প্রধান মন্ত্রী, শ্রী নরেন্দ্র মোদীনা ঙসি সংবিধানগী নুমিৎকী নুংঙাইবা ফোংদোকপগী থৌরমদা শরুক য়াখ্রে অমসুং সুপ্রীম কোর্ত্তা তিনখিবা মীয়ামদা ৱা ঙাংখি। ভারতকী কন্সতিত্বেন্ত এসেমব্লীনা ইং ১৯৪৯দা ভারতকী সংবিধান চৎনখিববু নীংশিংবা ওইনা নবেম্বর ২৬বু ইং ২০১৫দগী হৌনা সংবিধানগী নুমিৎ হায়না পাংথোক্তুনা লাক্লি। প্রধান মন্ত্রীনা ঙসিগী থৌরম মনুংদা ভর্চুএল জস্তিস ক্লোক, জস্ত আই.এস. মোবাইল এপ ২.০, দিজিতেল কোর্ত অমসুং এস.৩ দবল্যু.এ.এ.এস. ৱেবসাইত য়াওনা ই.-কোর্ত প্রোজেক্তকী মখাদা অনৌবা খোঙথাং কয়াসু হৌদোকখি।
প্রধান মন্ত্রীনা সংবিধানগী নুমিৎকীদমক্তা মহাক্কী য়াইফ পাউজেল পীরদুনা ইং ১৯৪৯গী ঙসিগী নুমিৎমক্তদা মনিং তম্লবা ভারতনা মশাগী তুংগী মতমগীদমক্তা অনৌবা ফম্বাক শেমখিবনি হায়না ফোংদোকখি। নিংতম্বগী অমৃত মহোৎসবকী চহিসিদা সংবিধানগী নুমিৎকী মরু ওইবশিংসু মহাক্না পনখি। মহাক্না কন্সতিত্বেন্ত এসেমব্লীগী মীহুত খুদিং অমসুং বালাসাহেব দাঃ বি.আর. অম্বেদকরগী মদফমদসু খুম্নবা উৎখি।
লিএজিস্লেচর, জুদিসিএরী অমসুং একজেক্যুতিবকী মশিং থীঙমদ্রবা মীওই কয়ানা মমাংগী দিকেদ ৭০দগী ভারতকী সংবিধানবু হেন্না চাউখৎহন্নবা অমসুং পাকথোক চাউথোকহন্নবা তেংবাংখিবশিং নিংশিংলদুনা প্রধান মন্ত্রীনা ঙসিগী অখন্নবা থৌরম অসিদা লৈবাক মীয়ামগী মহুৎ শিন্দুনা মখোয়গী মফমদা থাগৎপা ফোংদোকখি।
ভারতকী পুৱারীগী অমম্বা নুমিৎ অমবু নিংশিংলদুনা প্রধান মন্ত্রীনা হায়খিবদা, লৈবাক অসিনা নবেম্বর ২৬তা সংবিধানগী নুমিৎকী কাওনাইদ্রবা মিৎকুপ অমগীদমক্তা নুংঙাইবা ফোংদোক্লিঙৈ নুমিৎসিদা মীওইবা খুন্নাইগী য়েক্নবশিংনা পাংথোকপা খ্বাইদগী চাউবা তেরোরিস্ত লান্দা অমা ভারতনা মাইয়োক্নখি হায়খি। মুম্বাই তেরর এতেক্কী মীনুংশি খঙদ্রবা থৌদোক অসিদা থৱাই মাঙখিবা মীওই খুদিংগী মফমদা শ্রী মোদীনা ইকায় খুম্নবা উৎখি।
হৌজিক ওইরিবা মালেমগী ফিভম অসিদা, ভারতকী শেন্মিৎলোন শাহৌ লৌখৎলক্লিবা অমসুং মালেমগী মাঙদা মশক থোকপা শক্তাক অমা লৈরক্লিবা অসিনা মরম ওইরগা মালেম্না থাজবা অমগা লোয়ননা ভারত্তা য়েংলি হায়না প্রধান মন্ত্রীনা হায়খি। ভারতকী তংদু লৈতাবগী ফিভমদা মমাংদা খন্নরম্বা ৱাখল্লোন কয়া মায়থীবা পীরদুনা, ভারতনা অকনবা শাফুগা লোয়ননা তুংলমচত্তা চঙশিল্লি অমসুং মশাগী দাইবর্সিতীদা চাউথোকচরি হায়না মহাক্না হায়খি। মহাক্না পুম্নমক অসি ঐখোয়গী সংবিধান্না মায় পাকহল্লিবনি হায়খি। প্রধান মন্ত্রীনা মখা তানা হায়রদুনা, সংবিধানগী প্রিএম্বলগী অহানবা ৱাহৈ অহুম, “ৱি দি পীপল”দা মিৎয়েং চঙলদুনা, মসিনা ঐখোয়গী খোল্লাও, ৱাশক অমসুং থাজবগী ৱারোলনি হায়খি। ঐখোয়গী সংবিধানগী মসিগুম্বা ইথিল অসিমক ঐখোয়গী ভারতকী ইথিলনি অমসুং মসিমক্না মালেমগী গনতন্ত্রগী মমা ওইরিবনি হায়না মহাক্না ফোংদোকখি। “হৌজিক্কী মতমসিদা, সংবিধান্না লৈবাক্কী চৎনবী অমসুং ৱাখল্লোন খুদিংবু অমত্তা ওইনা কোন্সিল্লি”, মহাক্না মখা তাখি।
