ৱর্ল্দ এনভাইরনমেন্ত দেগী থৌরমদা, প্রধান মন্ত্রী শ্রী নরেন্দ্র মোদীনা জুন ৫গী অয়ুক পুং ১১ তাবা মতমদা ভিজ্ঞান ভবনদা পাঙথোক্কদবা ‘সেভ সোইল মুভমেন্ত’ থৌরমদা শরুক য়াগদৌরি। প্রধান মন্ত্রীনা থৌরম অদুদা শরুক য়ারিবশিংগী মফমদসু ৱা ঙাঙগনি।
‘সেভ সোইল মুভমেন্ত’ অসি মাঙথরক্লিবা লৈহাউগী ফীভমগী মরমদা পাক শন্না খঙবা হেনগৎহন্নবা অমদি ফীভম ফগৎহন্নবা মওং চুমবা থৌওং পায়খৎনবা মালেমগী ওইবা ইহৌ অমনি। ইহৌ অসি মার্চ ২০২২দা সাধগুরুনা লৈবাক ২৭ ফাওদুনা নুমিৎ ১০০গী ওইবা মোতোরসাইকলগী খোঙচৎ অমগীদমক খোঙশাল্লদুনা হৌদোকখিবনি। জুন ৫ অসি হায়রিবা নুমিৎ ১০০গী খোঙচৎ অসিগী ৭৫শুবা নুমিৎনি। প্রধান মন্ত্রীনা থৌরমসিদা শরুক য়াগদৌরিবা অসিনা ভারতকী লৈহাউগী ফীভম ফগৎহন্নবা ফিরেপ অসিগী মমি তাগনি।
