“১৭শুবা লোক সভাদা লেজিসলেতিপকী অওনবা থবক কয়া উবা ফংখি”
“সংসদ অসি ফক্লাংশিংনা কোইশিনবা শঙলেন অমা খক নত্তে, মসি নাগরিক করোর ১৪০গী অনিংবা-অপাম্বশিংগী মফম অমনি”হাওসনা শ্রী ওম বিরলা হাওসকী স্পিকর ওইনা খল্লবা মতুংদা প্রধান মন্ত্রী শ্রী নরেন্দ্র মোদী লোক সভাদা ৱা ঙাংখ্রে।
শ্রী বিরলা অনিরকশুবা ওইনা স্পিকর ওইবদা প্রধান মন্ত্রীনা তরাম্না ওকখি। মহাক্না হাওসকী স্পিকরদা য়াইফ-পাউজেল পীখি। অমৃত কাল মনুংদা শ্রী বিরলানা অনিশুরকশুবা ওইনা স্পিকর ওইবগী মরুওইবা পল্লদুনা, প্রধান মন্ত্রীনা হায়খি মহাক্কী চহি মঙাগী মতমদা পাংথোকখিবা থবকশিং অমসুং মেম্বরশিংনা পাংথোকখিবা থবকশিং অদুগা লোয়ননা মরুওইবা মতম অসিদা হাওস অসি লমজিংনবা মহাক অমুক হন্না স্পিকর ওইনা খনখিবনি। স্পিকর অসি নোল্লুকপা অমসুং ইচম-চম্বা মীওই অমনি অমসুং মহাক্কী মোমোন নোকপা মীনোক্না হাওসকী থবকশিং পাংথোকপদা মহাক্কী মতেং পাংখি।
স্পিকর ওইনা অমুক হন্না খনবা অসিনা মখা তানা অনৌবা মাইপাকশিং পুরকপা ঙমগনি হায়বগী থাজবা ফোঙদোক্লদুনা প্রধান মন্ত্রীনা হায়খি চহি মঙাগী মতুংদা অমুক হন্না ফম অসি পায়বা ঙমখিবা অহানবা স্পিকর অসি শ্রী বালরাম ঝাকারনি অমসুং ঙসি শ্রী ওম বিরলানা মাইপাক্না ১৭শুবা লোক সভা লুচিংবগী থৌদাং লৌরবা মতুংদা ১৮শুবা লোক সভা লুচিংলগনি। চহি ২০গী মতম অসিগী মনুংদা স্পিকর খল্লবশিং মীখল থেংনখিদে নত্ত্রগা ফম পায়রবা মতুংদা মীখল অমা মাইপাকখিদে। অদুবু পুৱারি ওইনা শ্রী ওম বিরলা মীখল মাইপাক্লবা মতুংদা অমুক হন্না স্পিকর ওইরে।
সংসদকী মেম্বর অমা ওইনা স্পিকরনা পাংথোকখিবা থবকশিংগী মতাংদা প্রধান মন্ত্রীনা হায়খি শ্রী ওম বিরলাগী কেন্দ্রগী মমা ফবা মমা অমসুং মশা ফবা অঙাংগী মতাংদা শিংথানিঙাই ওইবা কেম্পেন পাংথোকখি। মহাক্কী কেন্দ্র কোতাগী খুঙ্গংগী লমশিংদা শ্রী বিরলানা হকশেলগী মতাংদা অফবা থবক কয়া পাংথোকখি। মহাক্কী কেন্দ্রদা শান্ন-খোৎনবগী থবকশিং চাউখৎহনবগীদমক মহাক্না শ্রী বিরলা থাগৎপা ফোঙদোকখি।
হৌখিবা লোক সভাদা শ্রী বিরলনা লুচিংদুনা পাংথোকখিবা থবকশিং নিংশিংলদুনা, প্রধান মন্ত্রীনা হায়খি হায়রিবা মতম অদু ঐখোয়গী সংসদকী পুৱারিগী খ্বাইদগী ফবা মতম অমনি। ১৭শুবা লোক সভাদা অওনবা পুরকপা ৱারেপ কয়া লৌখি। শ্রী ওম বিরলাগী লমজিং মখাদা নারী শক্তি বন্দন অধিনিয়ম, জম্মু অমসুং কাস্মির রিওর্গনাইজেসন, ভারতিয়া ন্যায় সমহিতা, ভারতিয়া নাগরিক সুরক্ষা সমহিতা, সমাজিক সুরক্ষা সমহিতা, পর্সোনেল দেতা প্রোতেক্সন বিল, মুস্লিম মহিলা বিভাহ অধিকার সনরক্ষন বিধেয়ক, ত্রান্সজেন্দর পর্সন্স প্রোতেক্সন ওফ রাইতস বিল, কঞ্জুমর প্রোতেক্সন বিল, দাইরেক্ত তেক্স-বিবাদ সে বিশ্বাস বিধেয়ক পাস তৌখি।
