত্রীনা য়েংখি।
প্রধান মন্ত্রীনা ঙসিগী থৌরমদা ৱা ঙাঙবদা নুমিৎ অসিনা গুরু পুর্নিমাগী য়াইফরবা নুমিৎ তারিবা অসি নীংশিংলদুনা মীয়ামগী মফমদা য়াইফ পাউজেল পীখি। ঙসিগী য়াইফরবা নুমিত্তা ৱর্ল্দ হেরিতেজ কম্মিত্তীগী মীফম হৌদোকপা অমসুং ভারতনা অহানবা ওইনা য়ুম্বু ওইবসিদা নুংঙাইবা ফোংদোকখি। মীফম অসিদা শরুক য়ানবগীদমক্তা মালেমগী মফম খুদিংদগী লাক্লিবা মীথুংলেন অমসুং দিগ্নিতরী খুদিংমক, অখন্নবা ওইনা, য়ুনেস্কোগী দাইরেক্তর জেনেরেল, শ্রীমতি ওদ্রী অজোলেবু তরাম্না ওক্লদুনা ভারত্তা পাংথোকখিবা মালেমগী অতোপ্পা মীখলনা উৎখিবগুম্না ৱর্ল্দ হেরিতেজ কম্মিত্তীগী মীফম অসিনা পুৱারীদা অনৌবা ৱারী অমা থনম্লগনি হায়বগী থাজবা ফোংদোকখি।
মীরমদগী ভারত্তা অমুক হন্না পুরকখ্রবা আর্তিফেক্ত কয়াগী মতাংদা প্রধান মন্ত্রীনা পল্লদুনা হেরিতেজকী পোৎলম 350 হেনবা অসি ভারত্তা হৌখিবা মতম খরদা পুরকখ্রে পাউদমখি। “হেরিতেজকী অরীবা পোৎলম হন্দোক্লকপা অসিদি মালেমগী মবুকচেল ফবা অমসুং পুৱারীবু ইকায় খুম্নবগী মতৌনি”, প্রধান মন্ত্রীনা হায়খি। তেক্নোলোজীনা চাউখৎলকপগা লোয়ননা হীরম অসিদা রিসর্চ পাংথোকপা অমসুং তুরিজমগী খুদোংচাবা লৈবা হেনগৎলক্লি হায়না মহাক্না হায়খি।
প্রধান মন্ত্রীনা ৱর্ল্দ হেরিতেজ কম্মিত্তীবু থাগৎলদুনা মসিগুম্বা থৌরমগী য়ুম্বু ওইবসি ভারতকী চাউথোকচনীংঙাইনি হায়খি। ভারতকী অৱাং নোংপোক্কী পুৱারী ওইরবা মাইদম অসিবু য়ুনেস্কোগী ৱর্ল্দ হেরিতেজ লিস্তকী মনুং চলহন্নবা য়ানখ্রে হায়না মহাক্না হায়খি। “মসিনা কলচরেল ৱর্ল্দ হেরিতেজকী থাক ফংবা ভারতকীনা 43শুবা অমসুং অৱাং নোংপোক্কীনা অহানবা ৱর্ল্দ হেরিতেজ সাইত ওইরগনি”, শ্রী মোদীনা হায়খি। লিস্তকী মনুংদা হেক চনবদগী মফম অসিগী নাৎকী তোপ-তোপ্পা মরু ওইবা লৈরিবা মাইদম অসি মমিং চৎপা হেল্লগনি অমসুং চাউখৎলগনি হায়বগী থাজবা লৈ হায়না মহাক্না মখা তাখি।
মালেম পুম্বগী অখঙ-অহৈ কয়ানা শরুক য়ারিবা অসিনা সম্মিত অসিগী মিৎয়েং অমসুং থবক তৌবা ঙম্বগী মতিক ময়েক শেংনা মশক তাক্লি হায়না প্রধান মন্ত্রীনা হায়খি। মালেমগী খ্বাইদগী লিরবা সিভিলাইজেসন লৈরিবা মফম অসিদা মীফম অসি পাংথোক্লি হায়না মহাক্না অহেনবা মিৎয়েং চঙখি। মালেমদা হেরিতেজকী ময়োল কয়া অমা লৈরি হায়না প্রধান মন্ত্রীনা পল্লদুনা মহাক্না