বরানসী কান্তোনমেন্ত স্তেসন্দগী গোদোলিয়া ফাওবগী পেসেঞ্জর রোপৱেগী উরেপ উয়ুং তমখ্রে
জল জীবন মিসনগী মখাদা থক্নবা ঈশিংগী স্কীম ১৯ মীয়ামদা কত্থোকখ্রে"কাসীনা মীয়ামগী চিংনবা নাথৈদুনা ময়োল্লম অসিদা অহোংবা পুরকপদা মায় পাক্লে""হৌখিবা চহি ৯সিদা মীপুম খুদিংমক্না গঙ্গা ঘাৎকী লমদা অহোংবা লাকখিবা উরে""লৈবাকসিগী য়ুমথোঙ করোর ৮না হৌখিবা চহি ৩সিদা তোতীগী ঈশিং ফংলে""অমৃৎ কাল অসিদা ভারতকী চাওখৎ লম্বীদা মীপুম খুদিংমক্না থৌদাং য়াহন্নবা অমদি কনাগুম্বা অমত্তা চিত্থহৌদনবা লৈঙাক্না থবক পায়খৎলি""উত্তর প্রদেশনা স্তেত অসিগী চাওখৎপগী হীরম খুদিংদা অনৌবা মাইওন হাপ্লি""উত্তর প্রদেশনা নীংবা কায়বগী মমিদগী থোরক্তুনা অনিংবা অমদি থাজবা থম্লম্বশিংগী লম্বীদা খোঙ থাংলক্লি"প্রধান মন্ত্রী, শ্রী নরেন্দ্র মোদীনা ঙসি বরানসীদা লুপা করোর ১৭৮০ হেনবগী চাওখৎ থৌরাংগী প্রোজেক্তশিং উরেপ উয়ুং তমখ্রে অমদি মীয়ামদা কত্থোকখ্রে। প্রোজেক্তশিং অসিদা বরানসী কান্তোনমেন্ত স্তেসন্দগী গোদোলিয়া ফাওবগী পেসেঞ্জর রোপৱে, নমামী গঙ্গা স্কীমগী মখাদা ভগবানপুরদা এম.এল.দি. ৫৫গী সিৱেজ ত্রীতমেন্ত প্লান্ত অমা, সিগ্রা স্তেদিয়ম নৌনা শেমগৎ শাগৎপগী ফেজ ২ অমদি ৩, ইসরৱর খুঙ্গংদা এল.পি.জি. বোত্লিং প্লান্ত অমা, হিন্দুস্তান পেত্রোলিয়ম কোর্পোরেসন লিমিতেদনা শাগদবা সেৱাপুরী, ভরথরা খুঙ্গংদা প্রাইমারী হেল্থ সেন্তর অমা অমদি ফি হোংফম য়াওবা অতাউবা জেত্তী অমদি অতৈ কয়া য়াওরি। প্রধান মন্ত্রীনা গ্রাম পঞ্চায়ত ৬৩গী মীওই লাখ ৩ হেনবদা কান্নবা পীগদবা থক্নবগী ঈশিংগী স্কীম ১৯সু জল জীবন মীসনগী মখাদা মীয়ামদা কত্থোকখি। মহাক্না মিসন অসিগী মখাদা থক্নবা ঈশিংগী স্কীম ৫৯সু উরেপ উয়ুং তমখি। মহাক্না উহৈ অমসুং মনা মশিং গ্রেদিং, সোর্তিং অমদি প্রোসেসিং তৌনবা ইন্তিগ্রেতেদ পেক হাউস অমসু কারখিয়াওনদা মীয়ামদা কত্থোকখি। মহাক্না বরানসী স্মার্ত সিতী মিসনগী মখাদা তোঙান তোঙানবা প্রোজেক্তশিংসু মীয়ামদা কত্থোকখি।
তিল্লিবা মীয়ামগী মফমদা ৱা ঙাঙলদুনা, প্রধান মন্ত্রীনা ঙসি অসি নবরত্রগী য়াইফরবা মীকুপ্নি অমদি ইমা চন্দ্রঘন্তবু খুরুমজবা নুমিৎনি হায়খি। অসিগুম্বা অখন্নবা তাঞ্জা অসিদা বরানসীগী মীয়াম মরক্তা তিনবা ফংবদা মহাক্না হরাওবা ফোঙদোকখি অমদি বরানসীগী নুংঙাই য়াইফবগী লমদা অনৌবা পন্দুপ অমা হাপচিল্লে হায়খি। বরানসীদা হীরম খুদিংদা চাওখৎপা