ঙসি প্রধান মন্ত্রী শ্রী নরেন্দ্র মোদীনা তেলঙ্গানাগী নীজামবাদতা লুপা করোর ৮০০০ রোমগী পৱার, রেল অমসুং হকশেলগী তোঙান-তোঙানবা চাউখৎ-থৌরাংগী প্রোজেকশিং উরেপ-উয়ুং তমখ্রে অমসুং মীয়ামদা কৎথোকখ্রে। প্রোজেকশিংগী মনুংদা এন.তি.পি.সিগী তেলঙ্গানা সুপর থর্মেল পাৱর প্রোজেক্কী ফেজ-১গী অহানবা ৮০০ মেগাৱাত য়ুনিত, মনোহরবাদ অমসুং সিদ্দিপেত শম্নবা অনৌবা রেলৱে লাইন য়াওনা রেল প্রোজেকশিং; অমসুং ধর্মাবাদ-মনোহরবাদ অমসুং মহাবুবনাগর-কুরনুলগী মৈ ফংহন্নবা প্রোজেক মীয়ামদা কৎথোকপা য়াওরি। মহাক্না পি.এম-অয়ুস্মান ভারত হেল্থ ইনফ্রাস্ত্রকচর মিসনগী মখাদা তেলঙ্গানা শীনবা থুংনা শাগদবা ক্রিতিকেল কিয়ার ব্লোক ২০গী উরেপ-উয়ুং তমখ্রে। শ্রী মোদীনা সিদ্দিপেত-সিকন্দরবাদ-সিদ্দিপেত ত্রেন সর্বিসশু লমথাখ্রে।
থৌরম অদুদা তিনখিবা মীয়ামদা ৱা ঙাংবদা প্রোজেকশিংগীদমক তেলঙ্গানাগী মীয়াম থাগৎপা ফোঙদোক্লদুনা প্রধান মন্ত্রীনা হায়খি লৈবাক অমা নত্ত্রগা রাজ্য অমা চাউখৎপা হায়বসি মশাগী ওক্নবা মৈ পুথোকপা অমসুং মতম চপ মান্ননা হিংবদা লাইবা অমসুং ললোন-ইতিক তৌবদা লাইবা হেনগৎহনবগী মখা পোল্লি। মৈ ফজনা ফংহনবনা রাজ্য অমদা উদোগশিং চাউখৎপগী খোঙজেল য়াংখৎহনগনি। পেদ্দাপাল্লি জিলাদা তেলঙ্গানা সুপর থর্মেল পৱার প্রোজেক্কী ফেজ-১গী মেগাৱাত য়ুনিত ৮০০ মীয়ামদা কৎথোকখ্রে। অথুবা মতমদা অনিশুবা য়ুনিতশু থবক হৌরগনি অমসুং মসি লোইশিল্লবা মতুংদা পৱার প্লান্ত অসিনা মেগাৱাত ৪০০০ ফাওবা পুথোকপা ঙম্লগনি।
লৈবাক অসিদা লৈরিবা এন.তি.পি.সিগী পৱার প্লান্তশিংগী মনুংদা তেলঙ্গানা সুপর থর্মেল পৱার প্লান্তনা খ্বাইদগী নৌবা পৱার প্লান্ত ওইবদা প্রধান মন্ত্রীনা হরাওবা ফোঙদোক্লদুনা হায়খি পৱার প্লান্ত অসিদগী পুথোরকপা মৈগী অয়াম্বা শরুক তেলঙ্গানাগী মীয়ামদা ফংহনগনি। সরকার অসিনা উরেপ-উয়ুং তমখিবা প্রোজেকশিং লোইশিন্নবা হায়বসি কেন্দ্র সরকারগী পান্দম্নি। ২০১৬দা প্রোজেক অসি উরেপ-উয়ুং তমখিবনি অমসুং মসি ঙসি শঙ্গাবদা অপেনবা পোকই। মসি ঐখোয়গী সরকারগী অনৌবা থবক তৌবগী চৎনবীনি।