ভারতকী অরিবা য়ুগতা মিৎয়েং চঙখি অমসুং অসুম্না হায়খি, “ভারত অসি অদুমক্কী মতিক লিরে, হৌজিক্কী পুঙফম খুদিংনা য়াইফরবা থাইনগী মতম ৱারী লিরি”। প্রধান মন্ত্রীনা ভারতকী কোনুং, দিল্লীগী মতাংদা পল্লদুনা মফম অসি হেরিতেজকী চহি লিশিং কয়াগী ময়োল ওইদুনা লাক্লি অমসুং লমদমসিগী মফম খুদিংদা কনাগুম্বা অমনা হেরিতেজ অমসুং পুৱারী থেংনগনি হায়খি। কোহলিং শুক্কা কাদবা চহি 2000 শুরবা য়োৎকী য়ুম্বীবু মহাক্না খুদম ওইনা পীরদুনা মসিনা ভারতনা অরিবা মতমদা মেতাল্লর্জীদা থোইদোক হেন্দোকপা লৌশিং লৈরম্বগী ৱাফম খঙহল্লি হায়না মহাক্না হায়খি। “ভারতকী হেরিতেজ অসি শুপ্নগী পুৱারী ওইবতা নত্তনা সাইন্সশু ওইরিবনি”, মহাক্না হায়খি। নিংথম্থাগী মতমদা উন কা হেন্না তাবনা মরম ওইরগা ইনিফ্রাস্ত্রকচরগী থবক পাংথোকপদা ঙসিশু শিংনবা কয়া মাইয়োক্নরিবা মীতর 3500 ৱাংবা মফমদা কেদর্নাথ লাইশঙ অসি 8শুবা চহি-চাদা শারম্লিবা অসি পল্লদুনা ভারতকী হেরিতেজনা ইঞ্জনিয়রিংগী থাক-ৱাংবগী খোঙচৎ উখ্রবনি হায়না মহাক্না মখা তাখি। রাজা চোলানা খা ভারত্তা শারম্বা বৃহদেশ্বরা লাইশঙ অমসুং মসিগী মুর্তী কয়াগা লোয়ননা নীংথিজনা মওং য়াৎলিবা অসিগী মতাংদশু মহাক্না পনখি।
প্রধান মন্ত্রীনা গুজরাতকী ধোলাভিরা অমসুং লোথলগী মতাংদশু পনখি। 3000 BC দগী 1500 BC ফাওবগী লিরবা মতমসিদা অর্বান প্লান্নিং পায়খৎলম্বা অমসুং ৱাতর মেনেজমেন্ত সীস্তেমগীদমক্তা ধোলাভিরা অসি মমিং চৎলিবনি। মান্নবা মতৌ ওইনা, লোথলদশু সিতাদেল অমসুং লাৱর প্লান্নিংগী মতাংদা নীংথিরবা থৌরাং য়াৎলম্মি অমসুং লম্বী অমদি ইরম নালা মওং মরিল নাইনা লৈরম্লিবনি।
প্রধান মন্ত্রীনা অসুম্না হায়খি, “ভারতকী পুৱারী অমসুং পুৱারীগী ৱাখল্লোন অসি অতোপ্পদগী হেন্না কুপ্পি, অদুনা তেক্নোলোজীনা চাউখৎলক্লিবা অমসুং অনৌবা ৱাফম কয়া খঙলক্লিবা অসিনা মরম ওইরগা থাইনগী মতম্বু তোঙানবা মিৎয়েং অমদগী য়েংবগী তঙাই ফদবা লৈহল্লি”। ইন্দস ভেল্লী সিভিলাইজেসন্দগী হেন্না লিরিবা ভেদিক য়ুগকা হেন্না নক্নবা কোরীগী য়ুগকী পোৎলম কয়া উত্তর প্রদেশকী সিনোলীদা ফংখিববুশু মহাক্না পনবদা য়াওখি। চহি 4000 লিরবা শগোল গারী ফংখিবগী মতাংদশু মহাক্না পাউদমখি। ভারতপু তসেংনা মশক খঙগে হায়রবদি মীচঙ-মীখায় নাইদনা অনৌবা ৱাখল্লোন অমগা লোয়ননা থবক তৌবগী মথৌ তারে হায়না মসিগুম্বা পোৎলম কয়া অসিনা তাক্লি হায়না প্রধান মন্ত্রীনা হায়রদুনা মসিগুম্বা অনৌবা স্ত্রীম অসিগী শরুক ওইবীয়ু হায়না থৌরম অসিদা ফোংদোকখি।