লৈবাক অসিনা গনতন্ত্রগী মমা ওইনা, সংবিধানগী থাজবশিংবু মপাঙ্গল হেন্না কনহলি, মীয়ামগীদমক্তা খনবা পোলিসীশিংনা লৈবাক্কী লাইরবা অমসুং নুপীশিংগী থৌনা হাপ্লি হায়না প্রধান মন্ত্রীনা নুংঙাইবা পোকপগা লোয়ননা ফোংদোকখি। লৈবাক্কী আইনশিংবু মীয়ামদা য়াম্না লাইথোকহল্লে অমসুং অচুম্বা ৱায়েল মতম চানা পীবা ঙম্নবগীদমক্তা জুদিসিএরীনা খোঙথাং কয়া পায়খৎলি হায়না মহাক্না হায়খি।
মহাক্কী নিংতম নুমিৎকী ৱারোল নিংশিংলদুনা, প্রধান মন্ত্রীনা ইশাগী থৌদাংদা অহানবা মিৎয়েং চঙবা অমসুং খ্বাইদগী মরু ওইনা লৌবা অসিমক্না ঐখোয়গী সংবিধানগী ইথিলগী শক্তম্নি হায়খি। অমৃত কালবু কর্তব্যা কাল হায়না কৌরদুনা, প্রধান মন্ত্রীনা নিংতম্বগী অমৃত কাল অসিদা লৈবাক্না নিংতম্বগী চহি ৭৫ মপুং ফারক্তুনা চাউখৎ-থৌরাংগী মথংগী চহি ২৫গী মাইকৈদা ঐখোয়না খোংদারি অমসুং লৈবাক্কীদমক্তা ইশাগী থৌদাং পাংথোকপগী মন্ত্রসিনা খ্বাইদগী মাঙদা থমগদবনি হায়না মীয়ামগী পুক্নিং চিংশিনখি। “নিংতম্বগী অমৃত কাল অসিদি লৈবাক্কীদমক্তা ইশাগী থৌদাং পাংথোকপগী মতম্নি। মীয়ামদা নত্ত্রগা ইন্সতিত্যুসনশিংদা ওইরো, ঐখোয়গী থৌদাংনা ঐখোয়গী খ্বাইদগী অহানবা মিৎয়েং চঙফম্নি”, প্রধান মন্ত্রীনা হায়খি। মীওই অমগী মশাগী ‘কর্তব্যা পথ’তা চত্তুনা লৈবাক অসিনা চাউখৎপগী অনৌবা অৱাংবা থাক্তা য়ৌবা ঙমগনি হায়না মহাক্না হায়খি।
ভারতনা চয়োল অমগী মনুংদা জি.২০ প্রসিদেন্সী ফংলগনি, অমসুং ঐখোয়না তীম অমা ওইনা জি.২০ প্রসিদেন্সী মনুংদা ভারতকী মমায় অমসুং মিংচৎপু মালেম মাঙদা খুমাং চাউশিলহনবগী তঙাই ফদবা লৈরে হায়না প্রধান মন্ত্রীনা পাউদমখি। “মসিদি ঐখোয় পুম্নমক্কী অপুনবা থৌদাংনি”, মহাক্না হায়খি। “গনতন্ত্রাগী মমা হায়দুনা লৈরিবা ভারতকী শক্তাক অসিবু হেন্না মপাঙ্গল লৈহনবা তাই”, মহাক্না হায়খি।
ঐখোয়গী সংবিধানগী নহারোলদা অহেনবা মিৎয়েং চঙবা ইথিলদা প্রধান মন্ত্রীনা মিৎয়েং চঙলদুনা ঐখোয়গী সংবিধান অসিদি পুম্নমকপু য়াবা, তুংগীদমক্তা মিৎয়েং য়েংবা অমসুং মতমগা চুনবা ৱাখল খনবগীদমক্তা মমিং চৎলিবনি হায়খি। ভারতকী চাউখৎপগী খোঙচত্তা নহাশিংগী পাঙ্গলনা য়াখিবা থৌদাংশিংবু মহাক্না শকখঙখি।