পুরক্নবগীদমক পেসেঞ্জর রোপৱে অমগী উরেপ উয়ুং তম্লে অমদি থক্নবা ঈশিং, হকশেল, মহৈ মশিং, গঙ্গা ক্লীনলিনেস, ঈচাও লাকশিনবা, পুলিস সর্ভিস, স্পোর্তস সর্ভিসেস অমদি হীরম অতৈ কয়া য়াওনা লুপা করোর চা কয়াগী ওইগদবা অতোপ্পা প্রোজেক্ত কয়া অমসু হৌদোক্লে হায়না মহাক্না পাউদমখি। সেন্তর ওফ এক্সেলেন্স ওন মেচিন তুল্স দিজাইনগী উরেপ উয়ুংসু বি.ঐচ.য়ু.দা তমদুনা ময়োল্লম অসিদা মালেমগী থাক্কী অতোপ্পা ইনস্তিত্যুৎ অমসু হাপচিল্লে হায়না মহাক্না পাউদমখি। প্রধান মন্ত্রীনা ঙসিগী চাওখৎ থৌরাংগী প্রোজেক্তশিং অসিগীদমক বরানসী অমদি পুর্বাঞ্চলগী মীয়ামগী মফমদা নুংঙাইবা ফোঙদোকখি।
প্রধান মন্ত্রীনা কাসীগী চাওখৎপগী মরমদা মফম খুদিংদা শোন্নরি অমদি মফমসিদা লাকপা মীথুং খুদিংমক অনৌবা থৌনাগা লোয়ননা হনখি হায়খি। কাসীনা মীয়ামগী চিংনববু নাথৈদুনা ময়োল্লম অসিদা অহোংবা পুরকপদা মায় পাকপা ঙম্লে হায়না মহাক্না হায়খি।
প্রধান মন্ত্রীনা অরিবা অমদি অনৌবা কাসী পুন্না ‘উনবা’ অসিগী মরমদা ৱাফমশিং থমখি। মহাক্না কাসী বিস্বানাথ ধাম, গঙ্গা ঘাৎকী থবক, অমদি খ্বায়দগী শাংবা তুরেলগী ক্রুজকী মরমদা মালেমগী মফমদা ঙাঙনরিবশিংগী মরমদা পনখি। শুপ্নতগী চহি অমদা কাসীদা তুরিস্ত করোর ৭ হেনবনা লাকখি। হায়রিবা তুরিস্তশিং অসিনা ময়োল্লম অসিদা অনৌবা শেন্মিৎলোনগী অমদি থবক্কী খুদোংচাবশিং শেমগৎলি হায়না মহাক্না হায়খি।
প্রধান মন্ত্রীনা তুরিজম অমদি ময়োল্লম অসি মশক ফজথোকহনবগা মরী লৈনবা অনৌবা চাওখৎ থৌরাংগী প্রোজেক্তশিংগী মরমদা পনখি। “লম্বী, থোং, রেলৱে নৎত্রগা এয়রপোর্ত ওইরবসু, বরানসীগী কন্নেক্তিবিতী মপুং ফানা কোমহল্লে”, হায়না প্রধান মন্ত্রীনা ময়োল্লম অসিগী কন্নেক্তিবিতীবু পুম্নৌ নৌবা থাক অমদা পুখৎলক্লিবা অনৌবা রোপৱে প্রোজেক্তকী মরমদা পল্লদুনা ফোঙদোকখি। মসিনা ময়োল্লম অসিগী ফেসিলিতীশিং ফগৎহনবগা লোয়ননা তুরিস্তশিংগী অনৌবা পুক্নিং চিংশিনফম অমসু শেমগৎলগনি হায়বা ৱাফম মহাক্না থমখি। রোপৱে অসি লোইশিল্লকপদা বনারস কান্তোনমেন্ত রেলৱে স্তেসনদগী কাসী-বিস্বানাথ কোরিদোর ফাওবগী অরাপ্পা মিনৎ খরগা মনুংদা য়ৌবা ঙম্লগনি অমদি কান্তোনমেন্ত স্তেসন্দগী গোদোলিয়া ফাওবগী মরক্তা ত্রাফিক চিনবগী চাংসু হন্থহল্লগনি হায়না মহাক্না পাউদমখি।