প্রধান মন্ত্রীনা হায়খি তেলঙ্গানাগী দরকার ওইবা ইনর্জি ফংহন্নবা সরকারনা থবক পায়খৎলি। হন্দক হাসান-চেরলাপাল্লী পাইপলাইন মীয়ামদা কৎথোকখ্রে। মসিগী পাইপলাইন অসিনা মমল হোংনা অমসুং মহৌশাগী অকোয়বগী ফিবম শোকহন্দনবা এল.পি.জি ওন্থোকপা, পুথোক-পুশিন তৌবা অমসুং য়েন্থোকপা ঙমহল্লগনি।
ধর্মাবাদ-মনোহরবাদ অমসুং মহাবুবনাগর-কুরনুলগী মরক্তা মৈ ফংহন্নবা প্রোজেক্কী মতাংদা প্রধান মন্ত্রীনা হায়খি মসিনা রাজ্য অসিদা চৎথোক-চৎশিনগী খুদোংচাবা হেনগৎহনবগা লোয়ননা লাইন অনিগী ত্রেনশিংগী খোঙজেল হেনগৎহল্লগনি। রেলৱে লাইন খুদিংমক চাদা ১০০ মৈ ফংহন্নবা পান্দম অমদা ভারত রেলৱেনা থবক পায়খৎলি। মনোহরবাদ অমসুং সিদ্দিপেতগী মরক্তা লৈরিবা অনৌবা রেল লিঙ্ক অসিনা ললোন-ইতিক অমসুং উদোগতা অনৌবা ইনোৎ অমা পীরগনি। ২০১৬দা প্রোজেক অসি উরেপ-উয়ুং তমখিবা অদু প্রধান মন্ত্রীনা নিংশিংখি।
কমদৌনা মমাংঙৈদা হকশেলগী থবক অসি অখন্নবা মীওই খর খক্তগী ওইরম্বগে হায়বদু প্রধান মন্ত্রীনা নিংশিংখি অমসুং মহাক্না হায়খি হকশেলগী থবকশিং মমল হোংনা ফংহন্নবা থবক কয়া পায়খৎলে। বিবিনাগরদা লিংখৎলিবা অসি থারগা মেদিকেল কলেজ অমসুং এ.আই.আই.এম.এস মশিং হেনগৎহল্লে। দোক্তরশিংগী মশিং হেনগৎহন্নবা থবক পায়খৎলে।
প্রধান মন্ত্রীনা হায়খি পি.এম অয়ুস্মান ভারত হেল্থ ইনফ্রাস্ত্রকচর মিসনগী মখাদা জিলা খুদিংমক্তা মগুন লৈবা ইনফ্রাস্ত্রকচর শেমগৎলি। ব্লোক খুদিংমক্তা আইসোলেসন ৱার্দশিং, ওক্সিজেন অমসুং লায়না লৌনবা ঙাকথোক্নবা অমসুং লাকশিন্নবা খুদোংচাবশিং ফংহন্নবা শেমগৎকনি। তেলঙ্গানাদা হকশেলগী খুদোংচাবশিং হেনগৎহন্নবা অয়ুস্মান ভারত হেল্থ অমসুং ৱেলনেস সেন্তর ৫০০ হেন্না হান্নদগী থবক হৌখ্রে। কোবিদ লাইচৎ মনুংদা তেলঙ্গানাদা অচৌবা পি.এস.এ ওক্সিজেন প্লান্ত ৫০ লিংখৎতুনা মমল য়াম্লবা থৱায় কয়া কনবদা অচৌবা থৌদাং অমা লৌখি। পৱার, রেলৱে অমসুং হকশেলগী সেক্তরশিংদা ঙসিগী মরুওইবা প্রোজেকশিংগীদমক মীয়াম হরাওবা ফোঙদোক্লদুনা প্রধান মন্ত্রীনা মহাক্কী ৱারোল লোইশিনখি।
থৌরম অদুদা শরুক য়াখিবশিংগী মনুংদা তেলঙ্গানাগী রাজ্যপাল তমিলিসাই সাউন্দরাজন অমসুং য়ুনিয়ন মিনিস্তর শ্রী জি কিসন রেদ্দি য়াওখি।
নুঙগীৱারোল