প্রধান মন্ত্রীনা হেরিতেজকী মরু ওইবশিংগী মতাংদা অসুম্না হায়খি, “হেরিতেজ অসি শুপ্নগী পুৱারীখক নত্তে। মসিদি মীওইবা খুন্নাইগী অমত্তা ওইবা কন্সিয়সনেসনী। ঐখোয়নী পুৱারী ওইরবা মফমশিংদা য়েংলুবা খুদিংদা, মসিনা হৌজিক ওইরিবা জিও-পোলিতিকেল থৌদোক কয়াদগী লাপথোকহন্দুনা ঐখোয়গী ৱাখল নুংঙাইহল্লি”। হেরিতেজকী মসিগুম্বা মতিক শিজিন্নদুনা মালেম্বু হেন্না নুংঙাইহন্নবা হোৎনসি, মীয়াম মরক্কী মরী ফজহনসি হায়না মহাক্না মীয়ামগী পুক্নিং থৌগৎখি। “46শুবা ৱর্ল্দ হেরিতেজ কম্মিত্তীগী মীফম অসিদগী খুত্থাংদগী অমনা অমগী হেরিতেজ চাউখৎহন্নবা অমসুং মীওইবা খুন্নাইনা নুংঙাই য়াইফনা হিংবগী ইথিলবু হেনগৎহন্নবা মালেম্না অমত্তা ওইনা পুল্লসি, তুরিজম চাউখৎহন্সি অমসুং থবক্কী খুদোংচাবা পীবা হেনগৎহন্সি হায়বসি ভারতকী খোল্লাওনি”, শ্রী মোদীনা হায়খি।
প্রধান মন্ত্রীনা চাউখৎ-থৌরাংগী খল্লিঙৈদা হেরিতেজপু মীরায়বগী মতম নীংশিংলদুনা ঙসিগী ভারতকী পান্দমদি চাউখৎ থৌরাংগা লোয়ননা হেরিতেজতা মিৎয়েং চঙবনি – বিকাস ভি, ভিরাসত ভি হায়বসিনি হায়খি। হৌখিবা চহি 10 অসিদা হেরিতেজকীদমক্তা লৌখিবা ৱারেপ কয়াগী মতাংদা প্রধান মন্ত্রীনা পল্লদুনা কাশী বিশ্বানাথ কোরিদোর, শ্রী রাম মন্দির, লিরবা নলান্দা য়ুনিভর্সিতীগী অনৌবা কেম্পসকুম্বা মমাংদা অমুক্তা পায়খৎখিদ্রিবা থবকশিংগী মতাংদা পাউদমখি। “ভারতনা হেরিতেজকীদমক্তা লেপ্লিবা ফিরেপ অসিগা মীওইবা খুন্নাইগী তেংবাংবগী ইথিলগা মরী লৈনৈ। ভারতকী চৎনবীনা মীওই অমখক্কীদা নত্তনা ঐখোয় অপুনবগী ৱারী লিরি”, মহাক্না মখা তাখি।
ভারতনা মালেমগী য়াইফ য়ুম্বালগী হীরমদা খোঙলোই অমা ওইনবা হোৎনরিবা কয়াদা মিৎয়েং চঙলদুনা, ভারতকী সাইন্তিফিক হেরিতেজ ওইরিবা ভারতকী য়োগ অমসুং অয়ুর্বেদবু মালেম্না য়াখিবা অসিবু প্রধান মন্ত্রীনা পাউদমখি। ভারতনা য়ুম্বু ওইদুনা পাংথোকখিবা জি-20গী থীম, “মালেম অমা, ইমুং অমা, তুংলমচৎ অমা” অসিবুশু নৌহৌননা নীংশিংখি। ‘বাসুদৈবা কুতুম্বাকম’গী ভারতকী পান্দম অসিগা মরী লৈননা মিল্লেত অমসুং ইন্তর্নেস্নেল সোলর এল্লাইএন্স অমসুং মিসন লাইফকুম্বা খোঙথাং কয়াশু পায়খৎলি হায়না প্রধান মন্ত্রীনা হায়খি।
