“ঙসি অসি পার্লিয়ামেন্তরী দিমোক্রেসীগী চাউথোকচনিংঙাই ওইরবা নুমিৎ অমনি, মসি মায় পাকপগী নুমিৎ অমনি। নিংতম্লবা মতুংদা অহান্বা ওইনা, ৱাশক লৌবা অসি ঐখোয়গী অনৌবা পার্লিয়ামেন্ততা পাঙথোক্লি”
“হয়েং জুন ২৫নি। চহি ৫০গী মমাঙদা নুমিৎ অসিমক্তদা, সংবিধান্দা অমুবা কালি অমা তৈশিনখি। অসিগুম্বা মচু অমা লৈবাকসিদা অমুক হন্না চুহন্দনবা ঐখোয়না হোৎনগনি”“নিংতম্বা মতুংদা অনিরকশুবা ওইনা, লৈঙাক অমনি থংনা থংননা অহুমলকশুবা ওইনা লৈবাক্কী থৌগল তৌনবা তাঞ্জা ফংলি। মসি চহি ৬০গী মতুংদা লাকপা তাঞ্জানি”“লৈঙাক অমা চলাইনবা মশিং য়াম্বা মথৌ তাই হায়বা ঐখোয়না থাজৈ, অদুবু পুম্নমক্না য়ানবা হায়বসি লৈবাক অমা চলাইবদা য়াম্না মরু ওই”“ঐনা লৈবাক মীয়ামগী মফমদা থাজবা পীজরি মদুদিই ঐখোয়গী অহুমশুবা তর্ম অসিদা, ঐখোয়না শরুক অহুম হেন্না কন্না হোৎনগনি অমসুং শরুক অহুম হেন্না মহৈ পুরক্নবা হোৎনগনি”“লৈবাকসিনা খোল্লাউ মথৌ তাদে, মসিনা মচাক মথৌ তাই। লৈবাকসিনা অফবা ওপোজিসন, থৌদাং লৈবা ওপোজিসন মথৌ তাই”প্রধান মন্ত্রী, শ্রী নরেন্দ্র মোদীনা ঙসি ১৮শুবা লোক সভাগী ১বা মীফম হৌদোকত্রিঙৈগী মাঙওইননা মীদিয়াগী মফমদা ৱা ঙাংখ্রে।
নিংতম্বা মতুংদা অহান্বা ওইনা অনৌবা পার্লিয়ামেন্ততা ৱাশক লৌবগী থৌরম পাঙথোক্কদৌরিবা অসিনা ঙসিগী থৌরম অসি পার্লিয়ামেন্তরী দিমোক্রেসীগী চাউথোকচনিংঙাই ওইরবা অমসুং মায় পাকপগী নুমিৎ অমনি হায়রদুনা প্রধান মন্ত্রীনা মহাক্কী ৱারোল পীবা হৌখি। “মরুওইখ্রবা নুমিৎ অসিদা, ঐনা নৌনা মীখল কারক্লবা এম.পি. পুম্নমকপু থম্মোয় শেংনা তরাম্না ওকচরি অমসুং মীপুম খুদিংমক্কী মফমদা নুংঙাইবা ফোঙদোকচরি,” হায়না প্রধান মন্ত্রীনা হায়খি।
পার্লিয়ামেন্ত অসি শেম্লকপবু ভারতকী মীচম মীয়ামগী ফিরেপ মপুং ফাহন্নবা পাম্বৈ অমনি হায়রদুনা, প্রধান মন্ত্রীনা মসি অনৌবা ৱাখল্লোনগা লোয়ননা অনৌবা খোঙজেল অমদি পন্দোল ফংনবগী মরুওইবা তাঞ্জা অমনি হায়খি। ২০৪৭ ফাওবদা চাওখৎলপা ভারত অমা শেমগৎনবগী পান্দমশিং ফংননবা ১৮শুবা লোক সভা ঙসিদগী হৌরগনি হায়না মহাক্না হায়খি। মালেমগী খ্বায়দগী চাউবা মীখল চাউনা পাঙথোকখিবা অসি ভারত মচা করোর ১৪০গী চাউথোকচনিংঙাইগী ৱাফম অমনি হায়না প্রধান মন্ত্রীনা ফোঙদোকখি। “মীখল অসিদা ভোতর করোর ৬৫ হেন্বনা শরূক য়াখি”, হায়না প্রধান মন্ত্রীনা হরাওবা ফোঙদোক্লদুনা হায়বগা লোয়ননা হন্দক্কী অসিনা নিংতম্লবা মতুংদা লৈবাকসিনা লৈঙাক অমদা থংন-থংননা অহুম্লক শুবা ওইনা মীয়ামগী থৌদাং শিন্নবা অনিরক শুবনি হায়খি। “তাঞ্জা অসি চহি ৬০গী মতুংদা লাকপা ওইবনা মশানা চাউথোকচনিংঙাইগী ওইবা থৌরম অমসু ওইরি,” হায়না মহাক্না মখা তাখি।