নহারোলশিংগী মরক্তা ইক্বেলিতী অমসুং ইম্পাৱর্মেন্তকুম্বা হীরমশিংবু মমুৎ তানা খঙনবগীদমক্তা ভারতকী সংবিধানগী মতাংদা খঙবা হেনগৎহনবগী মথৌ তারে হায়না প্রধান মন্ত্রীনা পল্লদুনা, ঐখোয়গী সংবিধান শেমখিবা মতম অমসুং মতমদুদা লৈবাক্কী মাঙদা লৈরম্বা শিংনবশিংবু নিংশিংখি। “মতমদুদা কন্সতিত্বেন্ত এসেমব্লীদা ৱারী শানখিবা মতমদা করি হায়নখি হায়বা হীরমশিং অসি ঐখোয়গী নহাশিংনা খঙফম থোকই”, মহাক্না হায়খি। মসিনা ঐখোয়না সংবিধানবু নীংথিনা খঙবদা তেংবাংগনি হায়না মহাক্না মখা তাখি। কন্সতিত্বেন্ত এসেমব্লীদা নুপী মেম্বর ১৫ লৈরম্বা মতমবু প্রধান মন্ত্রীনা নিংশিংখি অমসুং মখোয়শিংগী মরক্তগী দক্সায়ানী বেলায়ুধনগুম্বী শোত্থবা খুন্নাইগী নুপীশিংনা ফমদুদা য়ৌরকখিবগী মতৌদা মহাক্না মীয়ামগী পুক্নিং চিংশিনখি। মহাক্কুম্বী নুপীশিংগী থৌদাংশিং ঐখোয়না কয়া নিংশিংদবা অসিদা প্রধান মন্ত্রীনা নুংঙাইতবা ফোংদোকখি অমসুং দলিত অমসুং শিন্মীগী মতাংদা মহাক্না মরু ওইবা থৌদাং কয়া পায়খৎলম্মি হায়না প্রধান মন্ত্রীনা পাউদমখি। প্রধান মন্ত্রীনা নুপীগা মরী লৈনবা হীরমশিংদা মশক থোকপা শরুক তমখিবী দুর্গাবাই দেশমুখ, হন্সা মেহতা অমসুং রাজকুমারী অমৃত কৌর অমসুং অতোপ্পা নুপী মেম্বর কয়াগী খুদম পীখি। “ঐখোয়গী নহাশিংনা ৱাফমশিং অসি খঙলকপা মতমদা, মখোয়না মখোয়গী ৱাহংগী পাউখুম অদুমক ফংজগনি”, প্রধান মন্ত্রীনা ৱারোল লোইশিনবা ওইনা হায়খি। “নিংতম্বগী অমৃত কাল অসিদা মসিনা হৌজিক্কী মতমগী খ্বাইদগী তঙাই ফদবা থৌদাং ওইরি। মসিগী সংবিধানগী নুমিত অসিনা ঐখোয়না মাইকৈ অসিদা চঙশিনবদা পাঙ্গল হাপকনি হায়না থাজবা থম্মি”, মহাক্না মখা তাখি।
ভারতকী চীফ জস্তিস, দাঃ দি. ৱাই. চন্দ্রচুর, লো অমসুং জস্তিসকী কেন্দ্র মন্ত্রী, শ্রী কিরেন রিজিজু, ভারতকী সুপ্রীম কোর্তকী চীফ জস্তিস, জস্তিস সঞ্জয় কিশন কৌল অমসুং জস্তিস এস. অবদুল নজীর, লো অমসুং জস্তিসকী কেন্দ্রগী রাজ্য মন্ত্রী, প্রোফঃ এস.পি. বাঘেল, ভারতকী এত্তোর্নী জেনেরেল, শ্রী আর. ভেঙ্কতরমনী, ভারতকী সোলিসিতর জেনেরেল, শ্রী তুশার মেহতা অমসুং সুপ্রীম কোর্ত বার এসোসিএসনগী প্রসিদেন্ত, শ্রী বিকাশ সিংহসু ঙসিগী থৌরমদা অতোপ্পা মীওইশিংগা লোয়ননা শরুক য়াখি।
বেকগ্রাউন্দ
মসিগী প্রোজেক্ত অসিদি কোর্তশিংদা আই.সি.তি. পাংথোকপা য়াহন্দুনা লিতিগেন্ত, উকিল অমসুং জুদিসিএরীশিংদা সর্ভিস পীবা ঙম্নবা হোৎনবগী খোঙথাংনি। প্রধান মন্ত্রীনা হৌদোকখিবা অনৌবা খোঙথাংশিংগী মনুংদা ভর্চুএল জস্তিস ক্লোক, জস্ত আই.এস. মোবাইল এপ ২.০, দিজিতেল কোর্ত অমসুং এস.৩ দবল্যু.এ.এ.এস. ৱেবসাইত য়াওরি।