প্রধান মন্ত্রীনা ময়োল্লম অদু তেল্লবা মতম অমদা কোয়বা ঙম্লগদবা থংনবা ময়োল্লমশিংদগী অমদি স্তেতশিংদগী লাক্লিবা মীওইশিংগী মরমদসু পনখি। রোপৱে অসিগী মতমগা চুনরবা ফেসিলিতীশিংনা শেন্মিৎলোনগী থবক থৌওংশিংগী অনৌবা মফম অমসু শেমগৎলগনি হায়বা ৱাফমসু মহাক্না থমখি।
প্রধান মন্ত্রীনা ববতপুর এয়রপোর্ত্তা লৈরিবা অনৌবা এ.তি.সি. তৱারবু কাসীগা নোংথক্কী কন্নেক্তিবিতী মপাঙ্গল কনখৎহন্নবগী খোঙথাং অমনি হায়বা ৱাফম ফোঙদোকখি। প্রধান মন্ত্রীনা অতাওবা জেত্তী শেমগৎপগী মতাঙদসু পনখি অমদি মসিনা থম্লিবা মরুওইবা মীৎয়েঙ অসি লাই খুরুম্বা অমদি লম কোয়বা লাকপশিংগী মথৌ তাবদুনি হায়খি। নমামী গঙ্গে মিসনগী মখাদা, গঙ্গা মপানগী ময়োল্লম পুম্নমক্তা সিৱেজ ত্রীতমেন্তকী নেৎৱর্ক অমা লিংখৎলে হায়না প্রধান মন্ত্রীনা পাউদমখি। “মীপুম খুদিংমক্না হৌখিবা চহি ৯সিদা গঙ্গা তোর্বানগী লমশিংদা পুরক্লিবা অহোংবশিং উরে”, হায়না প্রধান মন্ত্রীনা ফোঙদোকখি অমদি গঙ্গা তোর্বান নাকল অনিমক্তা কিলোমিতর ৫ পাকপা মফমশিংদা লৈঙাক্না মহৌশাগী ওইবা লৌউ পথাপ য়োকখত্তুনা অনৌবা এনভাইরনমেন্তেল কেম্পেন অমসি পায়খৎলি হায়খি। মসিগীদমক চহি অসিগী বজেত্তা অখন্নবা চাকথুং অমসু হাপ্লে হায়না মহাক্না হায়খি। প্রধান মন্ত্রীনা মহৌশাগী লৌউ পথাপকা মরী লৈননা লৌমীশিংদা তেংবাং পীননবগীদমক অনৌবা সেন্তরশিং শেমগৎলি হায়বা ৱাফমসু থমখি।
প্রধান মন্ত্রীনা, বরানসীগা লোয়ননা নোংপোক থংবা উত্তর প্রদেশ পুম্নমক লৌউ-শিংউ অমদি এগ্রি-এক্সপোর্তকী মকোল অমা ওইরকপদা হরাওবা ফোঙদোকখি। মহাক্না বরানসীগী প্রোসেসিং, ত্রান্সপোর্তেসন অমদি স্তোরেজ ফেসিলিতীশিংনা বরানসিগী ‘লেংদা’ হৈনৌ অমদি ঘাজিপুরগী ‘ভিন্দী’ অমদি ‘হরি মির্চ’, জোনপুরগী ‘মুলী অমদি খরবুজ’তা অনৌবা ইনোৎ হাপ্তুনা মালেমগী কৈথেলশিংদা য়ৌবা ঙম্লি হায়খি।
অরূবা থক্নবা ঈশিংগী ৱাফমশিং পল্লদুনা, প্রধান মন্ত্রীনা, লৈঙাক অসিনা চৎলিবা চাওখৎপগী লম্বী অসিদা থৌগল অমদি মিনুংসিগী মচাকশিং য়াওরি হায়খি। ঙসি থক্নবা অরূবা ঈশিংগা মরী লৈনবা প্রোজেক্ত কয়া শঙ্গারি অদুগা তোঙান তোঙানবা প্রোজেক্তশিংগী উরেপ উয়ুংসু তম্লি। হায়না মহাক্না পাউদমখি। মহাক্না ‘হর খর নল সে জল’ কেম্পেনগী মরমদা পনখি অমদি হৌখিবা চহি ৩সিদা লৈবাকসিগী য়ুমথোঙ করোর ৮দা তোতীগী ঈশিং ফংহল্লে হায়খি। মহাক্না উজ্জ্বলা য়োজনাগী মরমদসু পনখি অমদি সেৱাপুরীগী এল.পি.জি. বোত্লিং প্লান্ত অসিনা বেনিফিসরীশিংদা কান্নবা পীবতা নত্তনা নোংপোক উত্তর প্রদেশ অমদি নোংচুপ বিহারগী মফমশিংগী গ্যাস সিলিন্দরগী দিমান্দসু ফংহল্লগনি হায়খি।
