ঙসি প্রধান মন্ত্রী নরেন্দ্র মোদীনা ভুতানগী রাস্ত্রপতি দোক্তর দ্রুক য়ামরূপ সোগপাগা তেলিফোন্দা ৱারী শানখ্রে। ভুতানগী অহুমসুবা জেনরেল ইলেক্সন অমসুং মহাক মশাগী নেসনেল এসেমব্লীগী মীখলদা মহাক্কী দলনা মাইপাকপদা প্রধান মন্ত্রী মোদীনা দোক্তর লোতে সেরিংবু থাগৎপা ফোংদোকখি। ভুতানদা গনতন্ত্র মাইপাকহন্নবা জেনরেল ইলেক্সন মাইপাক্না পাংথোকপদা প্রধান মন্ত্রী মোদীনা তরাম্না ওকখি।
নাকল অনিগী অপাম্বশিং, থাজবা অমসুং অমনা অমবু মশক খঙনবদা য়ুমফম ওইদুনা ভুতানগা লৈনরিবা অখন্নবা মরূপ-মপাং ওইবগী মরি অসি মখা তানা কনখৎহন্নবা প্রধান মন্ত্রী মোদীনা ভারতকী মাইকৈদগী মরুওইবা অদু থমখি।
লৈবাক অনিগী মরক্তা দিপ্লোমেতিক্কী মরি লৈনবা হৌখিবগী হৌজিক চৎথরিবা গোল্দন জু্বলী থৌরম অসি নীংশিংলদুনা প্রধান মন্ত্রী মোদীনা ভুতানগী অনৌবা সরকার অসিনা ভুতানগী মীয়ামগী য়াইফনবা অমসুং লৈবাক্কী শেন-থুমগী ফিবম ফগৎনবা থবক পায়খৎলকপদা ভারতনা পাংবা য়াবা মতেং পাংগনি হায়না থাজবা পীখি। প্রধান মন্ত্রী মোদীনা দোক্তর লোতে সেরিং ভারত্তা লাক্নবা চেবাউ পীখি।
মহাক্কী য়াউফ-পাউজেল পীরকপগীদমক দোক্তর লোতে সেরিংনা প্রধান মন্ত্রী মোদী থাগৎখি অমসুং ভারত্তা লাক্নবা চেবাউ পীরকখিবা অদু মহাক্না য়াখি। ভুতান অমসুং ভারতকী মীয়ামগী য়াইফনবা লৈবাক অনিগী মরক্তা লৈনরিবা অখন্নবা মরি অসি নৌনা অমুক অৱাংবা থাক অমদা পুখৎনবা লুচীংবা অনিনা য়ানখি।
