প্রধান মন্ত্রীনা মকোক থোংবা ওফিসিএলশিংগা লৈবাক অসিদা চংশিল্লিবা ভেক্সিনেসনগী থবকশিং অমসুং কোবিদকী ফিভম য়েংশিন্নবা মীফম অমা পাংথোকখ্রে।
ওফিসিএলশিংনা লৈবাক অসিদা চংশিল্লিবা ভেক্সিনেসনগী মরীক চুম্বা প্রজেন্তেসন অমা প্রধান মন্ত্রীদা উৎখ্রে। চহি খায়না ভেক্সিন কাপখিবগী মরমদা প্রধান মন্ত্রীদা পাউদমখি। রাজ্য কয়াদা লৈরিবা হকশেলগী চেকশিন-থৌরাংদা থবক তৌরিবশিং, ফ্রন্তলাইন ওইনা থবক তৌরিবশিং অমসুং মীচম প্রজাদা ভেক্সিন কাপখিবগী মরমদসু প্রধান মন্ত্রীদা পাউদমখি।
লাক্লিবা থা খরা অসিদা ভেক্সিন ফংহনগদৌরিবা অমসুং পোত্থোকশিং হেনগৎনবা হোৎনরিবা অসিদা ওফিসিএলশিংনা প্রধান মন্ত্রীবু থাগৎপা ফোংদোকখি।
হৌখিবা নুমিৎ ৬নি অসিদা দোজ কোতি ৩.৭৭ কাপখ্রে হায়রিবা অসি মালাসিয়া, সৌদি অরাবিয়া অমসুং কানাদাগুম্বা লৈবাকশিংগী অপুনবা মীশিংদগী হেল্লি হায়না প্রধান মন্ত্রীদা পাউদমখি। হায়রিবা অসিদা লৈবাক অসিগী ওইনা ৪৫+কী মীশিংদা দিস্ত্রীক্ত ১২৮দা ৫০% হেন্না ভেক্সিন কাপখি অমসুং দিস্ত্রীক্ত ১৬তা ৪৫+কী মীশিং ৯০% হেন্না ভেক্সিন কাপখি। হন্দক্কী চয়োলদা ভেক্সিনেসনগী খোঙজেল হেনগৎলিবা অসিদা প্রধান মন্ত্রীনা অপেনবা ফোংদোকখ্রে অমসুং মসিগী খোঙজেল অসি লেপ্পা লৈতনা মাংলোমদা চংশিনবা মরু ওই হায়খ্রে।
ভেক্সিনেসন অসি মীয়ামদা য়ৌহন্নবা অনৌবা মওং কয়া অমা পুথোক্নবা রাজ্য সরকারগা মখোয়গা তৎতনা পাউ ফাওনরি হায়না ওফিসিএলশিংনা প্রধান মন্ত্রীদা পাউদমখি। প্রধান মন্ত্রীনা অসিদুম্বা মতম অসিদা এন.জি.ও. অমসুং অতৈ ওর্গানাইজেসনশিং য়াওহনবগী তঙাইফদবা লৈ হায়না হায়খি।
তেস্তিং তৌবা অসিনা অনাবা অসি মফম অমদা হেনগৎলকপা মতমদা ত্রেক অমসুং কন্তেন তৌবগী য়াম্না মরুওইবা খুলায় অমা ওইবনা তেস্তিং তৌবা অসি থেংথরোইদবনি হায়না প্রধান মন্ত্রীনা ওফিসরশিংদা রাজ্যশিংগা থবক তৌমিন্নবা পাউতাক পীখি।
ওফিসরশিংনসু প্রধান মন্ত্রীবু মালেম অসিনা কোৱিন প্লেতফোর্ম অসিদা অপাম্বা হেনগৎনরকপা অসিদা থাগৎপা ফোংদোকখ্রে। অপাম্বা ফোংদোরকপা লৈবাক খুদিংমক্তা ভারতকী ওইবা কোৱিনগী হৈ-শিংলবা তেক প্লেতফোর্মগা লোয়ননা মতেং পাংনবা হোৎনগদবনি হায়না প্রধান মন্ত্রীনা হায়খি।