কেন্দ্রদা অমদি উত্তর প্রদেশতা লৈরিবা লৈঙাকশিং অসিনা লায়রবশিংগী থৌগলদা থাজবা থমই হায়রদুনা, প্রধান মন্ত্রীনা, মীয়াম্না মহাকপু ‘প্রধান মন্ত্রী’ হায়না কৌজরবসু, মহাক্কী মফমদদি মহাক অসি মীয়ামগী থৌগলগীদমক্তা লৈবনি হায়খি। নুমিত্তুগী ঙল্লিঙৈদা তোঙান তোঙানবা লৈঙাক্কী স্কীমশিংগী বেনিফিসরীশিংগা শান্নখিবা ৱারী নীংশিংলদুনা, প্রধান মন্ত্রীনা বরানসীগী মীওই লিশিং কয়ানা লৈঙাক্কী স্কীমশিংগী কান্নবশিং ফংলিবসিদা অপেনবা ফোঙদোকখি। প্রধান মন্ত্রীনা ২০১৪গী মমাঙদা বেঙ্ক একাউন্ত অমা হাংদোকপা খুদোং চারমদবা ফীভম নীংশিংখি অমদি অদুগা ঙসিদি লৈবাকসিগী খ্বায়দগী লায়রবা মীওই ফাওবা জন ধন একাউন্ত অমমম লৈদুনা শেলগী তেংবাং লৈঙাক্কী মায়কৈদগী হকথেংননা ফংলিবা ফীভম পুথোক্তুনা শিংথাখি। “অপীকপা লৌমী, বিজিনেসমেন নৎত্রগা সেল্ফ-হেল্প গ্রুপশিং ওইরবসু, মুদ্রা য়োজনাগী খুত্থাঙদা লোন অমা লৌবা হায়বসি লায়হল্লে”, হায়না প্রধান মন্ত্রীনা হায়খি। শন ইরোই অমদি ঙা মচা কোকহনবা মীওইশিংদসু কিসান ক্রেদিৎ কার্দ পীরে, স্ত্রীত ভেন্দরশিং পি.এম. স্বানিধী য়োজনাগী খুত্থাঙদা লোন ফংবা হৌরে, অমদি ভারতকী বিস্বকর্মশিংগীদমক পি.এম. বিস্বকর্ম য়োজনা হৌদোক্লে হায়বা ৱাফমসু মহাক্না পনখি। “অমৃৎ কাল অসিদা ভারতকী চাওখৎ লম্বীদা মীপুম খুদিংমক্না থৌদাং য়াননবা অমদি কনাগুম্বা অমত্তা চিত্থহৌদনবা লৈঙাক্না থবক পায়খৎলি”, হায়না প্রধান মন্ত্রীনা হায়খি।
প্রধান মন্ত্রীনা শান্নরোয় লাখ অমনা শরুক য়াখিবা খেলো বনারস কম্পিতিসনগী ৱিন্নরশিংগা মহাক্কা ৱারী ৱাতায় শান্নখিবগী মতাঙদা পনখি। প্রধান মন্ত্রীনা শরুক য়াখিবশিং অমদি মায় পাকখিবশিংগী মফমদা নুংঙাইবা ফোঙদোকখি। মহাক্না বনারসকী নহাশিংগীদমক অনৌবা শান্ন-খোৎনবগী ফেসিলিতীশিংগী মতাঙদসু পনখি। সিগ্রা স্তেদিয়ম পাকথোক চাউথোকপগী ফেজ ২ অমদি ৩গী উরেপ উয়ুং ঙসি তমখি। মালেমগী থাক্কী ক্রিকেৎ স্তেদিয়ম অমসু বরানসীদা শারক্কদৌরি হায়নসু মহাক্না পাউদমখি।
