প্রধান মন্ত্রী শ্রী নরেন্দ্র মোদীনা ঙসি ভিদিও কনফরেন্সকী থোংদা লখনৌ য়ুনিভর্সিতী লিংখৎখিবা চহি চাম্মাশুবা নুমিৎকী থৌরমদা ৱা ঙাংখ্রে। প্রধান মন্ত্রীনা থৌরম অদুদা য়ুনিভর্সিতীগী চহি চাম্মা শুবগী নীংশিং শেলয়েক ফোংখি। থৌরম অদুদা মহাক্না ইন্দিয়ন পোস্তনা থাদোকপা অখন্নবা নীংশিং পোস্তেল স্তাম্প অমসুং মদুগী অখন্নবা কভর অমসুং ফোংখি। থৌরম অদুদা কেন্দ্রগী ঙাক-শেল মন্ত্রী অমসুং লখনৌদগী এম.পি. শ্রী রাজনাথ সিংহগা লোইননা উত্তর প্রদেশকী মুখ্যমন্ত্রী শ্রী য়োগী আদিত্যনাথ শরুক য়াখি।
প্রধান মন্ত্রীনা য়ুনিভর্সিতীদা মফম অদুগী কলাশিং অমসুং পোৎথোকশিংগা মরী লৈনবা কোর্সশিং য়াওহন্নবা খঙহনখি লোইননা হায়রিবা মফম অসিগী পোৎথোকশিংগী মগুন হেনগৎহন্নবা রিসর্স তৌনবা হায়খি। লখনৌগী ‘চিকনকারী’, মুরাদাবাদকী পিথ্রাইগী পোৎলমশিং, অলীগরগী শোশিং, ভদোহীগী কার্পেৎনচিংবা পোৎথোকশিংবু মালেমগী থাক্তা য়াওহন্নবা মেনেজমেন্ত, ব্রান্দিং অমসুং লাল্লোং শেম্নবা য়ুনিভর্সিতীনা ফংহল্লিবা কোর্সশিংগী মনুংদা য়াওহনগদবনি। মসিনা ৱান দিস্ত্রিক্ত ৱান প্রদক্তকী ৱাখল্লোন অদু অচুম্বা ওইহনবদা মতেং পাংবা ঙমগনি। প্রধান মন্ত্রীনা কলা, নাৎ অমসুং ধর্মগী ওইবা হিরমশিংদা শরুক য়াবা মখা চৎথনবা মখোয়বু মালেমগী থাক্তা পুখৎনবসু খঙহনখি।
তৌবা ঙম্বশিং খঙদোক্নবগী মথৌ তাবশিং পল্লদুনা প্রধান মন্ত্রীনা রায়বরেলীগী রেল কোচ ফেক্তরীগী খুদম পীখি। মহাক্না হায়খি মদুদি ফেক্তরীদা তৌখিবা ইনভেস্তমেন্ত মতম কুইনা অপীকপা পোৎথোকশিং অমসুং কপুরথালাদা শেম্বা কোচশিংদা চংবা পোৎলমশিংদা শিজিন্নখিদে। ফেক্তরী অদু কোচ শাবা ঙমখি, অদুবু মদুগী তৌবা ঙম্বশিং অদু মপুং ফানা কৈদৌঙৈদসু শিজিন্নখিদে। ২০১৪দা অসুম্না খজিক্তমক শিজিন্নগী ফিভমদা অহোংবা পুরকখি অমসুং ঙসি ফেক্তরীদা কোচ কয়ামরুম শারি। শ্রী মোদীনা হায়খি মদুদি তৌবা ঙম্বশিংগা লোইননা অনীংবা অমসুং ফিরেপসু অদুক্কী মতিক মরুওই। অতৈ অতোপ্পা খুদম কয়া পল্লদুনা প্রধান মন্ত্রীনা হায়খি, “ৱাখলদা অচুম্বা অমসুং মিৎয়েংদা ওইথোকপশিংবু মতম পুম্নমক্তা হিংহন্দুনা থমগদবনি।”
শ্রী মোদীনা গুজরাত্তা মহৈরোইশিংগী মতেংদগী গান্ধী জয়েন্তীদা পোরবন্দরদা তৌখিবা ফেশন শোগী থোংদগী খাদীবু মীয়াম্না পাম্নহনখিবগী মতাংদা মানা খঙখিবা অদু শিয়র তৌখি। মসিদগী খাদী “ফেস্নেবল” ওইখ্রে। প্রধান মন্ত্রীনা হায়খি মদুদি হৌখিবা চহি তরুক্তা খাদী য়োনখিবা অদু, মসিগী মমাং চহি ২০দা পুন্না য়োনখিবা অদুদগী হেনখ্রে।
অনৌবা মতমগী পুন্সিগী চরাংনবশিং অমসুং গেজেৎশিংদা হেনগৎলক্লিবা মীপান তাংবশিংগী মতাংদা পল্লদুনা প্রধান মন্ত্রীনা হায়খি মদুদি নহাশিংদা ৱাখন খনবা অমসুং মশানা মশাবু শকখঙবগী হৈনবী হন্থরক্লি। মহাক্না নহাশিংদা মখল খুদিংমক্কী চরাংনবশিংগী মরক্তা মখোয়গীদমক্তা মতম কাইথোক্নবা হায়খি। মহাক্না হায়খি মদুদি মসিদগী মখোয়না মখোয়গী তৌবা ঙম্বশিং হেনগৎহনবদা মতেং ফংগনি।
প্রধান মন্ত্রীনা হায়খি মদুদি য়ুনিভর্সিতীগীদমক্তা নেস্নেল এজুকেসন পোলিসী অসি মশাবু চাংয়েং লৌজনবগী পাম্বৈ অমনি। অনৌবা পোলিসীদা মহৈরোইশিংনা মশানা মশাবু থাজজবা হেনগৎহন্নবা অমসুং অনোপ-অতিং লৈহন্নবগীদমক্তা হোৎনরি। মহাক্না মহৈরোইশিংদা চৎনবীশিং থুগাইনবা, ঙমখৈশিংদগী হেনগৎনা খন্ননবা লোইননা অহোংবা পুরকপদা কিদনবা খঙহনখি। মহাক্না মহৈরোইশিংদা অনৌবা পোলিসীগী মতাংদা খন্ননবা অমসুং মসিবু থবক্তা ওন্থোকপদা মতেং পাংনবা হায়খি।