লৈবাক অসিদা মৈ পুথোকপদা হেনগৎহনবগা লোয়ননা মৈ শীজিন্নবা হেনগৎহন্নবা প্রধান মন্ত্রীগী পান্দম মখাদা. এন.তি.পি.সিগী তেলঙ্গানা সুপর থর্মেল পাৱর প্রোজেক্কী ফেজ-১গী অহানবা মেগাৱাত ৮০০ য়ুনিৎ মীয়ামদা কৎথোকখ্রে। মসিনা তেলঙ্গানাদা অহোংবা মমলদা মৈ ফংহনগনি অমসুং রাজ্যগী শেন্মীৎলোন চাউখৎহনবদা শাহৌ অমা পীরগনি। মসি লৈবাক অসিগী খ্বাইদগী মহৌশাগী অকোয়বগী ফিবম শোকহন্দবা পাৱর স্তেসনশিংগী মরক্তা অমা ওইরগনি।
প্রধান মন্ত্রীনা মনোহরবাদ অমসুং সিদ্দিপেৎ শম্নহল্লিবা অনৌবা রেলৱে লাইন; অমসুং ধর্মাবাদ – মনোহরবাদ অমসুং মহাবুবনগর –কুর্নুল ফাওবগী ইলেক্ত্রিফিকেসন প্রোজেক্ত য়াওনা রেল প্রোজেক্তশিং মীয়ামদা কত্থোকপনা তেলঙ্গানাগী রেল ইনফ্রাস্ত্রকচর অসি শাহৌ পীরগনি। কিমি ৭৬ শাংবা মনোহরবাদ-সিদ্দিপেৎ রেল লাইন অসিনা লমদম অসিগী মরু ওইনা মেদক অমসুং সিদ্দিপেৎকী জিলাশিংদা খুন্নাই অমসুং শেন্মীৎলোন চাউখৎহনবদা শাহৌ পীরগনি। ধর্মাবাদ–মনোহরবাদ অমসুং মহাবুবনগর–কুর্নুল ফাওবগী ইলেক্ত্রিফিকেসন প্রোজেক্তনা ত্রেনশিংগী খোঙজেলগী হেনগৎহনবদা মতেং পাংলগনি অমসুং লমদম অসিদা এনভাইর্নমেন্ত-ফ্রেন্দলী রেল ত্রান্সপোর্ত তৌবা ঙমহল্লগনি। প্রধান মন্ত্রীনা লমদম অসিগী লোকেল ত্রেনদা চৎথোক চৎশিন তৌরিবশিংদা কান্নবা পীরগদবা সিদ্দিপেত - সিকন্দরাবাদ – সিদ্দিপেত ত্রেন সর্ভিসসু লমথাখি।
তেলঙ্গানাদা হেল্থ ইনফ্রাস্ত্রকচর হেনগৎহন্নবা খোঙথাং অমদা প্রধান মন্ত্রীনা প্রধান মন্ত্রী – আয়ুশ্মান ভারত হেল্থ ইনফ্রাস্ত্রকচর মিসনগী মখাদা রাজ্য শিনবা থুংবদা ক্রিতিকেল কিয়র ব্লোক 20গী উরেপ-উয়ুং তমখ্রে। ক্রিতিকেল কিয়র ব্লোকশিং অসি অদিলাবাদ, ভাদ্রাদ্রি কোথাগুদেম, জয়শঙ্কর ভুপালপল্লি, জোগুলামবা গরৱাল, হাইদরাবাদ, খম্মম, কুমুরম ভিম অসিফাবাদ, মঞ্চেরিয়ল মহাবুবনগর (বরেপল্লি), মুলুগু, নগরকুর্নুল, নালগোন্দা, নরায়নপেৎ, নির্মল, রাজন্না সিরসিলা, রঙ্গারেদ্দী (মহেশ্বরম), সুর্য়াপেৎ, পেদ্দাপল্লি, বিকারাবাদ অমসুং ৱারঙ্গল (নারসমপেৎ) জিলাশিং অসিদা শাগনি। ক্রিতিকেল কিয়র ব্লোকশিংনা তেলঙ্গানা শিনবা থুংবদা দিস্ত্রিক্ত লেবেল ক্রিতিকেল কিয়র ইনফ্রাস্ত্রকচর হেনগৎহন্দুনা রাজ্যগী মীয়মদা কান্নবা পীরগনি।