“ঙসি উত্তর প্রদেশনা স্তেত অসিগী হীরম খুদিংদা চাওখৎপা পুরকপগী অনৌবা মায়ওন অমা হাপচিল্লি”, হায়না প্রধান মন্ত্রীনা হায়খি। উত্তর প্রদেশকী য়োগী লৈঙাক্কী অনিসুবা তর্মগী অহানবা চহি হয়েং, মার্চ ২৫দা মপুং ফারগনি হায়না মহাক্না পাউদমখি অমদি শ্রী য়োগীনা স্তেত অসিগী খ্বায়দগী মতম শাংনা পায়বা মুখ্য মন্ত্রী ওইবগী অনৌবা রেকোর্দ অমসু শেম্লে হায়খি। “উত্তর প্রদেশনা নীংবা কায়বগী মরুমদগী থোরক্তুনা মীয়ামগী অনিংবা অপাম্বগী লম্বীদা খোঙ থাংজিল্লক্লি”, হায়না মহাক্না হায়খি। উত্তর প্রদেশ অসি ঙাকশেল অমদি থৌগলগী থৌওং হেনগৎহন্দুনা নুংঙাই য়াইফবা পুরকপগী তশেং তশেংবা খুদম অমনি হায়না মহাক্না হায়খি। ঙসিগী অনৌবা চাওখৎ থৌরাংগী প্রোজেক্তশিং অসিনা নুংঙাই য়াইফবগী লম্বীগী মপাঙ্গল হাপ্লি হায়বা ৱাফমগা লোয়ননা প্রধান মন্ত্রীনা মহাক্কা ৱারোল লোইশিনখি অমদি মীপুম খুদিংমক্কী মফমদা অমুক্কা হন্না নুংঙাইবা ফোঙদোকখি।
উত্তর প্রদেশকী গভর্নর, শ্রী অনাদিবেন পতেল, উত্তর প্রদেশকী মুখ্য মন্ত্রী, শ্রী য়োগী অদিত্যনাথ অমদি উত্তর প্রদেশ লৈঙাক্কী মন্ত্রীশিং লোয়ননা অতৈ মীওই কয়াসু থৌরমদুদা শরুক য়াখি।
বেকগ্রাউন্দ
হৌখিবা চহি মাপনলোম অসিদা, প্রধান মন্ত্রীনা বরানসিগী মপুং ওইবা ফিভমদা অহোংবা পুরক্নবা অমসুং ময়োল্লম অসিদা লৈরিবা অমসুং থংনবদা লৈরিবা মীয়ামগী পুন্সিদা খুদোংচানবা অখন্নবা মীৎয়েং চঙদুনা লাকখি। মায়কৈ অসিদা অতোপ্পা খোঙথাং অমা থাংজিল্লদুনা প্রধান মন্ত্রীনা সম্পুর্নানন্দ সংস্কৃত য়ুনিভর্সিতী লম্পাক্তা পাঙথোকপা থৌরমগী মনুংদা লুপা করোর ১৭৮০ হেনগদবা তোঙান-তোঙানবা প্রোজেক্তশিং কত্থোকখি অমসুং উরেপ উয়ুং তমখি।
প্রধান মন্ত্রীনা বরানসি কান্তোনমেন্ত স্তেসন্দগী গোদোলিয়া ফাওবগী পেসেঞ্জর রোপৱে উরেপ উয়ুং তমখি। প্রোজেক্ত অসিগী শেঞ্জং লুপা করোর ৬৪৫রোম ওইগনি হায়না পারি। রোপৱে সিস্তেম অসি স্তেসন মঙা লৈবগা লোইননা কিলোমিতর ৩.৭৫কী অশাংবা ওইগনি। মসিনা তুরিস্তশিং, লাই খুইরুম্বা লাকপশিং অমসুং মফমসিগী মীয়ামগী চত্থোক চৎশিন্দা খুদোংচাহল্লগনি।
প্রধান মন্ত্রীনা নমামি গঙ্গা স্কীমগী মখাদা লুপা করোর ৩০০ চঙনা ভগবানপুরদা শাগদবা ৫৫ এম.এল.দি.গী সিৱেজ ত্রীতমেন্ত প্লানগী উরেপ উয়ুংসু তমখি। খেলো ইন্দিয়া স্কিমগী মখাদা, সিগ্রা স্তেদিয়মগী নৌনা শেমদোক শাদোকপগী থবক্কী ফেজ ২ অমসুং ৩সু প্রধান মন্ত্রীনা উরেপ উয়ুং তমখি।
প্রধান মন্ত্রীনা ইসরৱার খুঙ্গং, সেৱাপুরিদা হিন্দুস্তান পেত্রোলিয়ম কোর্পোরেসন লিমিতেদনা শাগদবা এল.পি.জি. বোত্তলিং প্লান্তকী উরেপ উয়ুংসু তমখি। প্রধান মন্ত্রীনা ভরথরা খুঙ্গংদা প্রাইমারী হেল্থ সেন্তর লিংবা; ফি হোংফম য়াওবা অতাওবা জেত্তী, অমসুং অতোপ্পা প্রোজেক্ত কয়াগী উরেপ উয়ুংসু তমখি।
