প্রধান মন্ত্রী শ্রী নরেন্দ্র মোদীনা ঙসি ৭ লোক কল্যান মার্গতা লৈবা মহাক্কী য়ুমদা সিখ মীহুৎশিংগা উন্নখ্রে।
দিল্লীগী গুরুদ্বারা শ্রী বালা সাহিব জীনা প্রধান মন্ত্রীগী মপোক কুমওন পালন তৌনবা ‘অখন্দ পাথ’ অমা পাঙথোকখি। ‘অখন্দ পাথ’ অসি সেপ্তেম্বর ১৫দা হৌখি অমসুং প্রধান মন্ত্রীগী মপোক নুমিৎ, সেপ্তেম্বর ১৭তা লোইশিনখি। সিখ মীহুৎশিং অদুনা প্রধান মন্ত্রীগী মনাক্তা লাকখি অমসুং গুরুদ্বারাগী প্রসাদ অমসুং থৌজালশিং পীখি।
মীফম অদুদা সিখ মীহুৎশিংনা প্রধান মন্ত্রীদা পগদী য়েৎপীদুনা অমসুং সিরোপা য়ানবীদুনা ইকাই খুম্নখি। প্রধান মন্ত্রীগী পুন্সি শাংনবা অমসুং মশা-মউ ফনা লৈনবগীদমক অরদাসসু পাঙথোকখি। সিখ ফুরুপপু ইকাই খুম্ননবা অমসুং য়াইফনবগীদমক প্রধান মন্ত্রীনা লৌখৎখিবা অনৌবা থৌশিলশিংগীদমক মীহুৎশিংনা থাগৎপা ফোঙদোকখি। দিসেম্বর ২৬পু “বীর বাল দিবস” হায়না লাউথোকখিবা, কর্তারপুর সাহিব কোরিদোর হাংদোকখিবা, গুরুদ্বারাশিংনা চল্লাইবা লঙ্গরশিংদা জি.এস.তি. লৌথোকখিবা, অফঘানিস্তানদগী গুরু গ্রান্থ সাহিবকী কোপীশিং ভারত্তা পুরকখিবা য়াওনা প্রধান মন্ত্রীনা পাইখৎখিবা খোঙথাং কয়ামরুমগী মতাংদা নীংশিংখি।
সিখ মীহুৎশিং অদুদা ওল ইন্দিয়া কেন্দ্রিয়া গুরু সিংহ সভাগী প্রসিদেন্ত শ্রী তরবিন্দর সিংহ মারৱাহ; ওল ইন্দিয়া কেন্দ্রিয়া গুরু সিংহ সভাগী ৱার্কিং প্রসিদেন্ত শ্রী বীর সিংহ; কেন্দ্রিয়া গুরু সিংহ সভাগী দিল্লীগী মকোক শ্রী নবীন সিংহ ভন্দারী; তিলক নাগরগী গুরুদ্বারা সিংহ সভাগী প্রসিদেন্ত শ্রী হরবন্স সিংহ; অমসুং গুরুদ্বারা সিংহ সভাগী হেদ গ্রন্থী শ্রী রাজিন্দর সিংহ য়াওখি।
