প্রধান মন্ত্রী শ্রী নরেন্দ্র মোদীনা বিগ্যান ভাবন নৈ দিল্লীদা ওক্তোবর ১৭গী অয়ুক পুং ১০ তারকপদা ইন্তর্নেসনেল অভিধম্মা দিবস পালন অমসুং পালিবু ক্লাসিকেল লোল ওইনা শকখঙবীবদা শরুক য়াগনি। মহাক্না থৌরম অসিগী তিনগদবা মীয়ামদসু ৱা ঙাংগনি।
অভিধম্মা দিবসনা প্রভু বুদ্ধবু অভিধম্মা তাক্লবা মতুংদা লাইরৈবাক্তগী লাকপবু নীংশিংদুনা পালন তৌরি। হন্দক্তা পালি অমসুং অতোপ্পা লোল মরিবু ক্লাসিকেল লোল অমা ওইনা শকখঙবীরম্বা অসিনা চহি অসিগী অভিধম্মা দিবস পালন্দা হেন্না মশক থোকহল্লে, মরমদি প্রভু বুদ্ধগী অভিধম্মা তাকপীরম্বা অসি পালি লোলদা ফংলি।
ভারত সরকার অমসুং ইন্তর্নেসনেল বুদ্ধিস্ত কনফিদরেসন্না পাঙথোকপা ইন্তর্নেসনেল অভিধম্মা দিবস পালন অসিদা লৈবাক ১৪ দগী একাদেমিসিয়ন অমসুং মঙ্কশিংনা শরুক য়াগনি অমসুং ভারতকী তোঙান-তোঙানবা য়ুনিভর্সিতীশিংদগী নহা ওইরিবা বুদ্ধ ধম্মদা খঙ হৈরবা কয়াসু শরুক য়াগনি।