জল জীবন মিসনগী মখাদা, প্রধান মন্ত্রীনা থক্নবা ঈশিংগী স্কীম ১৯ কত্থোকখি, মসিনা গ্রাম পঞ্চায়ত ৬৩গী মীওই লাখ ৩ হেনবদা কান্নবা পীরগনি। খুঙ্গংগী থক্নবা ঈশিংগী সিস্তেম হেন্না মপাঙ্গল কলহন্নবগীদমক্তা, প্রধান মন্ত্রীনা মিসন অসিগী মখাদা থক্নবা ঈশিংগী স্কিম ৫৯গী উরেপ উয়ুংসু তমখি।
বরানসিদা অমসুং মসিগী অকোইবদা লৈরিবা লৌমীশিং এক্সপোর্তর অমসুং ত্রেদরশিংগীদমক্তা, উহৈ অমসুং মনা মশীং গ্রেদিং, সোর্তিং, প্রোসেসিং তৌবগী থবকসু কার্খিয়াওদা শাখিবা ইন্তিগ্রেতেদ পেক হাউসনা পাঙথোকপা য়াহল্লগনি। প্রধান মন্ত্রীনা হায়রিবা প্রোজেক্ত অসি লৈবাক মীয়ামদা থৌরম অসিগী মনুংদা কত্থোকখি। মসিনা বরানসি অমসুং মসিগী অকোইবদা লৈরিবা মফমশিংগী লৌউ-শিংউগী পোত্থোকশিং মপান্দা পুথোকপদা হেন্না মপাঙ্গল হেলহল্লগনি।
প্রধান মন্ত্রীনা বরানসি স্মার্ত সিতী মিসনগী মখাদা রাজঘাত অমসুং মহমুর্গঞ্জ লৈঙাক্কী স্কুলশিং নৌনা শেমগৎ শাগৎপা; ময়োল্লম মনুংগী লম্বীশিং মশক ফজথোকহনবা; ময়োল্লম অদুগা পার্ক অমসুং ইকোন ৬ নৌনা শেমগৎপা য়াওনা তোঙান-তোঙানবা প্রোজেক্ত কয়াসু কত্থোকখি। মহাক্না লাল বহাদুর শাস্ত্রি ইন্তর্নেসনেল এয়রপোর্তকী এ.তি.সি. তাৱর; ভেলুপুরগী ঈশিংগী থবক তৌরিবা মফমদা মেগাৱাৎ ২গী সোলার পাৱর প্লান্ত; কোনিয়া পম্পিং স্তেসন্দা কিলোৱাৎ ৮০০গী সোলার পাৱর প্লান্ত; সর্নাথতা অনৌবা কম্ম্যুনিতী হেল্থ সেন্তর; চান্দপুরগী ইন্দস্ত্রিএল এস্তেৎকী ইনফ্রাস্ত্রকচর ফগৎহনবা; কেদরেস্বর, বিসেস্বর অমসুং ওমকরেস্বর খন্দ পরিক্রমাগী লাইশঙ শেমগৎ শাগৎপা য়াওনা অতোপ্পা তোঙান-তোঙানবা ইনফ্রাস্ত্রকচর প্রোজেক্ত কয়াসু মহাক্না মীয়ামদা কত্থোকখি।
काशी के विकास की चर्चा आज पूरे देश और दुनिया में हो रही है। pic.twitter.com/zpZwHoLuFy
— PMO India (@PMOIndia) March 24, 2023
8-9 वर्षों के विकास कार्यों के बाद, जिस तेजी से बनारस का विकास हो रहा है, अब उसे नई गति देने का समय आ गया है। pic.twitter.com/LbKXTMl0Gz
— PMO India (@PMOIndia) March 24, 2023
Transforming the landscape of Kashi. pic.twitter.com/8Bonivd6Xv
— PMO India (@PMOIndia) March 24, 2023
आज बनारस के हजारों लोगों को सरकार की योजनाओं का लाभ मिल रहा है। pic.twitter.com/NjXh1TEbJz
— PMO India (@PMOIndia) March 24, 2023