প্রধান মন্ত্রীনা হায়খি গনতন্ত্রগী শাংলবা খোঙচৎ মনুংদা অপনবা কয়া থেংনখি অমসুং মসিনা অনৌবা রেকোর্দ কয়া শেম্নবা খুদোংচাবা পীখি। ভারতকী মীয়াম্না তুংদা ১৭শুবা লোক সভাগী অফবশিং মখা তানা থাগৎনগনি অমসুং ভারত মতমগা চুনবা লৈবাক অমা ওইহন্নবা ১৭শুবা লোক সভানা পাংথোকখিবা থবকশিং থাগৎনিঙাইনি। ইকায়খুম্নরবা স্পিকরগী লমজিং মখাদা অনৌবা সংসদকী শঙলেন্না অমৃত কালগী তুংগী লম্বী শেমগনি। হৌজিক ওইরিবা স্পিকরগী চিয়ার্মেনসিপ মতমদা সংসদকী অনৌবা শঙলেন শঙ্গাখিবনি। গনতন্ত্রগী থবকশিংগী য়ুম্ফম মপাঙ্গল কনখৎহন্নবা পায়খৎখিবা থবকশিং থাগৎনিঙাইনি। হাওসতা খন্ন-নৈনবা হেনগৎহন্নবা স্পিকরনা চে শীজিন্নদনা থবক তৌবা অমসুং ৱা খন্নবগী থবকশিং হৌদোকখি।
রেকোর্দ ওইনা লৈবাক কয়া শরুক য়াদুনা জি-২০ লৈবাকশিংগী লেজিসলেতিপশিংগী প্রেসাইদিং ওফিসারশিং শরুক য়াদুনা মাইপাক্না পি-২০ মীফম পাংথোকখিবা অদুগীদমক প্রধান মন্ত্রীনা স্পিকর থাগৎপা ফোঙদোকখি।
প্রধান মন্ত্রীনা হায়খি সংসদ অসি ফক্লাংশিংনা কোইশিনবা শঙলেন অমা খক নত্তে, মসি নাগরিক করোর ১৪০গী অনিংবা-অপাম্বশিংগী মফম অমনি। হাওসকী থবকশিং, মরম চানা থবক তৌবা অসিনা ঐখোয়গী লৈবাক্কী গনতন্ত্রগী য়ুম্ফম চেৎশিনহল্লি। ১৭শুবা লোক সভাগী কান্নবা চাদা ৯৭ ওইখি। কোরোনা লাইচৎ মনুংদা হাওসকী মেম্বরশিংগী য়াইফনবা স্পিকরনা মশামক শরুক য়াদুনা থবক কয়া পায়খৎখি। হাওসকী থবক তৌবা চাদা ১৭০ য়ৌদুনা শ্রী বিরলানা লাইচৎ মনুংদা হাওসকী থবকশিং লেপহনখিদে।
অরুবা ৱারেপশিং লৌবা মতমদা হাওসকী চৎন-কাংলোনশিং ঙাক্না স্পিকরনা মান্নবা মীৎয়েং অমা থমখিবা অদু প্রধান মন্ত্রীনা থাগৎপা ফোঙদোকখি। চৎনবীশিং ঙাক্তুনা হাওসকী মগুনশিং ঙাক্তুনা থম্বগীদমক মহাক্না স্পিকরগী মতমদা তৌবীমল খঙবা উৎখি।
মীয়ামগী থবক তৌদুনা অমসুং মখোয়গী মঙলানশিং অমসুং অনিংবশিং থবক ওইনা পাংথোক্তুনা ১৮শুবা লোক সভা মাইপাকপা অমা ওইগনি হায়না প্রধান মন্ত্রীনা থাজবা ফোঙদোকখি। অরোইবদা, স্পিকরগী মফমদা শীন্নরিবা মরুওইবা থৌদাং অমসুং মাইপাক্না লৈবাক অসি অনৌবা থাকশিংদা পুখৎনবা শ্রী ওম বিরলাগী মফমদা প্রধান মন্ত্রীনা মহাক্কী য়াইফ-পাউজেল পীখি।