প্রধান মন্ত্রী মোদীনা লৈঙাক অসিবু অহুম্লক শুবা ওইনা মীখলদা মায় পাকহনবিরকপগগীদমক তৌবিমল খঙবা ফোঙদোকখি অমসুং মসিনা লৈঙাক্কী অনিংবা অপাম্বা, থৌরাং অমসুং মীয়ামগীদমক কত্থোকপসিদা অয়াবা পীবগী স্তাম্প অমা নম্লে হায়খি। “হৌখিবা চহি ১০সিদা ঐখোয়না চৎনবী অমা শেমগৎনবা হোৎনখি মরমদি লৈঙাক অমা চলাইবদা মশিং য়াম্বা মথৌ তাই হায়না ঐখোয়না থাজৈ অদুবু লৈবাক অমা চলাইবদা পুম্নমক্না য়ানবা হায়বসি য়াম্নমক মরুওই,” হায়বা ৱাফম প্রধান মন্ত্রীনা থমখি। পুম্নমক্না য়ানবা পুরক্তুনা অমদি ভারত মচা করোর ১৪০গী অপাম্বশিং অমসুং মঙলানশিং মংফাওনহন্নবা মীপুম খুদিংমক্কা চৎমিন্নদুনা ইমা ভারতগী থৌগল তৌননবা লৈঙাক অসিনা মতম পুম্বদা হোৎনখি হায়না মহাক্না ফোঙদোকখি।
মীপুম খুদিংমক্কা চৎমিন্নবা অমসুং ভারতকী সংবিধানগী ঙমখৈ মনংদা ফিরেপ লৌবগী খোঙজেল য়াঙখৎহনবগী মথৌ তাবা ৱাফমশিং থম্লদুনা, প্রধান মন্ত্রীনা ১৮শুবা লোক সভাদা ৱাশক লৌগদৌরিবা নহা ওইরিবা এম.পি মশিংদা নুংঙাইবা ফোঙদোকখি। ভারতকী চৎনবীগী মতুং ইন্না মশিং ১৮গী মরুওইবা ৱাফমশিং থম্লদুনা, প্রধান মন্ত্রীনা গীতাদা থৌওং, থৌদাং অমসুং মিনুংশিগী পাউজেল পীবা পন্দুপ ১৮ য়াওই, পুরান অমসুং উপুরান মশিংসু ১৮নি, ১৮গী রুত নম্বরসু মতিক চাবগী খুদম চাংদম ওইরিবা ৯নি, অমসুং ভারতকী ভোত থাদবা য়াবগী চহিসু ১৮নি হায়খি। “১৮শুবা লোক সসভা অসি ভারতকী অমৃত কালনি। লোক সভা অসি শেম্লিবসিসু য়াইফরবা খুদম অমনি,” হায়না শ্রী মোদীনা মখা তাখি।
প্রধান মন্ত্রীনা হয়েংগী তাং জুন ২৫ অসি ইমর্জেন্সী লৈঙাক্কী চহি ৫০ মপুং ফারকপা নুমিৎনি হায়খি অমসুং মসিনা ভারতকী দিমোক্রেসীদা অমুবা মচু অমা চুহল্লি হায়খি। ভারতকী অনৌবা মীরোলনা মীয়ামগী লৈঙাকপু নমহত্তুনা ভারতকী সংবিধানবু মপুং ফানা থৌওইখিদবা অমসুং লৈবাক অসিবু কৈশুমশঙ ওন্থোকখিবা নুমিৎ অসি কৈদৌঙৈদসু কাউবা ঙম্লোই হায়না শ্রী মোদীনা হায়খি। শ্রী মোদীনা লৈবাক মীয়ামগী মফমদা অসিগুম্বা থৌদোক অমুক হন্না থোক্তনবা ভারতকী দিমোক্রেসী অমসুং দিমোক্রেতিক চৎনবীবু ঙাক্তুনা থম্নবা ফিরেপ অমা লৌনবা ৱাফম থমখি। “ঐখোয়না মশক মচু থোকপা দিমোক্রেসী অমগীদমক ফিরেপ লৌগনি অমসুং মীচম মীয়ামগী মঙলানশিং ভারত সংবিধানগী মতুং ইন্না মঙফাওনহনগনি,” হায়না প্রধান মন্ত্রীনা হায়খি।