ভর্চুএল জস্তিস ক্লোক অসি ৱায়েলশঙগী থাক্তা নুংতিগী/চয়োলগী/থাগী ওইনা লৌখৎলব কেস, লোইশিনখ্রবা কেস অমদি পন্দুনা লৈরিবা কেসশিংগী মচা খায়বা ৱারোলশিং পীদুনা জস্তিস দেলিভরী সিস্তেমগী মরুওইবা স্তেতিস্তিক্সশিং ৱায়েলশঙগী থাক্তা ফংহন্নবগী থৌরাং অমনি। হোৎনরিবা অসি ৱায়েলশঙনা লোইশিনখিবা কেসকী ফীভম মীয়ামদা ফংহন্দুনা ৱায়েলশঙশিংগী থবক তৌবগী মওংবু একাউন্তেবল ওইহন্নবা অমদি ত্রান্সপেরেন্ত ওইহন্নবা থৌরাংনি। মীয়াম্না দিস্ত্রিক্ত কোর্তকী ৱেবসাইত্তগী ৱায়েলশঙ অমা হেক্তগী ভর্চুএল জস্তিস ক্লোক্তা চঙবা য়াগনি।
জস্তআই.এস. মোবাইল এপ ২.০ অসি জুদিসিএল ওফিসরশিংদা মখোয়গী ৱায়েলশঙখক্তগী নত্তনা মখোয়গী মখাদা থবক তৌরিবা জজশিংগী পন্দুনা লৈরিবা অমদি লোইশিনখ্রবা কেসশিং য়েংশিন্দুনা মতিং লৈবা কোর্ত অমদি কেস মেনেজমেন্ত ফংহন্নবা খুৎলায় অমনি। এপ অসি হায় কোর্ত অমসুং সুপ্রিম কোর্ত জজশিংদসু ফংহন্দুনা মখোয়না মখোয়গী মখাদা লৈরিবা স্তেত অমদি দিস্ত্রিক্তশিংদা পন্দুনা লৈরিবা অমদি লোইশিনখ্রবা কেসশিং য়েংশিনবা ঙম্লগনি।
দিজিতেল কোর্ত হায়বসি পেপরলেস কোর্তকী মায়কৈদা খোঙ থাংজিল্লকপা য়াহন্নবগীদমক কোর্তকী রেকোর্দশিং জজশিংদা দিজিতাইজ তৌরবা মওংদা ফংহন্নবা থৌরাং অমনি।
এস৩দব্লিউ.এ.এ.এস ৱেবসাইত হায়বসি দিস্ত্রিক্ত জুদিসিয়রীগা মরী লৈনবা অকক্নবা ঈ-পাউ অমদি সর্ভিসশিং ফোঙদোক্নবা ৱেবসাইতশিং জেনেরেৎ, কনফিগর, দিপ্লোয় অমদি মেনেজ তৌনবা ফ্রেমৱর্ক অমনি। এস৩দব্লিউ.এ.এ.এস হায়বসি সিক্যুর, স্কেলেবল অমদি সুগম্য (এসেসিবল) ৱেবসাইত জেনেরেৎ তৌনবা লৈঙাক্কী এন্তিতীশিংগীদমক্তা শেমবা ক্লাউদ সর্ভিস অমনি। মসি লোল কয়াদা য়াবা, মীয়াম্না নুংঙাইনা শীজিন্নবা য়াবা অমদি মীমান্নদ্রবশিংনা লায়না শীজিন্নবা য়াবা মওংনি।
PM @narendramodi extends Constitution Day greetings to the nation. pic.twitter.com/Xk6l6J8hZp
— PMO India (@PMOIndia) November 26, 2022
PM @narendramodi pays tribute to those who lost their lives during 26/11 terror attack in Mumbai. pic.twitter.com/NjRgk6lbWq
— PMO India (@PMOIndia) November 26, 2022
‘We the people’ एक आह्वान है, एक प्रतिज्ञा है, एक विश्वास है। pic.twitter.com/XTTVOWAQ4e
— PMO India (@PMOIndia) November 26, 2022
आज़ादी का ये अमृतकाल देश के लिए कर्तव्यकाल है। pic.twitter.com/EkmHnQooLv
— PMO India (@PMOIndia) November 26, 2022
Our Constitution is youth centric. pic.twitter.com/t35sgsDrlv
— PMO India (@PMOIndia) November 26, 2022
The eyes of the entire world are set on India. pic.twitter.com/j8Nht97FSt
— PMO India (@PMOIndia) November 26, 2022