মালেমগী হেরিতেজ ঙাক শেনববু ভারতনা মশাগী থৌদাং ওইনা লৌই হায়না প্রধান মন্ত্রীনা নৌহৌননা অমুক ফোংদোকখি। মসিনা মরম ওইরগা, ভারতকী হেরিতেজকা লোয়ননা গ্লোবেল সাউথকী লৈবাকশিংগী হেরিতেজ য়োকখৎপদা ভারতনা তেংবাংলিবনি হায়না প্রধান মন্ত্রীনা হায়খি। কম্বোদিয়াগী অঙ্কোত ৱাত, ভিএতনামগী চাম লাইশঙ, ম্যান্মারগী বগানগী স্তুপাগুম্বা হেরিতেজ সাইত কয়া পল্লদুনা, কেপাসিতী বিলদিং, তেক্নিকেলগী তেংবাং অমসুং মালেমগী হেরিতেজকী মফমশিং ঙাক শেন্নবগীদমক্তা ভারতনা য়ুনেস্কো ৱর্ল্দ হেরিতেজকী মফমদা মিলিয়ন দোল্লর অমা পীগনি হায়না প্রধান মন্ত্রীনা লাউথোকখি। শেনফমশিং অসি গ্লোবেল সাউথকী লৈবাকশিংদা মথৌ য়াম্না তাগনি হায়না মহাক্না হায়খি। ভারতকী ওইনা নহা ওইরিবা প্রোফেস্নেলশিংগীদমক্তা ৱর্ল্দ হেরিতেজ মেনেজমেন্তকী সর্তিফিকেত প্রোগ্রাম অমসু হৌদোক্লগনি হায়না মহাক্না পাউদমখি। ভারতকী কলচরেল অমসুং ক্রিএতিব ইন্দস্ত্রীনা মালেমগী শাহৌদা অচৌবা থৌদাং য়াগনি হায়বগী থাজবা লৈরে হায়না প্রধান মন্ত্রীনা হায়খি।
প্রধান মন্ত্রীনা মহাক্কী ৱারোল লোইশিনবা ওইনা, মীরমদগী লাকইবা মীথুংলেন অমসুং দিগ্নিতরীশিংনা ভারতপু য়েংথোকপীয়ু হায়রদুনা মখোয়গী খুদোংচানবগীদমক্তা মমিং লৈরবা হেরিতেজকী মফমদা চৎনবা লৈরিবা তুর সেরিজকী মতাংদা পাউদমখি। মখোয়না ভারত্তা থেংনগদৌরিবা কয়া অসিনা খোঙচৎ অসি মখোয়না কাওঙম্লোইদবা খোঙচৎ অমা ওইগনি হায়না মহাক্না হায়খি।
এক্সতর্নেল এফিয়র্সকী কেন্দ্র মন্ত্রী, দাঃ এস. জয়শঙ্কর; কলচর অমসুং তুরিজমগী কেন্দ্র মন্ত্রী, শ্রী গজেন্দ্র সিংহ সেখাৱত; য়ুনেস্কোগী দাইরেক্তর জেনেরেল, শ্রীমতি ওদ্রী অজোলে অমসুং ৱর্ল্দ হেরিতেজ কম্মিত্তীগী চেয়রপর্সন, শ্রী বিশাল শর্মশু অতোপ্পা মীথুংলেন কয়াগা লোয়ননা থৌরম অসিদা শরুক য়াখি।
বেকগ্রাউন্দ
ভারতনা ৱর্ল্দ হেরিতেজ কম্মিত্তীগী মীফম অসি হন্দক্না অহানবা শীনবনি। থৌরম অসি নই দিল্লীগী ভারত মন্দপমদা ইং 2024গী জুলাই 21দগী 31 ফাওবা পাংথোক্কনি। ৱর্ল্দ হেরিতেজ কম্মীত্তীনা চহি অমদা অমুক্লক উন্নৈ অমসুং ৱর্ল্দ হেরিতেজকা মরী লৈনবা হীরম কয়া অমদি করম্বা মফম্বু ৱর্ল্দ হেরিতেজ লিস্তকী মনুংদা চলহনগদগে হায়বা ৱারেপশিং লৌই। ৱর্ল্দ হেরিতেজ লিস্ততা করম্বা