মীয়াম্না লৈঙাক অসিবু অহুমলকশুবা ওইনা থাগৎপিরকপা মরম্না লৈঙাক্কী থৌদাংসু শরুক অহুম হেনগৎলে হায়না প্রধান মন্ত্রীনা থমখি। মহাক্না মীয়ামগী মফমদা লৈঙাক অসিনা হান্নদগী শরুক অহুম হেন্না কন্না হোৎনগনি অমসুং মহৈশু শরুক অহুম হেন্না পুরক্কনি হায়না থাজবা পীখি।
নৌনা মীখল কারক্লবা পার্লিয়ামেন্তকী মেম্বরশিংদা লৈবাকসিদা থম্লিবা অচৌবা থাজববু পল্লদুনা, প্রধান মন্ত্রীনা এম.পি. পুম্নমক্কী মফমদা তাঞ্জা অসিবু মীয়ামগী য়াইফনবা, অমসুং মীয়ামগী থৌগলগীদমক শীজিন্ননবা অমসুং মীয়ামগীদমক লৌখৎপা য়াবা খোঙথাং পুম্নমক লৌখৎনবা ৱাফম থমখি। ওপোজিসনগী থৌদাংগী মতাঙদা পল্লদুনা, পি.এম. মোদীনা, লৈববাক মীয়াম্না দিমোক্রেসীগী মায় ঙাক্তুনা মখোয়গী থৌদাং মপুং ফানা তৌননবা থাজবা থম্লি হায়খি। “ওপোজিসন্না মদুমক তৌরক্কনি হায়না ঐনা থাজৈ,” হায়না মহাক্না মখা তাখি। মীয়াম্না খোল্লাউগী মহুত্তা থবক ওইনা উবা পাম্মি হায়রদুনা এম.পি.শিংনা মীচম মীয়ামগী হায়রিবা থাজবশিংসি থবক্তা ওন্থোক্নবা হোৎনরক্কনি হায়না শ্রী মোদীনা থাজবা ফোঙদোকখি।
প্রধান মন্ত্রীনা চাওখৎপা ভারত অমগী পান্দম পুন্না হোৎনমিন্নদুনা ফংহনমিন্নবদা অমসুং মীয়ামগী থাজবা হেনগৎহনবদা লৈরিবা পার্লিয়ামেন্তকী মেম্বর পুম্নমক্কী থৌদাং ফোঙদোকখি। লৈবাক্কী মীওই করোর ২৫না লায়রবগী পনখৈনুংদগী থোরকখিবসিনা ভারতনা মায় পাকপা অমসুং অথুবা মতমদা লায়রবা মুত্থৎপা ঙমগনি হায়বগী অনৌবা থাজবা অমা পুরক্লে হায়না মহাক্না হায়খি। “ঐখোয়গী লৈবাক্কী মীয়াম্না, মীওই করোর ১৪০না, কন্না হোৎনবদা নিংহন্নদে। ঐখোয়না মখোয়দা খুদোংচাবা মশিং য়াম্না ফংহনবা তাই,” হায়বা ৱাফম প্রধান মন্ত্রীনা থমখি। হাঊস অসি ফিরেপ কয়াগী হাউস অমা ওইরক্কনি অমসুং ১৮শুবা লোক সভা অসিনা মীচম মীয়ামগী মঙলান মঙফাওনহনগনি হায়না মহাক্না হায়খি। পার্লিয়ামেন্তকী মেম্বরশিংগী মফমদা নুংঙাইবা ফোঙদোক্লদুনা অমদি মখোয়গী মফমদা মখোয়গী অনৌবা থৌদাংশিং মপুং ফানা কত্থোকপগা লোয়ননা পাঙথোক্নবা ৱাফম থম্বগা লোয়ননা প্রধান মন্ত্রীনা মহাক্কী ৱারোল লোইশিনখি।