অনৌবা মফম হাপকদগে হায়বগী ৱাহৌদোক থম্বা, হৌজিক লৈরিবা ৱর্ল্দ হেরিতেজ প্রোপর্তী 124গী স্তেত ওফ কঞ্জর্বেসন রিপোর্ত, মালেমগী তেংবাং অমদি ৱর্ল্দ হেরিতেজ ফন্দ শিজিন্নবখিবগী ৱারোল কয়া মীফম অসিদা নৈনগনি। মীফম অসিদা লৈবাক 150 হেনবগী নেস্নেল অমসুং ইন্তর্নেস্নেল দেলিগেৎ 2000 হেনবনা শরুক য়াগনি।
ৱর্ল্দ হেরিতেজ কম্মিত্তীগী মীফমগা লোয়ননা, ৱর্ল্দ হেরিতেজ য়ং প্রোফেস্নেল ফোরম অমসুং ৱর্ল্দ হেরিতেজ সাইত মেনেজর্স ফোরম অসিশু নাকলদা পাংথোক্কনি।
মখা তারকপা ওইনা, ভারত চৎনবী উৎনবগীদমক্তা মখল কয়াগী একজিবিসন কয়াশু ভারত মন্দপমদা পাংথোক্কনি। দি রিতর্ন ওফ ত্রেজর্স একজিবিসন অসিনা লৈবাক অসিদা অমুক হন্না পুরকখ্রবা অরীবা পোৎলম কয়া উৎকনি। অরীবা পোৎলম 350 হেনবসি লৈবাক অসিদা হৌজিক ফাওবগী মনুংদা পুরকখ্রবনি। মখা চত্থবা ওইনা, এ.আর. অমসুং ভি.আর.গী খ্বাইদগী নৌবা তেক্নোলোজী কয়া শিজিন্নদুনা ভারতকী ৱর্ল্দ হেরিতেজ সাইত অহুম – রানি কী বাব, গুজরাত; কৈলাশ লাইশঙ, মহারাস্ত্রগী ইল্লোরা শুরুং অমসুং কর্নাতকাগী হালেবিদকী হোইসালা লাইশঙগী ইমর্সিব ওইবা এক্সপেরিএন্স অমশু পীগনি। ভারতকী ইনাক খুল্লবা চৎনবীগী হেরিতেজ, চহি শাংলবা সিভিলাইজেসন, জিওগ্রাফিকেল দাইবর্সিতী, তুরিজম দেস্তিনেসন কয়াগা লোয়ননা ইনিফোর্মেসন তেক্নোলোজী অমসুং ইনফ্রাস্ত্রকচরগী হীরমদা হৌজিক্কী মতমদা চাউখৎলিবা অসিগী মতৌশিং উৎপা ‘ইনক্রেদিবল ইন্দিয়া’ হায়বা একজিবিসন অমশু উৎকনি।
ৱা ঙাংখিবগী মপুংফাবা ৱারোল পানবা মসিদা নম্বীয়ু
भारत इतना प्राचीन है कि यहाँ वर्तमान का हर बिन्दु किसी न किसी गौरवशाली अतीत की गाथा कहता है: PM @narendramodi pic.twitter.com/m256iWtsPd
— PMO India (@PMOIndia) July 21, 2024
भारत की विरासत केवल एक इतिहास नहीं है।
— PMO India (@PMOIndia) July 21, 2024
भारत की विरासत एक विज्ञान भी है: PM @narendramodi pic.twitter.com/UDhWIY4SRC
भारत का इतिहास और भारतीय सभ्यता, ये सामान्य इतिहास बोध से कहीं ज्यादा प्राचीन और व्यापक हैं: PM @narendramodi pic.twitter.com/nnbmlGm8qj
— PMO India (@PMOIndia) July 21, 2024
भारत का तो विज़न है- विकास भी, विरासत भी: PM @narendramodi pic.twitter.com/SvPxww16JN
— PMO India (@PMOIndia) July 21, 2024
